Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  November 2015

Waswe, Iumi Fit for Savve Long God?

Waswe, Iumi Fit for Savve Long God?

“Hard for eniwan savve long God.” —Philo of Alexandria, wanfala wise man long first century.

“Hem no hard nomoa for savve long [God].” —Saul from Tarsus, wea story long olketa wise man long Athens.

TAEM iu readim wanem tufala man hia talem, hu nao iu agree witim? Staka pipol tinghae long wanem Paul talem bikos olketa laek for savve long God. (Acts 17:26, 27) And olketa nara scripture long Bible storyim hao hem no hard for iumi savve long God. Olsem example, wanem Jesus talem long prea bilong hem showimaot olketa wea followim hem fit for savve long God and bae olketa kasem blessing from Hem.—John 17:3.

Bat olketa wise man, olsem Philo, no agree witim wanem Paul talem. Olketa man hia sei hem hard for eniwan savve long God. Hu nao talem tru samting?

Hem tru, Bible storyim samfala samting abaotem God wea no isi for iumi minim. Olsem example, hem no isi for minim wei wea God no garem start and bae hem no finis. And tu, bae iumi no savve long evri samting wea hem savve. Nomata olsem, datwan no minim bae hem hard nao for iumi savve long God. Sapos iumi ting raonem olketa samting wea Bible talem iumi abaotem hem, datwan bae helpem iumi for “fren gud witim God.” (James 4:8) Firstaem, bae iumi storyim samfala samting abaotem God wea hem no isi for minim. And then bae iumi storyim samfala samting wea iumi fit for minim.

 Olketa Samting Abaotem God wea Hem No Isi for Minim

GOD NO GAREM START AND BAE HEM NO FINIS: Bible hem sei: “from taem olowe go kasem taem olowe iu nao God.” (Psalm 90:2) Datwan hem minim God no garem start and bae hem no finis. For iumi olketa man, “datwan hem no isi for iumi minim.”—Job 36:26.

Hao nao diswan savve helpem iumi? Bible sei iumi bae kasem laef olowe sapos iumi lane abaotem God. (John 17:3) Bae hem hard for iumi trustim wei wea iumi savve kasem laef olowe sapos God hem savve dae. Bat from God hem “King for olowe,” iumi savve hem fit for mekem datfala promis kamap tru.—1 Timothy 1:17.

TINGTING BILONG GOD: Bible hem sei tingting bilong God hem hae winim tingting bilong iumi man. (Isaiah 40:28; 55:9) Dastawe Bible hem sei: “No eniwan hem savve long tingting bilong Jehovah mekem hem savve teachim hem.”—1 Corinth 2:16.

Hao nao diswan savve helpem iumi? From tingting bilong God hem hae winim tingting bilong iumi, hem fit for herem staka million prea long semtaem. (Psalm 65:2) And tu, hem savve taem wanfala smol bird hem dae, so from ‘iumi important winim staka smol bird,’ datwan showimaot God laek for herem olketa prea bilong iumi.—Matthew 10:29, 31.

OLKETA SAMTING WEA GOD DUIM: Bible hem sei olketa man “no savve minim evri samting wea God duim.” (Ecclesiastes 3:11) So bae iumi no savve long evri samting abaotem God. “Hem hard for iumi barava minim” wisdom and savve bilong God. (Rome 11:33) Bat God no haedem olketa samting wea hem duim from olketa wea worshipim hem.—Amos 3:7.

Hem no isi for minim wei wea God no garem start and bae hem no finis, and bae iumi no savve long evri samting wea hem savve

Hao nao diswan savve helpem iumi? Sapos iumi readim and studyim Bible, iumi bae gohed for lanem staka niu samting abaotem God and olketa samting wea hem duim. Datwan bae helpem iumi for fren gud witim Dadi bilong iumi long heven for olowe.

Olketa Samting Abaotem God wea Iumi Fit for Minim

Nomata hem no isi for minim samfala samting abaotem God, datwan no minim iumi no fit for savve long hem. Bible hem storyim staka samting wea savve helpem iumi for savve gud long God. Bae iumi storyim samfala example:

NEM BILONG GOD: Long Bible, God talem iumi nem bilong hem. Hem sei: “Mi nao Jehovah. Hem nao nem bilong mi.” Datfala nem hem stap insaed long Bible samting olsem 7,000 taem.—Isaiah 42:8.

Hao nao diswan savve helpem iumi? Long datfala Lord’s Prea, Jesus prea olsem: Dadi bilong mifala long heven, mifala laekem nem bilong iu for holy.” (Matthew 6:9) Hem gud for iusim datfala nem taem iu prea. Jehovah bae sevem olketa wea mekhae long nem bilong hem.—Rome 10:13.

PLES WEA GOD HEM STAP: Bible storyim heven and earth. Pipol stap long earth, and olketa wea garem spirit body stap long heven. (John 8:23; 1 Corinth 15:44) God hem stap long “heven.”—1 Kings 8:43.

Hao nao diswan savve helpem iumi? Diswan helpem iumi for minim God. Hem no stap long evri ples and hem no stap long heart bilong pipol.  Jehovah hem stap long heven. Nomata olsem God savve ‘lukim evri samting’ wea hem wakem.—Hebrew 4:13.

OLKETA WEI BILONG HEM: Bible storyim hao God garem olketa gudfala wei. Bible hem sei: “God hem love.” (1 John 4:8) Hem no savve laea. (Titus 1:2) Hem no favorim eniwan, hem showimaot mercy, hem kaen, and hem no savve kros kwiktaem. (Exodus 34:6; Acts 10:34) Staka pipol no savve God laek for fren witim olketa wea tinghae long hem.—Psalm 25:14.

Hao nao diswan savve helpem iumi? Iu savve fren witim Jehovah. (James 2:23) Then, taem iu start for savve long olketa wei bilong hem, datwan bae helpem iu for minim olketa nara samting wea Bible storyim.

“LUKAOTEM HEM”

Bible storyim staka samting abaotem Jehovah God. Iumi fit for savve long God, and hem laekem iumi for savve long hem. Bible hem sei: “Sapos iu lukaotem hem, bae iu faendem hem.” (1 Chronicles 28:9) Sapos iu readim Bible and ting raonem wanem iu lanem, datwan bae helpem iu for savve long God. Taem iu duim olsem, Bible sei God ‘bae fren gud witim iu.’—James 4:8.

Sapos iumi readim and studyim Bible, iumi bae gohed for lanem staka niu samting abaotem God and wanem hem duim

Maet iu tingse hem hard for iu fren witim God bikos hem no isi for minim olketa samting abaotem hem. Tingim diswan: Sapos best fren bilong wanfala man hem wanfala doctor, waswe, datwan minim datfala man mas wanfala doctor tu, mekem tufala fren gud? Nomoa! Maet datfala man hem garem difren waka. Nomata olsem, tufala savve fren gud. Main samting nao, datfala man mas savve long olketa wei bilong datfala doctor, wanem hem laekem, and wanem hem no laekem. Olsem tu, iumi savve lane abaotem olketa wei bilong Jehovah long Bible. Datwan bae helpem iumi for fren gud witim hem.

Bible storyim staka samting abaotem God for helpem iumi savve long hem. Waswe, iu laek for savve moa abaotem Jehovah God? Olketa Jehovah’s Witness willing for duim free Bible study witim pipol. Iu savve story witim eni Witness, or go long Website bilong mifala, www.jw.org.