“Samting wea iufala tinghae long hem nao bae iufala interest for garem.”—LUKE 12:34.

SONG: 153, 104

1, 2. (a) Wanem nao thrifala spesol samting wea iumi kasem from Jehovah? (b) Wanem nao bae iumi storyim long disfala study?

JEHOVAH hem rich winim eniwan long universe. Hem nao ownim evri samting. (1 Chron. 29:11, 12) Nomata olsem, Jehovah hem barava kaen long evriwan. Iumi hapi tumas hem givim iumi staka spiritual samting! Samfala long olketa samting hia hem (1) Kingdom bilong God, (2) ministry bilong iumi, and (3) truth insaed long Bible. Bat sapos iumi no careful, gogo bae iumi no tinghae long olketa spiritual samting. Dastawe iumi mas evritaem tingim why olketa samting hia hem important, and for evritaem tinghae long olketa. Jesus sei: “Samting wea iufala tinghae long hem nao bae iufala interest for garem.”—Luke 12:34.

2 Bae iumi storyim wanem iumi savve duim mekem iumi gohed tinghae long Kingdom, ministry bilong iumi, and truth insaed long Bible. Taem iumi studyim disfala article, ting raonem wanem iuseleva savve duim for barava tinghae long olketa spiritual samting.

 KINGDOM BILONG GOD HEM OLSEM GUDFALA PEARL

3. Wanem nao datfala man wea Jesus story abaotem willing for duim mekem hem baem wanfala pearl? (Lukim piksa long start bilong study.)

3 Readim Matthew 13:45, 46. Jesus story abaotem wanfala bisnisman wea savve baem and salem olketa pearl. Wanday, hem faendem wanfala pearl wea expensive tumas winim olketa pearl wea hem lukim bifor. Man hia laekem tumas datfala pearl, so hem salem evri samting wea hem garem mekem hem savve peim datfala pearl. Masbi datfala pearl hem barava spesol long hem.

4. Wanem nao bae iumi willing for duim mekem iumi stap anda long Kingdom?

4 Wanem nao iumi savve lanem from story bilong Jesus? Truth abaotem Kingdom bilong God hem olsem datfala expensive pearl. Sapos iumi tinghae long Kingdom bilong God olsem hao datfala man hem ting long datfala pearl, bae iumi willing for sakrifaesim samfala samting mekem iumi savve gohed stap anda long Kingdom bilong God. (Readim Mark 10:28-30.) Bae iumi storyim tufala wea duim olsem.

5. Wanem nao Zacchaeus willing for duim mekem hem stap anda long Kingdom?

5 Zacchaeus hem man for kolektem tax. Hem kamap rich bikos hem ravem pipol. (Luke 19:1-9) Bat wanday, Zacchaeus herem Jesus hem story abaotem Kingdom. Hem laekem tumas wanem hem herem, so hem changem wei bilong hem. Hem sei: “Lord, bae mi givim haf long evri samting bilong mi long pipol wea poor. Olketa wea mi ravem olketa long eni samting, bae mi givim bak fofala taem moa winim wanem mi tekem.” Zacchaeus givim bak selen wea hem tekem from pipol and hem lusim nao wei bilong hem for greedy.

6. Wanem nao samfala samting wea wanfala woman changem long laef bilong hem, and why nao hem duim olsem?

6 Samfala year go finis, wanfala woman wea lesbian (woman wea sleep witim nara woman) hem herem gud nius abaotem Kingdom. And hem president bilong wanfala organization wea sapotim raet bilong pipol wea duim homosexual fasin. Bat taem hem studyim Bible and lane abaotem olketa gud samting wea Kingdom bilong God bae duim, hem luksavve hem mas changem samfala samting long laef bilong hem. (1 Cor. 6:9, 10) From hem lovem Jehovah, hem lusim datfala organization and hem lusim tu woman wea hem stap witim. Hem baptaes long 2009, and long 2010 hem kamap regular pioneer. Hem mekem olketa change hia bikos hem lovem Jehovah winim olketa nogud samting wea hemseleva laekem.—Mark 12:29, 30.

