Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  November 2015

 BIBLE CHANGEM LAEF BILONG PIPOL

Distaem Nao Mi Fit for Helpem Olketa Narawan

Distaem Nao Mi Fit for Helpem Olketa Narawan
  • YEAR HEM BORN: 1981

  • KANTRI HEM KAM FROM: GUATEMALA

  • HISTORY: KASEM STAKA NOGUD SAMTING TAEM HEM PIKININI

LAEF BILONG MI BIFOR:

Mi born long Acul, wanfala smol taon wea stap long olketa maunten long west saed bilong Guatemala. Famili bilong mifala kam from laen bilong olketa Mayan pipol, and nem bilong tribe bilong mifala hem Ixil. Mi savve story long Spanish languis and languis bilong mifala. Taem mi born, ethnic tension hem gohed long Guatemala. Long datfala taem army killim dae staka pipol bilong Ixil.

Taem mi fofala year, brata bilong mi, wea seven year, plei witim wanfala bomb wea hem faendem. Seknomoa datfala bomb hem bosta. Mi sorre tumas bikos datwan killim dae brata bilong mi, and mi kamap blind nao. Bihaen datwan, olketa sendem mi long wanfala skul for olketa blind pipol wea stap long Guatemala City, and mi lanem Braille long there. Olketa teacher no kaen long mi and olketa stopem mi for no story witim olketa nara pikinini. Mi lonely tumas and mi luk forward nomoa for tufala month evri year wea mi savve go lukim mami bilong mi wea barava kaen long mi. Taem mi tenfala year, mami bilong mi hem dae. Mi sorre tumas bikos no eniwan moa bae lovem mi olsem mami bilong mi.

Taem mi 11 year, mi go stap witim haf brata bilong mi and famili bilong hem. Olketa givim mi kaikai and kaleko, bat olketa no barava lovem mi. Samfala taem, mi barava askem God: “Why nao mami bilong mi hem dae? Why nao mi blind?” Samfala talem mi olketa samting wea kasem mi hem will bilong God. So mi tingse God no tingim mi and hem no kaen. Mi laek dae nomoa.

From mi blind, pipol savve duim olketa nogud samting long mi. Taem mi young, samfala man rapem mi. Mi no talem olketa police bikos mi tingse olketa bae no duim eni samting. Pipol no laek story witim mi, and mi fraet for story witim olketa tu. Mi no garem eni fren and mi no trustim eniwan. Datwan mekem mi sorre tumas.

BIBLE CHANGEM LAEF BILONG MI:

Taem mi 13 year, wanfala teacher long skul bilong mi talem wanfala hasband and waef wea Jehovah’s Witness for kam story witim mi. Datfala teacher hem duim datwan bikos hem sorre long mi. Tufala storyim hao  Bible hem sei long future olketa wea dae bae laef bak and olketa wea blind bae lukluk moa. (Isaiah 35:5; John 5:28, 29) Mi barava laekem wanem tufala storyim, bat mi faendem hem no isi for story witim tufala bikos mi no getius for story witim pipol. Nomata olsem, tufala kaen and patient and gohed for teachim Bible long mi. Tufala hia mas wakabaot for 10 km and go ap and daon long wanfala maunten for kasem ples wea mi stap.

Haf brata bilong mi talem mi tufala hia evritaem werem olketa gudfala kaleko bat luk olsem tufala no garem staka samting. Nomata olsem, tufala savve tekem kam olketa smol samting for mi taem olketa kam, and tufala barava kaen long mi. Long tingting bilong mi, wei bilong tufala hia showimaot tufala tru Christian.

Mi iusim olketa Braille pablikeson for studyim Bible. Mi minim olketa samting wea mi lanem, bat mi tingse God no lovem mi and hard for olketa narawan lovem mi tu. Mi minim why Jehovah letem olketa nogud samting for gohed for lelebet taem, bat hem no isi for mi tingim hem olsem Dadi wea lovem mi. *

Isisi wanem mi lanem long Bible helpem mi for changem tingting bilong mi abaotem datwan. Olsem example, mi lanem hao God hem barava sorre long olketa wea safa, olsem long datfala taem wea hem lukim pipol bilong hem kasem hard taem long Egypt. (Exodus 3:7) Gogo, mi luksavve Jehovah hem lovem mi, and datwan mekem mi laek for iusim laef bilong mi for worshipim hem. Long 1998, mi baptaes and kamap wanfala Jehovah’s Witness.

Mi and datfala brata wea mi stap witim famili bilong hem

Wanfala elder luksavve hem no isi for mi go long olketa meeting, bikos for kasem ples for meeting mi mas go ap and daon long sem maunten wea tufala wea studyim Bible witim mi savve followim for kam long mi. Samting olsem wan year bihaen mi baptaes, mi go attendim wanfala course for olketa wea blind long Escuintla, wanfala big taon. So datfala elder mekem arrangement for mi stap witim wanfala Witness famili long Escuintla wea willing for lukaftarem mi and for helpem mi go long olketa meeting. Kam kasem distaem, olketa gohed for lukaftarem mi, olsem mi wanfala pikinini bilong olketa.

Staka gud samting nao olketa long kongregeson duim for mi wea showimaot olketa lovem mi. Olketa samting hia mekem mi barava sure Olketa Jehovah’s Witness olketa tru Christian.—John 13:34, 35.

GUD SAMTING WEA MI KASEM:

Distaem mi no sorre olowe and mi garem olketa fren wea lovem mi. Mi iusim laef bilong mi for helpem olketa narawan long wei for duim preaching waka full-taem. From mi teachim Bible long pipol, datwan helpem mi for no tingim olketa problem bilong mi. Mi kasem privilege for kamap elder and mi savve givim olketa Bible tok long kongregeson. And tu, mi kasem privilege for givim olketa Bible tok long olketa regional convention, wea staka thousand pipol savve attend.

Mi iusim Braille Bible taem mi givim tok

Long 2010, mi attendim Ministerial Training Skul (wea distaem olketa kolem long Skul for Olketa Kingdom Pablisa) wea kamap long El Salvador. Wanem mi lanem long datfala skul helpem mi for duim gud waka bilong mi long kongregeson. Datfala training hem helpem mi for luksavve Jehovah lovem mi and hem savve helpem eniwan for duim waka bilong hem.

Jesus sei: “Man wea givim samting hem barava hapi winim man wea kasem samting.” (Acts 20:35) Tru nao, olketa samting wea mi duim distaem mekem mi barava hapi. And mi hapi tu bikos distaem nao mi fit for helpem olketa narawan.

^ par. 13 For savve moa abaotem why God letem olketa nogud samting gohed, lukim chapter 11 long datfala buk Wanem Nao Really Samting wea Bible Teachim? wea Olketa Jehovah’s Witness pablisim.