Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  January 2018

Lukim Hao Pipol wea Obey Difren From Olketa wea No Obey

Lukim Hao Pipol wea Obey Difren From Olketa wea No Obey

‘Bae yufala luksave olketa stretfala pipol hu i obeim mi i barava deferen from olketa nogud pipol hu i nating obeim mi.’—MALAKAE 3:18.

SONG: 61, 53

1, 2. Wanem challenge nao pipol bilong God feisim? (Lukim piksa long start bilong study.)

STAKA doctor and nurse waka midolwan pipol wea garem sik wea isi for kasem narawan. Olketa lukaftarem sikman bikos olketa laek for helpem hem. Bat olketa mas protectim olketa seleva mekem olketa no kasem datfala sik wea olketa trae for kiurim. Long sem wei tu, staka long iumi stap and waka witim pipol wea wei and tingting bilong olketa barava difren from God. Diswan isi for affectim iumi. Hem wanfala challenge.

2 Long olketa last day distaem, pipol wea no lovem God no laek for followim standard bilong God long samting wea stret and no stret. Aposol Paul storyim olketa nogud fasin bilong olketa hia taem hem raet long Timothy. Hem sei diskaen wei bae kamap moa worse taem end barava klosap for kam. (Readim 2 Timothy 3:1-5, 13.) Olketa nogud fasin olsem mekem iumi feel nogud tumas. Nomata olsem, tingting, toktok, and fasin bilong pipol wea stap raonem iumi savve isi for affectim iumi. (Provebs 13:20) Long disfala study, iumi bae lukim hao olketa nogud fasin hia difren from wei bilong pipol bilong God. Bae iumi storyim tu hao  for protectim iumiseleva for no letem diswan affectim iumi taem iumi helpem pipol for savve long Jehovah.

3. Wanem kaen pipol nao 2 Timothy 3:2-5 storyim?

3 Paul sei ‘long olketa last day bae evri samting hem hard tumas.’ Hem storyim 19-fala nogud fasin wea staka pipol distaem bae garem. Olketa fasin hia klosap semsem witim wanem hem talem long Rome 1:29-31, bat list wea Paul raetem long Timothy hem iusim olketa word wea no stap long eni nara part long olketa Christian Greek Scripture. Start long story bilong Paul, hem sei “pipol” bae garem olketa nogud fasin. Diswan minim olketa man and olketa woman tu. Bat no evri pipol garem olketa nogud fasin wea Paul storyim. Wei bilong pipol bilong Jehovah hem difren.—Readim Malakae 3:18.

HAO IUMI TING LONG IUMISELEVA

4. Storyim wei bilong olketa wea praod tumas.

4 Bihaen Paul sei staka tingim olketa seleva nomoa and laekem tumas selen, hem sei tu pipol bae tok praod, mekhae long olketa seleva, and praod tumas. Staka taem pipol wea garem olketa fasin hia tingse olketa gud winim narawan bikos long lukluk, savve, material samting, or hae position wea olketa garem. Pipol olsem laekem tumas for narawan tinghae long olketa. Wanfala savveman raet abaotem kaen man olsem, and sei: “Insaed long heart bilong hem wanfala smol altar stap wea hem savve baodaon long hemseleva.” Samfala sei wei for praod hem nogud tumas, dastawe pipol wea praod tu no laek for lukim taem narawan praod.

5. Hao nao wei for praod affectim tu samfala wakaman bilong God?

5 Jehovah heitim “wei for praod.” (Provebs 6:16, 17) Man wea praod no savve fren witim God. (Sams 10:4) Wei for praod hem fasin bilong Satan. (1 Tim. 3:6) Sorre samting nao, wei for praod affectim tu samfala faithful wakaman bilong Jehovah. Olsem example, King Uzziah bilong Judah faithful for staka year. Bat Bible sei: “Taem [King Uzziah] hemi kamap strong fogud, hemi praod tumas go-go hemi bagarap. Hemi mekem sin agensim [Jehovah] hu hemi God blong hem.” Uzziah go long temple and bonem incense, wea datwan no waka bilong hem. Bihaen, faithful King Hezekiah tu kamap praod for lelebet taem.—Mektu Kronikols 26:16; 32:25, 26.

