Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 4 2017

 KAVA SUBJECT | WANEM NAO BIBLE TEACHIM ABAOTEM LAEF AND DAE?

Wanem Bible Teachim Abaotem Laef and Dae

Wanem Bible Teachim Abaotem Laef and Dae

Long Bible buk Genesis iumi readim story abaotem creation. God sei olsem long Adam: “Iu savve kaikaim frut bilong evri tree long garden. Bat iu mas no kaikaim frut from datfala tree wea piksarem wei for savve long gud and nogud samting, bikos long day wea iu kaikaim datwan bae iu dae.” (Genesis 2:16, 17) Datfala komand wea God talem long Adam showimaot klia sapos hem obeyim God bae hem no dae, bat bae hem laef olowe insaed garden long Eden.

Sorre tumas, Adam disaed for no obey and hem lusim chance for laef olowe. Taem waef bilong hem, Eve, givim long hem datfala frut wea God stopem, hem kaikaim nao. (Genesis 3:1-6) Distaem iumi kasem yet nogud samting wea kamaot from wei wea Adam no obey. Aposol Paul sei olsem: “Sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae bikos evriwan sin.” (Rome 5:12) Datfala man wea kosim sin and dae hem Adam. Bat wanem nao sin, and why nao sin hem mekem man for dae?

Taem Adam hem min for no obeyim God and brekem law bilong hem, datwan hem sin. (1 John 3:4) And panis bilong sin hem dae, olsem God talem finis long Adam. Sapos Adam and olketa pikinini bilong hem gohed for obeyim law bilong God, olketa bae no sin and bae olketa no dae. Taem God wakem olketa man, hem no plan bilong hem for olketa dae bat for laef olowe.

Kam kasem distaem, “evriwan dae” olsem Bible  talem. Bat waswe, eni part long iumi hem gohed for laef bihaen iumi dae? Staka pipol bilivim datwan hem tru bikos olketa sei soul no savve dae. Bat sapos iumi bilivim datwan, hem olsem iumi sei God hem laea long Adam. Why nao olsem? Bikos sapos eni part long iumi hem laef and hem go stap long nara ples bihaen iumi dae, then God hem laea taem hem sei panis bilong sin hem dae. Bat Bible sei: “God no savve laea.” (Hebrew 6:18) Satan nao laea taem hem sei long Eve: “Iu bae nating dae.”—Genesis 3:4.

So disfala kwestin kamap: Sapos teaching abaotem soul wea no savve dae hem wanfala laea teaching, then wanem nao happen long man taem hem dae?

BIBLE TEACHIM TRU SAMTING

Bible buk Genesis sei: “Jehovah God wakem man from dust bilong graon, and then hem blowim wind bilong laef insaed nose bilong hem, and hem kamap wanfala man wea laef.” Olketa transleitim datfala toktok “man wea laef” from Hebrew word ne’phesh, * wea minim “samting wea gohed for brith.”—Genesis 2:7, footnote.

Bible showimaot klia taem God wakem man, hem no putim wanfala soul wea no savve dae insaed long hem. Bat Bible sei man hia nao kamap “man wea laef.” Dastawe, nomata iu readim full Bible bae iu no faendem eni scripture wea iusim datfala toktok, “soul wea no savve dae.”

From Bible sei iumi olketa man no garem soul wea savve dae, why nao staka religion teachim datwan? For kasem ansa bilong diswan, bae iumi storyim samting wea happen long Egypt bifor.

HEATHEN TEACHING HEM SPRED

Herodotus, wanfala Greek savveman wea stap  long mek-faev century B.C.E., sei pipol long Egypt nao “olketa first pipol for sapotim teaching bilong soul wea no savve dae.” Olketa long Babylon bifor tu garem sem biliv. Gogo long 332 B.C.E., taem Alexander the Great tekovarem olketa kantri long Midol East, olketa Greek savveman spredim nao datfala teaching, and hem kasem evri ples wea Greece rul ovarem.

No eni scripture iusim datfala toktok “soul wea no savve dae”

Long first century C.E., tufala grup bilong Jew religion, wea hem olketa Essene and olketa Pharisee teachim pipol soul bilong man hem gohed for laef bihaen hem dae. The Jewish Encyclopedia sei: “Olketa Jew bilivim datfala teaching bilong soul wea no savve dae bikos olketa lanem from teaching bilong olketa Greek savveman and main wan nao Plato.” Olsem tu, Josephus, wea raetem history bilong olketa Jew long first century, hem sei datfala teaching no kam from olketa Holy Raeting bat from “biliv bilong olketa Greek pipol.” Hem ting long diswan olsem olketa kastom story bilong pipol long Greece.

Taem Greece start for rul ovarem staka ples, pipol wea olketa rul ovarem followim culture and biliv bilong olketa, gogo olketa wea sei olketa Christian bilivim tu disfala heathen teaching. Man wea raetem history, Jona Lendering, sei: “Plato sei long firstaem soul bilong man hem stap long gudfala ples and then hem go stap long wanfala nogud world. Datfala teaching mekem hem isi for teaching bilong Plato hem join witim teaching bilong olketa Christian.” So isisi olketa wea sei olketa Christian start for bilivim datfala teaching bilong soul wea no savve dae and gogo hem kamap wanfala main teaching bilong olketa.

 TRUTH BAE MEKEM IU FREE

Long first century, aposol Paul talem disfala warning: “Spirit bilong God hem sei taem bae kam wea samfala bae lusim biliv bilong olketa bikos olketa lisin long olketa laea toktok wea pipol sei hem kam from God, and olketa lisin tu long teaching bilong olketa demon.” (1 Timothy 4:1) Datfala toktok hem barava kamap tru! Wanfala “teaching bilong olketa demon” nao hem datfala teaching bilong soul wea no savve dae. Teaching hia no kam from Bible, bat hem followim olketa heathen religion and tingting bilong man.

Bat iumi tinghae long disfala toktok bilong Jesus: “Iufala bae savve long samting wea tru, and datwan bae mekem iufala free.” (John 8:32) Taem iumi savve long tru samting wea Bible teachim, iumi free from wei for bilivim olketa teaching wea spoelem God and from wei for duim olketa samting wea God heitim wea staka religion long world mekhae long hem. And tu, truth wea stap long Bible hem mekem iumi free from samfala kastom biliv and laea tingting abaotem dae.—Lukim box “ Olketa wea Dae Go Long Wea?

Taem God wakem iumi olketa man hem no plan bilong hem for iumi laef go kasem 70 or 80 year nomoa long earth, and then iumi gohed laef moa long heven or long ples bilong olketa spirit. Bat plan bilong hem for olketa man wea obeyim hem, hem for laef olowe long earth. Diswan showimaot God lovem iumi, and no eni samting bae stopem hem for duim wanem hem laekem. (Malachi 3:6) Man wea raetem psalm sei: “Olketa wea raeteous bae stap long earth, and olketa bae stap for olowe long hem.”—Psalm 37:29.”

 

^ par. 9 Samfala Bible transleison, olsem King James Version and Catholic Douay Version, transleitim ne’phesh olsem “soul wea laef.” Bat olketa nara Bible transleison distaem olsem The New English Bible transleitim olsem “samting wea laef,” New International Version and The Jerusalem Bible transleitim olsem “man wea laef,” and Today’s English Version olsem “start for laef.”