7. Wanem nao iumi mas duim mekem iumi gohed tinghae long Kingdom bilong God?

7 Staka long iumi mas changem staka samting long laef mekem iumi savve stap anda long Kingdom bilong God. (Rome 12:2) Nomata olsem, iumi mas gohed waka hard for no letem eni samting, olsem wei for laekem tumas material samting, or eni rabis samting wea body laekem for spoelem wei wea iumi tinghae long Kingdom. (Prov. 4:23; Matt. 5:27-29) For helpem iumi gohed tinghae long Kingdom bilong God, Jehovah hem givim narafala spiritual samting.

WAKA WEA SEVEM LAEF BILONG PIPOL

8. (a) Why nao aposol Paul storyim ministry olsem expensive samting insaed olketa clay pot? (b) Wanem nao Paul duim wea showimaot hem tinghae long ministry?

8 Jesus givim assignment long iumi for preachim gud nius and teachim pipol  abaotem Kingdom bilong God. (Matt. 28:19, 20) Aposol Paul storyim ministry olsem expensive samting insaed olketa clay pot. (2 Cor. 4:7; 1 Tim. 1:12) Iumi olsem olketa clay pot bikos iumi no perfect. Bat disfala message wea iumi talemaot hem olsem wanfala expensive samting bikos hem savve sevem laef bilong iumi, and olketa wea lisin long iumi tu. Dastawe Paul hem sei: “Evri samting wea mi duim hem for mekem mi savve sharem gud nius witim nara pipol.” (1 Cor. 9:23) Paul waka hard for teachim olketa narawan abaotem Kingdom bilong God. (Readim Rome 1:14, 15; 2 Timothy 4:2.) From hem tinghae long disfala gud nius, hem gohed preach nomata pipol persecutim hem. (1 Thess. 2:2) Hao nao iumi savve followim example bilong Paul for tinghae long ministry?

9. Wanem nao samfala samting iumi savve duim for showimaot iumi tinghae long ministry?

9 Paul hem tinghae long ministry taem hem iusim evri chance for preach long pipol. Iumi tu savve followim example bilong Paul and olketa Christian long first century taem iumi talemaot gud nius from haos tu haos, long olketa pablik ples, and long eni ples wea iumi meetim pipol. (Acts 5:42; 20:20) Iumi laek for duim moa samting long ministry. Sapos iumi fit for duim olsem, iumi savve duim auxiliary pioneer or regular pioneer. Or maet iumi savve lanem nara languis, muv long nara ples long kantri bilong iumi, or muv go long nara kantri.—Acts 16:9, 10.

10. Wanem gud samting nao Irene kasem from hem waka hard for preachim gud nius?

10 Irene, wanfala singol sista long United States laek for preachim gud nius long pipol wea story long Russian languis. So long 1993, hem joinim wanfala Russian grup long New York City. Long datfala taem, datfala grup garem samting olsem 20-fala pablisa nomoa. Bihaen 20-fala year, Irene sei: “Mi no savve gud yet long Russian languis.” Nomata olsem, Jehovah helpem hem and olketa nara pablisa for preach long pipol wea story long datfala languis. Distaem, sixfala Russian kongregeson nao stap long New York City. Staka nao Irene study witim olketa, and 15-fala long olketa baptaes finis. Samfala waka long Bethel, duim pioneer waka, and kamap olketa elder. Irene sei: “Taem mi ting abaotem olketa nara goal wea mi laek for kasem, no eniwan long olketa savve mekem mi hapi olsem.” Irene barava tinghae long ministry bilong hem!

