Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  January 2016

“Gohed for Lovem Narawan, Olsem Man Lovem Brata Bilong Hem”!

“Gohed for Lovem Narawan, Olsem Man Lovem Brata Bilong Hem”!

“Gohed for lovem narawan, olsem man lovem brata bilong hem.”—HEB. 13:1.

SONG: 72, 119

1, 2. Why nao Paul raetem leta long olketa Hebrew Christian?

LONG year 61 C.E., olketa kongregeson long Israel stap gud. Aposol Paul stap long prison long Rome, bat hem savve klosap bae hem go aot from prison. Timothy, wea tufala savve gogo tugeta, hem go aot finis from prison, and tufala plan for go visitim olketa brata long Judea. (Heb. 13:23) Bat bihaen faevfala year nomoa, olketa Christian long Judea, and especially olketa wea stap long Jerusalem, mas kwiktaem lusim ples bilong olketa. Why nao olsem? Long 33 C.E., Jesus talem olketa disaepol, taem olketa lukim army hem raonem Jerusalem, olketa mas ranawe go long olketa maunten.—Luke 21:20-24.

2 Insaed 28 year bihaen Jesus talem datwan, olketa Christian long Israel gohed faithful nomata staka pipol spoelem and againstim olketa. (Heb. 10:32-34) Bat Paul laek helpem olketa for redi for olketa hard samting wea bae kasem olketa long future. (Matt. 24:20, 21; Heb. 12:4) Olketa mas garem strongfala faith mekem olketa no givap and followim warning bilong Jesus for mas ranawe mekem olketa no dae. (Readim Hebrew 10:36-39.) So Jehovah iusim Paul for raetem leta long olketa brata and  sista hia. Datfala leta nao hem Bible buk Hebrew. Paul raetem datwan for strongim olketa and helpem olketa for gohed faithful.

3. Why nao iumi shud interest long Bible buk Hebrew?

3 Pipol bilong God distaem shud interest long Bible buk Hebrew. Why nao olsem? Bikos taem wea iumi stap long hem distaem hem olsem tu taem bilong olketa Christian long Judea. Long taem bilong iumi wea “evri samting hem hard tumas,” staka brata and sista gohed faithful nomata pipol spoelem and againstim olketa. (2 Tim. 3:1, 12) Bat staka long iumi no kasem persecution and iumi stap gud. Nomata olsem, iumi mas gohed for lukaot olsem olketa Christian long taem bilong Paul. Why nao olsem? Bikos day bilong God hem klosap, and iumi mas redi for datwan!—Readim Luke 21:34-36.

4. Wanem nao yeartext for 2016, and why nao hem fitim?

4 Wanem nao bae helpem iumi for redi for olketa samting wea klosap for happen? Long Bible buk Hebrew, Paul talem staka samting wea bae helpem iumi for garem strongfala faith. Wanfala samting hia wea barava important hem stap long Hebrew 13:1. Hem sei: “Gohed for lovem narawan, olsem man lovem brata bilong hem.” Datwan nao hem yeartext for 2016.

Yeartext for 2016: “Gohed for lovem narawan, olsem man lovem brata bilong hem.” —Hebrew 13:1

LOVEM NARAWAN, OLSEM MAN LOVEM BRATA BILONG HEM

5. Wanem nao hem minim for “lovem narawan, olsem man lovem brata bilong hem”?

5 Wanem nao hem minim for “lovem narawan, olsem man lovem brata bilong hem”? Long datfala scripture, Paul iusim wanfala Greek word wea minim “love wea man garem for really brata bilong hem.” Diskaen love hem love wea olketa long famili and olketa wea fren gud garem for each other. (John 11:36) From iumi evriwan olketa brata and sista, love wea iumi garem for each other hem mas tru wan. (Matt. 23:8) Paul sei: “Iufala mas lovem olketa narawan wea biliv, olsem man lovem brata bilong hem. Iufala mas willing for showimaot respect long narawan.” (Rome 12:10) Taem pipol bilong God showimaot kaen love olsem, and followim olketa Bible principle, datwan savve helpem olketa for fren gud tugeta and for wan mind.

