Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  September 2016

Olketa Young Wan, Strongim Faith Bilong Iufala

Olketa Young Wan, Strongim Faith Bilong Iufala

“Faith hem kliafala pruv wea showimaot samting wea man hope long hem, hem tru, nomata hem no savve lukim datwan.”—HEB. 11:1.

SONG: 41, 69

1, 2. Wanem hevi nao olketa young wan kasem distaem, and hao nao olketa savve deal witim datwan?

CLASSMATE bilong wanfala young sista long Britain sei long hem: “Gele wea kleva olsem iu shud no biliv God hem stap.” Wanfala young brata long Germany hem sei: “Olketa teacher bilong mi sei story long Bible abaotem creation hem laea nomoa. And olketa tingse evri student bilivim evolution.” Wanfala young sista long France sei: “Olketa teacher long skul sapraes tumas for savve nomata distaem samfala student biliv yet long Bible.”

2 Sapos iu wanfala young wan wea iu worshipim Jehovah or iu studyim Bible, waswe, iu kasem hevi for bilivim evolution and for no bilivim God nao wakem evri samting? Sapos olsem, iu savve duim samting for strongim faith bilong iu. Bible encouragem iumi for tingting gud abaotem wanem iumi herem or readim. Hem sei: “Gudfala tingting and wei for luksavve bae protectim iu.” Long wanem wei? Hem bae helpem iu for no bilivim olketa laea teaching, and for strongim faith bilong iu long Jehovah.—Readim Proverbs 2:10-12.

3. Wanem nao bae iumi storyim long disfala study?

3 Iumi mas savve gud long Jehovah mekem iumi garem strongfala faith. (1 Tim. 2:4) So taem iu readim Bible and olketa Bible  pablikeson hem barava important for ting raonem wanem iu readim. Trae for minim gud wanem iu readim. (Matt. 13:23) Sapos iu study seleva long wei olsem, bae iu faendem staka pruv wea showimaot Jehovah nao wakem iumi and hem nao givim kam Bible. (Heb. 11:1) Distaem bae iumi storyim hao for duim diswan.

WANEM IU SAVVE DUIM FOR STRONGIM FAITH BILONG IU

4. Wanem nao hem klosap semsem long wei for bilivim evolution and wei for bilivim creation? So wanem nao iumi evriwan mas duim?

4 Maet samwan sei long iu, “Mi bilivim evolution bikos olketa scientist sei hem tru. Hao nao iu bilivim God hem stap sapos no eniwan lukim hem enitaem?” Hem nao tingting bilong staka pipol. Hem tru, no eniwan long iumi hem lukim God or lukim taem hem wakem wanfala samting. (John 1:18) Bat waswe long pipol wea bilivim evolution? Olketa tu bilivim samting wea olketa no lukim. No eni scientist or eni man lukim wanfala samting wea hem laef hem isisi change for kamap nara samting. Olsem example, no eniwan lukim wanfala monkey hem isisi change for kamap wanfala man. (Job 38:1, 4) So iumi evriwan mas lukluk gud long olketa pruv wea stap, and ting raonem gud mekem iumi luksavve long wanem nao hem stret. Staka pipol studyim nature and “luksavve” wanfala God hem stap. Olketa luksavve hem nao wakem evri samting hia, hem garem bigfala paoa, and hem garem olketa nambawan wei.—Rome 1:20.

Taem iu duim research, datwan savve helpem iu for explainim wanem iu bilivim long olketa narawan (Paragraf 5 storyim diswan)

5. Wanem nao iumi savve lanem abaotem creation long samfala pablikeson bilong iumi?

5 Taem iumi lukluk long olketa samting long nature and barava ting raonem, iumi bae luksavve olketa samting hia barava spesol. “From iumi garem faith iumi luksavve” wanfala Creator hem stap nomata iumi no lukim hem. Iumi luksavve hem garem olketa nambawan wei and bigfala wisdom. (Heb. 11:3, 27) Iumi savve lanem staka samting abaotem olketa samting wea hem wakem taem iumi readim wanem olketa scientist faendemaot abaotem nature. Samfala information hia stap long video The Wonders of Creation Reveal God’s Glory, and tufala brochure Was Life Created? and The Origin of Life—Five Questions Worth Asking, and datfala buk Is There a Creator Who Cares About You? Long olketa Awake! magasin, iumi savve readim tu olketa interview bilong olketa scientist and olketa narawan wea storyim hao nao gogo olketa biliv long God. And olketa article wea garem title,  “Was It Designed?” storyim staka samting abaotem olketa animal and olketa nara samting long nature, and olketa storyim tu hao olketa scientist luk followim design bilong olketa samting hia for wakem samting.

