“Mifala waka tugeta witim God and mifala askem iufala tu for no ting nating long why God hem kaen long iufala.—2 COR. 6:1.

SONG: 75, 74

1. Nomata Jehovah hem Olmaeti God, wanem nao hem laekem olketa narawan for duim?

JEHOVAH hem Olmaeti God. Hem wakem evri samting and hem garem bigfala wisdom and paoa. Bihaen Jehovah helpem Job for minim datwan, Job sei long hem: “Mi luksavve iu fit for duim evri samting, and no eni samting wea iu ting for duim hem hard long iu.” (Job 42:2) Jehovah savve duim eni samting wea hem laek for duim and hem no needim eniwan for helpem hem. Nomata olsem, hem showimaot love long wei wea hem laekem olketa narawan for waka tugeta witim hem for mekem plan bilong hem kamap tru.

2. Wanem important waka nao Jehovah givim long Jesus for duim?

2 First samting wea God wakem hem Son bilong hem Jesus. Then, Jehovah iusim Son bilong hem for helpem hem for wakem evri nara samting. (John 1:1-3, 18) Aposol Paul sei olsem abaotem Jesus: “God iusim hem for wakem evri nara samting long heven and long earth. Hem wakem olketa samting wea iumi lukim and olketa samting wea iumi no savve lukim, olsem olketa  ruler, olketa gavman, and olketa wea garem paoa. God iusim hem for wakem evri samting hia and evri samting hia hem bilong Christ.” (Col. 1:15-17) So Jehovah givim important waka long Son bilong hem for duim, and God talem olketa narawan abaotem diswan. Datwan hem nambawan privilege for Jesus!

3. Wanem nao Jehovah talem Adam for duim, and why nao olsem?

3 Jehovah laekem tu olketa man for waka tugeta witim hem. Olsem example, hem talem Adam for nemim olketa animal. (Gen. 2:19, 20) Masbi Adam hapi tumas for duim datfala waka! Hem studyim gud lukluk bilong olketa animal and wanem olketa duim, and then hem nemim each wan long olketa. Jehovah nao wakem evri animal, so hemseleva savve nemim olketa. Bat from hem lovem Adam, hem talem hem for nemim olketa animal. And tu, God givim waka long Adam for mekem disfala full earth kamap Paradaes. (Gen. 1:27, 28) Bat Adam disaed for no gohed waka witim God, and from hem duim olsem, hem and evri man kasem barava nogud samting.—Gen. 3:17-19, 23.

4. Wanem nao olketa narawan duim for waka witim God for mekem plan bilong hem kamap tru?

4 Gogo, God talem olketa narawan for waka witim hem. Noah wakem wanfala ark for sevem hem and famili bilong hem long taem bilong Flood. Moses mekem olketa Israelite kamap free from Egypt. Joshua leadim olketa Israelite go insaed long Promis Land. Solomon buildim temple long Jerusalem. Mary kamap mami bilong Jesus. Olketa hia and staka narawan tu waka witim Jehovah for mekem plan bilong hem kamap tru.

5. Wanem waka nao Jehovah laekem iumi for duim, and waswe, Jehovah needim iumi for duim disfala waka? (Lukim piksa long start bilong study.)

5 Distaem Jehovah laekem iumi for duim best bilong iumi for sapotim Kingdom bilong hem. Staka waka stap wea iumi savve duim for sapotim Kingdom. Nomata samfala long olketa waka hia iumi no savve duim, iumi evriwan savve preachim gud nius abaotem Kingdom. Jehovah seleva savve duim disfala waka. Hem savve story kam from heven long pipol long earth. And tu, Jesus sei Jehovah savve mekem olketa ston for talem pipol abaotem King long Kingdom bilong God. (Luke 19:37-40) Nomata olsem, Jehovah laekem iumi for “waka tugeta” witim hem. (1 Cor. 3:9) Aposol Paul sei: “Mifala waka tugeta witim God and mifala askem iufala tu for no ting nating long why God hem kaen long iufala.” (2 Cor. 6:1) Hem nambawan privilege for waka tugeta witim God. Distaem bae iumi storyim samfala reason why hem barava gud for waka witim God.

HEM MEKEM IUMI HAPI

6. Wanem nao firstborn Son bilong God talem abaotem wei wea hem waka witim Dadi bilong hem?

6 Olketa wea worshipim Jehovah evritaem hapi taem olketa waka witim God. Bifor firstborn Son bilong God kam long earth hem sei: “Mi nao first samting wea Jehovah wakem . . . mi stap witim hem and mi wanfala nambawan wakaman, and mi nao kamap datwan wea hem laekem tumas evriday, and evritaem mi hapi taem mi stap witim hem.” (Prov. 8:22, 30) Taem Jesus waka witim Dadi bilong hem, hem hapi bikos hem duim staka samting and hem savve Jehovah lovem hem. Bat waswe long iumi?