6. Long tingting bilong iumi olketa tru Christian, hu nao “brata” bilong iumi?

6 Staka taem, olketa Bible pablikeson nomoa savve story abaotem wei for “lovem narawan, olsem man lovem brata bilong hem.” Long bifor, olketa Jew iusim word “brata” for minim wanfala relative and samfala taem hem minim nara Jew wea no relative bilong olketa. Bat no enitaem hem minim man wea no Jew. Bat iumi olketa tru Christian savve iusim word “brata” for minim eni tru Christian, nomata wanem kantri nao hem kam from. (Rome 10:12) Jehovah teachim iumi for lovem narawan, olsem man lovem brata bilong hem. (1 Thess. 4:9) Why nao hem important for iumi gohed lovem olketa brata and sista bilong iumi?

WHY HEM IMPORTANT FOR LOVEM NARAWAN

7. (a) Wanem nao main reason why iumi lovem narawan? (b) Wanem nao nara reason why hem important for iumi strongim love wea iumi garem for each other?

7 Main reason why iumi lovem narawan hem bikos Jehovah talem iumi for duim datwan. Iumi no savve sei iumi lovem Jehovah sapos iumi no lovem olketa brata and sista bilong iumi. (1 John 4:7, 20, 21) Nara reason why iumi lovem narawan hem bikos iumi needim each other, especially taem iumi kasem olketa hard taem. Taem Paul raetem leta bilong hem for olketa Hebrew  Christian, hem savve klosap nao samfala mas lusim haos bilong olketa and olketa material samting wea olketa garem. Jesus sei long datfala taem bae hem barava hard tumas. (Mark 13:14-18; Luke 21:21-23) So bifor datwan hem happen, olketa Christian hia mas strongim love wea olketa garem for each other.—Rome 12:9.

8. Wanem nao iumi mas duim distaem bifor bigfala trabol hem start?

8 Hem klosap nao for bigfala trabol hem start. (Mark 13:19; Rev. 7:1-3) Taem datwan hem happen, iumi mas duim wanem disfala scripture talem: “Pipol bilong mi, go insaed long olketa rum bilong iufala wea iufala bae stap sef, and satem door. Haed for lelebet taem nomoa go kasem taem kros bilong God hem finis.” (Isa. 26:20) Maet datfala toktok “olketa rum bilong iufala” hem minim olketa kongregeson bilong iumi. Long kongregeson nao iumi savve worshipim Jehovah witim olketa brata and sista bilong iumi. Hem important for iumi go evritaem long olketa meeting, bat iumi mas duim samfala nara samting tu. Paul talem olketa Hebrew Christian for encouragem narawan for “showimaot love and duim olketa gudfala samting” for each other. (Heb. 10:24, 25) Distaem nao iumi mas strongim love wea iumi garem for olketa brata and sista, bikos love wea iumi garem for each other bae helpem iumi evriwan for no givap nomata wanem hard taem iumi kasem long future.

9. (a) Olketa wanem chance nao iumi garem for showimaot love long olketa brata and sista distaem? (b) Storyim samfala example wea showimaot love wea pipol bilong Jehovah garem for each other. (Lukim tu endnote.)

9 Bifor bigfala trabol hem start, iumi garem staka chance for showimaot iumi lovem olketa brata and sista bilong iumi. Staka long olketa safa bikos long earthquake, flood, cyclone, tsunami, or olketa nara natural disaster. Samfala brata and sista kasem persecution. (Matt. 24:6-9) And samfala narawan kasem hard taem saed long selen bikos iumi stap long disfala nogud world. (Rev. 6:5, 6) Taem olketa brata and sista kasem hard taem, datwan hem chance for iumi showimaot iumi lovem olketa. Nomata staka pipol long world no showimaot love, iumi mas gohed for showimaot love long olketa narawan.—Matt. 24:12. [1]

HAO IUMI SAVVE SHOWIMAOT IUMI LOVEM NARAWAN

10. Wanem nao bae iumi storyim distaem?

10 Nomata iumi evriwan savve kasem olketa hard taem, wanem nao bae helpem iumi for gohed showimaot love long olketa narawan? Wanem nao samfala samting wea iumi savve duim for showimaot iumi lovem olketa brata and sista bilong iumi? Bihaen aposol Paul sei for olketa Christian “gohed for lovem narawan, olsem man lovem brata bilong hem,” hem storyim samfala wei wea olketa Christian savve duim datwan. Bae iumi storyim sixfala samting wea Paul talem.