6. Hao nao olketa pablikeson bilong iumi helpem samfala, and wanem gud samting nao iuseleva kasem?

6 Wanfala brata long United States wea 19 year sei olsem abaotem tufala brochure wea iumi storyim finis. Hem sei: “Tufala brochure hia barava helpem mi. Staka taem nao mi studyim tufala brochure hia.” Wanfala sista long France sei: “Olketa article wea garem title, ‘Was It Designed?’ barava interesting and mi laekem tumas! Olketa scientist wea designim olketa samting followim nature olketa savve tumas, bat wanem olketa designim hem no kasem hao God designim olketa samting.” Long South Africa, parents bilong wanfala gele wea 15 year sei: “First article wea gele bilong mifala savve readim long olketa Awake! magasin nao hem datfala ‘Interview’ article.” Olketa pablikeson hia savve helpem iu tu for pruvim wanfala Creator hem stap, and for iu luksavve and no followim olketa laea teaching. Taem iu duim olsem, faith bilong iu bae barava strong and iu bae olsem tree wea rut bilong hem stap deep insaed long graon wea no foldaon nomata hem big wind.—Jer. 17:5-8.

BILIVIM WANEM BIBLE TALEM

7. Why nao God laekem iu for pruvim wanem Bible talem hem tru?

7 Waswe, hem rong for kwestinim sapos wanem Bible talem hem tru? Nomoa. Jehovah no laekem iu for bilivim nomoa samting wea olketa narawan bilivim. Hem laekem iuseleva for “chekim evri samting” mekem iu savve pruvim wanem Bible talem hem tru and hem kam from God. Taem iu savve gud long Bible, datwan bae strongim faith bilong iu long wanem Bible talem. (Readim 1 Thessalonica 5:21; 1 Timothy 2:4.) Wanfala wei for savve gud long Bible hem for studyim samfala subject wea iu laek for savve samfala samting moa abaotem.

8, 9. (a) Wanem nao samfala laek for studyim? (b) Storyim gud samting wea samfala kasem from olketa ting raonem wanem olketa studyim.

8 Samfala laek for studyim olketa profesi long Bible. Or maet olketa laek for comparem wanem Bible talem witim wanem olketa savveman wea studyim olketa oldfala samting bifor olketa talem, or wanem olketa savveman saed long history and science olketa talem. Olsem example, wanfala profesi nao hem Genesis 3:15. Jehovah talem datfala profesi no longtaem bihaen Adam and Eve againstim Jehovah and les for stap anda long rul bilong hem. Disfala profesi hem join witim staka nara profesi wea helpem iumi for minim wanem Kingdom bilong God bae duim for pruvim God nomoa fit for rul, and wanem hem bae duim for finisim evri nogud samting. Wanem nao wanfala wei for studyim profesi long Genesis 3:15? Iu savve listim olketa scripture wea showimaot hao datfala profesi bae kamap tru. Then iu savve faendaot wanem taem nao olketa raetem olketa scripture hia, and arrangem olketa followim taem wea olketa happen. Gogo bae iu luksavve olketa man wea raetem Bible laef long olketa difren taem bat wanem olketa raetem hem helpem iumi for minim gud datfala profesi. Diswan bae helpem iu for luksavve holy spirit bilong Jehovah nao leadim olketa man hia.—2 Pet. 1:21.

