Skip to content

Skip to secondary menu

Olketa Jehovah’s Witness

Solomon Islands Pidgin

Wastaoa  |  January 2014

 WANEM NAO BAE MEKEM FAMILI STAP GUD?

Story Witim Teenage Pikinini Bilong Iu and No Argue

Story Witim Teenage Pikinini Bilong Iu and No Argue

“Taem dota bilong mi 14 year, hem start for no herem toktok bilong mi. Sapos mi sei long hem, ‘Iumi kaikai nao,’ hem bae sei, ‘Mi no laek kaikai yet.’ Taem mi sei long hem, ‘Iu duim finis samting wea mi talem iu for duim?’ bae hem sei, ‘Iu askem for wat ia?’ Staka taem mitufala savve argue and singaot big long mitufala.”MAKI, JAPAN. *

Hem hard samting for iufala dadi and mami taem teenage pikinini bilong iu argue witim iu, and iu mas patient. Maria, wanfala mami long Brazil wea garem 14 year old gele, hem sei: “Taem dota bilong mi no duim wanem mi talem, datwan mekem mi kros tumas. Mitufala feel nogud tumas and singaot big long mitufala.” Carmela, wanfala woman long Italy wea feisim sem samting, hem sei: “Mitufala son bilong mi savve kros tumas evritaem mitufala argue, and gogo hem savve go satem hemseleva long rum bilong hem.”

Why nao samfala teenage pikinini savve laek argue tumas? Waswe, olketa fren bilong olketa nao mekem olketa olsem? Maet olsem. Bible sei olketa fren bilong man savve spoelem hem or helpem hem. (Proverbs 13:20; 1 Corinth 15:33) Nara samting tu, olketa TV program and movie wea olketa teenager laek for lukim, hem mekem olketa tingse hem olraet nomoa for no lisin long dadi and mami and for no respectim narawan.

Bat olketa nara samting savve affectim wei bilong pikinini. Taem iu minim datwan then bae iu savve wanem for duim. Bae iumi storyim samfala example.

WEI WEA TEENAGER “TING RAONEM SAMTING”

Aposol Paul sei: “Taem mi pikinini, toktok bilong mi, tingting bilong mi, and wei wea mi ting raonem samting hem olsem bilong pikinini nomoa. Bat from mi big finis, mi lusim olketa wei bilong pikinini nao.” (1 Corinth 13:11) Disfala toktok bilong Paul showimaot pikinini and olketa big  man garem difren wei for ting raonem samting. Long wanem wei?

Taem big man mas disaedem samting hem luksavve hem mas ting raonem staka samting. Bat taem pikinini mas disaedem samting, maet hem no savve hao for ting raonem evri samting. Olsem example, olketa wea big finis savve lukluk long olketa difren saed long samting and ting raonem sapos samting wea olketa duim bae affectim narawan. Datwan savve kamap wei bilong olketa. Bat olketa teenager lane yet for ting raonem samting.

Bible encouragem olketa young wan for ting raonem samting. (Proverbs 1:4) Bible talem tu evri Christian mas iusim “gudfala tingting.” (Rome 12:1, 2; Hebrew 5:14) Samfala taem, pikinini bilong iu bae argue abaotem smol samting nomoa maet bikos hem no ting raonem evri samting. Or hem maet talem samting wea barava showimaot tingting bilong hem no stret. (Proverbs 14:12) Long taem olsem, hao nao iu savve story gud witim hem mekem iutufala no argue?

TRAEM DISWAN: From teenage pikinini hem lane yet for ting raonem samting, maet hem no strong tumas long idea bilong hemseleva. Firstaem showimaot iu tinghae long wei wea hem talem tingting bilong hem. Iu savve sei: “Mi minim why iu garem tingting olsem, nomata mi no agree witim evri samting wea iu talem.” Then, for helpem hem ting raonem idea bilong hem, iu savve sei: “Waswe, iu tingse wanem iu just talem hem fitim evri samting wea bae kamap?” Maet iu sapraes for lukim hem ting raonem idea wea hem garem and then changem tingting bilong hem.

Samting for tingim: Taem iu helpem teenage pikinini bilong iu for ting raonem samting, no forcem pikinini for agree witim iu. Nomata luk olsem pikinini no agree witim iu, hem herem wanem iu talem and maet bihaen bae hem ting raonem datwan. No sapraes sapos tu-thri day bihaen, pikinini changem tingting bilong hem and talem iu hem nao wanem hem tingim firstaem.

“Samfala taem mi and son bilong mi savve argue abaotem olketa smol samting nomoa. Olsem example, mi savve talem hem for no weistim samting or for no mekem smol sista bilong hem kros. Bat staka taem luk olsem hem laekem mi for askem hem why hem duim wanfala samting. Hem laekem mi for minim hem and for talem samting olsem: ‘So hem nao why iu duim datwan?’ or ‘So hem nao tingting bilong iu?’ Taem mi ting go bak long datwan, mi tingim sapos mi story olsem long hem, maet mitufala no argue staka taem.”—Kenji, Japan.