Waswe, iu tinghae long ministry and markem taem for duim datwan evri week? (Paragraf 11, 12 storyim diswan)

11. Wanem gud samting nao savve kamaot taem iumi gohed for preach nomata pipol persecutim iumi?

11 Sapos iumi tinghae long ministry, iumi bae olsem aposol Paul wea gohed for preach nomata pipol persecutim hem. (Acts 14:19-22) Olsem example, midolwan long olketa year bilong 1930 and 1944,  olketa brata and sista bilong iumi long United States kasem bigfala persecution. Bat olketa gohed nomoa for preach. Taem gavman trae for stopem olketa and tekem olketa long kot, olketa brata bilong iumi winim staka kot case. Long 1943, Brata Knorr storyim wanfala kot case wea iumi winim long U.S. Supreme Court. Hem sei sapos olketa brata no gohed for preach, bae no eni kot case kamap. Hem sei tu bikos olketa brata and sista evriwea long world gohed for preach, datwan pruvim hard for persecution stopem preaching waka. Olketa brata long olketa nara kantri tu winim samfala case olsem. Tru nao, wei wea iumi tinghae long ministry helpem iumi for gohed preach nomata pipol persecutim iumi.

12. Wanem nao iu barava laek for duim?

12 Sapos iumi tinghae long ministry, iumi bae no warim nomoa haomas hour iumi raetem long report bilong iumi. Bat bae iumi traem best ‘for talemaot gud nius long evriwan.’ (Acts 20:24; 2 Tim. 4:5) So wanem nao bae iumi teachim long olketa narawan? Bae iumi storyim nara spesol samting wea iumi kasem from God.

TRUTH WEA IUMI LANEM LONG BIBLE

13, 14. Wanem nao “olketa naesfala samting” wea Jesus storyim long Matthew 13:52, and wanem nao iumi savve duim for kasem datwan?

13 Mek-thri spiritual samting wea Jehovah givim iumi hem nao olketa tru samting wea iumi lanem insaed long Bible. Evri tru teaching hem kam from Jehovah. (2 Sam. 7:28; Ps. 31:5) From hem Dadi wea kaen, hem laekem iumi for savve long olketa tru samting hia. Iumi lanem olketa tru teaching taem iumi readim Bible and olketa pablikeson bilong iumi, and taem iumi attendim olketa convention, assembly, and olketa meeting. Taem iumi gohed for lanem moa samting long Bible, hem olsem iumi hipimap “olketa naesfala samting” wea old and niu. (Readim Matthew 13:52.) Jehovah bae helpem iumi for lanem staka samting insaed Bible, sapos iumi lukaotem olketa tru teaching olsem man wea lukaotem samting wea garem hae price. (Readim Proverbs 2:4-7.) Hao nao iumi savve duim datwan?

14 Iumi mas evritaem studyim Bible and olketa pablikeson bilong iumi and duim research. Datwan savve helpem iumi for savve long samfala “niu” samting long Bible wea iumi no savve long hem bifor. (Josh. 1:8, 9; Ps. 1:2, 3) Firstfala Watch Tower magasin wea olketa pablisim long July 1879, hem storyim truth olsem flaoa wea stap haed midolwan olketa nila grass. For man faendem datfala flaoa hem mas barava lukaotem gud for faendem. And taem hem faendem, hem shud no tingse hem inaf nao. Hem shud gohed for lukaotem samfala flaoa moa. Long sem wei, iumi shud no tingse hem inaf sapos iumi minim wanfala samting long Bible. Iumi shud barava laek for lanem staka samting long Bible.

15. Why nao iumi sei samfala tru teaching long Bible hem “old,” and which wan nao iu tinghae long hem?

15 Taem iumi start for studyim Bible, iumi lanem olketa tru teaching. So iumi savve sei olketa samting hia hem “old” bikos hem nao olketa first samting wea iumi lanem. Wanem nao olketa samting hia? Firstaem, iumi lanem Jehovah nao hem Creator and hem garem plan for iumi olketa man. Iumi lanem tu, God hem sendem kam Son bilong hem long disfala earth for dae for iumi mekem iumi kamap free from sin and dae. And iumi lanem Kingdom bilong God bae finisim evri nogud samting wea kasem iumi and iumi bae hapi, garem peace, and kasem laef olowe.—John 3:16; Rev. 4:11; 21:3, 4.

