Skip to content

Skip to table of contents

Olketa Jehovah’s Witness

Chusim languis Solomon Islands Pidgin

 LAEF STORY

No Eniting Hard Long Jehovah

No Eniting Hard Long Jehovah

“BAE no eniwan dae and pipol bae laef bak.” Waef bilong mi, Mairambubu, herem toktok hia taem hem insaed bas. Hem barava interest and laek for savve samfala samting moa. So, taem bas stop and olketa passenger go aot, hem ran bihaen woman wea talem datfala toktok. Nem bilong datfala woman hem Apun Mambetsadykova, and hem wanfala Jehovah’s Witness. Nomata wei for story long olketa Witness long datfala taem hem danger, wanem mifala lanem from Apun barava changem laef bilong mifala.

WAKA FROM MORNING GO KASEM EVENING

Mi born long 1937 long wanfala kolkhoz, wea hem community farm, klosap Tokmok, long Kyrgyzstan. Mifala pipol bilong Kyrgyz and mifala story long Kyrgyz languis. Parents bilong mi waka long kolkhoz farm from morning go kasem evening. Olketa wea waka long farm savve kasem rasin evritaem, bat olketa tek pei wantaem long year nomoa. Mami bilong mi stragol for lukaftarem mi and smol sista bilong mi. Bihaen mi skul for faevfala year nomoa mi tu start for waka long datfala kolkhoz farm.

Olketa maunten bilong Teskey Ala-Too

Staka poor pipol stap long area wea mifala stap, and olketa mas hard waka for kasem inaf selen. Taem mi young, mi no ting abaotem why iumi laef or wanem bae happen long future. Long datfala taem, mi nating savve hao olketa nambawan teaching abaotem Jehovah God and plan bilong hem bae changem laef bilong mi. Story abaotem hao disfala message kasem pipol long Kyrgyzstan hem barava interesting. Diswan start klosap hom bilong mi long northern part long Kyrgyzstan.

OLKETA WEA PRISONER BIFOR TEKEM KAM TRUTH LONG KYRGYZSTAN

Long 1956, truth abaotem Jehovah God hem start for grow long Kyrgyzstan. Bat hem no isi bikos pipol garem strong tingting abaotem teaching bilong Communist gavman. Why nao olsem? Diswan bikos bifor Kyrgyzstan stap anda long Union of Soviet Socialist Republics (USSR). Evriwea long USSR, olketa Jehovah’s Witness no teksaed long eni samting long politik. (John 18:36) Datwan mekem Communist gavman ting long olketa olsem enemy, so olketa persecutim olketa. Bat no eni samting savve stopem  toktok bilong God for kasem heart bilong pipol wea hambol. Tru nao, wanfala long olketa important leson wea mi lanem long full laef bilong mi, hem nao hao Jehovah “savve duim eni samting.”—Mark 10:27.

Emil Yantzen

Wei wea Olketa Jehovah’s Witness kasem persecution nao mekem staka pipol long Kyrgyzstan herem truth. Hao nao olsem? Gavman bilong USSR, savve sendem olketa prisoner go long Siberia wea hem stap anda long datfala gavman. Taem olketa prisoner kamap free, staka go long Kyrgyzstan, and samfala long olketa tekem truth go long there. Wanfala prisoner, hem Emil Yantzen wea born long Kyrgyzstan long 1919. Olketa sendem Emil long wanfala labor camp long Siberia and long there hem meetim olketa Witness. Hem lanem truth and long 1956 hem kam bak long Kyrgyzstan. Emil kam stap klosap long Sokuluk, wea klosap ples bilong mi. Long 1958, firstfala kongregeson start long Sokuluk long Kyrgyzstan.

Victor Vinter

Klosap wan year bihaen, Victor Vinter muv go long Sokuluk. Disfala faithful brata kasem staka hard taem. From hem no tek saed, tufala taem nao hem stap long prison for thrifala year. Then, olketa putim hem long prison for nara tenfala year, and then olketa sendem hem for prisoner long nara ples for faevfala year. Nomata olsem, persecution no stopem wei wea tru worship gohed for grow.

TRUTH KLOSAP FOR KASEM HOM BILONG MI

Eduard Varter

Long 1963, Kyrgyzstan garem samting olsem 160 Jehovah’s Witness, and staka long olketa kam from Germany, Ukraine, and Russia. Wanfala long olketa hem Eduard Varter, wea hem wanfala prisoner, wea baptaes long Germany long 1924. Long olketa year bilong 1940, olketa Nazi sendem hem long concentration camp, and samfala year bihaen, Communist gavman bilong USSR sendem hem olsem prisoner long nara ples. Long 1961, disfala faithful brata muv kam long taon bilong Kant, wea klosap long homtaon bilong mi.

