Waswe, for plantim rabis grass long garden bilong narawan hem samting wea really happen bifor?

Disfala Digest bilong 1468 wea King bilong Rome, Justinian, hem pablisim hem wanfala long staka record wea storyim olketa law and olketa kot case long bifor

LONG Matthew 13:24-26, Jesus sei: “Kingdom bilong God hem olsem wanfala man wea plantim olketa gudfala seed long planteison bilong hem. Taem evriwan sleep, enemy hem kam and plantim rabis grass midolwan olketa wheat hia, and then hem go. Long semtaem wea datfala wheat hem grow and garem frut, olketa rabis grass grow tu.” Pipol wea raetem olketa buk no really sure sapos disfala tokpiksa hem samting wea happen bifor. Bat olketa buk wea story abaotem olketa law bilong Rome bifor showimaot diswan hem samting wea really happen.

Wanfala Bible dictionary sei: “Law bilong Rome sei man wea plantim rabis grass long garden bilong enemy bilong hem, hem brekem law. From Rome garem disfala law, datwan showimaot diswan hem samting wea happen staka taem.” Wanfala savveman saed long law, Alastair Kerr, sei long year 533 C.E., King bilong Rome, Justinian, pablisim buk bilong hem, Digest. Buk hia garem shortfala review bilong olketa law bilong Rome, and hem storyim wanem olketa nara savveman talem abaotem olketa law long olketa year bilong 100-250 C.E. Long datfala buk (Digest, 9.2.27.14), Ulpian, wanfala savveman saed long law story abaotem wanfala kot case long mek-tu century wea bigman bilong Rome, Celsus, hem judgem. Disfala kot case hem abaotem wanfala man wea plantim rabis grass long garden bilong nara man, and datwan spoelem datfala garden. Buk hia storyim samfala samting wea law talem for kaen case olsem. Hem storyim olketa samting wea eni man wea plantim rabis grass for spoelem garden bilong narawan, hem mas duim for changem bak datwan.

From kaen samting olsem hem happen anda long rul bilong Rome long bifor, datwan showimaot wanem Jesus storyim hem samting wea really happen.

Olketa wanem samting nao gavman bilong Rome givim paoa long olketa bigman bilong olketa Jew for disaedem?

LONG first century, Rome nao rulim Judea. Rome markem wanfala governor for rulim Judea and hem tu komanda bilong olketa soldia bilong Rome long there. Main waka bilong hem for kolektem tax for Rome and for mek sure peace hem stap long there. Eniwan wea brekem law or eniwan wea kosim problem bae gavman bilong Rome panisim hem for datwan. Bat saed long olketa nara samting bilong datfala province olketa letem olketa bigman bilong datfala province nao for deal witim.

Hae Kot bilong olketa Jew herem wanfala case

Sanhedrin hem Hae Kot bilong olketa Jew wea mekem and olketa nao lukaftarem and deal witim olketa samting saed long law bilong olketa Jew. Olketa nara kot tu stap long Judea. Luk olsem olketa nara kot hia nao deal witim klosap evri difren kaen kot case, and olketa bigman bilong Rome no join insaed olketa case hia. Bat wanfala samting nao olketa kot bilong olketa Jew no garem paoa for duim. Gavman bilong Rome nomoa garem raet for disaedem sapos wanfala criminal hem fit for dae or nomoa. Bat diswan no happen evritaem. Wanfala example long diswan nao hem taem olketa member bilong Sanhedrin kotem Stephen and sutim hem dae long ston.—Acts 6:8-15; 7:54-60.

Wanfala savveman wea nem bilong hem Emil Schürer, storyim hao nomata datfala Hae Kot bilong olketa Jew garem bigfala paoa, olketa bilong Rome savve tekovarem eni case, especially sapos olketa tingse man wea olketa accusim hem againstim gavman. Wanfala example long diswan hem taem Claudius Lysias, wea hem komanda bilong army, givim order for olketa putim aposol Paul long prison, wea hem citizen bilong Rome.—Acts 23:26-30.