Skip to content

Skip to table of contents

Olketa Jehovah’s Witness

Chusim languis Solomon Islands Pidgin

“Iu No Fraet, Bae Mi Helpem Iu”

“Iu No Fraet, Bae Mi Helpem Iu”

TINGIM sapos wantaem iu wakabaot long road long midol naet. Seknomoa iu feel savve samwan hem followim iu. Taem iu stop, hem stop tu. Taem iu wakabaot fast, hem wakabaot fast tu. So iu start for ran go long haos bilong wanfala fren wea stap klosap. Taem iu kasem haos and noknok long door, fren bilong iu openem door and iu hapi tumas for go insaed haos. Iu savve iu sef nao.

Maet samting olsem hem no happen long iu. Bat maet samfala nara samting wea happen long laef bilong iu mekem iu wari. Olsem example, waswe, iu stragol witim eni wik point wea iu traem best for winim bat hem no isi? Waswe, longtaem nao iu no garem waka nomata iu traem best for faendem waka? Waswe, distaem iu gogo for olo and iu wari abaotem health bilong iu? Or maet iu warim eni nara samting.

Nomata wanem samting nao iu wari abaotem, hem gud for garem wanfala fren wea iu savve story witim and wea hem willing for helpem iu. Waswe, iu garem wanfala fren olsem? Wanfala fren olsem hem stap! Jehovah nao datfala fren. Hem savve fren gud witim iu, olsem hem fren gud witim Abraham, wea Isaiah 41:8-13 hem storyim. Long verse 10 and verse 13, Jehovah promisim iumi olsem: “No fraet, bikos mi stap witim iu. No wari, bikos mi God bilong iu. Mi bae strongim iu and helpem iu. Mi bae barava sapotim iu witim raet hand bilong mi. Mi evritaem duim stret samting. Mi nao Jehovah, God bilong iu. Mi hol strong long raet hand bilong iu and sei, ‘Iu no fraet, bae mi helpem iu.’”

“MI BAE BARAVA SAPOTIM IU”

Olketa toktok hia barava comfortim iumi. Ting raonem datfala toktok bilong Jehovah. Datfala verse no sei iumi holem hand bilong Jehovah and wakabaot saed long hem. Sapos iumi wakabaot saed long hem, raet hand bilong Jehovah bae holem left hand bilong iumi. Bat datfala scripture sei Jehovah hem iusim “raet hand” bilong hem for holem “raet hand bilong iu,” olsem hao wanfala man pullim kamap narawan wea klosap for foldaon. Taem Jehovah holem raet hand bilong iumi, hem encouragem iumi and sei: “Iu no fraet, bae mi helpem iu.”

Waswe, iu ting long Jehovah olsem Dadi wea lovem iu, and wanfala gudfala fren wea laek for helpem iu taem iu kasem hard taem? Jehovah barava lovem iu and laek for helpem iu. Taem iu kasem hard taem, Jehovah no laekem iu for wari. Why nao olsem? Bikos hem barava lovem iu. Psalm 46:1 sei: “Iumi savve evritaem kasem help from hem long taem bilong trabol.”

 FEEL GUILTY YET LONG SIN WEA IUMI DUIM BIFOR

Samfala tingim yet olketa mistek wea olketa duim bifor and no sure sapos God forgivim olketa tu or nomoa. Sapos datwan kasem iu, tingim Job. Hem sei taem hem young hem duim samfala samting wea no stret. (Job 13:26) David tu tingim olketa mistek wea hem duim bifor and hem sei long Jehovah: “No gohed tingim olketa sin and nogud samting wea mi duim taem mi young.” (Ps. 25:7) From iumi no perfect, iumi evriwan duim “sin and no savve showimaot olketa nambawan wei bilong God.”—Rome 3:23.

Profet Isaiah raetem olketa toktok long Isaiah chapter 41 for olketa Israelite. From olketa barava no faithful, Jehovah sei bae hem panisim olketa and bae olketa go prisoner long Babylon. (Isa. 39:6, 7) Long semtaem tu, God sei bae hem mekem olketa wea repent and kam bak long hem for kamap free from Babylon! (Isa. 41:8, 9; 49:8) Long sem wei, Jehovah showimaot mercy tu long olketa distaem wea repent and laek for duim stret samting.—Ps. 51:1.

Tingim story bilong Takuya, * wea stragol witim wik point bilong hem for lukluk long olketa rabis piksa and duim nanali. Staka taem nao hem foldaon long diswan. Wanem nao tingting bilong hem abaotem diswan? Hem sei: “Mi barava feel iusles, bat taem mi prea long Jehovah for hem forgivim mi, hem helpem mi for gohed moa.” Hao nao Jehovah helpem hem? Olketa elder long kongregeson bilong Takuya talem hem for ringim olketa taem hem foldaon long wik point bilong hem. Hem sei: “Hem no isi for mi ringim olketa, bat taem mi duim olsem, olketa strongim mi.” Then olketa elder arrangem circuit overseer for visitim Takuya. Circuit overseer sei long hem: “Mi kam bikos olketa elder nao laekem mi for visitim iu. Olketa chusim iu for mi kam duim shepherding kol long iu.” Takuya sei: “Mi nao duim sin, bat Jehovah hem iusim olketa elder for helpem mi.” Gogo, Takuya stop nao for duim olketa nogud samting hia, hem kamap wanfala regular pioneer, and distaem hem waka long wanfala branch office. Long sem wei wea God helpem datfala brata, bae hem helpem iu tu taem iu duim olketa mistek.

