Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  July 2017

Why Nao Hem Fitim for Iumi Praisem Jehovah?

Why Nao Hem Fitim for Iumi Praisem Jehovah?

“Praisem Jah! . . . Hem gud tumas and hem fitim for iumi praisem hem!”—PS. 147:1.

SONG: 104, 152

1-3. (a) Wanem taem nao maet olketa raetem Psalm 147? (b) Wanem nao iumi savve lanem long Psalm 147?

IUMI savve praisem samwan taem iumi lukim hem duim or talem samting wea iumi tinghae long hem. Bat Jehovah God nao hem main wan wea iumi laek for praisem! Iumi laek for praisem hem for bigfala paoa wea hem garem wea iumi savve lukim long olketa nambawan samting wea hem wakem, and iumi praisem hem for bigfala love wea hem showimaot for iumi, wea hem nao ransom sakrifaes bilong Son bilong hem.

2 Taem iumi readim Psalm 147, iumi luksavve man wea raetem datfala psalm hem barava laek for praisem Jehovah. And tu, hem encouragem olketa narawan for praisem God.—Readim Psalm 147:1, 7, 12.

3 Iumi no savve hu nao raetem Psalm 147. Bat luk olsem disfala man hem laef long datfala taem wea olketa Israelite go bak long Jerusalem, bihaen Jehovah mekem olketa kamap free from Babylon. (Ps. 147:2) Hem praisem Jehovah bikos pipol bilong Hem bae worshipim hem moa long ples bilong olketa. Then  hem storyim samfala nara samting wea iumi shud praisem Jehovah for hem. Wanem nao olketa samting hia? And olketa wanem reason nao iu garem for iu sei “Hallelujah!,” or “Praisem Jah!”?—Ps. 147:1, footnote.

JEHOVAH HEALIM OLKETA WEA SORRE

4. Hao nao olketa Israelite feel taem King Cyrus mekem olketa kamap free, and why nao olsem?

4 Tingim feeling bilong olketa Israelite taem olketa prisoner long Babylon. Olketa wea tekem olketa go long Babylon mekfani long olketa and sei: “Singim wanfala long olketa song abaotem Zion for mifala.” Bat olketa Jew no laek for singsing bikos Jerusalem, ples wea olketa barava hapi long hem, hem distroe finis. (Ps. 137:1-3, 6) Olketa sorre tumas and olketa needim comfort. Nomata olsem, profesi long Bible talem finis, Jehovah bae helpem pipol bilong hem. Hao nao hem duim datwan? King Cyrus bilong Persia tekovarem Babylon, and hem sei olsem abaotem Jehovah: “Hem komandim mi for buildim wanfala haos for hem long Jerusalem.” Cyrus sei tu long olketa Israelite: “Eniwan long iufala pipol bilong hem wea laek for go bak long Jerusalem, Jehovah God bae stap witim iufala.” (2 Chron. 36:23) Masbi datwan barava comfortim olketa Israelite wea stap long Babylon!

5. Wanem nao man wea raetem psalm talem abaotem paoa wea Jehovah garem for healim iumi?

5 Jehovah hem comfortim datfala nation bilong Israel, and hem comfortim tu each wan long olketa Israelite. Jehovah duim sem samting for iumi distaem. Datfala man wea raetem psalm sei God “healim olketa wea sorre tumas, and hem bandagem garekil bilong olketa.” (Ps. 147:3) Taem iumi sik or iumi feel sorre, iumi sure Jehovah hem lukaftarem iumi. Jehovah hem barava laek for comfortim and healim iumi taem iumi feel sorre. (Ps. 34:18; Isa. 57:15) Hem givim iumi wisdom and strongim iumi mekem iumi savve deal witim eni problem wea maet kasem iumi.—Jas. 1:5.

6. Wanem nao iumi savve lanem long Psalm 147:4? (Lukim piksa long start bilong study.)

6 Datfala man wea raetem psalm luk go ap long skae and hem sei Jehovah “hem kaontem evri star, and hem savve long nem bilong evriwan.” (Ps. 147:4) Datfala man savve lukim staka star, bat hem no savve haomas star nao stap. Distaem, olketa scientist savve staka billion star nao stap long galaxy bilong iumi. And samting olsem trillion galaxy nao stap long full universe! Iumi olketa man no savve kaontem evri star, bat Creator bilong iumi savve duim datwan. From hem savve gud long olketa star, hem givim nem for each wan long olketa. (1 Cor. 15:41) God wea hem savve long ples wea each star hem stap, hem savve gud long iu tu. Hem savve long ples wea iu stap, feeling bilong iu, and wanem iu needim!

7, 8. (a) Wanem nao Jehovah savve long hem abaotem iumi? (b) Storyim example wea showimaot Jehovah minim feeling bilong iumi.

