Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  February 2018

Gohed Strong Olsem Spiritual Man!

Gohed Strong Olsem Spiritual Man!

“Gohed followim spirit.”—GAL. 5:16.

SONG: 136, 10

1, 2. Wanem nao wanfala brata luksavve abaotem spiritual saed bilong hem, and wanem nao hem duim?

ROBERT baptaes taem hem teenager, bat hem no really ting strong long truth. Hem sei: “Mi no duim eni rong samting, bat mi olsem nomoa. Pipol tingse mi strong long spiritual wei, from mi go olowe long olketa meeting and mi savve auxiliary pioneer samfala taem long year. Bat wanfala samting mi no duim.”

2 Firstaem, Robert no luksavve wanem nao datfala samting wea hem no duim, bat bihaen hem marit hem just minim. Samfala taem hem and waef savve duim Bible quiz. Waef bilong hem wanfala spiritual woman, and hem isi nomoa for hem ansarem olketa kwestin, bat Robert savve feel shame bikos staka taem hem no savve long ansa. Hem sei: “Mi feel olsem mi nating savve nomoa. So mi ting olsem, ‘From mi nao mas leadim mitufala saed long olketa spiritual samting, mi mas duim samting.’” Hem sei: “Mi study, study, gogo mi start for minim hao evri samting insaed Bible join tugeta. Datwan helpem mi for minim staka samting, and wanfala important samting nao, mi fren gud witim Jehovah.”

3. (a) Wanem nao iumi lanem from story bilong Robert? (b) Olketa wanem kwestin nao bae iumi storyim?

3 Story bilong Robert teachim iumi olketa important leson. Iumi maet savve long samfala samting long Bible and attendim olketa  meeting olowe, bat datwan no minim iumi wanfala spiritual man. Or, maet iumi gohed gud long spiritual wei, bat taem iumi lukluk gud long iumiseleva, iumi luksavve iumi no duim samfala samting yet. (Phil. 3:16) For helpem iumi gohed strong olsem spiritual man, bae iumi ansarem thrifala kwestin hia: (1) Wanem nao savve helpem iumi for lukluk gud long spiritual saed bilong iumi? (2) Hao nao iumi savve gohed grow long spiritual wei? (3) Hao nao wei for strong long spiritual wei affectim samting iumi duim evriday?

LUKLUK GUD LONG IUMISELEVA

4. Kaonsel long Ephesus 4:23, 24 hem for hu?

4 Taem iumi start for worshipim God, iumi mas changem laef bilong iumi. Diswan affectim evri samting wea iumi duim. Nomata iumi baptaes finis, iumi still gohed for change. Bible sei, iumi mas “gohed for garem wanfala niu tingting.” (Eph. 4:23, 24) From iumi no perfect, iumi evriwan need for gohed changem wei bilong iumi. Nomata sapos iumi worshipim Jehovah for staka year finis, iumi need for gohed strong olsem spiritual man.—Phil. 3:12, 13.

5. Olketa wanem kwestin nao savve helpem iumi for lukluk gud long iumiseleva?

5 For gohed strong olsem spiritual man, iumi need for honest taem iumi lukluk gud long iumiseleva. Nomata iumi young or olo, iumi savve askem iumiseleva: ‘Wanem nao samfala samting wea mi changem wea showimaot mi start for kamap spiritual man? Waswe, olketa wei bilong mi start for olsem Christ? Waswe, samting wea mi tingim and duim long meeting showimaot mi strong long spiritual wei? Long wanem wei nao samting wea mi storyim savve showimaot wanem mi laekem tumas? Wei bilong mi for study seleva, kaleko and lukluk bilong mi, hem showimaot mi wanem kaen man? Wanem nao mi duim taem samwan kaonselem mi? Wanem nao mi duim taem mi kasem test? Waswe, mi kamap wanfala mature Christian?’ (Eph. 4:13) Olketa kwestin hia bae helpem iumi for luksavve sapos iumi grow long spiritual wei.

