Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  January 2018

Memorial Mekem Iumi Wan Mind

Memorial Mekem Iumi Wan Mind

“Hemi barava gud tumas taem olketa pipol blong God i wanmaen an stap tugeta gudfala.”—SAMS 133:1.

SONG: 149, 99

1, 2. Long 2018, wanem spesol hipap nao bae mekem iumi for wan mind, and why nao olsem? (Lukim piksa long start bilong study.)

LONG March 31, 2018, taem sun start for gogo daon, pipol bilong God and staka pipol wea interest bae hipap for disfala Evening Kaikai Bilong Lord wea kamap wantaem long year. Taem disfala earth hem gohed for tane raon and sun hem gogo daon long each kantri, staka million pipol bae celebratem Memorial bilong dae bilong Christ. Evri year, disfala barava spesol celebration mekem staka difren pipol for wan mind long full earth.

2 Tingim hapi bilong Jehovah and Jesus taem tufala lukim hao disfala celebration hem gohed for kamap bihaen sun go daon long evri kantri and olketa lukim staka million pipol attendim datfala spesol hipap. Bible storyim “wanfala big crowd wea no eniwan fit for kaontem. Olketa hia from evri kantri and tribe and pipol and languis,” and olketa singaot and sei, “God bilong iumi wea sidaon long throne witim datfala Pikinini Sheepsheep, tufala nao sevem iumi.” (Rev. 7:9, 10) Hem gud tumas for lukim hao evri year long  Memorial, staka pipol mekhae long Jehovah and Jesus for nambawan samting wea tufala duim.

3. Olketa wanem kwestin nao disfala study bae ansarem?

3 Long disfala study, iu bae kasem ansa bilong fofala kwestin hia: (1) Hao nao mi savve redi for Memorial mekem mi kasem gud samting taem mi attend? (2) Wanem nao olketa wei wea Memorial helpem pipol bilong God for wan mind? (3) Wanem nao mi savve duim for wan mind witim pipol bilong God? (4) Waswe, enitaem bae iumi attendim lastfala Memorial? Sapos olsem, wanem taem?

REDI FOR MEMORIAL MEKEM IUMI KASEM GUD SAMTING TAEM IUMI ATTEND

4. Why nao hem important for attendim Memorial?

4 Why nao hem important for attendim Memorial? Tingim, hem wanfala meeting and hem part long worship bilong iumi for Jehovah. Iumi sure Jehovah and Jesus luksavve taem each wan long iumi duim best for attendim disfala important meeting wea winim eni narawan. Iumi laekem Jehovah and Jesus for lukim hao iumi bae no letem eni samting stopem iumi for attendim Memorial, only sapos samting happen wea mekem hem barava hard tumas for iumi. Taem iumi duim samting wea showimaot meeting hem important long iumi, Jehovah bae keepim nem bilong iumi long buk bilong hem for rememberim iumi. Nara nem bilong disfala buk hem “buk bilong laef.” Buk hia garem nem bilong evriwan wea Jehovah bae givim laef olowe long olketa.—Malakae 3:16; Rev. 20:15.

5. Bifor Memorial, hao nao bae iu luksavve sapos iu followim yet olketa tru teaching?

5 Long olketa week bifor Memorial, iumi savve spendem taem for prea and ting raonem gud wei wea iumi fren witim Jehovah. (Readim 2 Corinth 13:5.) Aposol Paul talem olketa Christian: “Gohed for lukluk gud long iufala seleva for savve sapos iufala followim yet olketa tru teaching.” Hao nao iumi savve duim datwan? Ting raonem olketa kwestin olsem: ‘Waswe, mi barava bilivim diswan nao only organization Jehovah chusim for duim waka bilong hem? Waswe, mi duim best bilong mi for preachim and teachim disfala gud nius? Waswe, samting mi duim showimaot mi barava bilivim iumi stap long olketa last day and rul bilong Satan hem klosap for finis? Waswe, wei wea mi trustim Jehovah and Jesus strong yet olsem taem wea mi start for worshipim Jehovah?’ (Matt. 24:14; 2 Tim. 3:1; Heb. 3:14) Wei for ting raonem ansa bilong olketa kwestin hia bae helpem iumi for luksavve sapos iumi followim yet olketa tru teaching.