Elizabeth Fot; Aksamai Sultanalieva

Elizabeth Fot, wea hem faithful for worshipim Jehovah, hem tu stap long Kant. Hem savve tumas for soengim kaleko, from datwan pipol wea garem big waka olsem olketa doctor and teacher savve askem hem for somapem kaleko for olketa. Wanfala long olketa hia, hem Aksamai Sultanalieva, wea hasband bilong hem waka long office bilong pablik prosecutor. Taem Aksamai kam long Elizabeth for samfala kaleko, hem askem staka kwestin abaotem why iumi laef and wanem nao happen long olketa wea dae finis. Elizabeth iusim Bible for ansarem olketa kwestin hia. Gogo, Aksamai kamap wanfala sista wea strong for preachim gud nius.

Nikolai Chimpoesh

Long datfala taem tu, Nikolai Chimpoesh, wea hem from Moldova kamap circuit overseer, and hem duim datfala waka for klosap 30 year. Nikolai visitim olketa kongregeson and hem organizem tu waka for copyim and givimaot olketa pablikeson bilong iumi. Olketa police savve long olketa samting wea hem duim. So Eduard Varter encouragem Nikolai and talem hem, “Sapos olketa police kwestinim iu talem olketa stret, pablikeson wea iumi kasem hem kam from hedquarter long Brooklyn. Luk stret long eye bilong datfala KGB police. Iu no fraet.”—Matt. 10:19.

No longtaem bihaen, Nikolai kasem komand for go long KGB hedquarter long Kant. Nikolai storyim samting wea happen: “Datfala police askem wea nao iumi kasem pablikeson bilong iumi. Mi talem hem iumi kasem from Brooklyn. Hem no talem eni samting abaotem datwan. So hem letem mi go and no enitaem moa olketa kwestinim mi.” Olketa Witness hia wea no  fraet, gohed for garem wei for luksavve taem olketa spredim gud nius long ples bilong mi long northern part bilong Kyrgyzstan. Long 1981, famili bilong mi kasem datfala nambawan truth abaotem Jehovah, and waef bilong mi Mairambubu nao first wan for herem.

WAEF BILONG MI KWIKTAEM LUKSAVVE LONG TRUTH

Mairambubu kam from Naryn Region bilong Kyrgyzstan. Wan taem long August 1974, hem kam visitim sista bilong mi long haos, and datwan firstaem mi meetim hem. Semtaem mi lukim Mairambubu, mi barava laekem hem. And mitufala marit long datfala sem day.

Apun Mambetsadykova

Long January 1981, taem Mairambubu insaed bas for go long market hem herem datfala toktok wea iumi storyim long start bilong article. Waef bilong mi laek for savve samfala samting moa, so hem askem datfala woman for nem and ples wea hem stap. Hem talem nem bilong hem, Apun, bat hem careful for no talem eni nara samting bikos long datfala taem olketa banim waka bilong olketa Witness. Winim wei for talem ples hem stap, hem ask abaotem wea nao mifala stap. Waef bilong mi arrive bak long haos and hem hapi tumas.

Mairambubu sei, “Mi herem olketa naesfala samting. Wanfala woman talem hao klosap nao pipol bae no savve dae. Nomata olketa wild animal tu bae kamap tame.” Taem mi herem diswan, hem here olsem mekap story nomoa. So mi sei, “Iumi weit for hem kam explainim gud for iumi.”

Bihaen thrifala month, Apun visitim mifala. Then samfala narawan gohed visitim mifala staka taem moa. From datwan, mifala meetim samfala Kyrgyz pipol wea olketa firstfala Witness long datfala taem. Olketa sista hia storyim olketa nambawan tru samting abaotem Jehovah and plan bilong hem for evri man. Olketa iusim datfala buk From Paradise Lost to Paradise Regained for teachim mifala. * Bat bikos wanfala buk hia nomoa hem stap long Tokmok, mifala mas raetem copy bilong mifala seleva.

Wanfala long olketa first samting wea mifala lanem hem profesi long Genesis 3:15. Mifala lanem hao Kingdom bilong God, wea Jesus nao hem King long hem, bae mekem diswan kamap tru. Datwan important message wea evriwan mas herem! Dastawe mifala mas join insaed waka for talemaot diswan long pipol. (Matt. 24:14) Kwiktaem nomoa, wanem mifala lanem from Bible mekem mifala start for changem laef bilong mifala.

 MEETING AND BAPTISM GOHED NOMATA OLKETA BANIM MIFALA

Wanfala brata long Tokmok invaetem mifala for attendim wanfala wedding. Taem mifala go mitufala waef kwiktaem luksavve olketa Witness barava difren. No eniwan drinkim alcohol and evriting organize gud. Diswan barava difren from olketa wedding wea mifala attendim bikos staka taem pipol savve drunk, tok swear, and duim samting wea no stret.

Mifala attendim tu samfala Christian meeting long kongregeson long Tokmok. Sapos hem fine day, olketa meeting kamap long forest. Olketa brata and sista savve hao olketa police gohed for spaem mifala, so olketa brata markem samwan for security. Long taem bilong winter, mifala savve meeting insaed haos. Tu-thri taem, olketa police kam long datfala haos and ask wanem nao mifala duim long there. Long July 1982, mitufala Mairambubu baptaes long Chüy River, bat mifala mas barava careful. (Matt. 10:16) Olketa brata and sista kam long olketa smol grup for datfala hipap long forest. Mifala singim wanfala Kingdom song and then herem baptism tok.