Taem iumi teachim truth long narawan,datwan mekem iumi barava hapi (Paragraf 7 storyim diswan)

7. Why nao preaching waka hem mekem iumi hapi?

7 Jesus sei man wea givim samting hem hapi and man wea kasem samting hem hapi tu. (Acts 20:35) Iumi barava hapi taem iumi lanem truth. Bat why nao iumi hapi tu  taem iumi talemaot truth long olketa narawan? Bikos iumi lukim pipol barava hapi taem olketa minim olketa tru teaching insaed Bible and olketa start for fren witim God. Iumi hapi taem iumi lukim olketa changem tingting and wei bilong olketa. Iumi luksavve preaching waka hem important winim eni nara waka wea iumi savve duim. Hem helpem pipol for fren witim God and for kasem laef olowe.—2 Cor. 5:20.

8. Wanem nao samfala talem abaotem hapi wea olketa kasem taem olketa waka witim Jehovah?

8 Taem iumi helpem olketa narawan for lane abaotem God, iumi savve datwan hem mekem Jehovah hapi and hem tinghae long wanem iumi duim. Datwan tu mekem iumi hapi. (Readim 1 Corinth 15:58.) Marco, wea stap long Italy sei: “Mi barava hapi from mi waka hard for Jehovah and no for samwan wea bae forgetim nomoa waka wea mi duim.” And Franco, wea hem tu stap long Italy sei: “Evriday, Jehovah iusim Bible and olketa nara samting wea hem givim for remindim iumi hem lovem iumi and hem tinghae long olketa samting wea iumi duim, nomata maet iumi tingse wanem iumi duim hem no important. Dastawe taem mi waka tugeta witim God mi hapi and mi luksavve mi duim gud samting long laef.”

HEM HELPEM IUMI FOR FREN GUD WITIM GOD AND OLKETA NARAWAN

9. Wanem nao mekem Jehovah and Jesus for fren gud tugeta?

9 Taem iumi waka tugeta witim olketa wea iumi lovem, datwan mekem iumi for fren gud witim olketa. Datwan helpem iumi for savve gud long olketa and wei bilong olketa. Iumi savve long goal bilong olketa and wanem olketa duim for kasem olketa goal hia. Maet Jesus waka witim Jehovah for plande billion year. Tufala barava lovem each other and no eni samting savve spoelem wei wea tufala fren gud tugeta. Jesus story abaotem datwan taem hem sei: “Mi and Dadi long heven, mitufala wan mind nomoa.” (John 10:30) Tufala wan mind and waka gud tugeta.

10. Hao nao preaching waka helpem iumi for fren gud witim God and olketa narawan?

10 Long wanfala prea, Jesus askem Jehovah for lukaftarem olketa disaepol bilong hem. Why nao hem prea olsem? Hem sei: “Mekem olketa savve wan mind olsem iumi tufala wan mind.” (John 17:11) Taem iumi followim olketa standard bilong God and duim preaching waka, datwan helpem iumi for savve gud long olketa nambawan wei bilong God. Iumi luksavve hem wise for iumi trustim hem and followim wanem hem talem. And taem iumi fren gud witim God, hem tu bae fren gud witim iumi. (Readim James 4:8.) Iumi fren gud tu witim olketa brata and sista bikos iumi kasem olketa semkaen problem, iumi hapi long olketa semkaen samting, and iumi garem olketa semkaen goal. Iumi waka tugeta, hapi tugeta, and gohed strong tugeta. Octavia, wea stap long Britain, hem sei: “Taem mi  waka witim Jehovah, datwan helpem mi for fren gud witim olketa narawan.” Hem sei diswan hem bikos olketa wea hem fren witim olketa garem “sem goal long laef.” Iumi tu garem semkaen tingting olsem hem. Taem iumi lukim olketa brata and sista traem best for mekem Jehovah hapi, datwan helpem iumi for fren gud witim olketa.

11. Wanem nao bae strongim wei wea iumi fren gud witim Jehovah and olketa brata and sista long niu world?

11 Love wea iumi garem for God and olketa brata and sista hem strong distaem, bat long niu world, datfala love bae hem strong go moa. Tingim evri gudfala waka wea iumi bae duim long future! Iumi bae hapi for lukim olketa wea laef bak and for teachim olketa abaotem Jehovah. And tu, iumi bae duim waka for mekem disfala earth kamap wanfala paradaes. Iumi bae hapi tumas for waka tugeta and iumi bae isisi kamap perfect taem Christ rulim iumi. Evriwan long earth bae fren gud tugeta and fren gud witim Jehovah, and Jehovah bae “givim long evri samting wea laef, evri samting wea olketa laekem.”—Ps. 145:16.

HEM PROTECTIM IUMI

12. Hao nao preaching waka hem protectim iumi?

12 Iumi mas no letem eni samting spoelem wei wea iumi fren witim Jehovah. Iumi stap long world bilong Satan and iumi no perfect, so hem isi for iumi start for garem tingting and wei bilong pipol long world. Tingting bilong pipol long world hem olsem current long river wea savve pullim iumi for go difren. So iumi mas iusim full strong bilong iumi for swim go long ples iumi laek go long hem. Long sem wei, iumi mas waka hard for no letem world bilong Satan pullim iumi for go difren. So hao nao preaching waka protectim iumi? Taem iumi story long nara pipol abaotem Jehovah and Bible, datwan helpem iumi for tingim olketa samting wea important and gud, and no olketa samting wea savve spoelem faith bilong iumi. (Phil. 4:8) Preaching waka strongim faith bilong iumi bikos hem helpem iumi for tingim olketa promis bilong God and olketa standard bilong hem. And tu, hem helpem iumi for gohed garem olketa gudfala wei wea bae protectim iumi from Satan and world bilong hem.—Readim Ephesus 6:14-17.