6. (a) Wanem nao only wei for kasem laef olowe? (b) Wanem nao wanfala elder duim for redi for Memorial, and hao nao iu savve duim sem samting?

6 Iumi redi for Memorial taem iumi readim and ting raonem information abaotem why Memorial hem important tumas. (Readim John 3:16; 17:3.) Only wei for iumi kasem laef olowe hem for savve long Jehovah and showimaot faith long Son bilong hem, Jesus. So iumi savve chusim olketa study project for helpem iumi feel klos long tufala. Tingim wanem wanfala brata wea elder for longfala taem hem duim. For staka year, hem kolektem olketa Wastaoa article wea storyim Memorial and love wea Jehovah and Jesus showim. Then insaed olketa week bifor Memorial, hem readim olketa article hia moa and ting raonem why Memorial hem important tumas. Taem niu article abaotem Memorial kamap hem bae putim witim olketa narawan hia. Hem ting raonem tu Bible reading for Memorial. Datfala elder sei taem hem duim diswan, hem lanem staka niu samting. Barava important samting nao, datfala study mekem love bilong hem for Jehovah and Jesus kamap strong evri year. Taem iu duim study olsem,  iu tu bae mekem love bilong iu for Jehovah and Jesus kamap strong. And tu, bae iu tinghae long wanem Jehovah and Jesus duim for iumi, and iu bae kasem gud samting from Memorial.

MEMORIAL HELPEM IUMI FOR WAN MIND

7. (a) Wanem nao Jesus prea abaotem long naet bilong datfala Evening Kaikai Bilong Lord? (b) Wanem nao showimaot Jehovah ansarem prea bilong Jesus?

7 Long datfala naet bilong Evening Kaikai Bilong Lord, Jesus talem wanfala spesol prea. Hem prea abaotem wei wea hem and Dadi bilong hem wan mind and for evri disaepol bilong hem tu for wan mind. (Readim John 17:20, 21.) Jehovah ansarem datfala prea bilong Son bilong hem, and distaem staka million pipol bilivim Jehovah nao sendem kam Son bilong hem. Memorial hem spesol winim eni nara meeting, from hem barava pruvim hao Olketa Jehovah’s Witness wan mind. Long datfala day, staka million pipol from olketa difren kantri and kala skin hipap tugeta long olketa difren part long world. Long samfala ples, hem no normal for pipol from olketa difren kantri for hipap tugeta for worship, and taem olketa duim olsem, pipol savve ting daonem olketa. Bat taem Jehovah and Jesus lukim olketa wan mind, datwan hem luk naes tumas.

8. Wanem nao Jehovah talem Ezekiel for duim?

8 From iumi pipol bilong Jehovah, iumi no sapraes for lukim wei wea iumi wan mind. Jehovah talem profesi abaotem datwan long Ezekiel. Hem talem Ezekiel for tekem tufala stik, wanfala stik for “Kingdom blong Jiuda” and narawan for “Kingdom blong Israel” and joinim tugeta for kamap wanfala stik nomoa. (Readim Esikiel 37:15-17.) Long “Kwestin From Reader” long Wastaoa bilong July 2016 hem sei: “Jehovah talem profet Ezekiel for raetem profesi abaotem pipol bilong hem. Hem sei pipol bilong hem bae go bak long Promis Land and olketa bae kamap wanfala nation moa. And tu, datfala profesi showimaot pipol bilong God wea stap long olketa last day bae wan mind for worshipim hem.”

