Skip to content

Skip to secondary menu

Olketa Jehovah’s Witness

Solomon Islands Pidgin

Wastaoa  |  April 2011

 WANEM NAO BAE MEKEM FAMILI STAP GUD?

Lanem Pikinini for Savve Long Samting wea Stret and No Stret

Lanem Pikinini for Savve Long Samting wea Stret and No Stret

Loida, * wanfala mami long Mexico sei: “Olketa givimaot olketa condom long skul, so olketa teenager tingse hem olraet nomoa for duim sex, sapos hem ‘sef’ sex.”

Nobuko, wanfala mami long Japan sei: “Mi askem boy bilong mi wanem nao hem bae duim sapos hem and gelfren bilong hem stap seleva. Hem sei, ‘Mi no savve.’”

TAEM boy or gele bilong iu smol, waswe, iu mekem haos bilong iu sef? Maet iu putim olketa samting olsem naef, glass, or botol long ples wea pikinini no savve kasem. Iu duim olsem mekem pikinini bilong iu stap sef.

Sapos teenager bilong iu hem savve stap sef olsem, datwan hem gud tumas! Bat distaem iu start for wari tumas and tingting olsem: ‘Waswe, boy bilong mi lukluk long olketa rabis piksa?’ ‘Waswe, dota bilong mi sendem rabis piksa abaotem hemseleva long nara mobile phone?’ And bigfala kwestin hem olsem, ‘Waswe, teenager bilong mi duim sex finis?’

No Kontrolem Teenager Long Evri Samting

Samfala parents laekem teenager for stap witim olketa evritaem, mekem olketa savve lukim and kontrolem evri samting wea pikinini duim. Gogo, parents luksavve diskaen wei for kontrolem evri samting wea teenager duim, hem mekem teenager haedem samting wea hem duim.

Tru tumas, wei for kontrolem pikinini long evri samting hem no waka. Jehovah God no iusim diskaen wei for mekem olketa wea hem wakem for obeyim hem, and parents shud no duim olsem tu. (Deuteronomy 30:19) So wanem nao iu savve duim for helpem olketa teenager bilong iu disaedem olketa stret samting?—Proverbs 27:11.

Gud samting wea iu savve duim hem for evritaem story witim olketa pikinini bilong iu start from taem olketa young. * (Proverbs 22:6) Then, taem olketa kamap teenager, gohed story witim olketa. From iu wanfala dadi or mami, iu shud kamap main wan for storyim stretfala information long olketa teenager bilong iu. Alicia, wanfala gele from Britain, sei olsem: “Staka pipol tingse mifala  olketa young wan laek for storyim sex witim olketa fren nomoa, bat datwan hem no tru. Mifala laek for storyim diswan witim parents bilong mifala. Mifala trustim wanem olketa talem.”

Important for Savve Long Samting wea Stret and No Stret

Taem olketa pikinini big, olketa need for minim moa samting abaotem sex winim wei for savve nomoa hao olketa born. Olketa tu shud “luksavve long wanem hem stret and wanem hem no stret.” (Hebrews 5:14) Olketa need for barava bilivim wanem Bible talem abaotem sex hem stret, and duim samting followim wanem olketa bilivim. Wanem nao iu savve duim for lanem teenager bilong iu saed long diswan?

Tingim wanem iu bilivim hem stret or no stret. Olsem example, maet iu barava bilivim hem no stret for tufala wea no marit for durong. (1 Thessalonians 4:3) Olketa pikinini bilong iu maet savve gud long tingting bilong iu abaotem diswan, and maet olketa baeheartim samfala scripture for sapotim wanem iu bilivim. Taem eniwan askem olketa, maet olketa stretawe talem hem no stret for tufala wea no marit for duim sex.

Bat olketa needim moa samting. Wanfala buk Sex Smart sei samfala young pipol maet sei olketa agree long wanem parents bilivim saed long sex. Datfala buk sei: “Olketa no barava sure long tingting bilong olketa seleva abaotem diswan. Taem olketa feisim problem wea olketa no expectim and mas disaed stretawe ‘wanem for duim,’ olketa konfius and kasem trabol.” Dastawe hem important for teenager savve long wanem hem stret and no stret. Wanem nao iu savve duim for helpem teenager bilong iu for savve long diswan?

Storyim klia wanem hem stret and no stret.

Waswe, iu bilivim hao sex hem for olketa wea marit nomoa? Then talem klia datwan evritaem long teenager bilong iu. Disfala buk Beyond the Big Talk, showimaot “olketa famili wea parents talem klia olketa no laekem teenager bilong olketa for duim sex, staka taem olketa teenager weit firstaem.”

Hem tru, olsem iumi storyim finis, for just talem nomoa wanem hem stret and no stret, hem no minim boy or gele bilong iu bae chus for followim datwan. Bat wei for talem klia wanem hem stret and no stret bae helpem pikinini for garem gudfala start long laef and olketa seleva savve gohed for followim diswan. Samfala research showimaot staka young pipol wea luk olsem firstaem olketa followim tingting bilong olketa seleva, gogo olketa followim samting wea parents lanem long olketa.

TRAEM DISWAN: Startim story witim pikinini long wei for storyim wanfala nius and talemaot tingting bilong iu long datwan. Example, sapos wanfala man rapem wanfala woman, maet iu sei: “Mi barava no laekem wei wea samfala man trae for spoelem olketa woman. Long tingting bilong iu, hao nao olketa garem kaen wei olsem?”

