Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  June 2016

Waswe, Iu Tingim Yet?

Waswe, Iu Tingim Yet?

Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Trae for ansarem olketa kwestin hia:

Wanem nao savve helpem parents for trainim teenager bilong olketa for worshipim Jehovah?

Hem barava important for parents lovem teenager bilong olketa and showimaot gudfala example long wei for hambol. And tu, hem important for parents garem wei for luksavve and traem best for minim feeling bilong teenager bilong olketa.—w15 11/15, page 9-11.

Waswe, Peter nao firstfala pope?

Matthew 16:17, 18 no sei Peter nao bae kamap hed bilong Christian kongregeson. Bible showimaot Jesus nao hem hed bilong kongregeson. (1 Pet. 2:4-8)—wp16.1, page 12-14.

Wanem nao iumi shud tingim bifor iumi toktok?

For toktok bilong iumi hem encouragem narawan, iumi shud tingim (1) stretfala taem for story (Eccl. 3:7), (2) wanem for talem (Prov. 12:18), and (3) hao for story (Prov. 25:15). —w15 12/15, page 19-22.

Waswe, hem stret for mekhae long brata or sista wea kaikaim bred and drinkim wine long Memorial?

Olketa Christian shud no mekhae long olketa brata or sista olsem. Olketa anointed Christian no laekem iumi for duim datwan. Olketa no laek for advertisem disfala spesol wei wea olketa fren witim God. (Matt. 23:8-12)—w16.01, pp. 23-24.

Wanem nao helpem Abraham for fren witim God, and wanem nao iumi savve lanem from datwan?

Abraham savve long Jehovah. Maet hem lane abaotem Jehovah from Shem. And Abraham lukim wei wea Jehovah helpem hem and famili bilong hem. Iumi laek for duim sem samting tu.—w16.02, page 9-10.

Hu nao disaedem wea for putim olketa chapter and verse insaed long Bible?

Olketa sei Stephen Langton, wanfala bigman long church long mek-13 century, hem nao putim olketa chapter insaed long Bible. Samfala Jew wea copyim olketa Hebrew Scripture divaedem long olketa verse, and long mek-16 century, savveman Robert Estienne divaedem olketa Christian Greek Scripture long olketa verse. —wp16.2, page 14-15.

Taem Satan traem Jesus, waswe, hem tekem Jesus go long temple, or hem showim temple long Jesus long vision?

Iumi no barava sure. Toktok long Matthew 4:5 and Luke 4:9 maet minim Satan hem showim temple long Jesus long wanfala vision, or maet hem minim Jesus standap long part long temple wea barava hae.—w16.03, page 31-32.

Long wanem wei nao ministry bilong iumi savve olsem dew?

Dew hem isisi foldaon from skae, hem mekem olketa plant grow gud and olketa gohed for laef. Dew hem blessing wea kam from God. (Deut. 33:13) Waka wea evriwan wea worshipim Jehovah duim long ministry hem savve helpem pipol long evri kantri for kasem gud samting.—w16.04, page 4.