Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  May 2016

 History Bilong Iumi

Olketa wea Garem Waka for Preach

Olketa wea Garem Waka for Preach

LONG aftanun bilong Monday, September 1, 1919, samting olsem 1,000 pipol hipap for firstfala day bilong convention long Cedar Point, Ohio, U.S.A. Tu-thri day bifor datwan, hem bin rain and bigfala wind, bat long datfala day, weather hem naes fogud. Building wea olketa hipap insaed garem 2,500 chair for pipol sidaon. Long datfala aftanun winim 2,000 pipol moa arrive long boat, car, and olketa train. Long Tuesday, staka pipol moa kam so olketa mas sidaon aotsaed andanit olketa big tree for datfala full program.

Wanfala brata sei hem naes tumas for sidaon aotsaed for datfala convention long ples wea luk naes olsem. Olketa leaf bilong olketa tree mekem shadow long kaleko bilong olketa brata, and naesfala wind blow kam from Lake Erie.

Nomata ples hem luk naes, samting wea barava spesol nao hem wei wea evriwan wea hipap olketa barava hapi. Wanfala niuspepa tu sei disfala sekson olketa hapi fogud. Olketa Bible Student hia hapi for hipap tugeta bikos long tu-thri year bifor 1919, olketa feisim staka hard taem. Olsem example, long taem bilong war pipol againstim olketa, wei for divaed kamap insaed olketa kongregeson, Brooklyn Bethel hem klos daon, and staka brata go long prison. Eitfala long olketa hia hem olketa brata wea leadim organization, and kot sei olketa bae stap long prison for 20 year. *

Long olketa hard taem hia, samfala Bible Student wikdaon and olketa stop nao for duim preaching waka. Bat klosap evriwan traem best bilong olketa for gohed preach nomata gavman againstim olketa. Wanfala policeman sei nomata hem warnim olketa Bible Student for no preach, olketa talem hem bae “olketa gohed nomoa for preach go kasem end.”

Long olketa hard taem hia, olketa faithful Bible Student prea long Jehovah for leadim and lukaftarem olketa. Then long 1919, olketa hapi for hipap tugeta long Cedar Point. Wanfala sista sei hem laek for savve hao nao olketa bae startim moa waka bilong God. Staka narawan garem sem tingting tu. Olketa barava laek for gohed duim waka bilong God.

“GA”—WANFALA NIU TUL!

Long datfala full week olketa wea hipap barava laek  for savve wanem nao mining bilong tufala leta hia “GA” wea olketa lukim long convention program, olketa welkam card, and olketa saen wea stap long ples wea convention kamap. Long Friday bilong datfala week, Brata Joseph Rutherford storyim long 6,000 pipol wea hipap wanem nao tufala leta hia “GA” hem minim. “GA” hem minim The Golden Age, wea hem wanfala niu magasin for iusim long ministry. *

Brata Rutherford sei olsem abaotem olketa anointed Christian: “From olketa garem faith olketa lukim taem wea evri trabol bae finis and olketa lukim wanfala Golden Age bae kamap taem Messiah hem rul. . . . Olketa luksavve olketa garem privilege and responsibility for talemaot rul bilong Messiah long full world. Hem waka wea God givim long olketa.”

The Golden Age hem magasin wea storyim olketa tru samting and wea givim hope long pipol. Olketa Bible Student bae iusim disfala magasin for offerim subscription long pipol long haos tu haos. Taem Brata Rutherford askem olketa hu nao laek for duim disfala waka, evriwan long audience nao standap. Then olketa singim big disfala song “Send out thy light and truth, O Lord.” Brata Judge Norris sei: “Singsing bilong mifala hem olsem hem sekem olketa tree nao from mifala sing laod fogud.”

Bihaen long program olketa brata and sista laen ap for staka hour bikos olketa laek for tekem subscription for datfala magasin. Mabel Philbrick sei: “Mifala hapi tumas for herem mifala garem moa wanfala waka for duim!” Staka narawan garem sem tingting tu.

OLKETA WEA GAREM WAKA FOR PREACH

Samting olsem 7,000 Bible Student redi for duim datfala waka. Datfala tract Organization Method and datfala buklet To Whom the Work Is Entrusted storyim hao olketa bae duim datfala waka: Wanfala niu department for lukaftarem disfala waka hem start long Bethel, wea olketa kolem Service Department. Evri kongregeson bae garem wanfala Service Komiti and wanfala director for givimaot olketa instruction wea kam from organization. Olketa kongregeson bae divaedem each territory for garem 150 go kasem 200 haos. Evri Thursday evening olketa kongregeson bae garem Service Meeting wea olketa savve storyim olketa experience and givim field service report.

Herman Philbrick sei: “Taem mifala go bak, mifala busy nao for duim datfala waka for offerim subscription.” Staka pipol interest long wanem olketa storyim. Beulah Covey sei: “From war hem just finis and staka nogud samting happen, pipol hapi for herem story abaotem wanfala taem wea evri problem bae finis.” Arthur Claus sei: “Olketa long kongregeson sapraes tumas from staka pipol nao interest for tekem subscription.” Tufala month bihaen olketa printim firstfala copy bilong The Golden Age, olketa offerim klosap 500,000 copy bilong magasin hia, and 50,000 pipol tekem subscription.

Brata Alexander Macmillan sei datfala article “Gospel of the Kingdom,” insaed The Watch Tower bilong July 1, 1920, hem nao firstfala taem wea organization encouragem evri brata and sista raonem world for preach abaotem Kingdom bilong God. Datfala article encouragem evri anointed Christian for “talemaot long evriwan long world Kingdom long heven hem klosap for kam.” Distaem staka narawan waka witim olketa brata bilong Christ for preach long pipol taem olketa weitim olketa gudfala samting wea bae kamap taem Messiah hem rul.

^ par. 5 Lukim Jehovah’s Witnesses—Proclaimers of God’s Kingdom, chap. 6, “A Time of Testing (1914-1918).”

^ par. 9 Long 1937, olketa changem nem bilong disfala magasin The Golden Age for kamap Consolation and long 1946 hem kamap Awake!