“Pipol bilong Israel, herem kam disfala toktok: Jehovah nao God bilong iumi, and wanfala Jehovah nomoa hem stap.”—DEUT. 6:4.

SONG: 138, 112

1, 2. (a) Why nao staka pipol savve long toktok long Deuteronomy 6:4? (b) Why nao Moses talem datfala toktok?

FOR staka handred year finis, olketa Jew pipol savve talem toktok long Deuteronomy 6:4 long wanfala spesol prea bilong olketa. Olketa kolem datfala prea Shema, wea hem first word long datfala scripture long Hebrew languis. Staka Jew savve talem disfala prea evri morning and evening long worship bilong olketa.

2 Toktok long datfala scripture hem insaed long olketa lastfala toktok bilong Moses for olketa Israelite. Hem talem datwan long year 1473 B.C.E. taem olketa Israelite hipap long Moab and redi for akrosim Jordan River for tekovarem Promis Land. (Deut. 6:1) Moses leadim pipol hia for 40 year finis, and hem laekem olketa for no fraet mekem olketa savve deal witim olketa hard taem wea bae kasem olketa. Olketa mas trustim God bilong olketa, Jehovah, and gohed faithful long hem. So Moses encouragem olketa for duim olsem. Bihaen hem storyim Ten Komandment and olketa  nara law wea Jehovah givim olketa, Moses talem datfala barava important toktok long Deuteronomy 6:4, 5. (Readim.)

3. Olketa wanem kwestin nao bae iumi storyim long disfala study?

3 Olketa Israelite savve God wea olketa worshipim hem Jehovah, and “wanfala Jehovah nomoa hem stap.” Olketa Israelite wea faithful worshipim wanfala God nomoa, wea hem tu God bilong olketa grani bilong olketa, Abraham, Isaac, and Jacob. So why nao Moses talem olketa moa “wanfala Jehovah nomoa hem stap”? Hao nao datwan join witim wei for lovem God long full heart, soul, and strong bilong iumi? And hao nao toktok long Deuteronomy 6:4, 5 hem fitim iumi distaem?

“WANFALA JEHOVAH NOMOA HEM STAP”

4, 5. (a) Why nao Moses talem olketa Israelite “wanfala Jehovah nomoa hem stap”? (b) Long wanem wei nao Jehovah hem difren from olketa nara god?

4 Hem Barava Difren. Datfala toktok “wanfala Jehovah nomoa hem stap” showimaot Jehovah hem barava difren from eni narawan and no eniwan olsem hem. Why nao Moses talem datfala toktok? Luk olsem hem no trae for pruvim trinity teaching hem rong. Jehovah nao wakem heven and earth and hem nao ruler bilong universe. Hem nomoa trufala God, and no eni nara god olsem hem. (2 Sam. 7:22) So datfala toktok bilong Moses helpem olketa Israelite for no forgetim olketa mas worshipim Jehovah nomoa. Olketa shud no followim wei bilong pipol wea stap raonem olketa wea worshipim staka false god. Pipol hia tingse olketa god bilong olketa savve kontrolem samfala samting long nature.

5 Olsem example, pipol long Egypt worshipim Ra, wea hem god bilong sun, Nut, wea hem woman god bilong skae, Geb, wea hem god bilong earth, and Hapi, wea hem god bilong Nile River. And olketa bilong Egypt worshipim staka animal tu. Jehovah showimaot hem strong winim olketa false god hia taem hem mekem Tenfala Trabol for kasem pipol long Egypt. Staka pipol long Canaan tu worshipim Baal, wanfala false god wea olketa sei hem nao givim laef long evri samting. Olketa sei tu hem god bilong skae, rain, and big wind. Pipol long staka ples trustim Baal for protectim olketa. (Num. 25:3) Taem Moses sei “wanfala Jehovah nomoa hem stap,” hem laekem olketa Israelite for rememberim God bilong olketa, Jehovah, hem nomoa “trufala God” wea barava difren from olketa nara god.—Deut. 4:35, 39.

6, 7. Wanem nao datfala toktok “wanfala Jehovah nomoa hem stap” showimaot, and hao nao datwan pruvim man fit for trustim hem?

6 No Savve Change. Datfala toktok “wanfala Jehovah nomoa hem stap” showimaot tu iumi fit for trustim plan bilong Jehovah and evri samting wea hem duim. Jehovah God hem evritaem faithful, duim wanem hem promisim, and hem no savve change. Olsem example, hem talem long Abraham olketa wea kam from laen bilong hem bae stap long Promis Land. And Jehovah duim staka mirakol for mekem datfala promis kamap tru. Nomata 430 year hem go pas bihaen Jehovah talem datfala promis, plan bilong hem no change.—Gen. 12:1, 2, 7; Ex. 12:40, 41.

7 Staka handred year bihaen, Jehovah sei olketa Israelite nao olketa witness bilong hem and sei long olketa: “Mi nao God. No eni nara God stap firstaem long mi and no eni nara God moa kamap bihaen long mi.” Jehovah talem olketa tu hao plan bilong hem no savve change. Hem sei: “Mi nao God wea no savve change.” (Isa. 43:10, 13; 44:6; 48:12) Olketa Israelite garem nambawan privilege for worshipim God wea no savve change and wea olketa fit for trustim hem! Iumi tu garem datfala nambawan privilege.—Mal. 3:6; Jas. 1:17.