6. Wanem nao nara samting wea savve helpem iumi luksavve sapos iumi garem spiritual tingting?

6 Maet samfala taem iumi needim olketa narawan for helpem iumi luksavve sapos iumi garem spiritual tingting. Aposol Paul sei man wea no garem spiritual tingting nating luksavve wei bilong hem no mekem God hapi. Bat spiritual man minim tingting bilong God and luksavve God no hapi taem man duim nogud samting. (1 Cor. 2:14-16; 3:1-3) Staka taem olketa elder wea garem tingting bilong Christ kwiktaem luksavve long olketa saen wea showimaot man no garem spiritual tingting. Sapos elder trae for helpem iumi, waswe, bae iumi acceptim help and followim kaonsel bilong hem? Taem iumi acceptim kaonsel, datwan showimaot iumi barava laek for kamap strong long spiritual wei.—Eklesiastes 7:5, 9.

GOHED FOR KAMAP STRONG LONG SPIRITUAL WEI

7. For kamap wanfala spiritual man, why nao hem no inaf for savve long Bible nomoa?

7 Tingim, for kamap spiritual man, hem minim hem no inaf for savve long Bible nomoa. King Solomon savve staka samting abaotem olketa wei bilong Jehovah and samfala wise toktok bilong hem stap insaed Bible tu. Bat gogo, hem no gohed olsem spiritual man from hem no faithful long Jehovah. (Fas Kings 4:29, 30; 11:4-6) Iumi need for savve long Bible bat iumi needim nara samting tu. Iumi need for gohed grow long spiritual wei. (Col. 2:6, 7) Hao nao for duim datwan?

8, 9. (a) Wanem nao bae helpem iumi for garem strongfala faith? (b) Wanem nao goal bilong iumi taem iumi study and ting raonem samting iumi lanem? (Lukim piksa long start bilong study.)

8 Paul encouragem olketa Christian long  first century for “waka hard for kamap mature.” (Heb. 6:1) Wanem nao iumi savve duim for followim kaonsel bilong Paul? Wanfala important samting hem for studyim datfala buk, Gohed Kasem Gud Samting From Love Bilong God.” Diswan bae helpem iu for savve hao for followim olketa Bible principle. Sapos iu studyim finis datfala buk, iu savve studyim olketa nara buk wea savve helpem iu for garem strongfala faith. (Col. 1:23) Iumi need tu for prea and ting raonem wanem iumi lanem and askem Jehovah for helpem iumi for luksavve hao for followim datwan.

9 Taem iumi study and ting raonem wanem iumi lanem, goal bilong iumi hem for mekem grow wei wea iumi laek for mekem Jehovah hapi and obeyim hem. (Sams 40:8; 119:97) And tu, iumi waka hard for no duim olketa samting wea bae spoelem wei wea iumi gohed grow long spiritual wei.—Titus 2:11, 12.

10. Wanem nao olketa young wan savve duim for kamap strong long spiritual wei?

10 Sapos iu wanfala young wan, waswe, iu garem olketa spiritual goal? Wanfala brata wea waka long Bethel evritaem savve interest for story witim olketa wea bae baptaes long olketa circuit assembly. Staka hem olketa young wan. Hem savve ask abaotem spiritual goal bilong olketa. Ansa bilong olketa showimaot hao staka long olketa tingting gud abaotem wanem olketa bae duim for Jehovah long future. Samfala plan for duim full-taem service or for muv go long ples wea needim olketa pablisa for preach. Bat samfala young wan no savve hao for ansarem kwestin bilong hem. Maet olketa tingse olketa no need for garem olketa spiritual goal. Sapos iu wanfala young wan, askem iuseleva: ‘Waswe, mi duim olketa spiritual samting nomoa bikos dadi and mami laekem mi for duim datwan? Waswe, miseleva traem best for fren gud witim God?’ Nomata iumi young or olo, iumi evriwan shud garem olketa spiritual goal. Taem iumi garem goal olsem, datwan bae helpem iumi for strongim spiritual saed bilong iumi.—Eklesiastes 12:1, 13.

