Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  July 2017

“Hem Bae Helpem Iu for Win Long Evri Plan Bilong Iu”

“Hem Bae Helpem Iu for Win Long Evri Plan Bilong Iu”

“Barava hapi long Jehovah, and hem bae givim iu olketa samting wea heart bilong iu laekem.”—PS. 37:4.

SONG: 89, 140

1. Wanem nao olketa young wan mas disaedem abaotem future bilong olketa, and wanem nao savve helpem olketa for no wari tumas? (Lukim piksa long start bilong study.)

IUFALA olketa young wan, maet agree hao bifor iufala go long wanfala ples, hem wise for plan firstaem. Laef bilong iumi olketa man hem olsem wanfala gogo, and taem iu young nao hem taem for planim wanem iu laek for duim long laef. Hem tru maet datwan hem no isi samting for duim. Wanfala sista wea nem bilong hem Heather sei: “Mi fraet taem mi tingim hao mi mas disaedem wanem mi bae duim long laef.” Sapos iu garem kaen tingting olsem, tingim wanem Jehovah talem, hem sei: “No wari, bikos mi God bilong iu. Mi bae strongim iu and helpem iu.”—Isa. 41:10.

2. Wanem nao helpem iu for luksavve Jehovah laekem iu for mekem gudfala plan for future?

2 Jehovah encouragem iufala olketa young wan for mekem gudfala plan for future. (Eccl. 12:1; Matt. 6:20) Hem laekem iufala for hapi. Datwan showaot long olketa samting wea hem wakem wea iumi savve lukim, herem, and teistim. Jehovah showimaot hem lovem iumi long olketa nara wei tu. Hem givim iumi advaes and hem teachim iumi wanem for duim mekem iumi garem gudfala laef. So taem pipol no followim advaes bilong hem, hem no hapi long olketa.  Hem sei long olketa wea no followim hem: “Iufala chus for duim samting wea mi no hapi long hem. . . . Olketa pipol bilong mi bae hapi, bat iufala bae feel nogud. Olketa pipol bilong mi bae singaot from olketa hapi bikos olketa garem gudfala heart.” (Isa. 65:12-14) Taem iumi mekem olketa wise disison, iumi mekhae long Jehovah.—Prov. 27:11.

OLKETA PLAN WEA SAVVE MEKEM IU FOR HAPI

3. Wanem nao Jehovah laekem iufala olketa young wan for duim?

3 Wanem nao Jehovah laekem iufala olketa young wan for duim? Jehovah wakem olketa man long wei wea olketa savve hapi taem olketa savve long hem and faithful for worshipim hem. (Ps. 128:1; Matt. 5:3) Olketa animal no olsem, olketa kaikai nomoa, drink, and garem baby. Bat Jehovah laekem iufala for mekem gudfala plan mekem iufala hapi and garem gudfala laef. Creator bilong iufala hem “God wea garem love,” and hem “datfala hapi God,” wea wakem iumi “for olsem hem.” (2 Cor. 13:11; 1 Tim. 1:11; Gen. 1:27) Iufala bae hapi sapos iufala followim example bilong God. Bible sei: “Man wea givim samting hem barava hapi winim man wea kasem samting.” (Acts 20:35) Diswan hem wanfala tru samting. Masbi iu tu hapi taem iu givim samting. So Jehovah laekem iufala for mekem plan for future wea showimaot iufala lovem hem and olketa nara pipol.—Readim Matthew 22:36-39.

4, 5. Wanem nao mekem Jesus for hapi?

4 Jesus Christ showimaot nambawan example for iufala olketa young wan. Masbi taem hem smol hem savve plei and duim olketa nara samting witim olketa nara pikinini tu. Bible sei “taem for laflaf” and “taem for dance” hem stap. (Eccl. 3:4) Jesus hem savve gud long Jehovah bikos hem studyim olketa Holy Raeting. Taem hem 12 year, olketa bigman long temple barava sapraes taem “hem ansarem olketa kwestin and long bigfala savve wea hem garem.”—Luke 2:42, 46, 47.

