Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  November 2015

 KAVA SUBJECT | WANEM KAEN PIPOL NAO OLKETA JEHOVAH’S WITNESS?

Tru Samting Abaotem Olketa Jehovah’s Witness

Tru Samting Abaotem Olketa Jehovah’s Witness

Olketa Jehovah’s Witness stap long staka difren kantri long world and mifala no part long eni nara religion. Hedquarter bilong mifala hem long America bat long winim 230 kantri, * samting olsem eit million Jehovah’s Witness teachim Bible long pipol. Mifala duim olsem bikos Jesus hem sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem.”—Matthew 24:14.

Nomata wanem kantri mifala stap, mifala obeyim olketa law bilong datfala kantri. Bat mifala no join insaed politik or war bikos mifala followim wanem Jesus talem for olketa Christian for “no olsem pipol long world.” (John 15:19; 17:16) Olsem example, long World War II, olketa putim samfala Jehovah’s Witness long prison, whipim olketa nogud, and killim dae samfala bikos olketa no laek for sapotim datfala war. Wanfala bigman bilong religion long Germany hem sei: “Olketa Jehovah’s Witness nao olketa main wan wea no joinim army bilong Germany long datfala taem.”

“[Olketa Jehovah’s Witness] olketa gudfala pipol. Bae hem gud sapos olketa insaed long gavman, bat hard for datwan hem happen. . . . Olketa stap anda long gavman bat olketa bilivim Kingdom bilong God nomoa savve stretem evri problem bilong olketa man.”—Nová Svoboda newspaper, Czech Republic.

Nomata olsem, long staka wei, mifala semsem olsem olketa nara pipol. Jesus prea abaotem olketa disaepol bilong hem: “Mi no askem iu for tekem olketa from disfala world.” (John 17:15) Dastawe iu bae lukim mifala Jehovah’s Witness waka for selen, go long skul, go long market and long stoa, olsem olketa nara pipol.

^ par. 3 1,856 Jehovah’s Witness stap long Solomon Islands.