11. (a) Wanem nao iumi need for duim for gohed kamap strongfala spiritual man? (b) Bible example bilong hu nao iumi savve followim?

11 Sapos iumi luksavve iumi need for kamap gud long samfala samting, iumi mas duim samting mekem iumi gohed strong long spiritual wei. Hem barava important for kamap spiritual man bikos laef bilong iumi depend long datwan. (Rome 8:6-8) Bat, for kamap strong long spiritual wei hem no minim iumi mas perfect. Holy spirit bilong Jehovah savve helpem iumi for change. Bat, iumi mas waka hard for duim datwan. Long bifor, Brata John Barr, member bilong Governing Body, storyim Luke 13:24, and sei: “Staka fail bikos olketa no waka hard for mekem olketa seleva kamap strong.” Iumi laek for olsem Jacob, wea no laek for let go long wanfala angel go kasem taem hem kasem blessing. (Jenesis 32:26-28) Nomata iumi savve enjoyim wei for studyim Bible, iumi shud no tingse Bible hem olsem wanfala story buk for readread nomoa. Iumi need for trae hard for faendem olketa gudfala point wea bae helpem iumi.

12, 13. (a) Wanem nao savve helpem iumi for followim Rome 15:5? (b) Hao nao example bilong aposol Peter and kaonsel wea hem talem savve helpem iumi? (c) Wanem nao iu savve duim for gohed grow long spiritual wei? (Lukim box “ Hao for Gohed Strong Long Spiritual Wei.”)

12 Taem iumi waka hard for grow long spiritual wei, holy spirit bae helpem iumi for changem tingting bilong iumi. Taem holy spirit helpem iumi, isisi bae iumi garem sem tingting olsem Christ. (Rome 15:5) And tu, holy spirit bae helpem iumi for aotem feeling for laek duim olketa nogud samting and for mekem grow olketa fasin wea mekem God hapi. (Gal. 5:16, 22, 23) Nomata sapos iumi start for tingting tumas abaotem wanem iumiseleva laekem or olketa material samting,  iumi shud no givap. Iumi mas gohed askem holy spirit bilong Jehovah for helpem iumi for garem stret tingting. (Luke 11:13) Tingim aposol Peter. Samfala taem hem duim samting wea showimaot hem no garem spiritual tingting. (Matt. 16:22, 23; Luke 22:34, 54-62; Gal. 2:11-14) Bat hem no givap. Jehovah helpem Peter for isisi garem sem tingting olsem Christ. Iumi tu savve duim sem samting.

13 Bihaen, Peter storyim samfala fasin iumi need for garem. (Readim 2 Peter 1:5-8.) Taem iumi traem best for garem olketa fasin olsem for kontrolem seleva, no givap, and lovem olketa brata, datwan bae helpem iumi for gohed for kamap spiritual man. Each day hem gud for askem iuseleva, ‘Wanem fasin nao bae mi traem best for garem tuday mekem mi savve grow long spiritual wei?’

FOLLOWIM BIBLE PRINCIPLE EVRIDAY

14. Hao nao wei for garem spiritual tingting bae affectim laef bilong iumi?

14 Wei for garem sem tingting olsem Christ bae affectim wanem iumi duim long waka ples or long skul. Hem bae affectim tu story bilong iumi and olketa disison wea iumi mekem evriday. Olketa disison bilong iumi bae showimaot iumi traem best for followim Christ. From iumi garem spiritual tingting, iumi no laekem eniting for spoelem wei wea iumi fren witim Dadi bilong iumi long heven. Taem iumi garem spiritual tingting olsem Christ datwan savve helpem iumi for no foldaon taem iumi kasem test. Bifor iumi mekem disison, iumi mas stop firstaem and ting raonem olketa kwestin hia: ‘Olketa wanem Bible principle nao bae helpem mi for mekem wise disison? Wanem nao Christ bae duim sapos diswan kasem hem? Wanem disison nao bae mekem Jehovah hapi?’ Iumi need for mekem diswan kamap wei bilong iumi. So bae iumi storyim samfala example. Taem iumi storyim each example, bae iumi lukluk long wanfala Bible principle wea bae helpem iumi for mekem wise disison.