11, 12. Wanem nao iumi savve duim for showimaot iumi kaen long pipol and welkamim olketa? (Lukim piksa long start bilong study.)

11 “No forget for kaen long pipol and welkamim olketa.” (Readim Hebrew 13:2.) Long datfala scripture Paul iusim wanfala Greek word wea minim “wei for kaen long olketa stranger.” Datwan maet mekem iumi for tingim Abraham and Lot. Tufala man hia kaen long olketa visitor wea tufala no savve long olketa. Bihaen nao, tufala just savve olketa visitor hia olketa angel. (Gen. 18:2-5; 19:1-3) Olketa example hia encouragem olketa Hebrew Christian for showimaot love long wei for kaen long pipol and welkamim olketa.

12 Wanem nao iumi savve duim for showimaot iumi kaen long pipol and welkamim olketa? Iumi savve invaetem olketa brata  and sista for kam long haos for iumi kaikai tugeta or for associate tugeta. Nomata iumi no savve gud long circuit overseer and waef bilong hem, iumi savve invaetem tufala for kaikai tugeta taem olketa visitim kongregeson bilong iumi. (3 John 5-8) Iumi no need for wakem staka kaikai or spendem staka selen. Goal bilong iumi hem for encouragem olketa brata and sista, no for show long olketa samting wea iumi garem. And iumi shud no invaetem nomoa olketa wea bae duim samting for iumi tu long narataem. (Luke 10:42; 14:12-14) Nomata iumi busy tumas, iumi shud “no forget for kaen long pipol and welkamim olketa”!

13, 14. Wanem nao iumi savve duim for showimaot iumi “tingim olketa wea stap long prison”?

13 “Tingim olketa wea stap long prison.” (Readim Hebrew 13:3.) Taem Paul raetem datwan, hem story abaotem olketa brata wea stap long prison from olketa faithful long God. Paul praisem olketa long kongregeson bikos olketa “barava sorre long olketa brata wea stap long prison.” (Heb. 10:34) Taem Paul stap long prison for fofala year, samfala brata helpem hem. Bat olketa Hebrew Christian stap farawe from Paul, so wanem nao olketa hia savve duim for helpem hem? Olketa savve gohed prea strong for hem.—Phil. 1:12-14; Heb. 13:18, 19.

14 Distaem, staka brata and sista stap long prison bikos olketa faithful long God. Olketa brata and sista wea stap klosap savve duim samfala samting for helpem olketa. Bat staka long iumi stap farawe from olketa wea stap long prison. Wanem nao iumi savve duim for helpem olketa and showimaot iumi no forgetim olketa? From iumi lovem olketa, iumi laek gohed prea strong for olketa. Olsem example, iumi savve prea for olketa brata, olketa sista, and olketa pikinini tu wea stap long prison long Eritrea. Iumi laek prea tu for thrifala brata bilong iumi, Paulos Eyassu, Isaac Mogos, and Negede Teklemariam, wea stap long prison long Eritrea for 20 year finis.

15. Hao nao iumi savve showimaot iumi respectim marit bilong iumi?

15 “Evriwan mas respectim marit.” (Readim Hebrew 13:4.) Iumi savve showimaot iumi lovem olketa narawan long wei wea iumi stap klia long wei for durong. (1 Tim. 5:1, 2) Olsem example, sapos iumi durong witim wanfala brata or sista, iumi bae spoelem hem and famili bilong hem. Datwan bae mekem olketa brata and sista for no trustim iumi. (1 Thess. 4:3-8) And tu, tingim hao wanfala waef bae feel sapos hem savve hasband bilong hem savve lukluk long olketa rabis piksa. Waswe, waef hia bae feel olsem hasband bilong hem lovem hem and respectim marit bilong tufala?—Matt. 5:28.

