Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  June 2016

Jehovah ‘Hem Tingim Iu’

Jehovah ‘Hem Tingim Iu’

WANEM nao mekem iumi barava sure toktok hia hem tru? Wanfala reason hem bikos Bible nao sei Jehovah hem tingim iumi. Long 1 Peter 5:7, Bible sei: “Putim evri wari bilong iufala long hand bilong hem bikos hem tingim iufala.” Wanem nao olketa pruv wea showimaot Jehovah God hem tingim iumi?

GOD PROVAEDEM WANEM IUMI NEEDIM

Jehovah showimaot nambawan example for iumi. Hem kaen tumas and givim staka samting

God garem olketa nambawan wei. Hem kaen tumas and givim staka samting long iumi. Iumi laekem olketa fren wea garem semkaen wei olsem. Evriday Jehovah kaen tumas and givim staka samting long iumi olketa man. Olsem example, Bible sei: “Hem mekem sun hem shaen long pipol wea gud and pipol wea nogud and hem mekem hem rain long pipol wea raeteous and pipol wea no raeteous.” (Matt. 5:45) Wanem nao olketa gudfala samting wea iumi kasem from sun and rain? God iusim sun and rain for “givim staka kaikai and mekem [iumi] hapi.” (Acts 14:17) Tru nao, Jehovah mekem earth for garem staka kaikai, wea diswan mekem iumi hapi tumas.

Bat why nao staka pipol short long kaikai? Bikos staka man wea rul olketa tingim nomoa selen and for garem bigfala paoa winim for tingim pipol long kantri bilong olketa. Klosap nao Jehovah bae stretem problem hia taem hem finisim olketa gavman bilong man, and Kingdom bilong hem long heven bae rul ovarem earth. Long datfala taem, no eniwan bae short long kaikai. Go kasem datfala taem, God bae gohed for lukaftarem olketa wea worshipim hem. (Ps. 37:25) Datwan barava showimaot Jehovah tingim iumi.

 JEHOVAH WILLING FOR LISIN LONG IUMI

Jehovah showimaot nambawan example for iumi. Hem willing for lisin long iumi

Gudfala fren bilong iu bae willing for spendem taem witim iu. Maet iutufala savve storystory for longfala taem. And gudfala fren bae hem lisin gud taem iu storyim olketa problem bilong iu, and wanem iu wari abaotem. Waswe, Jehovah hem willing for lisin olsem long iumi? Ia, hem barava willing. Hem herem olketa prea bilong iumi. Dastawe Bible encouragem iumi for “gohed for prea and no givap” and for “prea evritaem.”—Rome 12:12; 1 Thess. 5:17.

Waswe, hem olraet for iumi talem longfala prea long Jehovah? Tingim disfala example long Bible wea ansarem datfala kwestin. Bifor Jesus chusim olketa aposol bilong hem, “hem prea long God for full naet.” (Luke 6:12) Taem Jesus prea, maet hem talem nem bilong staka disaepol bilong hem, and storyim olketa gudfala wei and wik point bilong olketa, and hem askem Dadi bilong hem for helpem hem for chusim hu nao bae kamap aposol bilong hem. Long next day, Jesus savve hu nao fit for kamap olketa aposol bilong hem. Jehovah hem laekem tumas for herem prea bilong olketa wea garem faith. (Ps. 65:2) Nomata sapos iumi talem longfala prea abaotem eni samting wea mekem iumi wari, Jehovah bae willing for lisin long iumi.

GOD HEM WILLING FOR FORGIVE

Jehovah showimaot nambawan example for iumi. Hem willing for forgive

Hem no isi for forgivim narawan wea duim nogud samting long iumi. Nomata tufala wea barava fren gud for longfala taem maet no fren nao from tufala faendem hard for forgivim tufala. Jehovah hem no olsem. Bible encouragem iumi for askem God for forgivim iumi bikos hem barava willing for duim datwan. (Isa. 55:6, 7) Why nao God willing for forgivim iumi olsem?

Hem bikos God barava lovem iumi. From hem lovem tumas pipol long world hem givim Son bilong hem, Jesus, for sevem olketa man from sin and olketa nogud samting wea kamaot from sin. (John 3:16) Iumi kasem olketa nara gud samting tu from datfala ransom sakrifaes. Bikos long disfala sakrifaes, God willing for forgivim olketa wea hem lovem. Aposol  John sei: “God hem keepim promis bilong hem and hem raeteous. So sapos iumi talemaot olketa sin bilong iumi long hem, bae hem forgivim iumi.” (1 John 1:9) Iumi fit for gohed fren witim Jehovah bikos hem willing for forgivim iumi. Iumi barava tinghae long disfala nambawan wei bilong God.

HEM WILLING FOR HELPEM IUMI

Jehovah showimaot nambawan example for iumi. Hem willing for helpem iumi

Gudfala fren hem willing for helpem fren bilong hem. Waswe, Jehovah hem olsem tu? Bible sei: “Nomata maet [wanfala wea worshipim God] klosap foldaon, bae hem no savve foldaon, bikos Jehovah holem hand bilong hem.” (Ps. 37:24) Jehovah helpem pipol bilong hem long olketa difren wei. Tingim disfala experience long Saint Croix, wanfala island long Caribbean.

Samfala long class bilong wanfala Witness gele tok spoelem hem bikos hem no salutim flag. Bihaen hem prea long Jehovah for helpem hem, hem disaed for explainim long class bilong hem why hem no salutim flag. Long next assignment bilong hem for givim report long class, hem storyim subject abaotem wei for salutim flag. Hem story abaotem Shadrach, Meshach, and Abednego from datfala buk Bible Story Buk Bilong Mi. Hem sei story bilong thrifala hia nao helpem hem for disaed for no salutim flag. Hem sei: “Jehovah protectim thrifala Hebrew boy hia bikos olketa no worshipim wanfala image.” Then hem askem olketa long class sapos eniwan laekem datfala buk. Elevenfala student nao laekem datfala buk. Datfala gele barava hapi bikos hem luksavve Jehovah nao strongim hem and helpem hem for savve wanem for storyim long class bilong hem.

Sapos samfala taem iu tingse maet Jehovah no tingim iu, hem gud for iu readim and ting raonem olketa scripture olsem Psalm 34:17-19; 55:22; and 145:18, 19. Askem olketa wea worshipim Jehovah for longfala taem finis for storyim long iu hao Jehovah lukaftarem olketa. Taem iu laekem God for helpem iu, prea long hem abaotem samting wea kasem iu, and lukim wei wea hem bae helpem iu. Bae iu luksavve Jehovah ‘hem tingim iu.’