15, 16. Storyim hao wei for garem tingting bilong Christ helpem iumi for mekem disison taem iumi (a) chusim marit partner. (b) chusim olketa wea iumi associate witim.

15 Chusim marit partner. Bible principle wea storyim diswan hem 2 Corinth 6:14, 15. (Readim.) Paul storyim klia hao spiritual man hard for stap gud witim man wea no garem spiritual tingting. Hao nao iu savve followim disfala principle taem iu chusim marit partner?

16 Olketa wea iumi associate witim. Tingim Bible principle long 1 Corinth 15:33. (Readim.) Spiritual man bae no associate witim pipol wea bae spoelem faith bilong hem. Hao nao iu savve followim disfala principle? Olsem example, hao nao diswan fitim wei for iusim social network? Or wanem nao bae iu duim sapos olketa invaetem iu for pleim online game witim olketa stranger?

Waswe, olketa disison bilong mi helpem mi for grow long spiritual wei, garem spiritual goal, and “stap gud witim olketa narawan”? (Paragraf 17 storyim diswan)

17-19. Hao nao wei for garem spiritual tingting helpem iu for (a) no duim olketa iusles samting? (b) garem spiritual goal? (c) deal witim raoa?

17 Olketa samting wea savve spoelem spiritual wei bilong iumi. Wanem Paul talem long disfala scripture hem wanfala warning for olketa Christian. (Readim Hebrew 6:1.) Wanem  nao “olketa iusles samting” wea iumi mas stap klia long hem? Hem nao wei for aftarem eni samting wea bae spoelem spiritual saed bilong iumi. Disfala principle helpem iumi for ansarem olketa kwestin olsem: ‘Waswe, samting wea mi duim helpem mi or hem iusles nomoa? Waswe, fitim for mi joinim kaen bisnis olsem? Why nao mi shud no joinim olketa grup wea trae for changem living bilong pipol?’

Waswe, olketa disison bilong mi helpem mi for grow long spiritual wei, garem spiritual goal, and “stap gud witim olketa narawan”? (Paragraf 18 storyim diswan)

18 Olketa spiritual goal. Long Sermon long Maunten Jesus givim gudfala advaes abaotem hao for markem olketa goal. (Matt. 6:33) Spiritual man bae aftarem olketa spiritual goal. Disfala principle helpem iumi for ansarem olketa kwestin olsem: ‘Waswe, mi shud go long university? Waswe, mi shud acceptim disfala waka?’

Waswe, olketa disison bilong mi helpem mi for grow long spiritual wei, garem spiritual goal, and “stap gud witim olketa narawan”? (Paragraf 19 storyim diswan)

19 Wei for raoa. Hao nao kaonsel bilong Paul for kongregeson long Rome helpem iumi deal witim raoa? (Rome 12:18) From iumi followim Christ, iumi traem best for “stap gud witim olketa narawan.” Wanem nao iumi savve duim taem raoa kamap? Waswe, hard for iumi acceptim tingting bilong narawan, or waswe, hem isi for “mekem peace” nomoa?—Jas. 3:18.

20. Why nao iu laek for gohed strong long spiritual wei?

20 Olketa example hia showimaot, hao wei for ting raonem Bible principle savve helpem iumi for mekem disison wea showimaot iumi wanfala spiritual man. Sapos iumi garem spiritual tingting, bae iumi hapi and satisfae evriday. Robert, wea iumi storyim long start, sei: “Taem mi strongim wei wea mi fren witim Jehovah, datwan helpem mi for kamap gudfala hasband and dadi. Mi hapi and satisfae.” Sapos iumi barava trae hard for gohed strong olsem spiritual man, bae iumi tu savve kasem olketa blessing. Taem iumi garem spiritual tingting, bae iumi hapi and satisfae distaem and bae iumi kasem “datfala tru laef” long future.—1 Tim. 6:19.