Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  May 2017

 LAEF STORY

Mi No Hol Bak for Teachim Olketa Narawan Nomata Mi Earpas

Mi No Hol Bak for Teachim Olketa Narawan Nomata Mi Earpas

Mi baptaes long 1941, taem mi 12 year. Bat long 1946 nao mi just minim gud olketa tru teaching long Bible. Why nao olsem? Bae mi storyim samting wea happen long laef bilong mi.

LONG samting olsem year 1910, mami and dadi bilong mi lusim Tbilisi, long Georgia, and muv go long Canada. Olketa stap long wanfala smol haos long wanfala farm klosap long Pelly, Saskatchewan, long west saed long Canada. Mi born long 1928, and mi nao lastborn long sixfala pikinini. Sixfala month bifor mi born, dadi bilong mi hem dae. And taem mi baby nomoa mami bilong mi hem dae tu. No longtaem bihaen, Lucy, wea hem firstborn sista bilong mi hem dae tu taem hem 17 year. So uncle Nick tekem mifala olketa pikinini and lukaftarem mifala.

Wanfala day, taem mi smol, mi pullim tail bilong wanfala long olketa horse bilong mifala. Olketa long famili bilong mi lukim datwan and wari fogud nogud datfala horse kikim mi. Olketa singaotem mi for stop bat mi nating herem olketa bikos mi no tane go for olketa. Bat gud nao mi no kasem eni nogud samting, and long datfala taem nao olketa luksavve mi earpas.

Wanfala gud fren bilong mifala sei hem bae gud for uncle bilong mi sendem mi go long skul bilong olketa wea earpas wea stap long Saskatoon, long Saskatchewan. Datfala skul hem farawe from ples wea mifala stap, so mi fraet bikos mi faev year nomoa. Mi savve go visitim famili bilong mi taem skul holiday and long olketa nara holiday. Gogo, mi savve long saen languis, and mi hapi for plei witim olketa nara pikinini.

MI LANEM TRU SAMTING LONG BIBLE

Long 1939, big sista bilong mi, Marion, hem maritim Bill Danylchuck, and tufala lukaftarem mi and sista bilong mi, Frances. Tufala nao first wan long famili bilong mifala wea studyim Bible witim Olketa Jehovah’s Witness. Taem mi kam bak long haos long taem bilong skul holiday, olketa traem best bilong olketa for storyim wanem olketa lanem long Bible long mi. Hem no isi for mi minim olketa bikos olketa no  savve long saen languis. Bat olketa luksavve mi laekem olketa samting wea mi lanem abaotem Jehovah. Mi luksavve tufala followim wanem tufala lanem long Bible, so mi savve followim olketa taem olketa go preaching. No longtaem bihaen, mi laek for baptaes. So long September 5, 1941, Bill baptaesim mi insaed wanfala drum wea olketa fulimap long wata from wanfala well. Datfala wata hem cold tumas!

Mi and olketa narawan wea earpas long wanfala convention long Cleveland, Ohio, long 1946

Long 1946, taem mi kam bak for holiday, mifala go long wanfala convention long Cleveland, Ohio, U.S.A. Long first day bilong datfala convention, tufala sista bilong mi raetem olketa note mekem mi minim olketa tok long datfala day. Bat long mek-tu day, mi hapi tumas for joinim wanfala grup bilong saen languis. So mi barava enjoyim datfala convention bikos mi minim gud olketa samting wea Bible teachim!

TEACHIM TRUTH LONG OLKETA NARAWAN

Long datfala taem, World War II hem just finis and wei for mekhae long kantri kamap big tumas. Bihaen datfala convention, mi disaed strong for faithful long Jehovah taem mi long skul. So mi stop nao for salutim flag and singim national anthem. And tu, mi stop for joinim olketa celebration long taem bilong olketa holiday and mi stop for attendim olketa program bilong church. Olketa teacher no hapi long mi, so olketa traem enikaen samting for mekem mi fraet and storyim olketa laea samting mekem mi changem tingting bilong mi. Olketa skulfren savve long samting wea happen, and datwan givim mi chance for preach long olketa. Gogo, Larry Androsoff, Norman Dittrick, and Emil Schneider kamap Olketa Jehovah’s Witness and gohed faithful kasem distaem.

Taem mi go long olketa nara taon, mi evritaem laek for preach long olketa wea earpas. Olsem example, taem mi long Montreal, mi go long ples bilong olketa earpas and mi preach long Eddie Tager, wanfala young wan wea joinim wanfala rabis gang. Hem joinim saen languis kongregeson long Laval, Quebec, go kasem taem hem dae last year. Mi meetim tu Juan Ardanez, wea hem olsem olketa long Beroea bifor wea laek for duim research for mek sure wanem hem lanem hem kam from Bible. (Acts 17:10, 11) Hem tu kamap Witness and hem wanfala elder long Ottawa Kongregeson, long Ontario, wea faithful go kasem taem hem dae.

