Wanem nao savve mekem iu barava tinghae long wanfala present? Maet hem fofala samting hia: (1) Man wea givim datfala present, (2) why hem givim datwan, (3) wanem hem sakrifaesim for mekem iu kasem datwan, and (4) sapos datfala present hem samting wea iu barava needim. Taem iumi ting raonem fofala samting hia, datwan savve helpem iumi for barava tinghae long datfala ransom wea hem nambawan present from God.

MAN WEA GIVIM DATFALA PRESENT

Maet wanfala present hem spesol long iumi bikos man wea givim datwan hem wanfala bigman, or hem samwan wea iumi tinghae long hem. Maet iu tinghae long wanfala present bikos famili member or gud fren bilong iu nao givim datwan for iu, nomata datfala present hem no expensive. Hem olsem wei wea Jordan tinghae long datfala present wea Russell givim hem, wea iumi storyim long firstfala article. So why nao datfala ransom hem wanfala spesol present?

First samting, Bible sei “God sendem kam spesol Son bilong hem long world mekem iumi savve kasem laef bikos long hem.” (1 John 4:9) So datfala present hem kam from man wea garem bigfala paoa winim eni narawan. Man wea raetem psalm hem sei olsem abaotem God: “Iu, wea nem bilong iu Jehovah, iu nomoa Barava Haefala God ovarem full earth.” (Psalm 83:18) From God nao sendem kam Jesus, datwan mekem datfala present hem barava spesol.

Mek-tu samting, God hem “Dadi bilong iumi.” (Isaiah 63:16) Why nao iumi sei olsem? Bikos hem givim iumi laef. And tu, hem lukaftarem iumi, olsem wanfala dadi lukaftarem olketa pikinini bilong hem. Taem God story long olketa Israelite hem kolem olketa Ephraim, and hem sei: “Ephraim hem wanfala spesol son bilong mi wea mi lovem. . . . Mi barava tingim hem. And mi feel sorre long hem.” (Jeremiah 31:20) God garem sem tingting abaotem olketa wea worshipim hem distaem. Hem man wea wakem iumi, and tu, hem Dadi and fren bilong iumi. Dastawe iumi tinghae long evri present wea God givim iumi.

 WHY HEM GIVIM DATFALA PRESENT

Taem samwan givim iumi wanfala present bikos hem lovem iumi, datwan mekem iumi tinghae long datfala present. Hem bae no expectim iumi for changem bak datwan.

From God lovem iumi, hem sendem Son bilong hem for dae for iumi. Bible sei: “Love wea God garem for iumi hem showaot taem hem sendem kam spesol Son bilong hem.” Why nao hem duim datwan? Hem for “mekem iumi savve kasem laef bikos long hem.” (1 John 4:9) Waswe, eniwan forcem God for duim datwan? Nomoa! Datfala ‘price wea Christ Jesus peim for sevem iumi’ hem from God “hem kaen tumas.”Rome 3:24.

Why nao iumi savve sei God “hem kaen tumas”? Bible sei: “Christ hem dae for iumi taem iumi sin yet, wea diswan showimaot God hem lovem iumi.” (Rome 5:8) So nomata iumi sin, God lovem iumi and laek for helpem iumi. Iumi no duim eni samting wea bae mekem hem fitim for God lovem iumi. Ransom hem nambawan wei wea God showimaot love long iumi.

WANEM HEM SAKRIFAESIM

Samfala present hem spesol bikos long samting wea samwan duim for mekem iumi kasem datwan. Maet samting wea samwan laek givim iumi hem barava spesol long hem. Nomata olsem, hem willing for givim iumi. Datwan mekem iumi barava tinghae long datfala present.

God “hem givim kam spesol Son bilong hem.” (John 3:16) Nomata Jesus barava spesol long God, hem sendem hem kam for dae for iumi. For staka million year hem and Jesus waka tugeta for wakem evri samting long universe and datwan mekem tufala fren gud tugeta. (Proverbs 8:30) Jesus hem datfala ‘Son wea God lovem’ and “hem olsem God wea no eniwan savve lukim.” (Colossae 1:13-15) Tufala barava lovem tufala.

Nomata olsem, God “no stopem Son bilong hem for safa” for iumi. (Rome 8:32) Big samting nao Jehovah duim for iumi.

HEM SAMTING WEA IUMI BARAVA NEEDIM

Iumi bae tinghae long wanfala present sapos hem samting wea iumi barava needim. Olsem example, iu garem big sik and iu no fit for peim treatment wea bae sevem laef bilong iu. Bat sapos samwan willing for peim datfala treatment for iu, bae iu barava tinghae long hem bikos hem sevem laef bilong iu!

Bible sei: “Evriwan dae bikos long Adam, and tu, evriwan bae laef bak bikos long Christ.” (1 Corinth 15:22) From iumi kam from laen bilong Adam iumi evriwan born sin. Diswan spoelem wei wea iumi fren witim God, and iumi savve sik and dae. Iumi no fit for sevem iumiseleva or olketa narawan from sin and dae. Bible sei: “Olketa no fit for baem bak brata bilong olketa, or peim price long God for hem . . . Hem hard tumas for olketa duim datwan.” (Psalm 49:7, 8) Sapos no eniwan helpem iumi, bae iumi no wei nao.

Jehovah barava lovem iumi, so hem olsem hem peim “treatment” for sevem laef bilong iumi, long wei wea hem sendem Jesus for dae for iumi. Hao nao wei wea Jesus dae hem sevem iumi? Bible sei: ‘Blood bilong Jesus, hem mekem iumi klin from evri  sin bilong iumi.’ So taem iumi showimaot faith long Jesus, datwan mekem iumi fit for kasem forgiveness for olketa sin bilong iumi and for kasem laef olowe. (1 John 1:7; 5:13) And hao nao dae bilong Jesus bae helpem olketa wea dae finis? Bible sei: “Pipol dae bikos long wanfala man nomoa, and pipol laef bak tu bikos long wanfala man [Jesus].”—1 Corinth 15:21. *

Jehovah showimaot hem barava lovem iumi taem hem sendem kam Son bilong hem for dae for iumi. Hem bigfala sakrifaes wea Jehovah duim for iumi. Datfala present hem samting wea iumi barava needim bikos hem sevem iumi from sin and dae. Tru nao, datwan hem wanfala nambawan present wea winim eni nara present wea iumi savve kasem.

 

^ par. 19 For savve moa abaotem plan bilong God for resurrectim olketa wea dae finis, lukim chapter 7 bilong disfala buk Wanem Nao Really Samting wea Bible Teachim? wea Olketa Jehovah’s Witness pablisim. Hem stap tu long www.jw.org/pis.