Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  September 2016

Defendim Gud Nius Front Long Olketa Bigman

Defendim Gud Nius Front Long Olketa Bigman

“MI CHUSIM disfala man for talemaot nem bilong mi long pipol long olketa difren kantri and long olketa king.” (Acts 9:15) Jesus nao talem datwan abaotem wanfala Jew wea kamap Christian, wea bihaen hem kamap aposol Paul.

Wanfala long “olketa king” wea Paul preach long hem nao, King bilong Rome, Nero. Hao nao bae iu feel sapos iu mas storyim biliv bilong iu long bigman olsem? Paul no fraet for duim datwan so iumi tu laek for followim example bilong hem. (1 Cor. 11:1) Paul iusim law bilong kantri for defendim gud nius and iumi tu savve duim sem samting.

Law bilong Moses hem law wea pipol wea stap long Israel olketa followim. Olketa Jew wea stap long olketa nara kantri, olketa tu followim datfala law. Bihaen long Pentecost 33 C.E., olketa Jew wea kamap Christian no keepim nao Law bilong Moses. (Acts 15:28, 29; Gal. 4:9-11) Nomata olsem, Paul and olketa nara Christian no tok spoelem datfala Law, and datwan mekem staka Jew willing for lisin long gud nius. (1 Cor. 9:20) Staka taem Paul savve go long olketa sinagog for story long pipol wea savve long God bilong Abraham, and hem savve iusim olketa Hebrew Scripture for story long olketa.—Acts 9:19, 20; 13:5, 14-16; 14:1; 17:1, 2.

Olketa aposol stap long Jerusalem and organizem preaching waka from there. Plande taem olketa go long temple for teachim pipol. (Acts 1:4; 2:46; 5:20) Tu-thri taem nao Paul go long Jerusalem and gogo olketa kasholem hem long there. Olketa kotem hem and gogo olketa tekem hem go long Rome.

PAUL IUSIM LAW BILONG ROME

Wanem nao tingting bilong olketa bigman bilong Rome abaotem wanem Paul preach abaotem? For savve long datwan, hem gud for savve long tingting bilong pipol long Rome abaotem religion. Olketa no forcem pipol bilong olketa difren kantri wea Rome rulim for lusim religion bilong olketa sapos olketa religion hia no againstim gavman or brekem law bilong kantri.

Gavman bilong Rome letem olketa Jew for duim staka samting. Datfala buk Backgrounds of Early Christianity sei: “Olketa Jew savve kasem staka samting  anda long rul bilong Rome. . . . Olketa free for duim worship bilong olketa, and olketa bilong Rome no forcem olketa for worshipim god bilong olketa. Olketa savve followim law bilong olketa seleva long olketa community bilong olketa.” Olketa bilong Rome no forcem olketa Jew for joinim army tu. * Olketa law bilong Rome protectim Jew religion, and Paul iusim olketa law hia for defendim gud nius front long olketa bigman bilong Rome.

Pipol wea againstim Paul duim enikaen difren samting for mekem pipol and olketa bigman for againstim hem. (Acts 13:50; 14:2, 19; 18:12, 13) Tingim wantaem wea diswan happen. Olketa elder long Jerusalem herem story wea gogo raon wea sei Paul “teachim olketa Jew for no followim Law bilong Moses.” Kaen story olsem savve mekem olketa Jew wea just kamap Christian for tingse Paul no tinghae long arrangement bilong God. And tu, diswan savve mekem Hae Kot bilong olketa Jew for sei olketa Christian againstim Jew religion. Sapos datwan happen, olketa Jew wea kamap Christian savve kasem nogud samting. Pipol bae no story witim olketa or duim eni samting witim olketa, and tu, bae olketa stopem olketa Christian hia for preach long temple or long sinagog. So olketa elder talem Paul for duim samting wea bae showimaot olketa story wea gogo raon abaotem hem, hem no tru. Olketa sei hem mas go long temple and duim samting followim Law for kamap klin, wea diswan hem no samting wea God askem bat wea hem no rong tu for Paul duim.—Acts 21:18-27.

Taem Paul go long temple for duim datwan, olketa samting wea happen givim hem chance for “defendim datfala gud nius and for kasem raet for preachim datwan.” (Phil. 1:7) Long temple, olketa Jew raeot and laek for killim dae Paul. Bigman long army bilong Rome tekem Paul and putim hem long cell. Taem olketa redi for whipim Paul, hem talem olketa hem wanfala citizen bilong Rome. So olketa tekem Paul go long Caesarea, wea hem taon wea olketa bigman bilong Rome wea lukaftarem Judea olketa stap. Paul garem olketa spesol chance long Caesarea for preach long olketa bigman. Diswan maet mekem staka nara pipol for savve long biliv bilong olketa Christian.

