Skip to content

Skip to secondary menu

Olketa Jehovah’s Witness

Solomon Islands Pidgin

Wastaoa  |  March 2013

 WANEM NAO BAE MEKEM FAMILI STAP GUD?

Sapos Pikinini Bilong Iu Disable

Sapos Pikinini Bilong Iu Disable

CARLO: * “Angelo, son bilong mitufala garem sik Down syndrome. From Angelo sik, mitufala savve taed tumas, wari, and feel sorre. Hem hard waka for lukaftarem pikinini wea healthy bat for lukaftarem pikinini wea sik hem hard waka tumas. Samfala taem datwan mekem mitufala no savve stap gud.”

MIA: “Angelo no kwiktaem lane for duim samting wea isi nomoa, so mitufala mas patient witim hem. Taem mi barava taed, eni smol samting nomoa savve mekem mi kros long hasband bilong mi, Carlo. Samfala taem mitufala no agree long samting and raoa nao.”

Waswe, iu tingim yet day wea pikinini bilong iu born? Masbi iu laekem tumas for karem hem. Dadi and mami wea olsem Carlo and Mia hapi for garem pikinini bat taem doctor sei pikinini bilong olketa hem sik or disable, datwan mekem olketa wari.

Waswe, iu garem pikinini wea disable? Maet iu tingim hao nao iu savve deal witim datwan. Sapos olsem, no givap. Olketa dadi and mami wea olsem iu win for helpem pikinini bilong olketa. Tingim thrifala samting wea savve happen and hao Bible savve helpem iu.

SAMTING WEA MEKEM HEM NO ISI: HEM HARD FOR ACCEPTIM HAO PIKININI DISABLE.

Staka dadi and mami feel sorre tumas taem olketa savve pikinini bilong olketa sik. Juliana wanfala mami long Mexico sei: “Taem doctor sei boy bilong  mitufala, Santiago, garem sik cerebral palsy, mi seke fogud. Mi feel nogud tumas.” Nara dadi and mami maet feel olsem Villana, wanfala mami long Italy. Hem sei: “Mi laek for garem pikinini nomata woman wea age olsem mi savve bornem baby wea disable. So taem son bilong mi kasem problem bikos hem garem sik Down syndrome, mi blamem miseleva.”

Sapos iu feel olsem iu no wei nao or iu blamem iuseleva, hem normal nomoa for feel olsem. Hem no plan bilong God for olketa man sik. (Genesis 1:27, 28) Hem no creatim olketa dadi and mami for kwiktaem acceptim samting wea no normal. Hem normal nomoa for sorre tumas taem iu savve pikinini bilong iu hem disable. Hem bae tek longtaem lelebet for no feel olsem and for change followim samting wea happen long famili.

Waswe sapos iu sei iu nao mekem pikinini for disable? No eniwan barava savve hao famili laen, ples wea pikinini growap long hem, and olketa nara samting savve mekem hem for sik. Hem isi tu for blamem hasband or waef bilong iu. No duim olsem. Hem gud tumas sapos iutufala waka tugeta for lukaftarem pikinini.—Ecclesiastes 4:9, 10.

IDEA: Lane abaotem sik bilong pikinini. Bible sei: “Famili wea wise bae stap gud and wei for minim narawan savve strongim famili.”—Proverbs 24:3, New Century Version.

Iu savve askem doctor for helpem iu for savve gud long sik bilong pikinini and iu savve readim olketa buk wea talem tru samting abaotem datfala sik. Hem olsem iu lanem wanfala niu languis. Firstaem hem bae no isi, bat gogo bae iu savve long datfala languis.

Carlo and Mia wea iumi storyim finis askem doctor information abaotem sik bilong boy bilong tufala and tufala story witim pipol long organization wea savve gud long datfala sik. Tufala sei: “Datwan helpem mitufala for savve long olketa problem wea savve happen and samting wea pikinini wea garem Down syndrome savve duim. Mitufala lanem hao son bilong mitufala savve duim normal samting tu. Datwan mekem mitufala no sorre tumas.”

TRAEM DISWAN: Tingim samting wea pikinini savve duim. Duim samting wea evriwan long famili savve join insaed. Taem pikinini duim gud samting, praisem hem and showimaot iu hapi witim hem.

SAMTING WEA MEKEM HEM NO ISI: IU TAED TUMAS AND FEEL OLSEM NO ENIWAN MINIM IU.

Maet iu feel olsem evri strong bilong iu go nomoa for lukaftarem sik pikinini bilong iu. Jenney wanfala mami long New Zealand sei: “Son bilong mi garem sik spina bifida. Long olketa first tu-thri year wea hem sik, sapos mi trae for duim moa waka long haos, mi savve taed tumas and krae nao.”

Maet nara samting wea mekem hem no isi, hem olsem iu feel no eniwan minim iu. Son bilong Ben garem sik muscular dystrophy and Asperger’s syndrome. Ben sei: “Staka pipol bae no savve minim laef bilong mifala.” Maet iu laek tumas for story witim narawan, bat staka fren bilong iu garem olketa healthy pikinini. So iu no laek storyim feeling bilong iu long olketa.

