Skip to content

Skip to secondary menu

Olketa Jehovah’s Witness

Solomon Islands Pidgin

Wastaoa  |  July 2009

 WANEM NAO BAE MEKEM FAMILI STAP GUD?

Redyim Olketa Young Wan for Taem Olketa Big

Redyim Olketa Young Wan for Taem Olketa Big

“Bifor, mi hapi tumas for story witim olketa boy bilong mi. Olketa herem wanem mi talem, and kwiktaem followim. Bat distaem olketa young nao, mifala raoa long staka samting. Olketa start for les long famili worship tu. Olketa ask olsem, ‘Waswe, iumi mas storyim Bible evritaem?’ Mi lukim diswan happen long olketa nara famili, bat bifor olketa boy bilong mi kamap young, mi tingse diswan bae hard tumas for happen long famili bilong mi.”—Reggie. *

WASWE, iu garem young wan? Sapos iu garem, iu lukim barava spesol taem long laef bilong pikinini bilong iu. Bat taem hia savve mekem man wari fogud. Waswe, iu herem eni toktok olsem wea mifala raetem long daon?

  •  Taem boy bilong iu smol, hem laek stap klosap long iu olsem wanfala kanu wea stap long sandbis. Bat distaem hem kamap young, boy bilong iu wea olsem kanu laek go long wata wea deep and iu feel olsem hem no laekem iu for go witim hem.

  •  Taem gele bilong iu hem smol, hem savve storyim evri samting long iu. Bat distaem hem kamap young, hem garem olketa fren for story witim and iu feel olsem iu no wanfala long olketa fren hia.

Sapos samting olsem happen long famili bilong iu, no kwiktaem tingse pikinini bilong iu start for bighed. Sapos olsem, wanem nao kasem olketa? For savve long ansa, iumi bae lukluk long hao nao taem wea pikinini kamap young helpem hem for kamap big.

Taem wea Pikinini Young Hem Spesol

Start taem wanfala pikinini hem born, hem duim staka samting for firstfala taem. Firstaem for wakabaot, firstaem for toktok, firstaem for go long skul, and samfala samting moa. Olketa dadi and mami barava hapi long olketa taem olsem. Olketa samting hia pruvim long dadi and mami hao pikinini bilong olketa kakamap big nao.

Taem pikinini kamap young, datwan tu hem wanfala spesol taem bat samfala mami and dadi wari long datfala taem. Iumi minim why nao olketa wari. No eni dadi and mami hapi for lukim wanfala kwaet pikinini kamap young wan wea komplen olowe. Bat taem wea pikinini kamap young, hem important part long laef bilong hem. Hao nao olsem?

Bible talem hao gogo, “man mas lusim dadi and mami bilong hem.” (Genesis 2:24) Taem pikinini bilong iu kamap young datwan redyim hem for datfala hapi and sorre taem wea hem bae lusim haos. Long datfala taem, pikinini bilong iu fit for talem toktok bilong aposol Paul: “Taem mi wanfala baby, toktok bilong mi, savve bilong mi and tingting bilong mi hem olsem baby; bat from distaem mi big finis, mi lusim nao olketa wei bilong baby.”1 Corinthians 13:11.

So hem nao wanem boy or gele bilong iu duim taem hem kamap young, hem start for  lusim olketa wei bilong pikinini and hem start for tekem wei bilong big man and showaot hem fit for lukaftarem hemseleva and lusim haos bilong mami and dadi. Wanfala buk storyim taem man kamap young, hem olsem taem “wea hem bae isisi lusim iu.”

Tru tumas, long disfala taem maet iu tingse pikinini bilong iu bae no fit for stap seleva. Maet iu garem kwestin olsem:

  • “Sapos boy bilong mi no savve klinim rum bilong hemseleva, hao nao bae hem klinim haos bilong hem?”

  • “Sapos gele bilong mi no savve followim taem wea mifala markem, hao nao bae hem followim taem wea olketa markem long waka?”

Tingim diswan, sapos iu garem tingting olsem: Wei for stap seleva hem no samting wea pikinini bilong iu bae lanem kwiktaem, hem bae tekem samfala year. Bae distaem iu luksavve hao “krangge wei hem stap long heart bilong wanfala boy” or wanfala gele.Proverbs 22:15.

Bat sapos iu leadim gud pikinini bilong iu taem hem young luk olsem hem bae kamap big man wea “luksavve long wanem hem stret and wanem hem no stret bikos olketa iusim wei for luksavve evritaem.”Hebrews 5:14.

Olketa Samting for Mekem Man Win

Sapos young wan bilong iu showimaot hao iu fit for trustim hem, waswe iu savve letem hem for duim samfala samting moa wea hem laek for duim?

For redyim young wan bilong iu for taem hem big, iu need for helpem hem for garem ‘gudfala tingting’ mekem hem fit for disaedem samting seleva. * (Romans 12:1, 2) Olketa samting wea Bible talem wea stap long daon bae helpem iu for duim datwan.

