Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  October 2017

Hem Showimaot Kaenfala Fasin

Hem Showimaot Kaenfala Fasin

LONG wanfala smol taon long Gujarat, long India, dadi bilong John baptaes and kamap wanfala Jehovah’s Witness long samting olsem 1957. Bat John witim faevfala brata and sista bilong hem, and mami bilong olketa, Roman Catholic, and olketa strong tumas long lotu bilong olketa. From diswan, olketa heitim tumas religion bilong dadi bilong olketa.

Wantaem, dadi bilong John askem John for go givim leta long wanfala brata long kongregeson. Bat long datfala morning, John katem finger bilong hem taem hem trae for openem wanfala drum. So hem iusim pis kaleko for taengem finger wea blood. Nomata olsem, hem wakabaot for go givim datfala leta bikos hem laek obeyim dadi bilong hem.

Taem John arrive long datfala haos, hem givim leta hia long waef bilong datfala brata, wea hem wanfala Jehovah’s Witness tu. Hem lukim finger bilong John wea garekil and hem laek for helpem hem. So hem iusim medicine for klinim and bandagem datfala finger. Then hem mekem kap tea for John. And hem gohed for story kaen long John abaotem Bible.

From datfala woman hem kaen, tingting bilong John abaotem olketa Witness start for change. So hem askem datfala woman abaotem tufala biliv bilong Olketa Jehovah’s Witness wea hem difren from biliv bilong Roman Catholic. Hem askem sapos Jesus hem God and sapos olketa Christian shud prea long Mary. From datfala sista savve long Gujarati languis, wea hem languis bilong John, hem fit for story long hem and iusim Bible for ansarem olketa kwestin bilong hem. Then hem givim hem datfala buk “This Good News of the Kingdom.”

Taem John readim datfala buk, hem luksavve samting wea hem readim hem tru. So hem go askem tufala sem kwestin hia long priest bilong olketa. Datfala priest kros fogud and sutim hem long wanfala Bible, and singaot olsem: “Iu Satan nao! Showim long Bible wea nao hem sei Jesus hem no God. Showim wea nao hem sei iumi shud no worshipim Mary. Showim mi!” John seke fogud taem datfala priest tok olsem. Hem talem datfala priest, hem bae no lotu moa long eni Catholic church. And kam kasem distaem, hem no duim datwan!

John start for studyim Bible witim olketa Witness, acceptim truth, and start for worshipim Jehovah. Gogo, samfala long famili bilong hem duim sem samting tu. Bihaen samting olsem 60 year, datfala scar long finger bilong John stap yet. Datwan evritaem remindim hem long kaenfala fasin bilong datfala sista, wea gogo datwan helpem hem for worshipim Jehovah long full laef bilong hem.—2 Cor. 6:4, 6.