Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  October 2017

Olketa Chariot and Kraon wea Protectim Iu

Olketa Chariot and Kraon wea Protectim Iu

“Bae hem kamap tru sapos iufala followim wanem God bilong iufala Jehovah hem talem.”—ZECH. 6:15.

SONG: 17, 136

1, 2. Bihaen Zechariah lukim finis mek-seven vision, hao nao laef bilong olketa Jew long Jerusalem?

LONG end bilong datfala mek-seven vision, Zechariah garem staka samting for ting raonem. Masbi promis bilong Jehovah for panisim pipol wea no honest hem strongim hem. Bat no eniting change nomoa. Staka pipol gohed for duim olketa nogud samting, and datfala waka for buildim temple long Jerusalem hem nating finis tu. Why nao olketa Jew kwiktaem stop for duim datfala waka wea Jehovah givim long olketa? Waswe, olketa kam bak long Jerusalem for duim nomoa wanem olketa seleva laekem?

2 Zechariah savve olketa Jew wea kam bak long Jerusalem, olketa faithful pipol wea worshipim Jehovah. “Trufala God mekem olketa for garem tingting for laek” lusim haos and bisnis wea olketa garem long Babylon. (Ezra 1:2, 3, 5) Olketa lusim ples wea olketa savve gud long hem and muv go long ples wea staka long olketa nating lukim enitaem bifor. Olketa Jew hia willing for go bak bikos hem important tumas long olketa for buildim bak temple bilong Jehovah, nomata olketa mas wakabaot for 1,600 kilometer long olketa ples wea danger.

3, 4. Olketa wanem hard samting nao olketa Jew wea go bak long Jerusalem feisim?

 3 Tingim bigfala gogo bilong olketa Jew from Babylon go kasem Jerusalem. Olketa hia bae garem staka taem for tingting and story abaotem niu ples bilong olketa. Olketa olo storyim long olketa narawan hao Jerusalem and datfala temple luk naes tumas. (Ezra 3:12) Sapos iu nao followim olketa and hem firstaem bilong iu for lukim Jerusalem, hao nao feeling bilong iu? Waswe, bae iu sorre taem iu lukim grass grow and kavarem olketa building wea distroe, wall bilong datfala taon brek, and olketa big hol nomoa stap long ples wea olketa gate and taoa stap bifor? Waswe, bae iu start for comparem wall bilong Babylon wea big and strong witim wall bilong Jerusalem wea distroe? Nomata olsem, olketa Jew no wikdaon. Why nao olsem? Bikos Jehovah helpem and protectim olketa taem olketa kam bak long Jerusalem. Taem olketa kasem Jerusalem, olketa buildim wanfala altar long ples wea temple hem stap long hem bifor, and olketa offerim sakrifaes long Jehovah evriday. (Ezra 3:1, 2) Olketa strong and redi for duim datfala waka. Luk olsem no eni samting bae mekem olketa wikdaon.

4 Taem olketa Jew wakem bak datfala temple, olketa mas wakem bak datfala taon and haos bilong olketa tu. Olketa mas wakem garden for provaedem kaikai for famili bilong olketa. (Ezra 2:70) Bigfala waka nao bae olketa duim. Bat no longtaem bihaen, olketa enemy kam and trae for stopem olketa. Olketa enemy duim datwan for 15-fala year, and olketa Jew isisi start for wikdaon. (Ezra 4:1-4) Nara hard samting tu hem happen long 522 B.C.E., taem king bilong Persia givim order for olketa Jew stop for buildim bak Jerusalem. Datwan mekem hem luk olsem bae hem hard nao for olketa buildim bak datfala taon.—Ezra 4:21-24

5. Wanem nao Jehovah duim for helpem pipol bilong hem?

5 Jehovah luksavve pipol bilong hem mas strong and no fraet. So hem showim mek-eit vision long Zechariah for helpem pipol bilong hem luksavve hao hem lovem olketa and tinghae long wanem olketa duim for worshipim hem. Hem promis for protectim olketa sapos olketa gohed moa long datfala waka. And Jehovah sei olsem abaotem datfala waka for buildim bak temple: “Bae hem kamap tru sapos iufala followim wanem God bilong iufala Jehovah hem talem.”—Zech. 6:15.