IDEA: Askem narawan for helpem iu. Sapos eniwan laek helpem iu, letem hem for duim datwan. Juliana wea iumi storyim finis sei: “Samfala taem mi and hasband bilong mi shame for askem narawan for helpem mitufala.” Bat hem sei tu: “Mitufala luksavve mifala needim olketa narawan for helpem mitufala. Taem olketa helpem mitufala, hem olsem mitufala no karem hevi seleva.” Sapos wanfala fren or narawan long famili laekem pikinini for sidaon witim hem long eni hipap or long Christian meeting, letem hem for duim datwan. Bible sei: “Gudfala fren hem lovem iu olowe and hem olsem brata long taem wea iu kasem trabol.”—Proverbs 17:17.

Duim samting for mekem iu healthy. Staka taem ambulance mas refillim petrol mekem hem gohed tekem olketa sikman long hospital. Iu tu mas kaikai gud, exercise, and rest gud mekem iu strong for gohed lukaftarem pikinini bilong iu. Javier wea son bilong hem kripol sei: “Son bilong mi no savve wakabaot, so mi mas kaikai gud mekem mi savve karem hem. Mi nao leg bilong hem!”

Wanem nao iu savve duim mekem iu healthy? Samfala dadi and mami markem taem for wanfala lukaftarem pikinini. Taem tufala duim olsem, wanfala savve rest or duim nara samting. Hem no isi, bat iu mas disaedem wanem nao no important tumas for duim mekem iu savve iusim datfala taem for duim samting for mekem iu healthy. Mayuri,  wanfala mami long India sei: “Gogo bae iu getius long wanem iu duim and bae iu duim olsem nao.”

Story witim gud fren bilong iu. Olketa fren wea no garem sik pikinini savve comfortim iu. Iu savve prea tu long Jehovah God. Waswe, prea savve helpem iu? Yazmin garem tufala pikinini wea garem sik cystic fibrosis. Hem sei: “Samfala taem mi feel olsem hem tumas nao and hem olsem mi klosap dae nomoa.” Nomata olsem, hem sei: “Mi prea long Jehovah for helpem and strongim mi. Then mi feel olsem mi savve gohed moa.”—Psalm 145:18.

TRAEM DISWAN: Raetem daon wanem iu kaikaim, haomas exercise iu duim, and haomas hour nao iu sleep. Disaed for no duim samting wea no important tumas mekem iu savve iusim taem hia for duim samting for mekem iu healthy. Gohed changem schedule bilong iu.

SAMTING WEA MEKEM HEM NO ISI: IU LUKAFTAREM GUD SIK PIKININI WINIM OLKETA NARAWAN LONG FAMILI.

From wanfala pikinini sik, datwan changem wanem famili kaikaim, ples wea olketa savve go, and haomas taem dadi and mami iusim witim each pikinini. Maet datwan mekem olketa nara pikinini savve feel olsem dadi and mami no tingim olketa. Nara samting tu, from dadi and mami iusim staka taem for lukaftarem pikinini wea sik, datwan savve affectim marit bilong tufala. Lionel, wanfala dadi long Liberia sei: “Samfala taem waef bilong mi sei hem nomoa duim evri samting and mi no tingim son bilong mitufala. Mi feel olsem hem no respectim mi and samfala taem mi tok kros long hem.”

IDEA: Duim samting wea olketa pikinini interest long hem mekem olketa luksavve iu tingim olketa. Jenney wea iumi storyim finis sei: “Samfala taem mifala duim spesol samting for big son bilong mifala olsem for go lunch long ples for kaikai wea hem laekem tumas.”

Showimaot iu interest long evri pikinini bilong iu

For strongim marit bilong iu, hem gud for story and prea tugeta. Aseem, wanfala dadi long India sei: “Nomata samfala taem mi and waef taed fogud and feel nogud, mitufala markem taem for story and prea tugeta. Evri morning bifor olketa pikinini wekap, mitufala storyim wanfala verse long Bible.” Olketa nara hasband and waef story tugeta bifor olketa sleep. Taem hasband and waef story gud tugeta and barava askem God for helpem olketa long hard taem, datwan bae strongim marit bilong olketa. (Proverbs 15:22). Wanfala hasband and waef sei: “Taem mitufala kasem hard taem, mitufala barava duim samting tugeta and mitufala no savve forgetim datwan.”

TRAEM DISWAN: Praisem olketa pikinini for wanem olketa duim for helpem pikinini wea sik. Evritaem talem olketa and marit partner bilong iu, iu lovem and tinghae long olketa.

NO GIVAP

Bible sei klosap nao God bae finisim evri sik wea spoelem olketa young wan and olketa olo. (Revelation 21:3, 4) Long datfala taem, “no eniwan bae sei: ‘Mi sik.’” *Isaiah 33:24.

Nomata pikinini bilong iu disable, iu savve win for helpem hem. Carlo and Mia wea iumi storyim finis sei: “No feel nogud sapos staka samting no gohed olsem hao iu laekem. Trae for tingim nomoa olketa naes samting abaotem pikinini bilong iu.”

^ par. 3 Long disfala article, mifala changem olketa nem.

^ par. 29 For savve moa long wanem Bible talem abaotem perfect health long future, lukim chapter 3 long buk Wanem Nao Really Samting wea Bible Teachim? wea Olketa Jehovah’s Witness pablisim.

TINGIM DISWAN . . .

  • Wanem nao mi savve duim mekem mi no taed tumas, no sorre tumas, and gohed fren gud witim Jehovah?

  • Waswe, mi praisem olketa nara pikinini wea duim samting for help?