Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  November 2016

Olketa Lusim False Religion

Olketa Lusim False Religion

“Iufala mas go aot from hem nao.”—REV. 18:4.

SONG: 101, 93

1. Hao nao iumi savve pipol bilong God bae kamap free from Bigfala Babylon, and olketa wanem kwestin nao bae iumi storyim?

IUMI lanem long study bifor diswan, olketa faithful Christian kamap prisoner long Bigfala Babylon. Bat iumi hapi for savve olketa no prisoner for olowe. Iumi savve long diswan bikos God hem sei pipol bilong hem mas “go aot” from evri false religion. (Readim Revelation 18:4.) Diswan showimaot olketa Christian bae lusim Bigfala Babylon. Iumi barava laek for savve long wanem taem nao olketa kamap free! Bat firstaem, bae iumi storyim ansa bilong olketa kwestin hia: Hao nao tingting bilong olketa Bible Student abaotem Bigfala Babylon bifor 1914? Hao nao preaching waka hem gohed long taem bilong World War I? Waswe, pipol bilong God olketa prisoner long Bigfala Babylon long datfala taem bikos olketa need for stretem tingting bilong olketa?

“BIGFALA BABYLON HEM FOLDAON”

2. Wanem nao olketa Bible Student disaed for duim bifor World War I?

2 Plande year bifor World War I (1914-1918), Charles Russell and olketa nara Bible Student luksavve olketa religion  wea sei olketa Christian no teachim truth insaed Bible. So olketa barava stap klia from olketa false religion hia. Long year 1879, Zion’s Watch Tower sei evri church wea sei olketa followim Christ bat wea olketa sapotim gavman, olketa part long Bigfala Babylon wea Bible sei hem olsem wanfala jury woman.—Readim Revelation 17:1, 2.

3. Wanem nao olketa Bible Student duim for showimaot olketa no part long false religion moa? (Lukim piksa long start bilong study.)

3 Olketa wea faithful for worshipim God luksavve sapos olketa gohed for sapotim false religion, God bae no blessim olketa. So staka long olketa raetem leta long church bilong olketa for talem bae olketa no member long church moa. Samfala readim leta bilong olketa front long evriwan long church bilong olketa. Long samfala church wea hem tambu for duim olsem, olketa sendem leta long evri member bilong church. Olketa Bible Student showimaot klia olketa no laek for part long false religion! Staka handred year bifor datwan, sapos olketa duim olsem, bae olketa killim olketa dae. Bat kasem 1870, olketa gavman long staka kantri no barava sapotim olketa church olsem olketa duim bifor. Pipol free nao for story abaotem Bible, and for talemaot olketa no agree witim wanem olketa church teachim.

4. Long taem bilong World War I, wanem nao olketa Bible Student duim wea showimaot tingting bilong olketa abaotem Bigfala Babylon?

4 Olketa Bible Student luksavve olketa mas duim moa samting winim for just talem olketa long famili, olketa fren, and olketa long church olketa no sapotim false religion. Olketa laekem evriwan for savve Bigfala Babylon hem olsem wanfala jury woman from hem no faithful long God. So start long December 1917 go kasem olketa month long start bilong 1918, tu-thri thousand Bible Student waka hard for givimaot 10,000,000 copy bilong wanfala tract wea garem wanfala article wea garem title “Bigfala Babylon Hem Foldaon.” Datfala tract hem storyim tru samting abaotem olketa church wea sei olketa Christian. Olketa bigman bilong church barava kros tumas! Bat olketa Bible Student no stop for duim datfala waka. Olketa gohed preach bikos olketa laek for obeyim disfala toktok: “God nao hem ruler wea mifala mas obeyim, no olketa man.” (Acts 5:29) Wanem nao diswan showimaot? Diswan showimaot long taem bilong World War I, olketa Christian hia no prisoner long Bigfala Babylon, bat olketa lusim false religion, and helpem olketa narawan for duim sem samting tu.

DUIM BIGFALA WAKA LONG TAEM BILONG WORLD WAR I

5. Wanem nao showimaot olketa brata barava strong for preach long taem bilong World War I?

5 Long bifor, iumi sei God no hapi long pipol bilong hem long taem bilong World War I bikos olketa no strong for duim preaching waka. From diswan, iumi sei Jehovah letem olketa for prisoner long Bigfala Babylon for lelebet taem. Bat olketa brata and sista wea stap long olketa year midolwan 1914 and 1918 sei olketa traem best bilong olketa for duim preaching waka. For savve gud long really samting wea happen long olketa Bible Student long datfala taem bae helpem iumi minim gud samfala samting wea Bible storyim.