Mi duim street witnessing long olketa year bilong 1950

Long 1950, mi go stap long Vancouver. Nomata mi laekem tumas for preach long olketa wea earpas, mi bae no forgetim taem wea mi preach long Chris Spicer, wea mi meetim long street wea hem no earpas. Hem acceptim magasin subcription and laekem mi for go meetim hasband bilong hem, Gary. Mi go long haos bilong olketa, and mifala iusim olketa note for story, so mifala story for longfala taem. Bihaen datwan, mi no lukim tufala moa go kasem taem wea mi meetim tufala long wanfala convention long Toronto,  Ontario. Long datfala day, Gary hem baptaes. Datwan mekem mi for tingim, hem important for iumi gohed preach long pipol bikos iumi no savve wanem taem nao datfala seed bilong truth bae grow.

Bihaen, mi muv go bak long Saskatoon. Long there, wanfala woman askem mi for study witim tufala twin gele bilong hem wea earpas, Jean and Joan Rothenberger. Tufala tu go long sem skul wea mi skul long hem bifor. No longtaem bihaen, tufala storyim wanem tufala lanem long Bible long olketa classmate bilong tufala. Gogo, faevfala student long class bilong tufala kamap Olketa Jehovah’s Witness. Wanfala nao hem Eunice Colin. Taem mi duim last year bilong mi long datfala skul nao mi meetim Eunice. Long datfala taem, hem givim mi wanfala lolly and hem laekem mitufala for fren. Gogo Eunice hem kamap waef bilong mi!

Mi and Eunice long 1960 and long 1989

Taem mami bilong Eunice savve hem studyim Bible, hem talem principal long skul for stopem Eunice for no study. Nomata datfala principal trae for stopem hem and tekem olketa buk bilong Eunice for studyim Bible, Eunice disaed strong for worshipim Jehovah. Taem hem laek for baptaes, dadi and mami bilong hem sei: “Iu bae no stap witim mifala sapos iu kamap wanfala Jehovah’s Witness!” Taem Eunice 17 year, hem lusim haos and hem go stap witim wanfala Witness famili. Hem gohed for study gogo hem baptaes. Long 1960, taem mitufala marit, dadi and mami bilong Eunice nating kam long marit bilong mitufala. Bat bihaen samfala year, olketa luksavve long biliv bilong mifala, and hao mifala trainim olketa pikinini and datwan mekem olketa respectim mifala.

JEHOVAH LUKAFTAREM MI

Son bilong mi Nicholas and waef bilong hem Deborah, tufala waka long London Bethel

From mitufala earpas, hem no isi for mifala teachim 7-fala boy bilong mitufala wea no earpas. Bat mifala  traem best for helpem olketa for savve long saen languis mekem mifala story tugeta and teachim olketa abaotem Jehovah. Olketa brata and sista long kongregeson barava helpem mifala long diswan. Olsem example, samwan long kongregeson raetem wanfala note for talem mitufala wanfala boy bilong mifala hem talem nogud toktok insaed long Kingdom Hall. So stretawe mitufala stretem datfala pikinini long there. Fofala long olketa boy bilong mi, James, Jerry, Nicholas, and Steven, faithful for worshipim Jehovah witim olketa waef and pikinini bilong olketa. Fofala evriwan olketa elder. And tu, Nicholas and waef bilong hem, Deborah, tufala waka long saen languis transleison long branch office long Britain, and Steven and waef bilong hem, Shannan, waka long saen languis transleison long branch office long United States.

Thrifala son bilong mi, James, Jerry, and Steven witim waef bilong olketa sapotim preaching waka long saen languis

Wanfala month bifor mek-foti wedding anniversary bilong mitufala, Eunice hem dae from cancer. Hem no givap nomata hem sik for longfala taem bikos hope bilong hem for resurrection strongim hem. Mi barava luk forward for lukim hem taem hem laef bak.

Faye and James, Jerry and Evelyn, Shannan and Steven

Long February 2012, mi foldaon and brekem hip bilong mi. Mi luksavve mi needim help, so mi go stap witim wanfala son bilong mi and waef bilong hem. Mifala joinim Calgary Saen Languis Kongregeson and mi gohed elder long there. Iu savve, diswan hem firstaem for mi joinim wanfala saen languis kongregeson! Start kam long 1946, mi joinim nomoa olketa English kongregeson. So wanem nao helpem mi for gohed gud long spiritual wei? Jehovah barava lukaftarem mi olsem hem promis hem bae duim for lukaftarem olketa pikinini wea no garem dadi. (Ps. 10:14) Mi barava tinghae long olketa wea willing for raetem note, olketa wea lanem saen languis, and olketa wea duim saen for mi.

Taem mi 79 year, mi attendim pioneer skul long saen languis

Samfala taem mi barava feel nogud and laek for givap nomoa bikos mi no minim wanem olketa narawan storyim, or samfala taem mi tingse olketa no minim mifala wea earpas. Bat long olketa taem olsem, mi tingim toktok wea Peter talem long Jesus wea sei: “Lord, no eniwan moa for mifala followim. Toktok bilong iu nomoa savve mekem man laef olowe.” (John 6:66-68) Mi lane for patient olsem olketa nara brata and sista wea earpas wea stap insaed truth for longtaem. Mi lane for depend long Jehovah and organization bilong hem and datwan hem barava helpem mi! Distaem mi garem staka spiritual kaikai long languis bilong mi, and mi enjoyim wei for associate witim olketa narawan long olketa meeting and convention long American Saen Languis. Mi barava hapi and kasem staka gud samting taem mi worshipim nambawan God bilong iumi, Jehovah.