8, 9. (a) Wanem nao Jehovah laekem olketa wea worshipim hem for duim? (b) Wanem nao Jesus talem wea showimaot iumi tu mas followim samting wea Moses talem?

 8 So Moses talem olketa Israelite Jehovah bae evritaem lovem olketa and lukaftarem olketa. From datwan, Jehovah laekem olketa for worshipim hem nomoa and for lovem hem long full heart, soul, and strong bilong olketa. Dadi and mami mas evritaem story abaotem Jehovah long olketa pikinini mekem olketa tu bae worshipim Jehovah nomoa.—Deut. 6:6-9.

9 Plan bilong Jehovah hem no savve change, so wanem hem laekem pipol bilong hem for duim bae no change tu. Sapos iumi laekem Jehovah for hapi long worship bilong iumi, iumi mas worshipim hem nomoa and lovem hem long full heart, mind, and strong bilong iumi. Jesus sei diswan nao barava important law wea winim evri nara law. (Readim Mark 12:28-31.) So distaem bae iumi storyim wanem iumi savve duim for showimaot iumi luksavve “wanfala Jehovah nomoa hem stap.”

WORSHIPIM JEHOVAH NOMOA

10, 11. (a) Hao nao iumi savve showimaot iumi worshipim Jehovah nomoa? (b) Hao nao olketa young Hebrew wea stap long Babylon showimaot olketa worshipim Jehovah nomoa?

10 Jehovah nao hem God bilong iumi, and iumi worshipim hem nomoa. Hem no laekem iumi for worshipim eni nara god or duim eni samting wea join witim false worship taem iumi worshipim hem. Jehovah hem no just wanfala god wea winim olketa nara god or wea hem garem paoa winim olketa. Jehovah nao hem trufala God, and hem nomoa iumi shud worshipim.—Readim Revelation 4:11.

11 Long buk bilong Daniel, iumi savve read abaotem olketa young Hebrew, wea nem bilong olketa Daniel, Hananiah, Mishael, and Azariah. Olketa showimaot olketa worshipim Jehovah nomoa taem olketa no kaikaim kaikai wea Jehovah sei hem no klin. And thrifala fren bilong Daniel hia no willing for baodaon long gold image wea Nebuchadnezzar wakem. Olketa faithful for worshipim Jehovah nomoa.—Dan. 1:1–3:30.

12. Wanem nao iumi mas keakea long hem saed long worship bilong iumi?

12 Worship bilong iumi for Jehovah nao mas first samting long laef bilong iumi, and iumi shud no letem olketa narafala samting for kamap important winim datwan. Wanem nao olketa samting hia? Taem Jehovah givim Tenfala Komandment, hem sei pipol bilong hem mas no worshipim olketa narafala god. Olketa mas no worshipim eni idol. (Deut. 5:6-10) Distaem, staka wei for worshipim idol hem stap, and maet hem no isi for luksavve long samfala wei hia. Bat wanem Jehovah laekem hem no change, wea diswan showimaot “wanfala Jehovah nomoa hem stap.” Distaem bae iumi storyim wanem iumi savve duim for stap klia long wei for worshipim idol.

13. Wanem nao samfala samting wea maet kamap important long iumi winim wei for worshipim Jehovah?

13 Long Colossae 3:5 (readim), Bible story abaotem samfala samting wea savve spoelem wei wea iumi fren witim Jehovah. Datfala scripture sei wei for greedy hem semsem witim wei for worshipim idol. Why nao olsem? Taem iumi laekem tumas wanfala samting, olsem for kasem staka selen and olketa expensive samting, datwan savve kontrolem laef bilong iumi gogo hem kamap olsem god bilong iumi. Evri samting wea Colossae 3:5 storyim hem join witim wei for greedy, wea hem semsem witim wei for worshipim idol. So sapos iumi laekem tumas olketa samting hia, maet olketa kamap important long iumi winim wei for worshipim Jehovah. Iumi mas no letem eni samting for stopem iumi for  worshipim Jehovah long full heart bilong iumi.

14. Wanem nao aposol John warnim iumi abaotem?

14 Aposol John warnim iumi abaotem semkaen samting tu. Hem sei sapos eniwan lovem olketa samting long world, wea hem nao for man “laekem nogud samting wea body and eye bilong hem laekem, witim tu wei for man show-off witim samting wea hem garem,” datfala man “no lovem Dadi long heven.” (1 John 2:15, 16) So iumi mas lukluk gud long iumiseleva nogud nao iumi lovem olketa samting long world. Maet iumi luksavve iumi start for laekem olketa nogud hapitaem, associate witim pipol long world, or iumi laek followim stael kaleko and lukluk bilong olketa. Or maet iumi aftarem hae education bikos iumi laek for kasem olketa “bigfala samting.” (Jer. 45:4, 5) Niu world hem klosap tumas for kam nao. So iumi mas no forgetim datfala important toktok wea Moses talem! Sapos iumi luksavve and barava sure “wanfala Jehovah nomoa hem stap,” bae iumi worshipim hem nomoa and duim wanem hem laekem.—Heb. 12:28, 29.

