Why nao Jesus tok againstim wei for swear long samting taem man mekem serious promis?

LAW bilong Moses hem sei man savve swear taem hem mekem serious promis long wei for talem kaen toktok olsem, “Mi talem disfala promis front long God” or “Mi talem disfala promis long nem bilong Jehovah.” Bat, long taem bilong Jesus hem wei bilong olketa Jew for swear taem olketa mekem eni promis nomoa and diswan kamap normal samting. Olketa duim diswan for mekem pipol bilivim wanem olketa talem, bat tufala taem Jesus tok againstim datwan. Hem sei: “Sapos iu sei iu bae duim samting, iu mas duim datwan. Sapos iu sei iu bae no duim samting, then no duim datwan.”—Matt. 5:33-37; 23:16-22.

Datfala Theological Dictionary of the New Testament showimaot hao datfala buk bilong olketa Jew, Talmud, hem storyim olketa promis wea olketa Jew shud keepim and olketa promis wea hem olraet for olketa brekem. Datwan showimaot hem normal samting for olketa Jew mekem olketa serious promis, or for swear for mekem pipol bilivim wanem olketa talem hem tru.

No Jesus seleva nomoa tok againstim diskaen wei for promis long eni samting nomoa. Olsem example, man wea raetem history bilong olketa Jew, Flavius Josephus storyim wanfala smol grup bilong olketa Jew wea againstim wei for mekem promis long eni samting nomoa. Datfala grup ting diskaen wei for mekem promis hem barava nogud winim wei for laea. Olketa sei sapos iu need for mekem wanfala serious promis for mekem narawan bilivim iu, datwan showimaot iu man for laea nomoa. Wanfala buk bilong olketa Jew wea olketa kolem Wisdom of Sirach sei tu: “Man wea evritaem laek for talem olketa serious promis hem wanfala rabis man.” Jesus tok againstim wei for mekem promis abaotem olketa samting wea no important nomoa. Sapos iumi evritaem talem tru samting, iumi bae no need for swear long eni samting for mekem olketa narawan bilivim wanem iumi talem hem tru.