9. Evri year long Memorial, hao nao profesi bilong Ezekiel abaotem wei for wan mind kamap tru?

9 Start long year 1919, Jehovah isisi organizem and mekem olketa anointed Christian for wan mind moa. Olketa nao piksarem disfala stik for “Kingdom blong Jiuda.” Then gogo, staka wea joinim olketa anointed garem hope for laef long disfala earth, olketa hia nao disfala stik for “Kingdom blong Israel.” Jehovah promis for joinim tufala stik hia long hand bilong hem for “mekem wanfala stik nomoa.” (Esikiel 37:19) Hem mekem olketa anointed and “olketa nara sheepsheep” for kamap “wanfala sekson” nomoa. (John 10:16; Sekaraea 8:23) Distaem, tufala grup hia gohed for wan mind for worshipim Jehovah. Olketa garem wanfala King, Jesus Christ, wea profesi bilong Ezekiel kolem hem King David, wakaman bilong God. (Esikiel 37:24, 25) Evri year long Memorial, taem iumi hipap for rememberim dae bilong Jesus, iumi savve lukim klia wan mind wea tufala grup hia garem wea Ezekiel profesi abaotem. Bat wanem nao each wan savve duim for gohed keepim wei for wan mind wea pipol bilong God garem?

WANEM NAO EACH WAN SAVVE DUIM FOR KEEPIM WAN MIND?

10. Hao nao iumi savve keepim wei for wan mind wea pipol bilong God garem?

10 Wanfala wei for pipol bilong God gohed keepim wei for wan mind, hem nao for hambol. Taem Jesus stap long earth, hem talem olketa disaepol for mas hambol. (Matt. 23:12) Pipol long world tingse olketa important winim narawan. Bat sapos iumi hambol, iumi bae respectim olketa brata wea lead long kongregeson. Taem iumi obeyim direction bilong  olketa, kongregeson bae wan mind. Barava important samting nao, sapos iumi hambol, Jehovah bae hapi bikos hem “againstim olketa wea praod tumas, bat hem kaen tumas long olketa wea hambol.”—1 Pet. 5:5.

11. Hao nao wei for ting raonem mining bilong bred and wine savve helpem iumi for keepim wan mind?

11 Mek-tu wei wea iumi savve gohed garem wan mind, hem for ting raonem wanem nao bred and wine long Memorial hem piksarem. Iumi shud duim diswan bifor Memorial, and especially long datfala naet bilong Memorial. (1 Cor. 11:23-25) Datfala bred wea no garem yeast hem piksarem perfect body bilong Jesus wea hem givim olsem sakrifaes. Datfala red wine hem piksarem blood bilong Jesus. Bat hem no inaf for savve nomoa long datwan. Iumi need for tingim hao ransom sakrifaes bilong Jesus showimaot bigfala love wea Jehovah and Jesus garem for iumi wea winim eni nara love. Jehovah givim Son bilong hem for iumi, and Jesus willing for dae for iumi. Taem iumi ting raonem love wea tufala showimaot, datwan bae muvim iumi for lovem tufala. Love wea iumi evriwan garem for Jehovah bae olsem rope wea taengem iumi tugeta and strongim wei wea iumi wan mind.

Taem iumi forgivim narawan, iumi keepim wei for wan mind (Paragraf 12, 13 storyim diswan)

12. Long story abaotem king and olketa slave bilong hem, hao nao Jesus showimaot klia Jehovah laekem iumi for forgivim narawan?

12 Mek-thri wei for gohed garem wan mind, hem for willing for forgivim narawan. Taem iumi forgivim narawan iumi showimaot iumi tinghae long wei wea Jehovah forgivim sin bilong iumi bikos long sakrifaes bilong Jesus. Ting raonem tokpiksa bilong Jesus long Matthew 18:23-34. Then askem olketa kwestin hia: ‘Waswe, mi willing for duim wanem Jesus talem? Waswe, mi patient and trae for minim olketa brata and sista? Waswe, mi redi for forgivim olketa wea spoelem mi?’ Hem tru, samfala sin hem serious winim narawan. And samfala sin hem hard tumas for iumi man wea no perfect for forgivim. Bat story bilong Jesus teachim iumi wanem Jehovah laekem iumi for duim. (Readim Matthew 18:35.) Jesus showimaot hao Jehovah bae no forgivim iumi sapos iumi no forgivim narawan taem iumi garem gudfala reason for duim datwan.  Dastawe iumi mas tingting gud abaotem wei wea iumi shud forgivim olketa brata bilong iumi. For protectim and gohed keepim wei for wan mind, iumi need for forgivim narawan olsem Jesus hem talem.