ARMY BILONG OLKETA ANGEL

6. (a) Wanem nao Zechariah lukim long start bilong mek-eit vision? (Lukim piksa long start bilong study.) (b) Why nao olketa horse garem difren kala?

6 Datfala mek-eit vision wea Zechariah lukim, wea hem lastfala vision, savve barava strongim faith. (Readim Zechariah 6:1-3.) Tingim diswan, Zechariah lukim olketa horse pullim fofala chariot and olketa kam “midolwan long tufala maunten wea olketa wakem long copper.” Olketa horse hia garem difren kala, wea mekem hem isi for luksavve long olketa difren man wea raedem olketa chariot hia. Zechariah hem laek for savve, “Wanem nao olketa samting hia?” (Zech. 6:4) Iumi tu laek for savve bikos disfala vision affectim iumi.

Jehovah gohed for iusim olketa angel for protectim and strongim pipol bilong hem

7, 8. (a) Wanem nao tufala maunten piksarem? (b) Why nao olketa wakem tufala maunten long copper?

7 Long Bible, samfala taem olketa maunten savve piksarem olketa kingdom or gavman. Tufala maunten wea Zechariah lukim hem semsem witim tufala maunten wea profesi bilong Daniel storyim. Wanfala maunten hem piksarem rul bilong Jehovah ovarem evri samting and wea bae stap for olowe. And nara maunten hem piksarem Messiah Kingdom wea Jesus nao rulim start long 1914. (Dan. 2:35, 45) Start long datfala taem,  tufala maunten hia waka tugeta for duim spesol waka for mekem plan bilong God for earth kamap tru.

8 Why nao olketa wakem tufala maunten hia long copper? Copper hem wanfala metal wea hem shaen and expensive tumas. Dastawe Jehovah talem olketa Israelite for iusim copper taem olketa wakem tabernacle, and bihaen, datfala temple long Jerusalem. (Ex. 27:1-3; 1 Ki. 7:13-16) So wei wea olketa wakem tufala maunten hia long copper showimaot rul bilong Jehovah and Messiah Kingdom hem barava nambawan. Anda long rul bilong tufala, evriwan bae stap sef and kasem staka blessing.

9. Hu nao olketa wea raedem olketa chariot, and wanem nao assignment bilong olketa?

9 Wanem nao olketa chariot and olketa wea raedem piksarem? Olketa wea raedem chariot hem olketa angel, and maet hem olketa difren grup bilong olketa angel. (Readim Zechariah 6:5-8.) “Lord bilong full earth” sendem olketa go for duim wanfala spesol assignment. God sendem olketa angel hia go long olketa ples wea hem markem, for protectim pipol bilong hem, especially from “north,” wea hem nao Babylon. Long disfala vision, Jehovah laekem pipol bilong hem for savve hao olketa bae no slave moa long Babylon. Masbi datwan barava comfortim olketa wea buildim temple long Jerusalem long taem bilong Zechariah! Olketa luksavve hard for olketa enemy stopem olketa.

10. Hao nao profesi bilong Zechariah abaotem olketa chariot and olketa wea raedem helpem iumi distaem?

10 Distaem tu, Jehovah iusim olketa angel for protectim and strongim pipol bilong hem. (Mal. 3:6; Heb. 1:7, 14) Start long 1919, taem pipol bilong Jehovah kamap free from Bigfala Babylon, olketa enemy trae for stopem tru worship for no gohed. Nomata olsem, organization bilong hem grow and kamap big. (Rev. 18:4) From olketa angel protectim organization bilong Jehovah, iumi no need for fraet and tingse pipol bilong Jehovah bae slave moa long Bigfala Babylon. (Ps. 34:7) Iumi bae gohed hapi and busy taem iumi gohed worshipim Jehovah. Profesi bilong Zechariah helpem iumi for savve hao iumi sef and kasem protection from tufala maunten hia.