WEI WEA TEENAGER DISAEDEM SAMTING

Hem gud for parents helpem pikinini for feel free for talemaot tingting bilong hem

Wanfala main samting wea dadi and mami laek for duim hem for trainim pikinini mekem hem fit for lukaftarem hemseleva taem hem big. (Genesis 2:24) Datfala training helpem pikinini for disaedem wanem bae hem bilivim and wanem kaen wei nao bae hem garem. Taem teenage pikinini wea disaedem diswan finis kasem temptation for duim samting wea no stret, bae hem no ting raonem nomoa nogud samting wea bae kamaot from datwan. Bae hem tingim tu: ‘Hao nao wei bilong mi? Waswe, diswan hem stret samting for duim? Wanem nao narawan wea garem sem tingting olsem mi bae duim taem samting olsem happen?’2 Peter 3:11.

Bible story abaotem Joseph, wanfala young wan wea disaedem finis hem laek for duim stret samting. Olsem example, taem waef bilong Potiphar laek for durong witim hem, Joseph sei: “Hem hard tumas for mi duim disfala barava nogud samting and sin againstim God!” (Genesis 39:9) Nomata olketa Israelite no kasem yet law abaotem adultery, Joseph luksavve long tingting bilong God abaotem datwan. And tu, taem hem sei, “hem hard tumas,” datwan showimaot hem agree witim tingting bilong God and hem disaed finis for duim wanem God laekem.Ephesus 5:1.

Teenage pikinini bilong iu tu start for disaedem wanem hem laek for duim. Hem gud for hem duim olsem bikos datwan bae helpem hem for deal witim hevi wea hem kasem from olketa nara young wan and no duim wanem olketa laekem. (Proverbs 1:10-15) Bat wei wea hem disaedem wanem hem laek for duim savve mekem hem no agree tu witim wanem iu talem. Sapos datwan happen, wanem nao iu savve duim?

TRAEM DISWAN: Bae hem gud for no argue witim pikinini, bat iu savve askem hem for talem moa wanem nao hem laekem. Then iu savve askem hem: “Why nao iu laek for duim olsem?” Encouragem hem for story and talemaot tingting bilong hem. Sapos iu and pikinini bilong iu garem difren tingting abaotem samting and datfala samting wea hem laekem hem  no rong, iu savve letem hem for duim datwan nomata iu no barava agree witim hem.

Wei wea teenage pikinini start for disaedem wanem hem laekem, hem normal samting and hem gud samting tu. Dastawe, Bible sei olketa Christian mas no olsem olketa pikinini wea “followim enikaen teaching . . . olsem wanfala boat long sea wea wind and olketa wave pushim hem olobaot.” (Ephesus 4:14) So encouragem teenage pikinini bilong iu for disaedem samting wea stret and for sure long datwan.

“Taem mi lisin gud long olketa dota bilong mi, olketa willing for lisin long tingting bilong mi nomata hem difren from tingting bilong olketa. Mi mas trae for no forcem olketa for followim tingting bilong mi bat for letem olketa trae for mek sure wanem olketa disaedem hem stret.”—Ivana, Czech Republic.

STRONG LONG WANEM IU DISAEDEM BAT NO OVA TUMAS

Samfala teenage pikinini olketa olsem smol pikinini wea askem samting olowe long dadi and mami mekem tufala letem olketa for duim samting wea olketa laekem. Iu mas tingting gud sapos datwan hem happen evritaem long famili bilong iu. Sapos iu letem pikinini duim wanem hem laekem maet datwan stopem wei for raoa, bat hem bae mekem pikinini tingse wei for argue savve mekem hem kasem wanem hem laekem. So wanem nao iu savve duim? Followim disfala advaes bilong Jesus: “Sapos iu sei iu bae duim samting, iu mas duim datwan. Sapos iu sei iu bae no duim samting, then no duim datwan.” (Matthew 5:37) Taem teenage pikinini lukim iu evritaem duim wanem iu sei bae iu duim bae hem no laek for argue.

Bat taem iu duim olsem hem gud for iu no ova tumas. Olsem example, letem hem explainim why nao hem no savve kam bak long haos long taem wea iu markem. Datwan no minim iu changem samting wea iu talem finis bat iu showimaot iu followim disfala Bible principle: “Showimaot long evriwan, iufala no ova tumas.”Philippi 4:5.

TRAEM DISWAN: Story tugeta witim famili abaotem taem wea pikinini mas kam bak long haos long evening and olketa nara rul for famili followim. Hem gud for showimaot iu willing for lisin and ting raonem evri samting bifor iu savve disaed. Roberto, wanfala dadi long Brazil, hem sei: “Taem pikinini askem wanfala samting, olketa shud luksavve parents savve willing for letem olketa duim datwan sapos hem no brekem Bible principle.”

Iumi savve olketa parents no perfect. Bible sei: “Iumi evriwan savve sin staka taem.” (James 3:2) Sapos iu luksavve iu duim samting wea mekem iutufala argue, no hol bak for sei sorre long pikinini bilong iu. Taem iu duim olsem, datwan showimaot iu hambol and bae hem helpem pikinini for duim sem samting.

“Wantaem, mitufala son bilong mi argue, then taem kros bilong mi hem katdaon, mi sei sorre long hem from mi kros tumas. Datwan helpem hem for no kros tu and hem savve lisin long mi.”—Kenji, Japan.

^ par. 3 Long disfala article, mifala changem olketa nem.

TING RAONEM OLKETA KWESTIN HIA . . .

  • Waswe, mi duim eni samting wea mekem mitufala raoa?

  • Wanem nao samfala point long disfala article wea mi savve iusim wea bae helpem mi for minim teenage pikinini bilong mi?

  • Wanem nao mi savve duim mekem mi savve story witim pikinini bilong mi and mitufala no argue?