5 Taem Jesus hem big, wei for duim wanem God laekem nao mekem hem for hapi. Olsem example, God laekem hem “for talemaot gud nius long pipol wea poor” and “for talem pipol wea blind bae olketa lukluk moa.” (Luke 4:18) Psalm 40:8 storyim tingting bilong Jesus abaotem datwan. Hem sei: “God bilong mi, mi hapi tumas for duim samting wea iu laekem.” Jesus hem hapi tumas for teachim pipol abaotem Dadi bilong hem. (Readim Luke 10:21.) Wantaem, bihaen hem story long wanfala woman abaotem tru worship, hem sei long olketa disaepol bilong hem: “Kaikai bilong mi hem for duim waka wea man wea sendem mi kam hem laekem mi for duim and for finisim datfala waka.” (John 4:31-34) Jesus hem hapi bikos hem duim samting wea showimaot hem lovem God and olketa man. Sapos iufala duim olsem, iufala tu bae hapi.

6. Why nao hem gud for storyim plan bilong iu for pioneer long olketa narawan?

6 Staka Christian start for pioneer taem olketa young and datwan mekem olketa for hapi. Hem bae gud sapos iu story witim samfala long olketa hia abaotem plan bilong iu for pioneer. Bible sei: “Taem pipol no story gud tugeta hem hard for olketa mekem gudfala plan, bat taem plande pipol story tugeta olketa kasem gud samting.” (Prov. 15:22) Olketa hia maet talem iu hao iu savve lanem staka samting long pioneer waka, wea bae helpem iu long laef. Jesus lanem staka samting from Dadi bilong hem taem hem stap long heven. Hem gohed for lane tu taem hem duim ministry bilong hem long disfala earth. Hem barava hapi taem hem preachim gud nius long pipol, and hem gohed for faithful long God nomata hem kasem olketa hard taem. (Readim Isaiah 50:4; Heb. 5:8; 12:2) Distaem, bae iumi storyim hao wei for duim full-taem service savve mekem iufala for hapi.

 HEM NAMBAWAN WAKA FOR TEACHIM PIPOL FOR KAMAP DISAEPOL

7. Why nao staka young wan laek for teachim pipol for kamap disaepol?

7 Jesus talem iumi for “go and teachim pipol long evri kantri for kamap disaepol.” (Matt. 28:19, 20) Sapos iu laek for duim datwan for full laef bilong iu, iu bae garem gudfala laef and datwan bae mekhae long God. Olsem olketa nara waka, taem iu duim pioneer waka for longfala taem, bae iu savve hao for duim gud datfala waka. Timothy wea hem start for pioneer taem hem teenager sei: “Mi laek for duim full-taem service bikos datwan nao showimaot mi lovem Jehovah. Firstaem, mi no garem eni Bible study. Bat bihaen, taem mi muv go long nara ples, insaed wan month nomoa mi startim tu-thri Bible study nao. Wanfala Bible study hem start for kam long olketa meeting. Bihaen mi attendim Bible Skul for Olketa Singol Brata, mi kasem niu assignment and mi startim fofala Bible study. * Mi laekem tumas for teachim pipol and lukim wei wea holy spirit helpem olketa for changem laef bilong olketa.”—1 Thess. 2:19.

8. Wanem nao samfala young wan duim for preach long difren kaen pipol?

8 Samfala young wan lanem narafala languis. Olsem example, Jacob, wea hem from North America, hem sei: “Taem mi seven year, mi skul witim samfala from Vietnam. Mi laek for story abaotem Jehovah long olketa, so mi disaed for lanem languis bilong olketa. Mi savve comparem English Wastaoa witim Vietnamese Wastaoa taem mi lanem datfala languis. Mi fren tu witim olketa narawan wea joinim Vietnamese languis kongregeson wea stap klosap long mifala. Taem mi 18 year, mi start for pioneer. Bihaen, mi attendim Bible Skul for Olketa Singol Brata. Datfala training hem barava helpem mi long assignment bilong mi bikos mi nomoa elder wea lukaftarem wanfala Vietnamese languis grup. Staka pipol from Vietnam sapraes tumas bikos mi savve long languis bilong olketa. Taem mi preach long olketa, olketa savve invaetem mi long haos bilong olketa and mi savve study witim olketa. Gogo samfala baptaes.”—Comparem Acts 2:7, 8.