Acts chapter 24 story abaotem taem wea Felix hem judgem case bilong Paul. Felix hem bigman bilong Rome wea rul long Judea, wea herem finis samfala samting abaotem biliv bilong olketa Christian. Olketa Jew sei Paul hem brekem 3-fala law bilong Rome. First wan, Paul hem mekem olketa Jew long evri ples wea Rome rulim for againstim gavman. Mek-tu, hem leadim wanfala nogud sekson wea mek trabol. Mek-thri, Paul trae for duim samting wea mekem temple for no holy, wea long datfala taem hem stap anda long rul bilong Rome. (Acts 24:5, 6) Sapos Paul guilty long 3-fala samting hia, panis for datwan nao hem mas dae.

Iumi olketa Christian interest for savve wanem nao Paul duim taem olketa accusim hem long olketa samting hia. Hem no raoa witim olketa and hem showimaot respect. Paul sei hem bilivim evri samting wea Law talem and wea olketa profet raet abaotem, and sei hem garem raet for worshipim “God bilong olketa grani bilong [hem].” Evri Jew wea stap anda long rul bilong Rome garem datfala raet tu. (Acts 24:14) Long olketa narataem, Paul storyim biliv bilong hem long nara bigman wea nem bilong hem Porcius Festus, and tu long King Herod Agrippa.

Gogo, from Paul no laekem wei for favorim wansaed for happen long kot case bilong hem, hem sei olsem: “Mi laekem King long Rome nao for judgem case bilong mi!” (Acts 25:11) Long datfala taem King nao garem bigfala paoa winim eni narawan.

KING JUDGEM CASE BILONG PAUL

Wanfala angel sei long Paul: “Iu bae kasem Rome and bae iu lukim King.” (Acts 27:24) Taem Nero, King bilong Rome, hem start for rul, hem sei hem bae no judgem evri case seleva. Long first eitfala year wea hem rul, hem markem olketa narawan nao for duim datfala waka. Datfala buk The Life and Epistles of Saint Paul sei taem Nero bae judgem wanfala case, hem savve duim datwan long haos bilong hem, and hem savve garem wanfala grup bilong olketa man wea garem hae position and bigfala savve for helpem hem.

 Bible no talem sapos Nero seleva nao judgem case bilong Paul or sapos hem markem narawan for duim datwan and report go bak long Nero. Nomata wanem, luk olsem Paul explainim gud hem worshipim God bilong olketa Jew and hem sapotim wei for evriwan mas stap anda long olketa wea rul. (Rome 13:1-7; Titus 3:1, 2) From Paul kamap free bihaen long datfala kot case, iumi sure Paul defendim gud datfala gud nius front long olketa bigman.—Phil. 2:24; Philem. 22.

DEFENDIM GUD NIUS DISTAEM

Jesus sei long olketa disaepol: “Olketa bae holem iufala and tekem iufala go long olketa bigman and king bikos iufala olketa disaepol bilong mi. Diswan bae givim iufala chance for storyim wanem iufala bilivim long olketa and long pipol from olketa nara kantri.” (Matt. 10:18) Hem wanfala nambawan privilege for duim diswan. From iumi defendim gud nius, iumi winim staka kot case. Nomata wanem olketa man disaedem long olketa kot case, Jehovah nao komandim iumi for preachim gud nius. Kingdom bilong God nomoa bae finisim wei for pipol againstim iumi and kotem iumi long wei wea hem no stret.—Eccl. 8:9; Jer. 10:23.

Distaem tu iumi savve mekhae long nem bilong Jehovah taem iumi storyim biliv bilong iumi long nara pipol. Olsem Paul, iumi shud no raoa witim olketa bat explainim gud wanem iumi bilivim. Jesus talem olketa disaepol bae olketa no need for ‘redyim firstaem samting wea olketa bae talem for ansarem toktok bilong olketa. Hem bae givim olketa wisdom and helpem olketa for savve wanem for talem, and olketa enemy bilong olketa bae no fit for talem eni samting nao.’—Luke 21:14, 15; 2 Tim. 3:12; 1 Pet. 3:15.

Taem olketa Christian defendim gud nius, staka taem olketa storyim gud nius long olketa king, olketa bigman, or olketa narawan, wea maet hem no isi for eniwan go preach long olketa. Samfala kot case wea pipol bilong Jehovah winim hem helpem olketa man wea mekem olketa law long kantri for changem samfala law mekem pipol free for toktok and for worship. Nomata iumi winim olketa kot case hia or nomoa, wei wea iumi no fraet taem pipol kotem iumi hem mekem God hapi.

Iumi mekhae long nem bilong Jehovah taem iumi storyim biliv bilong iumi long nara pipol

^ par. 8 Man for raet, James Parkes sei: “Olketa Jew savve celebratem olketa festival bilong olketa. Wei wea olketa bilong Rome letem olketa Jew for duim olketa samting hia olketa letem tu for olketa narawan. Hem wei bilong olketa long Rome for letem pipol wea olketa rulim for rulim olketa seleva long ples wea olketa stap.”