13. Wanem nao tingting bilong wanfala Witness long Australia abaotem preaching waka?

13 Taem iumi gohed busy for duim preaching waka and olketa nara spiritual samting, datwan savve protectim iumi bikos iumi bae no garem taem nao for wari tumas abaotem olketa problem bilong iumiseleva. Joel, wea stap long Australia, hem sei: “Preaching waka helpem mi for no forgetim wanem nao hem important long laef. Hem helpem mi for tingim olketa hard samting wea pipol kasem long laef and olketa gud samting wea mi kasem from mi followim olketa Bible principle. Preaching waka helpem mi for hambol. Hem helpem mi for depend long Jehovah and olketa brata and sista.”

14. Wanem nao showimaot God givim holy spirit for helpem iumi long preaching waka?

14 Taem iumi preach iumi barava sure God givim holy spirit for helpem iumi. Olsem example, tingim sapos iu garem waka for givim bred long pipol long ples wea iu stap. Iu no kasem eni pei for waka wea iu duim, and eni samting iu needim iuseleva nao peim. And tu, staka pipol les long datfala bred, and samfala heitim iu bikos iu tekem kam datfala bred for olketa. Waswe, bae iu gohed for duim datfala waka? Bihaen lelebet taem bae iu feel wikdaon, and iu stop nao. Long preaching waka, iumi iusim taem and selen bilong iumi, and  samfala pipol mekfani long iumi and kros long iumi taem iumi duim datfala waka. Nomata olsem, staka long iumi gohed for duim preaching waka for staka year finis and no givap. Datwan showimaot God givim holy spirit for helpem iumi.

HEM SHOWIMAOT IUMI LOVEM GOD AND OLKETA NARAWAN

15. Long wanem wei nao preaching waka hem join witim plan bilong Jehovah for olketa man?

15 Long wanem wei nao preaching waka hem join witim plan bilong Jehovah for olketa man? Plan bilong God hem for olketa man laef olowe long earth, and datfala plan hem no change taem Adam hem sin. (Isa. 55:11) God mekem wei for iumi kamap free from sin and dae. Wanem nao hem duim? Hem sendem kam Jesus long earth for sakrifaesim laef bilong hem. Bat for kasem gud samting from datfala sakrifaes, olketa man mas obeyim God. So Jesus teachim pipol wanem nao God laekem olketa for duim, and hem talem olketa disaepol bilong hem tu for duim sem samting. Taem iumi preach and helpem olketa narawan for kamap fren bilong God, iumi waka tugeta witim God for sevem olketa man from sin and dae.

16. Long wanem wei nao preaching waka hem showimaot iumi lovem God and narawan?

16 Taem iumi helpem olketa narawan for savve long wanem olketa mas duim for kasem laef olowe, iumi showimaot iumi lovem olketa and iumi lovem Jehovah. God “laekem tumas for evri difren kaen man mas sev and for garem stretfala savve abaotem olketa tru teaching.” (1 Tim. 2:4) Taem wanfala Pharisee askem Jesus wanem law nao hem important winim olketa nara law, Jesus sei: “‘Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.’ Disfala law nao first wan, and no eni nara law important winim hem. Nara law wea barava important nao hem: ‘Iu mas lovem narawan long sem wei wea iu lovem iuseleva.’” (Matt. 22:37-39) Taem iumi preachim gud nius, iumi obeyim olketa law hia.—Readim Acts 10:42.

17. Hao nao tingting bilong iu abaotem preaching waka?

17 Jehovah barava blessim iumi! Jehovah givim iumi wanfala waka wea mekem iumi hapi, wea helpem iumi for fren gud witim hem and olketa narawan, and wea protectim iumi. And tu, datfala waka givim iumi chance for showimaot iumi lovem God and olketa narawan. Plande million pipol raonem world worshipim Jehovah, and laef bilong olketa hem no semsem. Bat nomata iumi young or olo, rich or poor, strong or wik, iumi evriwan savve talemaot gud nius. Iumi garem sem tingting olsem Chantel from France, wea sei: “God wea garem bigfala paoa winim eniwan long universe, wea hem wakem evri samting, and wea hem hapi God, hem sei long mi: ‘Iu go! Iu story! Story for mi, and story from heart bilong iu. Mi givim iu strong bilong mi, toktok bilong mi long Bible, olketa angel for sapotim iu, olketa narawan for waka witim iu, training, and olketa instruction long barava taem.’ Hem wanfala nambawan privilege for duim wanem Jehovah laekem and for waka tugeta witim God bilong iumi!”