Skip to content

Skip to secondary menu

Olketa Jehovah’s Witness

Solomon Islands Pidgin

Wastaoa  |  April 2009

 WANEM NAO BAE MEKEM FAMILI STAP GUD?

Teachim and Stretem Pikinini

Teachim and Stretem Pikinini

John: *Taem mi smol, dadi and mami savve panisim mi, bat firstaem, tufala trae hard for minim wanem nao mekem mi for duim samting wea rong. Mi trae for followim example bilong tufala taem mi stretem olketa gele bilong mi. Famili bilong waef bilong mi Alison, hem difren. Dadi and mami bilong hem barava kwiktaem for duim samting. Luk olsem tufala no trae for minim firstaem samting wea happen, bat olketa kwiktaem for kros and laek stretem olketa pikinini. Samfala taem mi lukim waef bilong mi followim nao wei bilong famili bilong hem taem hem panisim olketa pikinini bilong mitufala.

Carol: Taem mi faev year, dadi bilong mi lusim famili. Hem no interest long mi or thrifala sista bilong mi. Mami barava waka hard for givim evri samting mifala needim, and mi nao mas lukaftarem olketa smol sista bilong mi. Hem hard for mi enjoyim young laef bikos mi mas duim waka bilong dadi and mami. Kasem distaem, mi savve strict tumas. Taem mi mas stretem olketa pikinini bilong mi, mi warim tumas rong samting wea olketa duim. Mi laek for savve why nao olsem and wanem kaen tingting nao mekem olketa duim datfala rong samting. Hasband bilong mi, Mark, hem difren, hem no wari tumas abaotem rong samting wea pikinini duim. Hem big kam long famili wea dadi bilong hem lovem mami bilong hem, and showimaot love taem hem stretem pikinini. Hasband bilong mi savve kwiktaem stretem olketa gele bilong mitufala. Hem trae for luksavve long datfala problem, stretem kwiktaem, and no tingim moa.

TOKTOK bilong John and Carol showimaot hao training wea man kasem taem hem pikinini savve affectim wei wea hem teachim and stretem pikinini. Maet wei wea hasband trainim pikinini hem difren from hao waef trainim pikinini bikos tufala laek followim nomoa samting wea parents duim taem tufala young. Samfala taem problem savve kamap insaed marit bikos long diswan.

Olketa problem savve kamap big taem hasband and waef taed tumas. Taem hasband and waef garem firstfala pikinini, tufala luksavve hao waka for lukaftarem pikinini hem no isi and man savve taed kwiktaem. Joan wea maritim Darren wea garem tufala gele sei olsem: “Mi lovem olketa gele bilong mi, bat tufala no savve sleep long taem wea mi laekem. Tufala wekap long  taem wea mi laekem for tufala sleep yet. Tufala katem story bilong mi taem mi laek story. Tufala leavim olobaot nomoa olketa kaleko, shoe, and olketa dole wea tufala plei witim and tufala no savve putim bak butter long ice.”

Waef bilong Jack hem safa from postpartum depression bihaen hem bornem mek-tu baby. Disfala sik mekem waef bilong hem for barava feel sorre, and no savve garem stretfala tingting. Jack hem sei: “Mi evritaem taed taem mi kam bak from waka and mi wekap midol naet witim baby bilong mitufala. Diswan mekem hard for stretem evritaem first gele bilong mitufala. Hem jealous taem hem lukim mifala karem smol sista bilong hem.”

Taem dadi and mami wea taed raoa abaotem hao for teachim pikinini, datwan savve mekem raoa kamap moa big. Taem hasband and waef no stretem samfala samting wea tufala no agree long hem, datwan savve mekem tufala for no stap gud and savve mekem pikinini for saedem wanfala wea duim wanem hem laekem. Olketa wanem toktok insaed Bible nao savve helpem hasband and waef for gohed stap gud tugeta and teachim gud pikinini?

Markem Taem for Strongim Marit Bilong Iu

Bifor tufala garem pikinini tufala shud marit, and mas gohed stap gud tugeta bihaen olketa pikinini lusim haos. Bible talem olsem for olketa wea marit: “No eni man mas aotem samting wea God joinim finis.” (Matthew 19:6) Datwan showimaot plan bilong God hem for pikinini bae gogo “lusim dadi and mami bilong hem.” (Matthew 19:5) Wei for garem pikinini and lukaftarem hem bae no for olowe, hem wanfala part nomoa long marit laef. Dadi and mami mas markem taem for teachim pikinini, bat tufala mas tingim hao taem marit bilong tufala hem strong datwan savve helpem tufala for teachim gud pikinini.

Wanem nao tufala wea marit savve duim for gohed fren gud tugeta long olketa year wea tufala lukaftarem pikinini? Long taem wea fitim, markem taem for story tugeta taem olketa pikinini no stap. Wei for duim olsem bae mekem iutufala savve story raonem olketa important samting long famili and for fren gud. Hem no isi for hasband and waef markem taem for stap tugeta seleva. Alison, mami wea iumi storyim firstaem sei: “Taem mi and hasband bilong mi ting for story lelebet, smol gele bilong mitufala laekem mitufala for kam kwiktaem and then nara gele bilong mitufala wea six year, start singaot olsem big samting nao happen mekem mifala mas faendem crayon bilong hem.”

Joan and Darren wea iumi storyim finis, garem taem for tufala stap tugeta and story gud bikos tufala markem taem for olketa gele mas go sleep. Joan sei olsem: “Olketa mas redi for go sleep and mas offem laet long taem mifala markem. Taem mitufala duim olsem, datwan mekem mitufala garem taem for story tugeta.”