6. Wanem nao samfala samting wea shud mekem David praod, bat why nao hem no olsem?

6 Samfala pipol praod bikos olketa luk naes, staka pipol savve long olketa, and savve hao for sing or pleim instrument, olketa strong, or narawan tinghae long olketa. David savve tumas for duim evri samting hia, bat hem gohed hambol for full laef bilong hem. Olsem example, bihaen David killim Goliath, King Saul sei David bae maritim dota bilong hem. Bat David sei: “Mi no fit fo tekem dota blong yu, bikos laen blong mi i samting nating nomoa long Israel an mi no bikman tu.” (Fas Samuel 18:18) Wanem nao helpem David for gohed hambol? Hem luksavve from God hambol and willing for helpem hem dastawe hem garem olketa gudfala wei, savve, and olketa privilege. (Sams 113:5-8) David luksavve evri gud samting wea hem kasem kam from Jehovah.—Lukim 1 Corinth 4:7.

7. Wanem nao bae helpem iumi for hambol?

7 Olsem David, pipol bilong Jehovah distaem traem best for hambol. Nomata Jehovah nao Most Hae, hem showimaot hem hambol, diswan barava tasim heart bilong iumi. (Ps. 18:35, NW) Iumi laek for followim disfala advaes: “Showimaot love, sorre long pipol, kaen long olketa, hambol, no raf, and patient.” (Col. 3:12) Iumi savve tu man wea garem love hem no “tok praod, and hem no savve tinghae tumas  long hemseleva.” (1 Cor. 13:4) Taem olketa narawan lukim iumi hambol, datwan maet mekem olketa laek for savve long Jehovah tu. Olsem hasband wea no insaed truth maet laek for worshipim Jehovah bikos long gudfala fasin bilong waef. Nara pipol tu, bae laek for worshipim Jehovah taem olketa lukim pipol bilong hem hambol.—1 Pet. 3:1.

HAO IUMI TREATIM OLKETA NARAWAN

8. (a) Wanem nao tingting bilong samfala pipol abaotem wei for no obeyim dadi and mami? (b) Wanem nao Bible talem olketa pikinini for duim?

8 Paul storyim wei wea pipol bae treatim each other long olketa last day. Hem sei olketa pikinini bae no obeyim dadi and mami. Distaem staka buk, movie, and TV program mekem hem luk olsem hem stret nomoa for pikinini no obeyim parents. Bat tru samting nao, taem pikinini no obey, famili no stap gud and datwan affectim community. Pipol bifor tu luksavve diswan important. Olsem example, long Greece bifor, sapos man hitim parents bilong hem, bae hem lusim olketa raet bilong hem insaed community. Law bilong Rome sei sapos samwan hitim dadi bilong hem, hem olsem man wea killim dae narawan. Olketa Hebrew and Greek Scripture komandim pikinini for respectim dadi and mami.—Eksodas 20:12; Eph. 6:1-3.

9. Wanem nao bae helpem pikinini for obeyim parents?

9 Nomata pikinini stap midolwan olketa wea no obey, samting wea bae protectim hem from diskaen wei for no obey, hem nao for tingim evri gud samting wea parents duim. Datwan bae mekem hem tinghae and laek for obey. Olketa young wan need for minim tu hao God, wea hem Dadi bilong iumi evriwan, expectim olketa for obeyim parents. Taem young wan storyim gud samting abaotem parents bilong hem, datwan savve helpem olketa fren bilong hem for respectim parents bilong olketa. Sapos parents no garem love insaed long famili, maet hem hard for pikinini obey. Bat taem young wan luksavve parents lovem hem, datwan helpem hem for obey nomata hem no isi. Wanfala young brata wea nem bilong hem Austin sei: “Nomata samfala taem mi laek trae for misstim panis, parents bilong mi savve markem olketa rul wea fitim, tufala explainim gud why tufala mekem olketa rul, and tufala evritaem mekem hem isi for mi story witim tufala. Diswan helpem mi for obey. Mi luksavve tufala kea for mi, and datwan mekem mi laek for mekem tufala hapi.”