6, 7. (a) Wanem nao olketa hard samting wea kasem olketa Bible Student long taem bilong World War I? (b) Wanem nao showimaot olketa Bible Student barava waka hard?

 6 Long taem bilong World War I, olketa Bible Student barava busy for duim preaching waka. Bat olketa kasem samfala hard samting tu. Tingim tufala samting hia. First samting, olketa Bible Student no getius for iusim Bible nomoa taem olketa preach. Olketa savve nomoa hao for givimaot olketa pablikeson and pipol lanem truth from olketa pablikeson hia. So taem gavman tambuim datfala buk The Finished Mystery long start bilong 1918, staka brata faendem hem hard for preach. Mek-tu samting, long datfala sem year, disfala sik Spanish flu hem start for kasem pipol. Disfala barava nogud sik hem isi for kasem narawan so datwan mekem hem no isi for olketa brata go long nara ples and for preach. Nomata olsem, olketa Bible Student traem best bilong olketa for gohed long preaching waka.

Olketa Bible Student hia barava waka hard! (Paragraf 6, 7 storyim diswan)

7 Long 1914, datfala smol grup bilong olketa Bible Student showim long pipol datfala “Photo-Drama of Creation.” Datfala Drama hem olketa slide and shortfala movie wea garem kala and saond, and hem niu samting long datfala taem. Datfala Drama hem story abaotem olketa man from taem wea God wakem Adam go kasem end bilong datfala 1,000 year rul bilong Christ. Long 1914, wea hem firstfala year wea olketa showim disfala Drama, winim 9,000,000 pipol nao lukim. Tingim diswan. Datfala namba hem winim namba bilong Olketa Jehovah’s Witness raonem full world distaem! Olketa report showimaot long 1916, winim 809,000 pipol attendim olketa meeting long United States, and long 1918, klosap 950,000 pipol nao attendim olketa meeting. Olketa Bible Student hia barava waka hard!

8. Hao nao olketa brata wea lead strongim olketa Bible Student long taem bilong World War I?

8 Long taem bilong World War I, olketa brata wea lead waka hard for redyim olketa Bible buk and for encouragem olketa Bible Student. Datwan strongim olketa for gohed duim preaching waka.  Richard Barber, wea hem strong for duim preaching waka long datfala taem, hem sei: “Nomata hem no isi, samfala traveling overseer gohed long waka bilong olketa, and mifala gohed for wakem The Watch Tower magasin and sendem go long Canada nomata gavman tambuim olketa magasin hia.” Hem sei tu: “Mi hapi tumas for sendem go samfala pocket-size copy bilong datfala buk The Finished Mystery long samfala brata and sista wea police tekem olketa buk bilong olketa. Brata Rutherford askem mifala for arrangem olketa convention long samfala taon long west saed bilong United States, and sendem olketa brata for givim olketa tok for encouragem olketa brata and sista.”

NEED FOR STRETEM TINGTING

9. (a) Why nao pipol bilong God need for stretem tingting bilong olketa long olketa year midolwan 1914 and 1919? (b) Nomata olketa Bible Student mas stretem tingting bilong olketa, datwan no showimaot wanem samting?

9 Olketa Bible Student need for stretem tingting bilong olketa abaotem samting. Olketa no garem stretfala tingting abaotem wanem nao hem minim for stap anda long olketa gavman. (Rome 13:1) Dastawe samfala long olketa teksaed long taem bilong datfala war. Olsem example, taem president bilong United States askem pipol for prea for peace long May 30, 1918, The Watch Tower encouragem olketa Bible Student for prea tu. Samfala long olketa givim selen for sapotim war, and tu-thri long olketa joinim army and go long faet tu. Bat nomata olketa mas stretem tingting bilong olketa abaotem olketa samting hia, hem no stret for iumi sei datwan nao reason why God letem olketa for prisoner long Bigfala Babylon. Tru samting nao, kasem taem bilong World War I olketa still no lusim evribit Bigfala Babylon.—Readim Luke 12:47, 48.

10. Wanem nao olketa Bible Student duim wea showimaot olketa tinghae long laef?

10 Nomata olketa Bible Student no barava minim gud evri samting abaotem wei for no teksaed, olketa savve hem rong for killim dae narawan. Dastawe tu-thri brata wea joinim army long World War I olketa karem gun bat olketa disaed strong for no iusim datwan for killim dae narawan. Samfala wea no laek for killim dae narawan olketa putim olketa long front laen mekem olketa nao first wan for dae.