Wei for markem taem for olketa pikinini sleep, savve helpem hasband and waef for story tugeta, and tu, diswan savve helpem pikinini for “no tinghae tumas long hemseleva winim wanem hem fitim.” (Romans 12:3) Gogo, olketa pikinini wea parents trainim olketa for respectim rul abaotem taem for sleep, bae luksavve hao olketa mas tingim olketa narawan long famili. Pikinini mas obeyim olketa rul wea dadi and mami markem and no tingse olketa narawan long famili mas change for fitim wanem pikinini hem laekem.

TRAEM DISWAN: Markem taem for sleep and followim datwan evritaem. Sapos pikinini bilong iu talem hem laek wekap yet bikos hem laek drink or samting olsem, maet iu savve letem hem for drink. Bat no letem hem for gohed askem staka samting, wea gogo hem no go sleep nao long taem wea iu markem. Sapos pikinini barava askem for hem wekap for faev minute moa and iu letem hem, onem alarm klok for krae bihaen faev minute. Taem klok krae, tekem pikinini stret go long bed and no duim eni samting moa wea hem laekem. “Sapos iu sei iu bae duim samting, iu mas duim datwan. Sapos iu sei iu bae no duim samting, then no duim datwan.”Matthew 5:37.

Agree Long Hao for Stretem Pikinini

Bible sei: ‘Lisin son bilong mi, long discipline bilong dadi bilong iu, and no forgetim law  bilong mami bilong iu.’ (Proverbs 1:8) Scripture hia minim dadi and mami fit for stretem pikinini. Bat nomata parents bilong hasband and waef garem sem wei for trainim tufala taem tufala young, maet tufala no agree long hao for stretem pikinini and wanem rul for olketa followim. Wanem nao tufala savve duim for winim datwan?

John, wea iumi storyim firstaem, hem sei: “Long tingting bilong mi, hem no stret for no agree taem olketa pikinini stap.” Bat hem sei datwan hem isi for talem bat hard for duim. John sei moa: “Olketa pikinini isi tumas for luksavve. Nomata mi and waef no showimaot mitufala no agree long wanfala samting, bat gele bilong mitufala hem luksavve.”

Wanem nao John and Alison duim for winim datwan? Alison sei: “Sapos mi no agree witim hasband bilong mi long hao for stretem gele bilong mitufala, mi weit go kasem taem mi and John stap seleva bifor mi savve talem tingting bilong mi. Mi no laekem gele bilong mitufala for iusim wei wea mitufala no agree for trae kasem samting wea hem laekem. Sapos gele bilong mitufala luksavve mitufala no agree long wanfala samting, mi talem long hem hao evriwan insaed famili mas followim wanem Jehovah laekem. Mi talem hem mi hapi for followim wanem hasband bilong mi talem and hem tu mas stap anda long mitufala.” (1 Corinthians 11:3; Ephesians 6:1-3) John sei: “Taem mitufala stap tugeta, mi savve stretem olketa gele bilong mitufala. Bat sapos Alison savve gud long samting wea happen, mi letem hem nao for stretem pikinini and mi sapotim hem. Sapos mi no agree, mi bae story witim hem bihaen.”

Wanem nao iu savve duim for mekem wei wea iutufala no agree long hao for stretem pikinini no mekem iutufala no fren gud, wea diswan savve mekem pikinini no respectim iutufala?

TRAEM DISWAN: Markem wanfala taem evri week for story abaotem hao iutufala savve teachim olketa pikinini, and storyim gud olketa samting wea iutufala no agree long hem. Luksavve long tingting bilong hasband or waef bilong iu and respectim wei wea hasband or waef garem wei bilong hemseleva for fren gud witim datfala pikinini.

Mami and Dadi Mas Waka Tugeta

For tok stret, hem no isi for teachim pikinini. Samfala taem hem barava hard. No longtaem nomoa pikinini bae lusim haos, and iutufala bae stap seleva moa. Bihaen long olketa year wea iu teachim pikinini and olketa lusim haos, waswe, marit bilong iutufala bae strong go moa or hem gogo for wikdaon? Ansa long disfala kwestin bae depend long wei wea iutufala obeyim toktok long Ecclesiastes 4:9, 10: ‘Tufala nao gud winim wanfala, bikos tufala bae kasem gud samting from hard waka bilong tufala. Bikos sapos wanfala hem foldaon, narawan savve helpem hem for standap.’

Taem hasband and waef waka tugeta, evriwan savve kasem gudfala samting bihaen. Carol, wea iumi storyim firstaem, hem talemaot feeling bilong hem olsem: “Mi savve hasband bilong mi garem staka gudfala wei, bat wei wea mitufala teachim pikinini tugeta mekem mi tinghae long olketa nara wei wea hem garem. Taem mi lukim hao hem lukaftarem gud tufala gele bilong mitufala, datwan mekem mi for barava lovem and respectim hem.” John talem olsem abaotem Alison: “Taem mi lukim hao waef bilong mi duim gud waka bilong hem olsem wanfala mami, diswan mekem mi for barava lovem and respectim hem tu.”

Sapos iu markem taem for hasband or waef bilong iu story tugeta and iutufala waka tugeta long olketa year wea iutufala teachim pikinini, marit bilong iutufala bae barava gohed gud taem olketa pikinini big. Datwan nao bae barava showimaot gudfala example for olketa pikinini bilong iu followim!

^ par. 3 Mifala changem olketa nem.

ASKEM IUSELEVA . . .

  • Haomas taem long week nao mi markem for stap tugeta witim hasband or waef taem olketa pikinini no stap?

  • Wanem nao mi duim for sapotim hasband or waef bilong mi taem hem stretem pikinini?