MIFALA IUSIM CHANCE FOR DUIM MOA SAMTING LONG MINISTRY

Long 1987, wanfala brata askem mi for go lukim samwan wea interest wea stap long taon bilong Balykchy. For kasem there, mi travel long train for fofala hour. Bihaen tu-thri taem mifala go preach long Balykchy, mifala luksavve staka pipol interest. Diswan chance for mifala duim moa samting long ministry.

Staka taem mitufala Mairambubu go long Balykchy. Long weekend mitufala stap long there, go aot long ministry, and garem olketa Christian meeting. Staka pipol barava laekem olketa pablikeson bilong iumi. Mifala karem olketa pablikeson from Tokmok insaed mishok, wea hem bag for karem potato. Insaed wan month, tufala bag pablikeson wea mifala tekem go hem no inaf for evriwan. Taem mifala travel long train, mifala savve preach tu long olketa passenger.

Eitfala year bihaen first visit bilong mifala long Balykchy, olketa startim wanfala kongregeson long 1995. Hem kostim staka selen for travel from Tokmok go long Balykchy. Mifala no garem staka selen, so hao nao mifala savve duim datwan? Wanfala brata nao evritaem givim selen for helpem mifala. Jehovah lukim wei wea mifala laekem tumas for duim moa samting long ministry, so hem givim blessing wea olsem hem “openem skae an letem ren hemi kamdaon.” (Malakae 3:10) Tru tumas, no eni samting hard long Jehovah!

BUSY LONG FAMILI AND MINISTRY

Long 1992, mi kamap first Kyrgyz elder long Kyrgyzstan. Long hom kongregeson bilong mi long Tokmok, samfala nara chance for duim ministry hem kamap. Mifala startim staka Bible study witim olketa young Kyrgyz student wea kam for skul. Wanfala wea mifala study witim hem Branch Komiti member distaem, and nara tufala spesol pioneer. And tu, mifala savve helpem olketa narawan wea kam long meeting. Long olketa year bilong 1990, pablikeson and olketa meeting kamap long Russian languis nomoa. Bat staka long kongregeson story long Kyrgyz languis. So mi savve interpretim olketa tok and datwan mekem hem isi for olketa minim truth.

Mi witim waef and eitfala long olketa pikinini bilong mifala long 1989

Mitufala Mairambubu busy tu for lukaftarem big  famili bilong mifala. Mitufala tekem olketa pikinini long preaching and long olketa meeting. Gele bilong mitufala, Gulsayra, wea 12 year, hapi tumas for story witim pipol long street abaotem Bible. And olketa pikinini laek for baeheartim scripture. From datwan, olketa pikinini and olketa grani pikinini, busy for duim samting for sapotim kongregeson. Mifala garem 9 pikinini and 11 grani pikinini wea laef yet. Sixtin long olketa gohed servem Jehovah or attendim meeting witim parents bilong olketa.

OLKETA BIGFALA CHANGE WEA KAMAP

Olketa brata and sista wea start for duim waka bilong Jehovah long ples bilong mifala long olketa year bilong 1950 bae barava sapraes long olketa change wea kamap. Start kam long olketa year bilong 1990, wanfala samting wea difren hem wei wea mifala garem freedom for preach and hipap tugeta.

Mi and waef long ministry

Long 1991, mi and waef bilong mi attendim first convention long Alma-Ata, wea distaem olketa kolem Almaty, long Kazakhstan. And long 1993, hem firstaem for olketa brata long Kyrgyzstan garem convention. Datwan kamap long Spartak Stadium long Bishkek. Olketa pablisa spendem wanfala week for klinim datfala stadium. Director bilong datfala stadium hem hapi tumas so hem letem mifala for iusim stadium and no peim.

Nara change kamap long 1994, taem olketa printim olketa first pablikeson long Kyrgyz languis. Distaem transleison team long branch office long Bishkek gohed for transleitim olketa pablikeson long Kyrgyz languis. Long 1998, gavman luksavve long waka bilong Olketa Jehovah’s Witness long Kyrgyzstan. Organization grow and distaem mifala winim 5,000 pablisa. Distaem mifala garem 83 kongregeson and 25 grup long Chinese, English, Kyrgyz, Russian, Russian Sign Language, Turkish, Uighur, and Uzbek. Evri brata and sista hia from difren ples wan mind for worshipim Jehovah. Evri samting hia kamap from no eniting hard long Jehovah.

Jehovah barava changem laef bilong mi. Mi growap long famili wea poor and mi skul for faevfala year nomoa. Nomata olsem, Jehovah helpem mi for kamap wanfala elder and for teachim olketa nambawan truth from Bible long pipol wea skul gud winim mi. Tru nao, Jehovah savve duim samting wea maet iumi tingse hem hard for happen. Olketa samting wea mi experiencem helpem mi gohed faithful for witness abaotem Jehovah, wea hem man wea “savve duim eni samting.”—Matt. 19:26.

^ par. 21 Olketa Jehovah’s Witness pablisim bat distaem olketa no printim.