9 Wanfala brata long Germany ting raonem hao evri buk long Bible storyim samting wea join witim Kingdom. Hem sei: “Mi sapraes long datwan bikos 40-fala difren man nao raetem Bible. And staka long olketa laef long olketa difren taem, and olketa no savve long each other.” Wanfala sista long Australia studyim wanfala article insaed long Wastaoa bilong December 15, 2013 wea storyim mining bilong Pasova. Hem lanem hao datfala spesol celebration hem join witim Genesis 3:15 and witim Jesus. Hem sei: “Datfala study article helpem mi for luksavve Jehovah hem barava nambawan God. Samting wea mi barava tinghae long hem nao Jehovah mekem arrangement for olketa  Israelite celebratem Pasova, and hao datwan hem piksarem olketa samting wea happen long Jesus. Taem mi ting raonem wanem nao Pasova kaikai hem piksarem, datwan hem barava spesol samting!” Wanem nao mekem datfala sista for feel olsem? Hem tingting gud raonem wanem hem readim and hem minim gud. Diswan strongim faith bilong hem and hem fren gud witim Jehovah.—Matt. 13:23.

10. From olketa man wea raetem Bible olketa honest, wanem nao datwan showimaot?

10 Tingim tu wei wea olketa man wea raetem Bible olketa honest. Olketa no hol bak for storyim tru samting wea happen. Samfala man wea raet wea stap laef long datfala taem storyim nomoa olketa gud samting abaotem kantri and olketa leader bilong olketa. Bat olketa profet bilong Jehovah raet abaotem olketa gud samting and nogud samting wea pipol long Israel and olketa king bilong olketa duim. (2 Chron. 16:9, 10; 24:18-22) Olketa storyim tu rong samting wea olketa seleva duim, and wea olketa narawan wea worshipim Jehovah olketa duim. (2 Sam. 12:1-14; Mark 14:50) Wanfala young brata long Britain sei: “Wei for honest olsem hem samting wea staka pipol for raet olketa no savve duim. Diswan mekem iumi barava sure Jehovah nao givim kam Bible.”

11. Hao nao advaes insaed long Bible pruvim God nao givim kam Bible?

11 Taem pipol followim advaes long Bible long laef bilong olketa, olketa kasem gud samting. Diswan mekem olketa barava sure God nao givim kam Bible. (Readim Psalm 19:7-11.) Wanfala young sista long Japan sei: “Taem famili bilong mifala followim wanem Bible talem, mifala barava hapi. Mifala stap gud tugeta, wan mind, and showimaot love long each other.” Bible hem helpem staka pipol for luksavve samfala samting wea olketa bilivim hem no tru. (Ps. 115:3-8) Bible helpem pipol for depend long Jehovah, wea hem nao Olmaeti God. And tu, Bible storyim olketa nambawan promis for future. Bat pipol wea bilivim evolution mekem olketa samting long nature nao for kamap god bilong olketa. Olketa narawan sei gavman bilong man nao bae duim samting for mekem pipol garem gudfala future. Bat kam kasem distaem, olketa gavman hia no fit for stretem olketa problem long world.—Ps. 146:3, 4.

STORY GUD WITIM OLKETA NARAWAN

12, 13. Wanem nao wanfala gudfala wei for storyim creation and Bible long olketa narawan?

12 Taem iu story long olketa narawan abaotem creation and abaotem Bible, hem gud for savve long tingting bilong olketa firstaem. Samfala wea bilivim evolution olketa biliv wanfala God hem stap. Olketa sei God nao startim evolution for wakem evri samting wea laef. Samfala narawan sei masbi evolution hem tru bikos hem nao wanem olketa teachim long olketa skul. And samfala pipol wea biliv long God bifor olketa no biliv long hem nao distaem bikos long olketa nogud samting wea olketa religion duim. So taem iu story witim samwan, hem gud for faendemaot wanem hem bilivim and why hem bilivim datwan. Then lisin gud long wanem hem talem. Sapos iu duim olsem, maet bae hem willing for lisin long iu tu.—Titus 3:2.

13 Sapos samwan sei hem krangge samting for bilivim God nao wakem evri samting, hao nao bae iu story long hem? Askem hem long kaenfala wei for explainim hao nao laef hem start. Iu savve sei sapos evri samting wea laef hem kamap seleva, firstfala samting wea laef, example nao wanfala cell, mas fit for gohed wakem olketa nara cell wea semsem olsem hem tu. Wanfala professor long chemistry sei for cell hia gohed laef hem mas (1) garem samting olsem skin for protectim hem, (2) fit for kasem paoa and iusim datwan, (3) garem information wea bae kontrolem lukluk and hao hem bae grow, and (4) fit for copyim datfala information. Datfala professor sei tu: “Nomata wanfala barava smol samting wea laef bat hem needim staka samting for mekem hem gohed laef.”