10, 11. (a) Wanem nao olketa nogud fasin wea showimaot pipol no lovem each other? (b) Wanem kaen love nao tru Christian showimaot?

10 Paul storyim tu samfala nara nogud fasin wea showimaot pipol no lovem each other. Bihaen hem storyim wei for “no obeyim dadi and mami,” hem storyim wei for no tinghae. Hem story olsem bikos pipol wea no tinghae no savve sei thankiu for gud samting wea narawan duim for olketa. Paul sei tu pipol bae no faithful. Olketa no willing for agree witim narawan, wea minim olketa no laek mek peace. Olketa bae talem nogud samting for tok spoelem God and man, and olketa bae spoelem fren bilong olketa. And samfala bae laea for spoelem narawan taem olketa talem laea story mekem pipol tingse wei bilong narawan hem nogud. *

11 Pipol bilong Jehovah barava difren from staka pipol long world bikos olketa showimaot really love. Nomata long bifor, olketa duim diswan tu. Jesus sei komand for lovem narawan hem mek-tu important komand long Law bilong Moses. First wan nao hem for lovem God. (Matt. 22:38, 39) Jesus sei pipol bae luksavve long olketa tru Christian  from love wea olketa showimaot for each other. (Readim John 13:34, 35.) And olketa bae lovem enemy bilong olketa tu.—Matt. 5:43, 44.

12. Hao nao Jesus showimaot love for olketa narawan?

12 Jesus showimaot hem barava lovem pipol. Hem duim diswan taem hem go long olketa difren taon for talemaot gud nius abaotem Kingdom bilong God. Hem healim olketa wea blind, kripol, garem leprosy, and olketa wea earpas. Hem resurrectim tu olketa wea dae. (Luke 7:22) Jesus givim tu laef bilong hem for sevem olketa man nomata staka heitim hem. Jesus showimaot love olsem Dadi bilong hem. Evriwea long world Olketa Jehovah’s Witness followim example bilong Jesus for showimaot love for narawan.

13. Hao nao wei wea iumi showimaot love hem helpem pipol for laek lane abaotem Jehovah?

13 Taem iumi showimaot love long pipol, datwan savve mekem olketa interest for lane abaotem Dadi bilong iumi long heven. Olsem example, wanfala man long Thailand go long wanfala regional convention and hem tinghae tumas long wei wea olketa brata and sista showimaot love long each other. Bihaen hem go bak long haos, hem askem Olketa Jehovah’s Witness for studyim Bible witim hem tufala taem long week. Then hem preach long evri relative. Six month bihaen, hem duim first Bible reading bilong hem long Kingdom Hall. Waswe, iumi showimaot iumi lovem narawan? Tingim diswan, ‘Waswe, mi duim best bilong mi for helpem pipol long ministry, long famili, and long kongregeson? Waswe, mi garem sem tingting abaotem pipol olsem Jehovah?’

OLKETA WOLF AND OLKETA PIKININI SHEEPSHEEP

14, 15. Wanem nogud fasin nao staka pipol showimaot, and hao nao samfala changem wei bilong olketa?

14 Long olketa last day, pipol showimaot olketa nogud fasin wea iumi shud no garem. Olsem example, staka no laekem gud samting. Olketa barava heitim and againstim olketa gud samting. Kaen pipol olsem no savve  kontrolem seleva, and olketa raf. Samfala olketa bighed. Olketa no tingting bifor olketa duim samting and no kea abaotem hao samting olketa duim bae affectim narawan.

