Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  February 2017

Tufala pioneer George Rollston and Arthur Willis, stop for fulimap wata long radiator long car bilong tufala.—Northern Territory, 1933

 HISTORY BILONG IUMI

“Nomata Hem Hard, or Hem Farawe,” Mifala Bae Go

“Nomata Hem Hard, or Hem Farawe,” Mifala Bae Go

LONG March 26, 1937, tufala man draev kam and kasem Sydney, Australia, and tufala taed fogud. Tufala lusim datfala taon wanfala year go finis, and travel for winim 19,300 kilometer followim samfala bush road for kasem midol long Australia. Tufala hia no go for wakabaot nomoa or faendem eni samting long bush. Tufala man hia, Arthur Willis and Bill Newlands, tufala pioneer wea waka hard for preachim gud nius abaotem Kingdom bilong God long pipol wea stap long midol long Australia. Staka nara pioneer tu duim sem samting.

Long olketa year bifor 1930, smol grup bilong olketa Bible Student * long Australia preach nomoa long olketa taon and area long saedsea. Long midol long Australia wea barava drae and hem area wea big winim haf bilong United States, hem ples wea no staka pipol stap. Nomata olsem, olketa brata luksavve olketa follower bilong Jesus mas talemaot gud nius long “evri farawe ples long earth,” and midol long Australia tu insaed diswan. (Acts 1:8) Bat hao nao bae olketa kasem olketa farawe ples hia? From olketa barava sure Jehovah bae blessim waka wea olketa duim, olketa waka hard for duim datwan.

OLKETA PIONEER FIRST WAN FOR GO

Long 1929, olketa kongregeson long Queensland and Western Australia, olketa modifyim samfala trak mekem olketa savve iusim for go long olketa farawe ples long territory bilong olketa. Olketa pioneer wea iusim olketa trak hia olketa strong and savve stap long eni ples and taem trak brekdaon olketa savve hao for fixim. Olketa pioneer hia go preach long staka ples wea witness no kasem bifor.

Olketa pioneer wea no garem trak iusim baesikol for go long farawe territory. Olsem example, long 1932, Bennett Brickell, wea hem 23 year long datfala taem, hem lusim Rockhampton, long Queensland, and go duim preaching waka for faevfala month long midol bush long barava north part bilong Queensland. Hem karem olketa blanket, kaleko, kaikai, and staka buk long baesikol bilong hem. Taem olketa tire long baesikol hem flat, hem sure Jehovah bae lukaftarem hem. Hem pushim baesikol bilong hem for 320 kilometer long road wea staka pipol dae long hem bikos datfala ples hem drae and  hot tumas. For 30 year nao Brata  Brickell iusim baesikol, motorbike, and car for go preach long olketa farawe ples long Australia. Hem nao first wan for preach long olketa Aborigine and help for startim olketa niu kongregeson. Staka brata and sista long olketa ples hia savve long hem and tinghae long hem.

WINIM OLKETA HARD SAMTING

Population bilong Australia hem no big tumas olsem olketa nara kantri, and especially long midol long Australia. So pipol bilong Jehovah waka hard for go preach long pipol wea stap long olketa farawe ples hia.

Stuart Keltie and William Torrington tufala pioneer wea waka hard for duim datwan. Long 1933, tufala go akrosim Simpson Desert, wea hem wanfala bigfala desert, wea hem sand nomoa. Tufala go for preach long Alice Springs, wea hem wanfala taon long midol long Australia. Taem smol car bilong tufala hem brekdaon, tufala lusim datfala car and iusim camel for travel. Brata Keltie duim datwan nomata hem garem false leg! Olketa pioneer hia kasem gud samting from hard waka bilong olketa taem olketa meetim wanfala manager bilong wanfala hotel long William Creek, wea hem wanfala train station long midol long Australia. Datfala manager, Charles Bernhardt, hem kamap wanfala witness, salem hotel bilong hem and pioneer for 15-fala year long olketa farawe ples long Australia wea barava drae.

Arthur Willis hem redyim evri samting for wanfala preaching gogo bilong hem long midol long Australia.—Perth, Western Australia, 1936

For winim staka hard samting wea olketa feisim, olketa pioneer hia mas no fraet and no givap. Long datfala gogo for preach long midol long Australia, wea Arthur Willis and Bill Newlands wea iumi storyim finis tufala duim, tufala kasem wanfala barava hard samting. From hem rain big, road long datfala desert hem mud fogud so hem tekem tufala week for olketa travel for 32 kilometer nomoa. Samfala taem nomata hem barava hot, tufala mas pushim trak bilong tufala go ap long olketa hill, and go daon long olketa valley, and insaed river wea drae. Staka taem trak bilong tufala savve brekdaon, so tufala mas wakabaot or go long baesikol for kasem next taon, and then mas weit moa for tu-thri week for spare part for arrive. Nomata tufala kasem olketa barava hard samting olsem, tufala hapi and no givap. Taem Arthur Willis storyim gogo bilong olketa, hem talem moa disfala toktok wea stap long The Golden Age magasin wea sei: “Nomata hem hard, or hem farawe, olketa witness bilong Hem bae go.”

Charles Harris wea pioneer for longtaem sei olketa hard samting wea kasem hem and wei wea hem stap farawe from kongregeson, datwan mekem hem fren gud witim Jehovah. Hem sei: “Laef bae hem isi sapos iumi garem tu-thri samting nomoa. Sapos Jesus hem willing for sleep aotsaed, then iumi tu shud hapi for duim sem samting.” And datwan nao samting wea staka pioneer duim. From olketa hia no givap, gud nius hem kasem evri ples long Australia, and staka pipol nao sapotim Kingdom bilong God.

^ par. 4 Olketa Bible Student start for iusim datfala nem Olketa Jehovah’s Witness long 1931.—Isa. 43:10.