Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  June 2017

Waswe, Iu Savve Finis?

Waswe, Iu Savve Finis?

Waswe, hem stret for kolem olketa wea salem olketa animal long temple “olketa man for steal”?

GOSPEL bilong Matthew sei: “Jesus hem go insaed long temple and raosem olketa wea salem and baem samting insaed long temple. Hem kapsaetem tu olketa tebol bilong olketa wea changem olketa difren selen and stul bilong olketa wea salem kurukuru. Hem sei long olketa: ‘Olketa Holy Raeting sei: “Pipol bae kolem haos bilong mi haos for pipol prea insaed.” Bat iufala mekem haos hia olsem cave bilong olketa man for steal.’”—Matt. 21:12, 13.

Olketa history buk bilong olketa Jew storyim olketa bisnisman wea market insaed long temple long Jerusalem ravem pipol taem olketa barava haem price bilong olketa samting wea olketa salem. Bat wanfala buk bilong olketa Jew storyim long midol bilong first century, kost bilong tufala young kurukuru wea olketa iusim for sakrifaes, hem wanfala golden denar (25 silver dinarius). And man mas waka for 25-fala day for kasem datwan. Olketa wea poor savve sakrifaesim tufala young kurukuru or tufala big kurukuru, bat price bilong olketa bird hia hem expensive tumas. (Lev. 1:14; 5:7; 12:6-8) Wanfala man for teachim law, Simeon ben Gamaliel barava kros long datwan, and hem talem pipol for givim nomoa sakrifaes wea law talem. From datwan, price bilong tufala young kurukuru hem go daon fitim pei wea man savve kasem sapos hem waka for thrifala hour.

So hem fitim for Jesus kolem olketa bisnisman wea market long temple “olketa man for steal” bikos olketa ravem pipol and olketa greedy.