16. Hao nao wei for hapi nomoa long samting wea iumi garem savve helpem iumi for showimaot love?

16 Iumi mas ‘hapi nomoa long samting wea iumi garem.’ (Readim Hebrew 13:5.) Wei for trust long Jehovah bae helpem iumi for hapi and satisfae long samting wea iumi garem. Hao nao datwan savve helpem iumi for showimaot love long olketa narawan? Taem iumi hapi and satisfae long samting wea iumi garem, iumi bae luksavve olketa Christian brata and sista olketa important winim selen or olketa material samting. (1 Tim. 6:6-8) Iumi bae no komplen olowe or tok againstim olketa brata and sista. And iumi bae no jealous long olketa narawan or greedy. Taem iumi hapi and satisfae long samting wea iumi garem, iumi bae willing for givim samting long olketa narawan.—1 Tim. 6:17-19.

17. Hao nao wei wea “iumi mas no fraet” helpem iumi for showimaot love?

17 “Iumi mas no fraet.” (Readim Hebrew 13:6.) Wei for trustim Jehovah bae helpem iumi for no fraet nomata iumi kasem hard  taem. And taem iumi no fraet, datwan mekem iumi hapi nomoa. From iumi hapi, datwan helpem iumi for showimaot love long wei for encouragem and comfortim olketa brata and sista. (1 Thess. 5:14, 15) Nomata long taem bilong bigfala trabol, iumi bae no fraet from iumi savve ‘taem for God sevem iumi hem klosap.’—Luke 21:25-28.

Waswe, iu tinghae long waka wea olketa elder duim for iumi? (Paragraf 18 storyim diswan)

18. Hao nao iumi savve showimaot iumi lovem olketa elder?

18 ‘Tingim olketa wea leadim iumi.’ (Readim Hebrew 13:7, 17.) Olketa elder long kongregeson iusim taem bilong olketa for helpem iumi. Taem iumi tingim evri samting wea olketa duim, datwan mekem iumi for lovem and tinghae long olketa. Iumi no laek for duim eni samting wea bae mekem olketa no hapi or feel nogud. Bat iumi laek for evritaem obeyim olketa. Taem iumi duim olsem, iumi “barava kaen long olketa and lovem olketa bikos long waka wea olketa duim.”—1 Thess. 5:13.

SHOWIMAOT LOVE LONG BIGFALA WEI MOA

19, 20. Wanem nao iumi savve duim for showimaot love long olketa brata and sista “long bigfala wei moa”?

19 Pipol luksavve pipol bilong Jehovah showimaot love long each other. Olketa Christian long taem bilong Paul tu showimaot love. Nomata olsem, Paul sei long olketa: “Gohed showimaot diswan long bigfala wei moa.” (1 Thess. 4:9, 10) Tru tumas, iumi savve duim samfala samting moa for showimaot love long olketa brata and sista!

20 Taem iumi lukluk long yeartext for disfala year long Kingdom Hall, hem gud for ting raonem olketa kwestin hia: Waswe, mi savve duim samfala samting moa for kaen long pipol and welkamim olketa? Wanem nao mi savve duim for helpem olketa brata and sista wea stap long prison? Waswe, mi respectim arrangement bilong God saed long marit? Wanem nao savve helpem mi for hapi nomoa long samting wea mi garem? Wanem nao savve helpem mi for barava trustim Jehovah? Waswe, mi evritaem obeyim olketa elder? Sapos iumi traem best for duim olketa samting hia, iumi bae followim yeartext bilong iumi for disfala year, wea sei: “Gohed for lovem narawan, olsem man lovem brata bilong hem.”—Heb. 13:1.

^ [1] (paragraf 9) Samfala example wea showimaot Olketa Jehovah’s Witness showimaot love long each other long taem bilong disaster, hem stap long Wastaoa bilong July 15, 2002, page 8-9, and disfala buk Jehovah’s Witnesses—Proclaimers of God’s Kingdom, chapter 19.