Philippians 4:5: “Evriwan shud luksavve long kaenfala wei bilong iu.” Young wan bilong iu maet ask for duim wanfala samting. Bat kwiktaem nomoa iu stopem nao. Young wan bilong iu komplen olsem, “Iu tok long mi olsem mi pikinini!” Bat bifor iu sei, “Ia, iu wanfala pikinini,” tingim diswan: Olketa young wan savve askem tumas samting and olketa dadi and mami savve stopem staka samting. Bat waswe, iu savve letem hem duim samfala samting samfala taem? Hao sapos iu trae for tingim tingting bilong young wan bilong iu.

TRAEM DISWAN: Raetem tu-thri samting wea iu tingse iu savve letem young wan bilong iu for duim. Talem hem hao iu bae letem hem for traem firstaem. Sapos hem duim gud, iu bae letem hem for duim samfala samting moa. Sapos nomoa, iu bae no letem hem for duim wanem iu letem long firstaem.Matthew 25:21.

Colossians 3:21: “Iufala dadi, no mekem pikinini bilong iufala kros. Nogud iu mekem olketa feel nogud.” Samfala dadi and mami trae for kontrolem tumas young wan bilong olketa. Olketa barava strict tumas. Olketa chusim fren bilong hem and spaem hu nao hem ring long olketa. No eni gud samting nomoa savve happen sapos iu duim olsem. Diskaen wei for strict bae mekem young wan for laek ranawe. Wei for tok spoelem olketa fren bilong hem evritaem bae mekem hem for laekem olketa winim iu. Wei for spaem hem bae mekem hem for story haed long olketa fren bilong hem. Iu trae for kontrolem hem winim bifor batawea, iu lus kontrol nomoa. For tok stret, sapos young wan bilong iu no lane for disaed seleva taem hem stap long haos, hao nao bae hem lane for disaed seleva taem hem no stap moa witim iu?

TRAEM DISWAN: Nextfala taem iu storyim wanfala samting witim young wan bilong iu, trae helpem hem for luksavve hao samting wea hem disaedem savve spoelem nem bilong hem. Tingim diswan, winim wei for tok daonem olketa fren bilong hem askem hem olsem: “Hao sapos olketa arrestim [nem bilong fren] bikos hem no obeyim law? Pipol bae ting hao long iu?” Helpem young wan bilong iu for luksavve hao wanem hem disaedem savve mekem pipol tinghae long hem or ting nating long hem.Proverbs 11:17, 22; 20:11.

 Ephesians 6:4: “No mekem pikinini bilong iufala kros, bat gohed for trainim and lanem olketa long wei bilong Jehovah.” Disfala toktok “lanem olketa long wei,” hem no minim for talem olketa tru samting nomoa, bat hem minim for story long wei wea mekem pikinini ting raonem and changem wei bilong hem. Diswan barava important taem pikinini bilong iu hem kamap young. Wanfala dadi wea nem bilong hem Andre sei olsem: “Taem pikinini bilong iu start for big, iu mas helpem hem for ting raonem wanem iu talem.”2 Timothy 3:14.

TRAEM DISWAN: Taem eni kwestin kamap, askem young wan bilong iu wanem nao bae hem talem sapos iu nao pikinini bilong hem. Mekem hem for duim samfala study for faendem sapos eni pruv agree witim tingting bilong hem or nomoa. Then wan week bihaen storyim moa datwan.

Galatians 6:7: “Eni samting man hem plantim, datwan nao bae hem harvestim.” For panisim wanfala pikinini, iu savve talem for go long rum bilong hem or stopem hem for no duim samfala samting wea hem laek for duim. Bat for wanfala young wan, iu mas helpem hem for luksavve long wanem nao bae kamaot from wanem hem duim.Proverbs 6:27.

TRAEM DISWAN: No changem eni selen wea hem kaonem or talem eni excuse long teacher taem hem no skul gud. Mekem hem lane from samting wea hem duim wea no stret.

From iu wanfala dadi or mami, luk olsem iu no laekem pikinini bilong iu for kasem staka problem taem hem kamap young and gogo for big. Bat staka taem olketa mas kasem samfala problem. Bat nomata olsem, taem pikinini bilong iu kamap young hem spesol chance for “trainim wanfala boy fitim wei for hem followim.” (Proverbs 22:6) Wanem Bible talem savve mekem famili bilong iu hapi and stap gud.

^ par. 3 Mifala changem nem.

^ par. 19 Evri toktok hia wea mifala talem hem fitim olketa boy and olketa gele tu.

ASKEM IUSELEVA OLSEM . . .

Taem young wan bilong mi no stap moa long haos, waswe, bae hem fit for duim olketa samting hia?

  • gohed followim wanfala spiritual schedule

  • chusim and disaedem gud samting

  • story gud witim olketa narawan

  • lukaftarem gud health bilong hem

  • iusim gud selen

  • klinim and keepim gud haos

  • duim samting seleva