13. Hao nao wei for stap gud witim olketa narawan helpem iumi for wan mind?

13 Taem iumi forgivim narawan hem showimaot iumi laek stap gud witim olketa brata and sista. Aposol Paul sei iumi shud waka hard for ‘stap gud tugeta, and traem best for keepim nao wei for wan mind wea holy spirit helpem iumi for garem.’ (Eph. 4:3) Klosap taem bilong Memorial, and especially long datfala naet, tingting gud abaotem hao iu treatim narawan. Tingim, ‘Waswe, wei bilong mi showaot klia hao mi no savve keepim kros? Waswe, pipol luksavve mi trae hard for keepim wan mind and stap gud witim narawan?’ Diswan hem olketa important kwestin for iumi ting raonem.

14. Hao nao iumi savve showimaot iumi ‘patient and lovem narawan’?

14 Mek-foa wei for keepim wan mind hem nao for followim example bilong Jehovah for showimaot love. (1 John 4:8) Iumi no laek for garem kaen tingting olsem, “Mi lovem olketa brata and sista bilong mi, bat mi no laekem wei bilong olketa.” Sapos iumi garem kaen tingting olsem, hem showaot iumi no followim kaonsel bilong Paul for “mas patient and mas lovem narawan.” (Eph. 4:2) Lukim hao Paul no sei for “mas patient” nomoa, bat hem sei iumi “mas lovem narawan.” For patient witim narawan bikos iumi lovem hem, hem difren from wei for just patient. Insaed kongregeson iumi garem staka difren kaen pipol, and Jehovah leadim each wan long olketa kam long hem. (John 6:44) So Jehovah lukim staka gud reason for lovem olketa. Sapos olsem, waswe long iumi? Iumi shud barava lovem olketa long wei wea Jehovah laekem iumi for duim!—1 John 4:20, 21.

WANEM TAEM NAO LASTFALA MEMORIAL BAE KAMAP?

15. Hao nao iumi savve last Memorial bae kamap?

15 Wanday, bae iumi attendim last Memorial. Hao nao iumi savve? Paul raet long olketa anointed Christian and sei taem olketa rememberim dae bilong Jesus evri year, olketa gohed “talemaot Lord hem dae, go kasem taem hem kam.” (1 Cor. 11:26) Datfala toktok “taem hem kam” hem minim sem samting olsem Jesus talem long profesi abaotem end bilong world. Hem story abaotem bigfala trabol wea bae klosap for kam and hem sei, “Saen bilong Son bilong man bae showaot long skae, and evri tribe long earth bae hitim chest bilong olketa seleva from olketa sorre tumas. Olketa bae lukim Son bilong man hem kam long olketa cloud long skae witim bigfala paoa and glory. Wanfala trumpet bae krae bigfala and [Jesus] bae sendem go olketa angel bilong hem and olketa bae hipimap olketa wea hem chusim from skae and earth.” (Matt. 24:29-31) Disfala wei wea Jesus bae “hipimap olketa wea hem chusim” hem minim bae hem tekem evri anointed Christian wea stap yet long earth for go long heven. Diswan bae happen bihaen bigfala trabol hem start, bat bifor Armageddon. Long datfala war, Jesus witim 144,000 bae faetem olketa king long earth and winim olketa. (Rev. 17:12-14) Memorial wea bae kamap bifor Jesus “kam” for tekem olketa anointed wan for go long heven, hem nao bae last Memorial.

16. Why nao iu disaed strong for attendim Memorial disfala year?

16 No letem eni samting stopem iu for attendim Memorial long March 31, 2018. And askem Jehovah for helpem iumi duim samting for gohed wan mind witim pipol bilong hem. (Readim Sams 133:1.) Tingim, hao wanday bae iumi attendim last Memorial. Go kasem datfala day, iumi laek for showimaot iumi barava tinghae long wei wea iumi wan mind long Memorial evri year.