9. Wanem nao iumi savve lanem taem iumi duim waka for teachim pipol for kamap disaepol?

9 Iu savve lanem staka samting taem iu duim waka for teachim pipol for kamap disaepol. Olsem example, iu lanem hao for duim gud wanfala waka, for story gud witim pipol, no fraet, and for kaen long pipol. (Prov. 21:5; 2 Tim. 2:24) Disfala waka savve mekem iu barava hapi bikos iu lane for iusim Bible for pruvim wanem iu bilivim, and iu lane tu for waka tugeta witim Jehovah.—1 Cor. 3:9.

10. Wanem nao savve helpem iumi for gohed hapi nomata staka long territory no interest?

10 Iumi savve gohed hapi for teachim pipol kamap disaepol nomata tu-thri pipol long territory nomoa interest for studyim Bible. Evriwan long kongregeson savve waka tugeta for helpem pipol kamap disaepol. Nomata wanfala brata or sista nomoa helpem samwan for kamap disaepol, iumi evriwan savve hapi bikos iumi tu duim samting for helpem datfala man. Olsem example, Brandon, wea hem pioneer for naenfala year long wanfala ples wea tu-thri pipol nomoa interest for studyim Bible. Hem sei: “Mi laek for preachim gud nius bikos hem nao wanem Jehovah askem iumi for duim. Mi start for pioneer no longtaem bihaen mi finisim hae skul. Mi laekem tumas for encouragem olketa young brata long kongregeson, and for lukim wei wea olketa gohed gud long spiritual wei. Bihaen mi attendim Bible Skul for Olketa Singol Brata, mi kasem niu assignment. Olketa narawan study witim samfala long territory gogo olketa baptaes, bat mi nao nomoa. Nomata olsem, mi hapi bikos mi plan for duim moa samting long waka for teachim pipol for kamap disaepol.”—Eccl. 11:6.

 OLKETA NARA SAMTING IU SAVVE DUIM LONG FULL-TAEM SERVICE

11. Wanem kaen waka nao staka young wan duim for Jehovah?

11 Staka waka hem stap for iumi duim for Jehovah. Olsem example, staka young wan olketa waka long construction. Iumi needim staka handred niu Kingdom Hall. Iumi iusim olketa Kingdom Hall for mekhae long Jehovah, so taem iu help for buildim olketa Kingdom Hall, datwan savve mekem iu hapi. Bae iu hapi tu for waka tugeta witim olketa brata and sista. And iu savve lanem staka samting, olsem hao for duim gud waka long wei wea hem sef, and for waka tugeta witim olketa overseer.

Olketa wea duim full-taem service savve kasem staka blessing (Paragraf 11-13 storyim diswan)

12. Hao nao pioneer waka savve helpem iu for duim samfala samting moa for Jehovah?

12 Wanfala brata, wea nem bilong hem Kevin sei: “Taem mi smol yet, mi garem tingting hao wanday bae mi duim full-taem service. Gogo, mi start for pioneer taem mi 19 year. Mi duim part-taem waka witim wanfala brata wea duim carpenter for sapotim mi. Mi lanem hao for wakem ruf, olketa window, and olketa door. Bihaen, mi volunteer for waka witim wanfala grup wea buildim olketa Kingdom Hall and haos bilong olketa brata and sista wea cyclone spoelem. Taem mi herem olketa needim samfala brata for help long construction waka long South Africa, mi sendem application bilong mi and olketa acceptim mi. Long Africa, mifala savve muv long olketa difren ples for wakem olketa niu Kingdom Hall bihaen evri tu-thri week. Construction grup bilong mifala hem olsem wanfala famili. Mifala stap tugeta, studyim Bible tugeta, and waka tugeta. Mi hapi tu for preach witim olketa brata long kongregeson evri week. Datfala plan wea mi garem taem mi smol yet hem mekem mi hapi fogud.”