7 Jehovah hem savve long hard samting wea kasem iu and hem garem paoa for helpem iu deal witim datwan. (Readim Psalm 147:5.) Maet iu feel olsem samting wea kasem iu hem tumas nao, and hem hard nao for iu deal witim. God savve long olketa samting wea iu no fit for duim bikos “hem savve iumi dust nomoa.” (Ps. 103:14) From iumi no perfect, iumi savve mekem sem mistek staka taem, and iumi savve feel wikdaon. Samfala taem iumi savve sorre bihaen iumi talem wanfala samting, garem feeling for laek duim nogud samting, or for jealous long olketa narawan! Jehovah no garem eni wik point, nomata olsem, hem barava savve gud long iumi.—Isa. 40:28.

8 Waswe, iu tingim enitaem wea Jehovah helpem iu for no givap taem iu kasem  wanfala hard taem? (Isa. 41:10, 13) Tingim wanfala pioneer wea nem bilong hem Kyoko. Bihaen hem muv from hem kasem niu assignment, hem barava feel wikdaon. Bat wanem nao helpem Kyoko for luksavve Jehovah minim samting wea kasem hem? Long niu kongregeson bilong hem, staka brata and sista minim hem. Hem feel olsem Jehovah sei long hem: “Mi lovem iu, no bikos iu pioneer, bat bikos iu dota bilong mi and iu disaed for duim wanem mi laekem. From iu wanfala Witness bilong mi, mi laekem iu for enjoyim laef!” Waswe long iu, wanem nao Jehovah duim for iu wea showimaot hem minim feeling bilong iu?

JEHOVAH PROVAEDEM WANEM IUMI NEEDIM

9, 10. Wanem nao barava important samting wea Jehovah provaedem for helpem iumi? Storyim example.

9 Iumi evriwan needim kaikai, kaleko, and ples for stap. Samfala taem iu maet wari nogud bae iu no garem inaf kaikai. Bat Jehovah wakem disfala earth for garem staka kaikai for fitim evriwan, nomata “olketa smol bird” tu garem samting for kaikaim. (Readim Psalm 147:8, 9.) Sapos Jehovah givim kaikai long olketa bird, iumi savve sure hem bae provaedem wanem iumi needim.—Ps. 37:25.

10 Barava important samting nao, Jehovah provaedem olketa samting wea bae helpem iumi for gohed faithful long hem. And hem givim iumi “peace bilong [hem] wea winim nao wanem man savve minim.” (Phil. 4:6, 7) Wanfala brata wea nem bilong hem Mutsuo, and waef bilong hem lukim wei wea Jehovah helpem tufala. Taem wanfala tsunami kasem Japan long 2011, tufala klae antap long ruf long haos bilong tufala mekem tufala stap sef. Long datfala taem, tufala lusim staka samting wea tufala garem. For full naet, tufala stap long wanfala rum wea cold and dark long mek-tu story long haos bilong tufala. Long morning, tufala lukluk for eni pablikeson wea savve encouragem tufala. Tufala faendem nomoa 2006 Yearbook of Jehovah’s Witnesses. Taem Mutsuo openem datfala buk long wanfala page, hem lukim disfala title “The Deadliest Tsunamis Ever Recorded.” Datfala sekson hem storyim earthquake long Sumatra long 2004, wea mekem wanfala tsunami wea distroem and killim dae staka pipol. Diswan hem bigfala tsunami wea winim eni tsunami wea happen bifor. Mutsuo and waef bilong hem krae taem tufala read abaotem samting wea happen long olketa brata and sista long there. Tufala feel olsem Jehovah hem encouragem tufala long taem wea tufala barava needim. Jehovah provaedem tu olketa nara samting wea tufala needim. Olketa brata and sista long olketa nara ples long Japan givim kaikai and kaleko long olketa. Bat samting wea barava strongim olketa hem wei wea organization bilong God sendem olketa brata for visitim olketa long kongregeson. Mutsuo sei: “Mi feel olsem Jehovah hem stap klosap long each wan long mifala and hem lukaftarem mifala gud. Datwan barava comfortim mifala!” First samting wea God savve provaedem nao hem olketa samting wea bae helpem iumi for gohed faithful, and then hem provaedem wanem iumi needim long physical wei.

GOD SAVVE HELPEM IUMI

11. Wanem nao iumi mas duim for God helpem iumi?

11 Jehovah “liftimap olketa wea hambol.” Hem lovem iumi and redi evritaem for helpem iumi. (Ps. 147:6a) Wanem nao iumi mas duim for God helpem iumi? Iumi mas fren gud witim hem. So for iumi fren gud witim God, iumi mas hambol. (Zeph. 2:3) Olketa wea hambol depend long Jehovah for finisim wei for safa, and olketa nogud samting  wea happen. Jehovah barava hapi long olketa wea hambol.

12, 13. (a) For God helpem iumi, wanem nao iumi mas stap klia long hem? (b) Wanem kaen man nao Jehovah hapi long hem?

