Skip to content

Skip to secondary menu

Olketa Jehovah’s Witness

Solomon Islands Pidgin

Wastaoa  |  January 2009

 WANEM NAO BAE MEKEM FAMILI STAP GUD?

Gohed Faithful Long Man wea Iu Maritim

Gohed Faithful Long Man wea Iu Maritim

Maria sei olsem: “Mi lukim hao hasband bilong mi Michael, hem start for no storyim feeling bilong hem and hem no fren gud witim pikinini bilong mitufala. * Wei bilong hem change no longtaem bihaen mifala garem Internet long computer long haos. Mi tingse hem lukluk long olketa rabis piksa. Wanfala naet bihaen pikinini go sleep, mi askem hem abaotem diswan and hem talem hao hem lukluk long olketa rabis piksa long Internet. Mi barava feel nogud. Mi no bilivim nao hao diswan hem happen long mi. Mi barava no trustim hem nao. Nara nogud samting tu, wanfala man long ples mi waka start for laekem mi.”

Michael sei olsem: “No longtaem go nomoa waef bilong mi Maria, askem mi abaotem wanfala piksa wea hem faendem long computer bilong mifala. Taem mi talem hao mi savve lukluk long olketa rabis piksa long Internet, hem barava kros nao. Mi barava feel shame and guilty tu. Mi tingse marit bilong mitufala bae finis nao.”

LONG tingting bilong iu, wanem nao kasem marit bilong Michael and Maria? Maet iu tingse wei for lukluk long olketa rabis piksa nao main problem bilong Michael. Gogo, Michael luksavve hao samting wea hem duim showimaot hem no gohed faithful long man wea hem maritim. * Taem Michael and Maria marit, tufala garem bigfala love and enjoyim wei for duim samting tugeta. Olsem staka marit, wei for gohed faithful long man wea olketa maritim hem gogo daon and tufala no fren gud nao.

Long tingting bilong iu, waswe, marit bilong iu hem strong olsem bifor? Waswe, iu laekem marit bilong iu for strong go moa? Sapos olsem, iu need for savve long ansa bilong thrifala kwestin hia: Wanem nao hem minim for gohed faithful long man wea iu maritim? Olketa wanem samting nao savve mekem hard for gohed faithful? And wanem nao iu savve duim for strongim go moa wei for gohed faithful?

Wanem Nao Hem Minim for Gohed Faithful?

Long tingting bilong iu, wanem nao hem minim for gohed faithful long man wea iu maritim? Staka pipol sei hem samting wea man wea marit mas duim. Tingim diswan,  tufala wea marit maet gohed faithful long tufala seleva bikos tufala garem pikinini or bikos tufala laek for obeyim God, Man wea startim marit. (Genesis 2:22-24) Hem tru, diskaen tingting hem gud and bae helpem hasband and waef for winim olketa hardfala taem. Bat for tufala wea marit for hapi, tufala needim samfala samting moa.

Jehovah God mekem marit olsem wei for man and woman barava hapi. Hem laekem man for “hapi witim waef wea [hem] tekem” and for woman lovem hasband wea lovem waef bilong hem olsem hem lovem hemseleva. (Proverbs 5:18; Ephesians 5:28) For fren gud olsem, tufala mas savve hao for trustim tufala seleva. Tufala need for savve tu hao for fren gud tugeta for olowe. Taem man and woman fren gud tugeta and trustim tufala seleva, datwan bae strongim go moa wei wea tufala gohed faithful. Bible storyim hao tufala wea fren gud, hem olsem tufala “kamap wanfala body nomoa.”Matthew 19:5.

Dastawe, wei for gohed faithful hem olsem cement wea joinim olketa brik long wanfala strong haos. Cement hia needim sand, cement and wata. Long sem wei tu, for hasband and waef gohed faithful tufala needim wei for obey, trust and fren gud. Wanem nao savve spoelem wei for gohed faithful?

Wanem Nao Olketa Hardfala Samting?