16. Wanem nao iumi mas duim taem mining bilong wanfala profesi or scripture hem change?

 16 Samfala taem, wei wea iumi minim wanfala profesi long Bible or hao iumi minim wanfala scripture maet change. Taem samting olsem happen, hem important for iumi studyim gud and ting raonem datwan. (Acts 17:11; 1 Tim. 4:15) Iumi studyim gud datfala change no for savve nomoa long hao hem difren from oldfala wei wea iumi minim. Bat iumi laek for studyim gud datwan for barava minim gud niufala wei for minim datfala scripture. Taem iumi duim olsem, iumi bae lanem wanfala niu point moa from Bible. Why nao datwan hem wanfala gud samting for duim?

17, 18. Long wanem wei nao holy spirit savve helpem iumi?

17 Jesus sei spirit bilong God savve helpem iumi for tingim moa olketa samting wea iumi lanem finis. (John 14:25, 26) Hao nao datwan savve helpem iumi taem iumi duim preaching waka? Tingim experience bilong wanfala brata wea nem bilong hem Peter. Long 1970, Peter start for waka long Bethel long Britain taem hem 19 year. Taem Peter hem preach long haos tu haos, hem meetim wanfala man wea samting olsem 50 year wea garem beard. Hem askem datfala man sapos hem laek for savve long Bible. Datfala man hem wanfala bigman long Jew religion, and hem seke tumas for herem Peter laek for teachim Bible long hem. Datfala bigman laek for testim Peter, so hem ask olsem “Boy bilong mi, wanem languis nao olketa raetem long Bible buk Daniel?” Peter sei, “Samfala part bilong hem olketa raetem long Aramaic languis. Datfala man hem sapraes tumas taem hem herem datwan. Bat mi tu mi sapraes long miseleva! Hao nao mi savve long datfala ansa? Taem mi kasem long haos and chekim Wastaoa and Awake! magasin bilong olketa month wea go pas finis, mi lukim wanfala article wea storyim Bible buk Daniel olketa raetem long Aramaic languis.” (Dan. 2:4, footnote.) Tru nao, holy spirit savve helpem iumi for tingim moa olketa samting wea iumi lanem finis.—Luke 12:11, 12; 21:13-15.

18 Sapos iumi tinghae long truth wea iumi kasem from Jehovah, bae iumi laek for gohed lanem moa samting insaed long Bible. Taem iumi duim olsem, bae iumi fit for teachim olketa narawan.

PROTECTIM OLKETA SPIRITUAL SAMTING WEA IU KASEM

19. Why nao iumi mas protectim olketa spiritual samting wea iumi kasem?

19 Long disfala study, iumi lanem hem important for iumi tinghae long olketa spiritual samting. Bat iumi mas careful for no letem Satan and olketa samting long disfala world mekem iumi for no tinghae long olketa samting hia. Sapos iumi no keakea, waka wea garem big pei, or wei for laek garem gudfala living, or for show-off long olketa samting wea iumi garem savve affectim iumi. Aposol John remindim iumi hao disfala world and evri samting wea pipol laekem hem klosap for finis. (1 John 2:15-17) Dastawe, iumi mas gohed tinghae long olketa spiritual samting and protectim datwan.

20. Wanem nao bae iu duim mekem iu protectim olketa spiritual samting wea iu kasem?

20 Iumi shud lusim eni samting wea savve spoelem wei wea iumi tinghae long Kingdom bilong God. Gohed strong for preach and gohed for tinghae long ministry. Gohed for lanem olketa tru samting insaed long Bible. Taem iu duim olsem, iu hipimap ‘evri gud samting long heven wea no savve finis. Man no savve stealim and kokoros no savve spoelem tu. Diswan hem important bikos samting wea iu tinghae long hem nao bae iu interest for garem.’—Luke 12:33, 34.