11. Wanem nao gavman trae for duim taem olketa Bible Student no laek for faet long war?

11 Wei wea olketa brata faithful long God hem mekem Devil barava kros. From datwan, hem “iusim law for mek trabol” long pipol bilong God. (Ps. 94:20) Wanfala bigman long army bilong United States, James Franklin Bell, talem Brata Rutherford and Brata Van Amburgh gavman trae for mekem wanfala niu law for killim dae eniwan wea no laek for faet long war. Olketa laek panisim olketa Bible Student. Datfala bigman barava kros and sei long Brata Rutherford datwan no kamap wanfala law bikos president bilong United States nao stopem. Then datfala bigman sei: “Bat bae mifala faendem eni wea for panisim iufala and bae mifala no givap!”

12, 13. (a) Why nao olketa judgem eitfala brata for stap long prison for staka year? (b) Waswe, olketa brata wikdaon and no strong for obeyim Jehovah from olketa stap long prison? Minim kam.

12 Gogo gavman faendem wei for panisim olketa Bible Student. Olketa arrestim Brata Rutherford and Brata Van Amburgh witim nara sixfala brata bilong  Watch Tower Society. Judge long datfala kot case sei olketa brata hia wanfala barava nogud grup wea danger winim wanfala grup bilong olketa soldia bilong Germany. Hem sei olketa againstim gavman, and againstim tu army and olketa church, dastawe olketa shud kasem bigfala panis. (Faith on the March, long p. 99, wea A. H. Macmillan raetem) So olketa judgem eitfala brata hia for stap for staka year long prison, long Atlanta, Georgia. Bat taem war hem finis, olketa brata hia kamaot from prison and kot sei olketa no guilty long eni samting.

13 Nomata eitfala brata hia stap long prison olketa gohed strong for obeyim law bilong God. Hao nao iumi savve long diswan? Olketa raet go long president bilong United States and askem hem for aotem olketa from prison. Insaed long datfala leta olketa sei Bible talem for mas no killim dae narawan, so eniwan wea dedicate long God and no laek for obeyim hem, God bae no hapi long hem and bae hem dae. Olketa sei hem nao reason why olketa bae hard for killim dae narawan. Olketa no fraet for talem go olketa toktok hia long president! Diswan showimaot olketa brata hia garem tingting for mas gohed faithful long Jehovah.

PIPOL BILONG GOD KAMAP FREE!

14. Olsem Bible talem, wanem nao happen midolwan 1914 go kasem 1919?

14 Malachi 3:1-3 explainim samting wea happen long olketa Bible student start long 1914 go kasem 1919. (Readim.) Jehovah God, wea hem “trufala Lord,” and Jesus Christ, wea hem “man for talem message abaotem datfala agreement,” tufala kam for chekim “olketa son bilong Levi,” wea piksarem olketa anointed Christian. Bihaen Jehovah stretem olketa and mekem olketa kamap klin, olketa redi for kasem wanfala niu assignment. Long 1919, Jesus markem wanfala “wakaman wea faithful and wise,” wea kasem assignment for leadim and givim spiritual kaikai long evri pipol bilong God. (Matt. 24:45) Long datfala taem nao pipol bilong God kamap free from Bigfala Babylon. Start long datfala taem, olketa lanem staka samting abaotem Jehovah and datwan mekem olketa barava lovem hem. Olketa barava tinghae long olketa blessing bilong hem! [1]

15. Wanem nao iumi savve duim for showimaot iumi hapi for kamaot from Bigfala Babylon?

15 Iumi barava hapi for kamap free from Bigfala Babylon. Nomata Satan trae for finisim tru worship long earth bat hem no savve duim datwan. Bat iumi mas evritaem tingim why nao Jehovah mekem iumi free. Wanem Jehovah laekem nao hem for evriwan mas sev. (2 Cor. 6:1) Bat staka million pipol stap yet insaed long false religion. Olketa needim iumi for helpem olketa for kamaot from false religion. Iumi laek for followim example bilong olketa faithful brata bilong iumi wea helpem pipol kamap free from Bigfala Babylon.

^ [1] (paragraf 14) Staka samting wea happen long olketa Jew wea prisoner long Babylon hem semsem witim samting wea happen long olketa Christian bihaen wei for apostate hem start. Bat iumi no savve sei wei wea olketa Jew prisoner long Babylon hem wanfala profesi wea piksarem samting wea happen long olketa anointed Christian. Samfala samting hem difren. Example nao, olketa Jew prisoner long Babylon for 70 year, bat olketa Christian prisoner long Bigfala Babylon for staka year winim datwan.