For gohed faithful minim man mas waka hard. Iu bae no duim samting wea iuseleva laekem nomoa bat iu bae duim samting wea bae mekem man wea iu maritim hapi. Bat wei for duim samting wea narawan laekem hem samting wea staka pipol no duim and hem nogud long samfala tu. Bat askem iuseleva, ‘Haomas marit pipol wea selfish nao hapi?’ Luk olsem no staka. Why nao olsem? Luk olsem man wea selfish bae no gohed faithful long man wea hem maritim taem hemseleva mas duim samting wea narawan laekem. Diswan hem tru taem hem no kasem gudfala samting from wanem hem duim. Sapos tufala wea barava fren gud taem tufala just marit no showimaot wei for gohed faithful, tufala bae no gohed fren gud.

Bible talem stret hao wei for marit hem no isi. Hem sei hao “man wea marit hem wari for olketa samting bilong world, hao hem savve mekem waef bilong hem hapi,” and “marit woman hem wari for olketa samting bilong world, hao hem savve mekem hasband bilong hem hapi.” (1 Corinthians 7:33, 34) Bat sorre nao, marit pipol no evritaem luksavve long olketa samting wea man wea hem maritim warim or tinghae long wanem hem duim. Taem tufala wea marit no tinghae long tufala seleva, tufala bae kasem “trabol long disfala world.”1 Corinthians 7:28.

Sapos iu laekem marit bilong iu for winim olketa hardfala taem and for gohed gud long olketa gudfala taem, iu need for tingim marit olsem samting for olowe. Hao nao iu savve duim datwan? And hao nao iu savve helpem man wea iu maritim for gohed faithful long iu?

Hao for Strongim Wei for Gohed Faithful

Main samting nao man mas hambol for followim wanem Bible talem. Taem iu duim olsem, iutufala bae “kasem gud samting.” (Isaiah 48:17) Tingim tufala samting nomoa wea iu savve duim.

Markem taem for man wea iu maritim

1. Tinghae long marit bilong iu.

Aposol Paul talem olsem: “Duim olketa samting wea barava important.” (Philippians 1:10) God tinghae long olketa hasband and waef wea tinghae long tufala. God bae honorim man wea honorim waef bilong hem. And “God hem barava tinghae long [woman]” wea respectim hasband bilong hem.1 Peter 3:1-4, 7.

Hao nao iu ting long marit bilong iu? Taem samting hem important, iu bae waka hard long datwan. Askem iuseleva olsem:  ‘Long lastfala month, haomas taem nao mi markem for duim samting witim man wea mi maritim? Wanem samting nao mi duim for showimaot long man wea mi maritim hao mitufala gud fren yet?’ Sapos iu markem lelebet taem or no enitaem for strongim marit bilong iu, man wea iu maritim maet no luksavve sapos iu gohed faithful long marit bilong iutufala or nomoa.

Waswe, man wea iu maritim tingim iu olsem man wea gohed faithful yet long marit? Hao nao bae iu savve?

TRAEM DISWAN: Raetem faevfala point hia long pis pepa: selen, waka, marit, hapitaem, and olketa fren. Nambarem olketa point hia fitim wanem hem important long man wea iu maritim. Askem man wea iu maritim for duim sem samting tu. Taem iutufala duim finis, exchangem list. Sapos man wea iu maritim tingse iu no iusim inaf taem and strong for marit bilong iutufala, storyim wanem nao iu need for duim for strongim go moa wei wea iutufala gohed faithful. Then askem iuseleva olsem: ‘Hao nao mi savve tinghae long olketa samting wea important long man wea mi maritim?’

Wei for durong start kam from nogud tingting

2. Stap klia long evri wei for durong.

Jesus Christ sei olsem: “Eniwan wea gohed for lukluk long wanfala woman and laek for durong witim hem, hem duim adultery finis witim hem long heart bilong hem.” (Matthew 5:28) Taem man duim sex witim samwan wea hem no maritim, hem barava spoelem nao man wea hem maritim and Bible sei datwan savve mekem wei for tufala divorce. (Matthew 5:32) Bat toktok bilong Jesus wea iumi storyim, showim hao man savve garem nogud tingting for longfala taem bifor hem duim adultery. Wei for gohed tingim nogud samting olsem hem wanfala wei for no faithful.