GAREM WAN MIND

15. Why nao Paul talem olketa Christian long first century olketa worshipim wanfala God nomoa?

15 Datfala toktok “wanfala Jehovah nomoa hem stap” showimaot Jehovah laekem evriwan wea worshipim hem for garem wan mind and waka gud tugeta. Long Christian kongregeson long first century, olketa garem olketa Jew, pipol bilong Greece, Rome, and olketa narafala ples. Culture and samting wea olketa laekem and no laekem hem difren. Bikos long datwan, hem no isi for samfala followim olketa teaching bilong Christ, or for lusim wanem olketa duim bifor. So Paul laekem olketa Christian hia for no forgetim hao olketa worshipim wanfala God nomoa, wea hem nao Jehovah.—Readim 1 Corinth 8:5, 6.

16, 17. (a) Wanem profesi nao kamap tru long distaem, and wanem nao kamaot from datwan? (b) Wanem nao savve spoelem wei wea iumi wan mind?

 16 Waswe long olketa kongregeson long taem bilong iumi? Profet Isaiah sei “long olketa last day,” pipol from evri kantri bae worshipim Jehovah tugeta. Bae olketa sei: “Hem bae teachim iumi long olketa wei bilong hem and iumi bae wakabaot long stretfala road bilong hem.” (Isa. 2:2, 3) Iumi hapi tumas from iumi lukim datfala profesi hem kamap tru distaem! Olketa brata and sista bilong iumi kam from difren kantri, story long difren languis, and garem difren culture. Bat iumi evriwan wan mind for worshipim Jehovah. Nomata olsem, from iumi evriwan difren, samfala taem hem no isi for deal witim narawan.

Waswe, iu waka hard for helpem kongregeson garem wan mind? (Paragraf 16-19 storyim diswan)

17 Olsem example, hao nao iu ting long olketa brata and sista wea garem difren culture? Maet languis, kaleko, wei, and kaikai bilong olketa hem barava difren from iu. Waswe, iu no laek associate witim olketa bikos olketa difren from iu? Waswe, iu associate nomoa witim olketa wea iufala kam from sem ples? Hao nao iu ting long olketa elder long kongregeson, circuit, or branch office wea olketa young winim iu, or wea kam from difren kantri? Sapos iumi no careful, maet olketa samting hia affectim tingting bilong iumi and spoelem wei wea iumi wan mind.

18, 19. (a) Wanem advaes nao Paul talem long Ephesus 4:1-3? (b) Wanem nao iumi savve duim for helpem kongregeson gohed garem wan mind?

18 Wanem nao savve helpem iumi for no garem kaen tingting olsem? Paul givim gudfala advaes long olketa Christian long Ephesus. Pipol wea stap long datfala taon olketa rich, and kam from staka difren ples. (Readim Ephesus 4:1-3.) Paul encouragem olketa for hambol, garem naesfala wei, patient, and lovem narawan. Olketa fasin hia olketa olsem olketa strongfala post wea sapotim wanfala haos. Bat for keepim gud wanfala haos, man mas waka hard tu for lukaftarem. Paul laekem olketa Christian long Ephesus for waka hard for “keepim nao wei for wan mind wea holy spirit helpem [olketa] for garem.”

19 Iumi evriwan mas waka hard for helpem kongregeson for garem wan mind. Wanem nao savve helpem iumi long datwan? First samting, iumi mas showimaot olketa fasin wea Paul storyim, olsem for hambol, garem naesfala wei, patient, and lovem narawan. Mek-tu samting, iumi mas waka hard for helpem kongregeson for “stap gud tugeta.” Wei for feel nogud long narawan savve spoelem wan mind wea iumi garem, so iumi mas waka hard for stap gud witim narawan mekem kongregeson gohed garem wan mind.

20. Hao nao iumi savve showimaot iumi luksavve “wanfala Jehovah nomoa hem stap”?

20 “Jehovah nao God bilong iumi, and wanfala Jehovah nomoa hem stap.” Datfala toktok hem garem bigfala mining! Datfala toktok bilong Moses hem helpem olketa Israelite for no givap taem olketa kasem olketa hard samting taem olketa tekovarem Promis Land. Toktok hia savve strongim iumi tu for gohed faithful long datfala big trabol and helpem iumi for stap gud witim olketa narawan long niu world. Iumi mas gohed for worshipim Jehovah nomoa. Iumi mas lovem Jehovah and worshipim hem long full heart, mind, and strong bilong iumi. And tu, iumi mas waka hard for stap gud witim olketa brata and sista bilong iumi. Sapos iumi gohed for duim olketa samting hia, Jesus bae judgem iumi and sei iumi olketa sheepsheep, and bae hem talem olsem long iumi: “Iufala wea Dadi bilong mi long heven blessim iufala, iufala kam. Dadi bilong mi bae givim long iufala datfala Kingdom wea hem redyim for iufala start kam long taem wea olketa man start for born long earth.”—Matt. 25:34.