Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  June 2016

Man wea holem olketa samting for raet witim hem piksarem Jesus Christ. Hem nao bae putim mark long forhed bilong olketa wea bae sev

Kwestin From Reader

Kwestin From Reader

Long vision bilong Ezekiel, hu nao man wea holem olketa samting for raet witim hem piksarem, and hu nao sixfala man wea karem olketa samting for faet olketa piksarem?

Olketa man hia piksarem olketa army long heven wea organizem wei for finisim Jerusalem long bifor and wea olketa bae finisim disfala nogud world bilong Satan long Armageddon. Diswan nao niufala wei wea iumi minim disfala vision bilong Ezekiel. Bae iumi storyim why iumi sei olsem.

Bihaen Ezekiel lukim long wanfala vision olketa nogud samting wea pipol long Jerusalem duim, hem lukim nara vision wea showimaot wanem bae happen bifor datfala taon hem finis long 607 B.C.E. Hem lukim sixfala man wea karem olketa samting for faet. Hem lukim tu wanfala man wea “werem naesfala kaleko” and hem holem “olketa samting for raet witim.” (Ezek. 8:6-12; 9:2, 3) God talem man hia for go long datfala taon and “putim mark long forhed bilong olketa man wea feel nogud and wea krae from evri rabis samting wea pipol duim long datfala taon.” Then, hem talem olketa man wea karem olketa samting for faet for killim dae evriwan long datfala taon wea no garem datfala mark. (Ezek. 9:4-7) Wanem nao iumi lanem from datfala vision, and hu nao man wea holem olketa samting for raet witim hem piksarem?

Ezekiel lukim disfala vision long 612 B.C.E., and firstfala taem wea datfala profesi kamap tru hem taem army bilong Babylon finisim Jerusalem long 607 B.C.E. Nomata olketa long Babylon no worshipim Jehovah, hem iusim olketa nao for panisim pipol bilong hem wea apostate and for finisim Jerusalem. (Jer. 25:9, 15-18) Bat Jehovah no finisim gudfala pipol taem hem finisim nogud pipol. Jehovah sevem olketa Jew wea no duim olketa nogud samting wea olketa nara pipol long Jerusalem duim.

Ezekiel no duim datfala waka for putim mark long forhed bilong pipol long Jerusalem and hem no help for finisim datfala taon. Bat God iusim olketa angel nao for organizem wei for finisim Jerusalem. So disfala profesi helpem iumi for minim samting wea happen long heven bifor Jerusalem hem finis. Jehovah talem olketa angel for organizem wanem bae happen for panisim nogud pipol long datfala taon and for sevem olketa wea raeteous. *

Long bifor, iumi sei datfala man wea holem olketa samting for raet witim hem piksarem olketa anointed Christian distaem. Iumi sei olketa wea acceptim message abaotem Kingdom nao kasem mark for sev. Bat distaem, wei wea iumi minim diswan hem change. Matthew 25:31-33 hem sei Jesus nao duim waka for judgem pipol. Bae hem duim datwan long taem bilong datfala big trabol. Olketa wea olsem sheepsheep bae sev, and olketa wea olsem goat bae finis.

Tingim faevfala samting wea iumi savve lanem from datfala vision bilong Ezekiel:

  1. Ezekiel and Jeremiah warnim pipol bilong God abaotem wei wea Jerusalem bae finis. Isaiah tu hem duim sem samting plande year bifor. Distaem Jehovah iusim wanfala smol grup bilong olketa anointed Christian for givim spiritual kaikai long pipol bilong hem, and for warnim pipol abaotem bigfala trabol wea bae kam. And tu, evri Christian kasem encouragement for duim datfala waka for warnim pipol.—Matt. 24:45-47.

  2. Ezekiel no duim waka for putim mark long forhed bilong pipol wea sev. Pipol bilong God distaem tu no duim datwan. Waka wea iumi duim nao  hem for talemaot message bilong Jehovah, and olketa angel nao leadim disfala preaching waka.—Rev. 14:6.

  3. Pipol wea sev long taem bilong Ezekiel no kasem mark long forhed wea man savve lukim. Distaem hem olsem tu. Olketa wea bae sev olketa no kasem mark long forhed wea man savve lukim. Wanem nao pipol mas duim for sev long taem bilong datfala big trabol? Olketa mas acceptim message abaotem Kingdom, followim wanem Bible talem, dedicate long Jehovah and baptaes, and faithful for sapotim olketa brata bilong Christ. (Matt. 25:35-40) Olketa wea duim olketa samting hia bae sev long taem bilong datfala big trabol.

  4. Datfala man wea holem samting for raet witim hem piksarem Jesus Christ. Hem nao bae putim mark long forhed bilong olketa wea bae sev. Datfala big crowd bae kasem mark for sev taem Jesus judgem olketa and sei olketa sheepsheep long taem bilong datfala big trabol. Olketa hia bae fit for kasem laef olowe long earth.—Matt. 25:34, 46. *

  5. Sixfala man wea karem olketa samting for faet olketa piksarem olketa angel wea Jesus nao leadim olketa. Klosap nao Jesus and olketa angel bae finisim evri nogud pipol long world.—Ezek. 9:2, 6, 7; Rev. 19:11-21.

Datfala vision bilong Ezekiel helpem iumi for trustim wei wea Jehovah bae no finisim gudfala pipol taem hem finisim nogud pipol. (2 Pet. 2:9; 3:9) And tu, vision hia helpem iumi for luksavve preaching waka wea iumi duim hem barava important. Evriwan mas kasem warning bifor end hem kam!—Matt. 24:14.

^ par. 6 Samfala wea sev nao hem Baruch (secretary bilong Jeremiah), Ebed-melech wea hem man bilong Ethiopia, and olketa Rechabite. (Jer. 35:1-19; 39:15-18; 45:1-5) Olketa hia kasem mark long forhed. Man no savve lukim datfala mark wea olketa kasem bat mark hia piksarem wei wea olketa sev.

^ par. 12 Olketa anointed Christian no kasem datfala mark. Olketa anointed Christian wea faithful bae kasem lastfala mark bifor olketa dae or bifor datfala big trabol hem start.—Rev. 7:1, 3.