For gohed faithful long man wea iu maritim, mekem wanfala promis for no lukluk long olketa rabis piksa. Olketa rabis piksa savve spoelem wanfala marit nomata staka pipol maet talem difren samting. Herem toktok bilong wanfala waef wea hasband bilong hem lukluk long olketa rabis piksa: “Hasband bilong mi sei hao wei for lukluk long olketa rabis piksa savve strongim wei wea mitufala fren. Batawea, hem mekem mi feel iusles, olsem mi no fitim hem. Taem hem gohed for lukluk long olketa rabis piksa, mi go sleep bat mi krae nomoa.” Waswe, iu tingse man hia hem gohed faithful long man wea hem maritim, or hem spoelem  hem nomoa? Waswe, samting wea hem duim bae mekem isi for waef bilong hem gohed faithful? Waswe, hem tingim waef bilong hem olsem nambawan fren bilong hem?

Faithful man Job ‘mekem wanfala promis’ for showimaot hem faithful long man wea hem maritim and God bilong hem. Hem disaed strong for no ‘lukluk long eni gele for durong witim hem.’ (Job 31:1) Hao nao iu savve duim sem samting wea Job duim?

Winim wei for no lukluk nomoa long olketa rabis piksa, iu mas keakea for no garem tingting for frenim eniwan wea iu no maritim. Staka pipol tingse wei for switim man wea iu no maritim hem savve spoelem marit bilong olketa. Bat Bible warnim iumi olsem: “Heart hem savve trikim man winim eni nara samting and hem nating hol bak. Hu nao fit for savve long hem?” (Jeremiah 17:9) Waswe, heart bilong iu trikim iu finis? Askem iuseleva olsem: ‘Mi laekem nomoa man wea mi maritim or mi laekem moa eniwan? Hu nao mi storyim nius long hem firstaem, man wea mi maritim or narawan? Hao nao bae mi feel sapos man wea mi maritim talem mi for no lukim samwan wea mi laekem? Waswe, bae mi kros or bae mi hapi for followim wanem hem talem?’

TRAEM DISWAN: Sapos iu start for laekem samwan wea iu no maritim, trae for no gogo tumas long hem and no story story olsem iutufala fren gud. No tingim olketa wei wea iu tingse disfala man hem winim man wea iu maritim. Bat tingim nomoa olketa gudfala wei bilong man wea iu maritim. (Proverbs 31:29) Tingim bak olketa samting wea iu firstaem laekem abaotem man wea iu maritim. Askem iuseleva olsem: ‘Waswe, man wea mi maritim no garem nao olketa wei hia, or waswe, mi nomoa no lukim distaem?’

Firstaem Duim Samting

Michael and Maria wea iumi storyim finis, askem help for winim olketa problem wea kasem tufala. Hem tru, wei for askem help hem firstfala samting nomoa for duim. Bat wei wea Michael and Maria luksavve long olketa problem and askem help, datwan showimaot wei wea tufala laek for gohed faithful and for mekem marit bilong tufala gohed gud.

Nomata marit bilong iu gohed gud or kasem olketa problem, man wea iu maritim mas luksavve iu laek for gohed faithful long hem. For pruvim datwan long man wea iu maritim, iu mas duim wanem iu fit for duim. Waswe, iu laek for duim datwan?

^ par. 3 Mifala changem olketa nem.

^ par. 5 Nomata iumi storyim wanfala man wea lukluk long olketa rabis piksa, wanfala woman wea duim sem samting tu bae showimaot hem no gohed faithful long man wea hem maritim.

ASKEM IUSELEVA . . .

  • Olketa wanem samting nao mi mas trae for no duim mekem mi garem taem for man wea mi maritim?

  • Wanem nao mi savve duim for mekem man wea mi maritim luksavve mi gohed faithful long hem?