13. Why nao staka young wan hapi for waka long Bethel?

13 Samfala wea pioneer bifor olketa waka  long Bethel distaem. Olketa wea waka long Bethel olketa hapi, bikos evri samting wea olketa duim hem for Jehovah. Olketa wea waka long Bethel help for provaedem olketa Bible and olketa pablikeson wea savve helpem pipol for lanem truth. Wanfala brata wea waka long Bethel, wea nem bilong hem Dustin sei: “Mi markem goal for duim full-taem service taem mi naen year. And mi start for pioneer taem mi finis from hae skul. Bihaen wan and haf year, mi kasem invitation for go waka long Bethel. Long there, mi lane for waka long olketa printing machine, and bihaen, mi wakem olketa program for computer. Long Bethel, mi savve hapi bikos mifala olketa first wan for herem olketa report abaotem waka for teachim pipol for kamap disaepol wea gohed evriwea long world. Mi laekem tumas for waka long Bethel bikos wanem mifala duim helpem pipol for fren gud witim Jehovah.”

WANEM NAO OLKETA PLAN BILONG IU FOR FUTURE?

14. Wanem nao iu savve duim mekem iu fit for duim full-taem service?

14 Wanem nao olketa samting wea iu savve duim mekem iu fit for duim full-taem service? For duim best bilong iu for Jehovah, hem important for iu garem olketa gudfala wei. Evritaem studyim Bible, ting raonem wanem iu lanem, and traem best for givim olketa gudfala koment long olketa meeting. Taem iu skul yet, hem gud for iu lane for storyim gud nius long olketa narawan. Showimaot iu interest long pipol taem iu story gud long olketa, and lisin taem olketa talemaot tingting bilong olketa. And tu, iu savve volunteer for duim eni waka long kongregeson, olsem for klinim and fixim olketa samting long Kingdom Hall. Jehovah hem laek for iusim olketa wea hambol and willing for duim waka. (Readim Psalm 110:3; Acts 6:1-3) Aposol Paul askem Timothy for duim missionary waka bikos ‘olketa brata talem olketa gud samting abaotem hem.’—Acts 16:1-5.

15. Wanem nao iu savve duim mekem iu garem waka for helpem iu for pioneer?

15 Staka wea duim full-taem service savve waka for sapotim olketa seleva. (Acts 18:2, 3) Maet iu savve duim wanfala short course for helpem iu faendem wanfala part-taem waka. Story witim circuit overseer and olketa nara pioneer abaotem plan bilong iu, and askem olketa for samfala idea. Then followim wanem Bible talem for “depend long Jehovah long evri samting wea iu duim, and olketa plan bilong iu bae gohed gud.”—Prov. 16:3; 20:18.

16. Hao nao full-taem service savve redyim iu for olketa nara responsibility long future?

16 Iu savve sure Jehovah laekem iu for “hol strong” long hope wea iu garem for future. (Readim 1 Timothy 6:18, 19.) Full-taem service savve helpem iu for kamap strongfala Christian taem iu waka witim olketa narawan wea duim sem samting. And tu, staka wea duim full-taem service taem olketa young luksavve datwan helpem olketa for garem gudfala marit. Staka taem olketa wea pioneer bifor olketa marit, olketa gohed for pioneer witim marit partner bilong olketa.—Rome 16:3, 4.

17, 18. Hao nao olketa samting wea heart bilong iumi laekem savve affectim plan bilong iumi?

17 Psalm 20:4 sei olsem abaotem Jehovah: “Hem bae givim iu olketa samting wea heart bilong iu laekem and hem bae helpem iu for win long evri plan bilong iu.” Taem iu mekem olketa plan for future bilong iu, ting raonem wanem nao iu barava laek for duim long laef. Tingim olketa samting wea Jehovah duim distaem, and wanem iu savve duim long waka bilong hem. Then plan for duim samting wea Jehovah bae hapi long hem.

18 Taem iu iusim laef bilong iu for duim moa samting long waka bilong Jehovah, and mekhae long hem, iu bae barava hapi. Iu bae “barava hapi long Jehovah, and hem bae givim iu olketa samting wea heart bilong iu laekem.”—Ps. 37:4.

^ par. 7 Distaem datfala skul hem change for Skul for Olketa Kingdom Evangelizer.