Teachim tru samting abaotem sex.

Hem tru, hem important for givim samfala warning abaotem sex long teenager bilong iu. (1 Corinthians 6:18; James 1:14, 15) Bat staka taem Bible storyim sex olsem wanfala present from God, and no evritaem wanfala trap from Satan. (Proverbs 5:18, 19; Song of Solomon 1:2) Wei for storyim nomoa olketa danger abaotem sex long olketa teenager, maet mekem olketa garem rong tingting wea no kam from Bible. Corrina, wanfala young woman long France sei: “Parents bilong mi storyim olowe wei for durong, and datwan mekem mi no garem stretfala tingting abaotem sex.”

Mek sure olketa pikinini minim tru samting abaotem sex. Nadia, wanfala mami long Mexico sei: “Samting wea mi laekem olketa teenager bilong mi for minim, hem hao sex hem naes and hem natural, and Jehovah God givim datwan for olketa man and woman enjoyim. Bat hem samting for tufala wea marit nomoa savve duim. Sex savve mekem iumi hapi or spoelem hapi bilong iumi, hem depend long wanem iumi duim.”

TRAEM DISWAN: Next taem iu storyim sex witim teenager bilong iu, finisim story long gudfala wei. No fraet for storyim sex hem wanfala naes present from God wea long future, taem hem marit, hem savve enjoyim. Talem teenager bilong iu, iu trustim hem for followim olketa standard bilong God go kasem taem hem marit.

 Helpem teenager for ting raonem wanem savve kamaot from wei for durong.

Bifor olketa teenager disaedem samting, olketa need for luksavve staka difren samting stap for chusim, and then olketa shud ting raonem olketa gud and nogud samting wea savve kamaot from wanem olketa chusim. No tingse wei for just savve long wanem hem stret and no stret hem inaf. Emma, wanfala Christian woman long Australia sei: “Taem mi ting go bak long olketa mistek wea mi duim taem mi young, mi luksavve wei for just savve long olketa standard bilong God hem no minim man agree long olketa standard hia. Hem important for man barava minim gud samting and nogud samting wea savve kamaot taem hem followim olketa standard bilong God.”

Bible savve helpem iumi bikos olketa komand insaed garem toktok wea talem klia nogud samting wea savve kamaot from wei for duim samting wea no stret. Olsem example, Proverbs 5:8, 9 talem olketa young man for no durong “nogud iu spoelem gudfala nem bilong iu.” Olsem tufala verse hia talem, olketa wea duim sex bifor olketa marit spoelem gudfala wei bilong olketa, wei wea olketa fren witim God, and no respectim olketa seleva. And datwan mekem hem hard for samwan wea tinghae long olketa gudfala wei hia for laek maritim kaen man olsem. Taem teenager ting raonem hao wei for durong savve spoelem hem saed long feeling, long physical saed, and long wei wea hem fren witim God, diswan savve helpem hem disaed strong for followim olketa law bilong God. *

TRAEM DISWAN: Iusim olketa tokpiksa for helpem teenager bilong iu luksavve olketa standard bilong God hem wise. Olsem example, maet iu sei: Fire for kuki hem gud, bat sapos iu iusim fire for bonem haos, datwan hem nogud. Wanem nao mekem tufala fire hia difren, and hao nao disfala tokpiksa join witim spialaen wea God putim saed long sex?” Iusim story wea stap long Proverbs 5:3-14 for helpem teenager minim nogud samting wea savve kamaot from wei for durong.

Takao, wanfala young man long Japan wea 18 year sei: “Mi savve mi shud duim stret samting, bat mi stragol witim samting wea body laekem.” Hem gud for olketa young wan savve hao samfala narawan tu feel olsem. Nomata aposol Paul hem strongfala Christian, hem sei: “Taem mi laek duim samting wea stret, tingting for duim samting wea nogud tu hem stap.”—Romans 7:21.

Olketa teenager shud luksavve samfala taem olketa mas stragol for duim stret samting. Hem helpem olketa for ting raonem wanem kaen man nao olketa laek for kamap. Hem savve helpem olketa for tingting strong abaotem diswan: ‘Waswe, mi laek for kontrolem laef bilong mi mekem pipol luksavve mi strong for duim stret samting, or mi laek for followim nomoa olketa narawan, olsem man wea wiki and isi for duim samting wea hemseleva laekem nomoa?’ Sapos teenager bilong iu savve long wanem hem stret and no stret, datwan bae helpem hem for ansarem gud datfala kwestin.

^ par. 3 Long disfala article, mifala changem samfala nem.

^ par. 10 For savve hao for startim story witim olketa pikinini abaotem sex and hao for storyim datwan fitim age bilong pikinini, lukim The Watchtower, November 1, 2010, page 12-14.

^ par. 22 For savve moa, lukim article “Young People Ask . . . Will Sex Improve Our Relationship?” long April 2010 Awake! magasin wea Olketa Jehovah’s Witness pablisim.

ASKEM IUSELEVA . . .

  • Hao nao bae mi luksavve teenager bilong mi savve long samting wea stret and no stret?

  • Taem mi story witim teenager bilong mi abaotem sex, waswe, mi storyim sex olsem present from God, or evritaem mi talem hem wanfala trap from Satan?