14. Wanem tokpiksa nao iu savve iusim for story abaotem creation?

 14 Taem iu story abaotem creation long samwan, iu savve storyim tokpiksa wea aposol Paul iusim. Hem sei: “Iumi savve, evri haos man nao wakem, bat man wea wakem evri samting hem God.” (Heb. 3:4) Wanfala haos samwan nao mas designim and wakem. So olketa samting wea laef, wea design bilong olketa hem winim wanfala haos, samwan nao mas designim and wakem. Iu savve iusim tu olketa pablikeson bilong iumi for explainim diswan. Wanfala sista story witim wanfala young man wea no bilivim eni God hem stap. Hem givim hem tufala brochure wea iumi storyim long paragraf 5, and samting olsem wanfala week bihaen, datfala man sei: “Distaem nao mi bilivim God hem stap.” Datfala young man studyim Bible and gogo hem kamap spiritual brata bilong iumi.

15, 16. Wanem nao gudfala wei for story witim narawan abaotem Bible, and wanem nao goal bilong iumi?

15 Sapos samwan hem no sure wanem Bible talem hem tru, hao nao u savve story gud witim hem? Hem gud for faendemaot wanem hem bilivim, and wanem hem interest long hem. (Prov. 18:13) Sapos hem interest long science, storyim samfala example long Bible wea showimaot taem Bible storyim samting wea join witim science, wanem Bible talem hem tru. Sapos man hia interest long history, iu savve storyim wanfala samting wea happen bifor wea stap insaed olketa history buk. Then iu savve showim hem long Bible hao staka year bifor datfala samting hem happen, Bible storyim finis. Olketa narawan maet lisin long iu sapos iu storyim eni samting from Bible wea savve helpem olketa for garem gudfala laef, olsem advaes wea Jesus storyim long Sermon long Maunten.

16 Taem iumi story witim pipol, iumi no laek for argue witim olketa. Iumi laekem olketa for hapi for story witim iumi and for olketa lanem wanem Bible talem. So long kaenfala wei askem samfala kwestin long olketa, and then lisin gud long wanem olketa talem. Showimaot respect taem iu storyim wanem iu bilivim, especially long samwan wea age bilong hem winim iu. Sapos iu respectim olketa narawan, olketa tu bae respectim iu. And olketa bae tinghae long wei wea iu barava bilivim wanem Bible talem nomata iu young nomoa. Bat sapos samwan laek for argue and mekfani long wanem iu bilivim, no story witim hem.—Prov. 26:4.

DUIM SAMTING FOR STRONGIM FAITH BILONG IU

17, 18. (a) Hao nao iu savve strongim faith bilong iu long wanem Bible talem? (b) Wanem kwestin nao bae iumi storyim long nextfala study?

17 Maet iumi savve finis long olketa main teaching long Bible, bat iumi mas duim samfala samting moa for strongim faith bilong iumi. Iumi mas waka hard for studyim olketa deep samting long Bible, olsem wanfala man wea digdig for olketa spesol samting wea garem hae price. (Prov. 2:3-6) Wanfala nambawan wei for strongim faith bilong iu hem for readim full Bible. Hem gud for iu trae duim datwan insaed wan year. Wanfala circuit overseer sei datwan nao helpem hem for fren gud witim Jehovah taem hem young. Hem sei: “Wanfala samting wea helpem mi for luksavve Bible hem toktok bilong God hem nao taem mi readim full Bible. Taem mi duim olsem nao mi just minim gud olketa story long Bible wea mi herem taem mi pikinini.” Iusim olketa samting wea organization bilong Jehovah provaedem for duim research for helpem iu minim wanem iu readim. Samfala long olketa samting hia nao Watchtower Library long DVD, Watchtower ONLINE LIBRARY, Watch Tower Publications Index, or Research Index for Olketa Jehovah’s Witness.

18 Olketa dadi and mami, iufala nao mas teachim pikinini bilong iufala abaotem Jehovah. So wanem nao iufala savve duim for helpem olketa pikinini for garem strongfala faith long Jehovah? Bae iumi storyim hao iufala savve duim diswan long nextfala study.