12 Bible sei God bae “torowem olketa nogud pipol long graon.” (Ps. 147:6b) Iumi no laekem datwan for happen long iumi! Iumi laekem God for showimaot love long iumi. Dastawe, iumi mas heitim samting wea God heitim. (Ps. 97:10) Olsem example, iumi mas heitim wei for durong. Diswan minim iumi mas stap klia long eni samting wea savve leadim iumi for durong, olsem wei for lukluk long olketa rabis piksa. (Ps. 119:37; Matt. 5:28) Maet diswan hem no isi, bat taem iumi waka hard Jehovah bae blessim iumi.

13 Iumi mas depend long Jehovah for helpem iumi taem iumi waka hard for heitim olketa samting hia. Waswe, hem bae hapi sapos iumi depend long olketa samting wea pipol trustim? Nomoa! Jehovah no depend long “strong bilong wanfala horse.” Waswe, iumi shud depend long strong bilong iumiseleva or olketa narawan? Jehovah no trustim “strongfala leg wea man garem.” (Ps. 147:10) Bat iumi mas gohed for prea long Jehovah and askem hem for helpem iumi long olketa wik point bilong iumi. Jehovah bae no taed for herem prea bilong iumi. Bible sei: “Jehovah hem hapi long olketa wea fraet long hem, and olketa wea weit for hem showimaot love long olketa.” (Ps. 147:11) From Jehovah hem faithful and hem lovem iumi, iumi savve hem bae helpem iumi for winim feeling for laek duim nogud samting.

14. Wanem samting nao man wea raetem psalm sure long hem?

14 Jehovah promisim hem bae helpem iumi taem iumi kasem problem. Taem olketa Israelite go bak long Jerusalem, datfala man wea raetem psalm ting raonem hao Jehovah helpem olketa. Hem sei: “Hem mekem olketa bar bilong gate long taon bilong iufala for strong, and hem blessim olketa son bilong iufala. Hem mekem evriwan long ples bilong iufala for garem peace.” (Ps. 147:13, 14) From Jehovah sei hem bae mekem olketa bar bilong gate long taon for strong, datwan mekem man wea raetem datfala psalm for feel sef. Hem sure Jehovah bae protectim pipol bilong hem.

Hao nao Bible savve helpem iumi taem iumi wari abaotem wanfala problem? (Paragraf 15-17 storyim diswan)

15-17. (a) Samfala taem, hao nao maet iumi feel taem iumi kasem problem, bat hao nao Jehovah iusim Bible for helpem iumi? (b) Storyim example wea showimaot toktok bilong God savve helpem iumi.

15 Taem iu garem olketa problem, maet iu wari, bat Jehovah savve givim iu wisdom for deal witim datwan. Man wea raetem psalm sei taem God “talemaot komand bilong hem, kwiktaem nomoa hem kasem earth nao.” Then hem askem disfala kwestin taem hem story abaotem snow, ice, and olketa hail ston. Hem sei: “Hu nao fit for stap long kaen cold olsem?” Hem sei tu taem Jehovah hem “tok olketa samting hia melt nao.” (Ps. 147:15-18) God bilong iumi wea savve long evri samting and savve duim eni samting, and wea kontrolem hail ston and snow, savve helpem iu for deal witim eni problem.

16 Distaem, Jehovah iusim Bible for leadim iumi. Datfala man wea raetem psalm sei toktok bilong Jehovah savve “kwiktaem” for helpem iumi. God showim iumi stretfala road for followim and hem duim datwan long barava taem. Tingim olketa gud samting wea iumi kasem from Bible, olketa pablikeson wea kam from “wakaman wea faithful and wise,” JW Broadcasting, jw.org, olketa elder, and olketa brata and sista. (Matt. 24:45) Waswe, iu lukim hao Jehovah hem kwiktaem for helpem iu?

17 Wanfala sista wea nem bilong hem Simone, hem sei toktok bilong God hem  barava helpem hem. Hem feel iusles, and hem tingse Jehovah no hapi long hem. Nomata olsem, hem gohed prea long Jehovah and askem hem for helpem hem. Hem gohed tu for studyim Bible. Simone sei: “Samting wea kasem mi mekem mi for luksavve long wei wea Jehovah strongim and leadim mi.” Diswan helpem hem for garem stretfala tingting.

18. Olketa wanem samting nao mekem iu feel olsem Jehovah hem hapi long iu, and olketa wanem reason nao iu garem for “Praisem Jah!”?

18 Man wea raetem psalm hem luksavve nomata staka nation stap long earth, nation bilong Israel nao Jehovah chusim for kamap pipol bilong hem. Olketa nomoa Jehovah givim “law” long olketa, and “toktok” bilong hem long olketa. (Readim Psalm 147:19, 20.) Distaem, iumi tinghae long privilege for garem nem bilong God. Iumi hapi for savve long hem, iumi garem Bible for leadim iumi, and iumi savve fren gud witim hem. Olsem man wea raetem Psalm 147, iu tu garem staka reason for “Praisem Jah!” and for encouragem olketa narawan for duim sem samting.