11. Why nao iumi shud no fraet taem olketa gavman kam for attakim pipol bilong God?

11 Klosap nao evri gavman long world bae join tugeta for attakim pipol bilong Jehovah. (Ezek. 38:2, 10-12; Dan. 11:40, 44, 45; Rev. 19:19) Profesi bilong Ezekiel storyim olketa hia olsem cloud wea kavarem full earth. Olketa raedem olketa horse and olketa kros fogud taem olketa kam for attakim pipol bilong God. (Ezek. 38:15, 16) * Waswe, iumi shud fraetem olketa? Nomoa! Army bilong Jehovah bae sapotim iumi. Long taem bilong bigfala trabol, olketa angel bilong Jehovah bae protectim pipol bilong hem, and olketa bae finisim eniwan wea againstim rul bilong Jehovah. (2 Thess. 1:7, 8) Iumi luk forward long datfala taem! Bat hu nao bae leadim army bilong Jehovah long heven?

JEHOVAH PUTIM KRAON LONG PRIEST WEA BAE KING

12, 13. (a) Wanem nao nara samting wea Jehovah talem Zechariah for duim? (b) Hao nao iumi savve datfala Niu Sut hem minim Jesus Christ?

12 Zechariah nomoa profet wea lukim eitfala vision hia. Bat bihaen, hem duim  samting wea olketa narawan bae lukim and wea savve encouragem olketa wea buildim bak temple bilong God. (Readim Zechariah 6:9-12.) Thrifala man wea nem bilong olketa hem Heldai, Tobijah, and Jedaiah olketa kam bak long Jerusalem from Babylon. Jehovah talem Zechariah for tekem olketa silver and gold from olketa man hia, and wakem long wanfala “barava naesfala kraon.” (Zech. 6:11, ftn.) Waswe, disfala kraon hem for Governor Zerubbabel, wea hem bilong tribe bilong Judah wea kam from laen bilong David? Nomoa. Jehovah talem Zechariah for putim datfala kraon long hed bilong Joshua, wea hem Hae Priest. Masbi samting wea hem duim mekem pipol wea lukim sapraes tumas.

13 Waswe, wei wea olketa putim datfala kraon long hed bilong Hae Priest Joshua showimaot hem kamap king? Nomoa. Joshua no kam from laen bilong David, so hem no fit for kamap king. Wei wea olketa putim kraon long hed bilong Joshua hem piksarem samting wea bae happen long future long wanfala king and priest, wea nem bilong hem Niu Sut. Bible sei datfala Niu Sut, hem Jesus Christ.—Isa. 11:1; Matt. 2:23. *

14. From Jesus hem King and Hae Priest, wanem waka nao hem duim?

14 Jesus hem King and Hae Priest tu. Hem leadim army bilong Jehovah, wea hem nao olketa angel, and hem waka hard for protectim pipol bilong God long disfala world wea pipol raf tumas. (Jer. 23:5, 6) Klosap nao Christ bae winim olketa enemy bilong God, for showimaot hem sapotim rul bilong God and sevem pipol bilong Hem. (Rev. 17:12-14; 19:11, 14, 15) Go kasem datfala taem, Jesus, or Niu Sut, garem bigfala waka for duim.

HEM BAE BUILDIM DATFALA TEMPLE

15, 16. (a) Long wanem wei nao pipol bilong God kamap klin and free distaem, and hu nao duim datwan? (b) Hao nao bae laef long earth long end bilong wan thousand year wea Christ hem rul?

15 Jesus kasem assignment tu for “buildim temple bilong Jehovah.” (Readim Zechariah 6:13.) Hem duim datfala waka long 1919, taem hem mekem pipol bilong God kamap free from Bigfala Babylon. Jesus hem strongim moa Christian kongregeson and markem datfala “wakaman wea faithful and wise.” Olketa anointed brata hia lukaftarem important waka wea gohed insaed spiritual temple long disfala earth. (Matt. 24:45) And tu, hem klinim pipol bilong God long spiritual wei, and helpem olketa for worship long wei wea God acceptim.—Mal. 3:1-3.