WARI ABAOTEM HAO FOR KASEM SELEN

Samfala wari bikos olketa lusim waka bilong olketa and no savve faendem nara waka moa. Masbi hem hard samting for go ask waka bat no eniwan givim waka long iu. Taem diswan kasem samfala, hem mekem olketa feel olsem olketa iusles. Hao nao Jehovah savve helpem iu? Maet hem no helpem iu for kwiktaem faendem wanfala gud waka, bat hem savve helpem iu for tingim disfala toktok bilong David: “Distaem mi olo nao, bat no enitaem mi lukim God hem lusim eni man wea raeteous or olketa pikinini bilong hem short long kaikai.” (Ps. 37:25, footnote.) Jehovah lovem iu, and hem bae helpem iu for garem wanem iu needim for gohed worshipim hem.

Wanem nao Jehovah savve duim for helpem iu sapos iu lusim waka bilong iu?

Sara, wea stap long Colombia, lukim wei wea Jehovah helpem hem. Hem waka full-taem for wanfala company wea staka pipol savve long hem,  and hem kasem bigfala pei tu. Bat from Sara laek for duim moa samting long waka bilong Jehovah, hem resign and start for pioneer. Bat hem no isi for Sara faendem part-taem waka. Hem startim wanfala smol bisnis for salem ice-cream, bat gogo bisnis hia brekdaon bikos selen bilong hem finis. Hem sei: “Thrifala year nao mi no garem gudfala waka, bat Jehovah nao helpem mi for no givap.” Long datfala taem hem lane for luksavve long wanem nao hem really needim, and for no wari tumas. (Matt. 6:33, 34) Gogo, boss bilong hem bifor ringim hem and askem hem for go bak duim sem waka wea hem duim bifor. Hem sei hem bae waka sapos hem waka part-taem, and sapos olketa letem hem for off for go long olketa meeting, assembly, and convention. Nomata pei bilong Sara hem no big olsem bifor, bat hem savve gohed long pioneer waka. Hem sei long datfala hard taem hem luksavve Jehovah gohed for helpem hem.

WARI FROM IUMI GOGO FOR OLO

Staka pipol wari bikos olketa gogo for olo, and olketa klosap for retire nao. Olketa no really sure abaotem hao nao bae olketa kasem selen for kasem need bilong olketa. Olketa wari tu abaotem saed long health. Luk olsem King David nao talem disfala toktok long Jehovah: “Nomata mi olo finis, plis iu no les long mi. Distaem mi wiki finis, so plis iu no lusim mi.”—Ps. 71:9, 18.

Wanem nao savve helpem olketa olo for no wari tumas abaotem future? Olketa mas gohed for garem strongfala faith long God and trustim hem bae givim olketa evri samting wea olketa needim. Samfala wea garem staka naes samting taem olketa garem selen maet need for mekem laef bilong olketa simpol and satisfae long wanem olketa garem. And maet olketa luksavve for kaikaim wanfala pleit kabis hem healthy winim for kaikaim wanfala pleit meat! (Prov. 15:17) Sapos iu gohed for duim wanem Jehovah laekem, hem bae givim iu evri samting wea iu needim taem iu olo.

José and Rose witim Tony and Wendy

Tingim example bilong José and Rose wea duim full-taem service for winim 65 year. Tufala feisim staka hard taem long olketa year hia. Tufala lukaftarem dadi bilong Rose, wea sik big and leidaon nomoa. And tu, José kasem cancer and hem mas operate and kasem chemotherapy treatment. Wanem nao Jehovah duim for helpem José and Rose? Hem iusim narafala hasband and waef, Tony and Wendy, for helpem tufala. Tony and Wendy garem wanfala smol haos wea tufala laek for givim long eni pioneer for stap insaed and tufala bae no askem eni rent for datwan. Tony rememberim taem hem long hae skul, hem evritaem lukim José and Rose waka hard long ministry. Tony barava tinghae long wei wea tufala strong long preaching waka. From José and Rose spendem full laef bilong tufala for duim waka bilong Jehovah, Tony and Wendy talem tufala for stap long datfala haos. Insaed long 15 year wea go finis, tufala helpem José and Rose, wea distaem tufala samting olsem 85 year. José and Rose ting long Tony and Wendy olsem wanfala present wea Jehovah givim long tufala.

Jehovah promisim iu olsem: “Iu no fraet, bae mi helpem iu.” Hem givim kam raet hand bilong hem for helpem iu tu. Waswe, bae iu holem hand bilong hem?

^ par. 11 Mifala changem samfala nem.