15 Staka pipol wea wei bilong olketa olsem wild animal olketa change. Bible talem interesting profesi abaotem disfala wei wea olketa barava change. (Readim Aesaea 11:6, 7.) Profesi hia story abaotem olketa wild animal olsem wolf and lion, wea bae stap tugeta witim olketa pikinini sheepsheep and baby buluka. Why nao olketa stap gud tugeta? Bible gohed for sei: “Bikos disfala wol bae hemi fulap long pipol hu i barava savegud long [Jehovah].” (Aesaea 11:9) Olketa animal no savve lane abaotem Jehovah, so disfala profesi storyim hao pipol bae changem wei bilong olketa.

Wei for followim Bible principle savve changem laef bilong man! (Paragraf 16 storyim diswan)

16. Hao nao Bible helpem pipol for changem wei bilong olketa?

16 Staka long olketa brata and sista bilong iumi wea bin raf olsem wolf, distaem olketa stap gud witim olketa narawan. Iu savve readim experience olsem wea garem title “Bible Changem Laef Bilong Pipol” long jw.org. Olketa wea lane abaotem and worshipim Jehovah olketa no olsem pipol wea luk olsem olketa worshipim God bat samting wea olketa duim showimaot olketa nating worshipim hem nomoa. Pipol olsem act olsem olketa worshipim God nomoa. Bat, staka wea worshipim Jehovah, wea bifor olketa raf, distaem olketa “garem niufala wei wea fitim wanem God hem laekem and wea datwan hem barava raeteous and faithful.” (Eph. 4:23, 24) Taem pipol lane abaotem God, olketa luksavve olketa need for followim standard bilong hem. Diswan helpem olketa for changem biliv, tingting, and wanem olketa duim. Hem no isi for mekem change olsem, bat holy spirit bilong God bae helpem olketa wea barava laek for worshipim hem.

“NO JOIN WITIM KAEN PIPOL OLSEM”

17. Hao nao iumi savve stap klia long pipol wea garem olketa nogud fasin?

17 Distaem, hem isi for lukim hao pipol bilong God difren from pipol wea no worshipim hem. Iumi mas careful for no letem nogud fasin bilong pipol hia for affectim iumi. Iumi laek for followim kaonsel bilong Jehovah for no join witim kaen pipol wea 2 Timothy 3:2-5 hem storyim. Bat, hard for iumi stap klia evribit from evriwan wea garem kaen nogud fasin olsem. Maet iumi mas waka, go skul, and stap witim olketa. Nomata olsem, iumi no need for garem sem tingting or duim sem samting olsem olketa. Wanem nao savve helpem iumi? Iumi savve strongim wei wea iumi fren witim Jehovah taem iumi studyim Bible and chusim olketa fren wea lovem hem.

18. Hao nao samting wea iumi talem and duim savve helpem olketa narawan for savve long Jehovah?

18 Iumi laekem tu for helpem olketa narawan for savve long Jehovah. Lukaotem chance for preach long pipol and askem Jehovah for helpem iu for talem raet toktok long raet taem. Iumi shud talemaot hao iumi wanfala Jehovah’s Witness. Then, gudfala wei bilong iumi bae givim glory long God and no long iumi. Jehovah teachim iumi for “heitim evri samting wea [hem] no laekem, and for heitim wanem pipol long disfala world laekem. Hem teachim iumi tu for garem gudfala tingting, for duim samting wea stret, and for faithful long God taem iumi stap long disfala world.” (Titus 2:11-14) Taem iumi followim example bilong Jehovah and duim wanem hem laekem, olketa narawan bae lukim datwan. Samfala pipol bae sei: ‘Plis yu letem mifala fo go wetem yufala, bikos mifala herem dat God hemi stap wetem yufala.’—Sekaraea 8:23.

^ par. 10 Greek word wea iumi transleitim “laea for spoelem narawan” hem di·aʹbo·los. Insaed Bible, disfala word hem title bilong Satan from hem laea for spoelem God.