16 Jesus and 144,000 wea king and priest, bae rul for wan thousand year. Long datfala taem olketa bae helpem olketa faithful man for kamap perfect. Taem olketa king and priest hia finisim waka bilong olketa, olketa wea worshipim Jehovah nomoa bae stap long disfala earth. Then, tru worship bae kamap evriwea long earth!

HELP FOR SAPOTIM BUILDING WAKA

17. Wanem nao nara samting wea Jehovah talem for strongim olketa Jew, and hao nao evri samting hem talem affectim olketa?

17 Hao nao message wea Zechariah talem affectim olketa Jew long datfala taem? Jehovah promis for helpem and protectim olketa mekem olketa finisim datfala building waka. Datfala promis mekem olketa for garem hope. Bat maet olketa tingse from olketa no staka, bae hem hard for olketa finisim datfala big waka. So nara samting wea Zechariah talem, mekem olketa for no fraet and for no daot. Jehovah sei staka narawan tu bae “kam and help for buildim temple bilong Jehovah,” and Heldai, Tobijah, and Jedaiah kam finis for helpem olketa. (Readim Zechariah 6:15.)  Olketa Jew sure Jehovah hem sapotim waka bilong olketa. Olketa no fraet and buildim bak datfala temple nomata king bilong Persia stopem datfala waka. Samting wea king bilong Persia duim hem olsem bigfala maunten wea blokem olketa, bat Jehovah kwiktaem aotem datwan. Gogo, olketa finis for buildim datfala temple long 515 B.C.E. (Ezra 6:22; Zech. 4:6, 7) Wanem Jehovah talem long olketa Jew bifor showimaot bigfala waka bae gohed insaed spiritual temple distaem.

Jehovah bae no forgetim love wea iumi showimaot for hem! (Paragraf 18, 19 storyim diswan)

18. Hao nao Zechariah 6:15 kamap tru long taem bilong iumi?

18 Distaem, staka million pipol worshipim Jehovah. Olketa willing for givim “olketa gudfala samting” long Jehovah, olsem taem, strong, and olketa material samting bilong olketa. Taem olketa duim olsem, datwan showimaot olketa sapotim bigfala waka wea gohed for buildim spiritual temple bilong Jehovah. (Prov. 3:9) And iumi savve sure Jehovah barava tinghae long wei wea iumi faithful for duim datwan. Tingim, Heldai, Tobijah, and Jedaiah olketa tekem kam olketa silver and gold and Zechariah iusim datwan for wakem wanfala kraon. Datfala kraon hem wanfala “memory,” or “reminder,” wea helpem olketa for tingim contribution wea olketa givim for sapotim tru worship. (Zech. 6:14; ftn.) Jehovah bae no forgetim waka wea iumi duim, and love wea iumi showimaot for hem.—Heb. 6:10.

19. Hao nao olketa vision bilong Zechariah affectim iumi?

19 Long olketa last day distaem, pipol bilong Jehovah fit for duim bigfala waka. Olketa duim olsem bikos Jehovah blessim olketa and Christ leadim olketa. Iumi hapi from iumi part long organization bilong Jehovah wea no eni samting savve spoelem, and iumi stap sef insaed. And iumi savve plan bilong Jehovah for tru worship bae kamap evriwea long earth. Tinghae long privilege wea iu garem for worshipim Jehovah witim pipol bilong hem, and “followim wanem God bilong [iu] Jehovah hem talem.” Then King and Hae Priest bilong iumi and olketa angel savve protectim iu. Duim best bilong iu for gohed sapotim tru worship. Jehovah bae gohed for protectim iu long olketa last day distaem and for olowe!

^ par. 11 For samfala information moa, lukim “Kwestin From Reader” long Wastaoa bilong May 15, 2015, page 29-30.

^ par. 13 Nazarene wea iumi transleitim “man bilong Nazareth” hem kam from wanfala Hebrew toktok wea minim “niu sut.”