WANFALA SISTA LONG POLAND MEKEM GUDFALA DISISON

“MI FIFTIN year taem mi baptaes, and sixfala month bihaen mi start for auxiliary pioneer. Bihaen wanfala year, mi kamap regular pioneer. Taem mi finisim secondary skul, mi askem circuit overseer for talem mi wea nao bigfala need hem stap for duim preaching waka. Mi laek lusim grani bilong mi wea mi stap witim wea hem no wanfala Jehovah’s Witness, and lusim homtaon for go preach long nara ples. Mi sorre tumas taem circuit overseer sei assignment bilong mi hem long homtaon bilong mi! Mi no talem hem feeling bilong mi abaotem datwan. Mi go and ting raonem wanem circuit overseer hem talem. Mi sei olsem long pioneer partner bilong mi: ‘Mi barava olsem Jonah stret. Bat gogo Jonah hem go long Nineveh. So mi tu mas duim assignment bilong mi.’

“Distaem mi pioneer long homtaon bilong mi for fofala year finis, and mi luksavve hem wise for mi followim direction wea mi kasem. Problem bilong mi nao mi garem tingting wea no stret. Distaem mi barava hapi. Evri month mi duim 24 Bible study. Mi thankiu long Jehovah bikos distaem mi study tu witim grani bilong mi wea savve againstim mi.”

WANFALA BIBLE STUDY LONG FIJI KASEM GUD SAMTING

Wanfala Bible study long Fiji mas disaed sapos hem bae attendim wanfala convention or go witim hasband bilong hem long wanfala birthday party. Hasband bilong hem letem hem for go long convention. Hem talem hasband bae hem kam long datfala party bihaen long convention. Bat bihaen long convention, hem disaed bae hem no go long datfala party bikos datwan maet affectim hem long spiritual wei.

Long datfala party, hasband bilong hem talem olketa relative bae waef bilong hem kam long party bihaen hem go long prea bilong hem. Olketa sei long hem: “Hard for hem kam ia, Olketa Jehovah’s Witness no celebratem birthday!” *

Hasband hia barava tinghae long wei wea waef bilong hem followim konsens bilong hem and duim samting followim wanem hem bilivim. From woman hia hem faithful, hem garem chance for preach long hasband bilong hem and long olketa narawan tu. Wanem nao kamaot from datwan? Hasband bilong hem start for studyim Bible and attendim olketa meeting witim waef bilong hem.

^ par. 7 Lukim “Kwestin From Reader” long Wastaoa bilong December 15, 2001.