“Tingim olketa wea leadim iufala.” —HEB. 13:7.

SONG: 125, 43

1, 2. Bihaen Jesus go bak long heven, wanem nao maet olketa aposol tingim?

OLKETA aposol bilong Jesus standap long Maunt Olive Tree and lukluk taem masta and fren bilong olketa, Jesus, hem go ap long heven, and gogo hem lus insaed cloud. (Acts 1:9, 10) Samting olsem tufala year nao Jesus teachim, encouragem, and leadim olketa. Bat hem go bak long heven nao. Wanem nao bae olketa duim?

2 Bifor Jesus go long heven, hem sei olsem long olketa follower bilong hem: “Iufala bae talem pipol abaotem mi long Jerusalem, long evri ples long Judea and long Samaria, and long evri farawe ples long earth.” (Acts 1:8) Hao nao bae olketa duim datfala waka? Jesus promis bae hem sendem holy spirit bilong God for helpem olketa. (Acts 1:5) Bat hu nao bae leadim and organizem preaching waka wea bae gohed evriwea long world? Olketa aposol savve Jehovah hem iusim olketa man for leadim olketa Israelite bifor. So maet olketa tingse Jehovah bae chusim wanfala niu leader for olketa.

3. (a) Bihaen Jesus go bak long heven, wanem nao wanfala important samting wea olketa faithful aposol duim? (b) Olketa wanem kwestin nao bae iumi storyim long disfala study?

 3 No longtaem bihaen Jesus go bak long heven, olketa disaepol studyim gud olketa Holy Raeting, prea long God for helpem olketa, and then olketa chusim Matthias for changem Judas Iscariot for kamap mek-12 aposol. (Acts 1:15-26) Why nao wei for chusim disfala mek-12 aposol hem important samting long olketa and long Jehovah? Olketa disaepol luksavve olketa mas garem 12-fala aposol. * Jesus hem chusim olketa aposol and trainim olketa for duim wanfala barava important waka for pipol bilong God. Wanem nao datfala waka, and wanem nao Jehovah and Jesus duim for redyim olketa for duim datwan? Waswe, wanfala grup hem stap distaem wea olsem olketa? And wanem nao iumi savve duim for “tingim olketa wea leadim” iumi, especially “datfala wakaman wea faithful and wise”?—Heb. 13:7; Matt. 24:45.

JESUS LEADIM GOVERNING BODY

4. Wanem nao samfala waka wea olketa aposol and olketa elder long Jerusalem duim?

4 Long Pentecost 33 C.E. olketa aposol start for leadim Christian kongregeson. Bible sei “Peter standap witim elevenfala aposol” and story long wanfala big sekson abaotem olketa tru teaching wea savve sevem laef bilong olketa. (Acts 2:14, 15) Staka long olketa hia kamap olketa Christian. Bihaen datwan, olketa niu Christian hia “gohed lane from olketa aposol.” (Acts 2:42) Olketa aposol lukaftarem selen bilong kongregeson tu. (Acts 4:34, 35) And olketa teachim pipol bilong God and prea for olketa tu. Olketa sei: “Mifala bae gohed for prea and talemaot message bilong God.” (Acts 6:4) And olketa sendem olketa mature Christian for preach long olketa niu territory. (Acts 8:14, 15) Gogo, olketa nara elder helpem olketa aposol for lead long kongregeson. Evri anointed Christian hia insaed governing body wea givim instruction long olketa kongregeson.—Acts 15:2.

5, 6. (a) Hao nao holy spirit helpem governing body? (Lukim piksa long start bilong study.) (b) Hao nao olketa angel helpem governing body? (c) Hao nao toktok bilong God leadim governing body?

5 Olketa Christian long first century savve Jehovah nao leadim governing body, and hem iusim Jesus for duim datwan. Wanem nao mekem olketa sure long datwan? First samting, holy spirit helpem datfala governing body. (John 16:13) Evri anointed Christian kasem holy spirit, bat holy spirit hem barava helpem olketa aposol and olketa elder long Jerusalem for duim waka bilong olketa for lukaftarem olketa kongregeson. Olsem example, long 49 C.E., holy spirit helpem governing body for mekem disison abaotem wei for circumcise. Olketa kongregeson followim wanem governing body disaedem. And from datwan, ‘olketa kongregeson gohed for kamap strong, and evriday plande pipol moa olketa biliv.” (Acts 16:4, 5) Datfala leta wea olketa kongregeson kasem abaotem datfala disison hem pruvim governing body showimaot love and faith, wea holy spirit nao helpem olketa for garem.—Acts 15:11, 25-29; Gal. 5:22, 23.

6 Mek-tu samting, olketa angel helpem governing body. Olsem example, wanfala angel talem Cornelius for go lukim aposol Peter. Bihaen aposol Peter preach long Cornelius and olketa relative bilong hem, olketa kasem holy spirit nomata olketa man hia no circumcise. So Cornelius hem firstfala man wea no circumcise wea hem kamap Christian.  Taem olketa aposol and olketa nara brata herem olketa samting hia, olketa luksavve God hem acceptim pipol wea no Jew and wea no circumcise for kam insaed long Christian kongregeson. (Acts 11:13-18) So diswan showimaot olketa angel nao sapotim preaching waka wea governing body leadim. (Acts 5:19, 20) Mek-thri samting, toktok bilong God nao leadim governing body. Olketa man hia iusim olketa Holy Raeting for helpem olketa for mekem olketa important disison abaotem olketa teaching bilong Christ, and for givim instruction long olketa kongregeson.—Acts 1:20-22; 15:15-20.

7. Wanem nao mekem iumi savve Jesus nao leadim olketa Christian long first century?

7 Nomata governing body garem paoa insaed long kongregeson, olketa luksavve Jesus Christ nao Leader bilong olketa. Hao nao iumi savve long datwan? Aposol Paul sei Christ nao markem samfala for kamap aposol. Hem sei tu Christ “hem nao hed” bilong kongregeson, wea diswan minim hem Leader long kongregeson. (Eph. 4:11, 15) And olketa no iusim nem bilong eni aposol for kolem long olketa seleva, bat “olketa disaepol kasem datfala nem ‘Christian.’ God nao givim disfala nem long olketa.” (Acts 11:26) Paul luksavve hem important for followim wanem olketa aposol and olketa nara Christian wea lead long kongregeson teachim wea kam from Bible. Nomata olsem, Paul hem sei: “Bat mi laekem iufala for savve Christ hem hed bilong evri man.” Diswan minim each member bilong governing body tu. Then Paul sei tu: “God hem hed bilong Christ.” (1 Cor. 11:2, 3) Tru nao, Jehovah markem Son bilong hem Christ Jesus for leadim kongregeson.

“DISWAN HEM NO WAKA BILONG ENI MAN”

8, 9. Wanem important samting nao Brata Russell duim?

8 Start long 1870, Charles Russell and samfala fren bilong hem trae for worshipim God followim wanem Bible talem, and helpem nara pipol for duim sem samting tu. So diswan minim olketa mas helpem pipol wea story long olketa nara languis tu. Dastawe long 1884, olketa registerim Zion’s Watch Tower Tract Society, and Brata Russel nao hem president. * Hem barava studyim gud Bible and hem no fraet for talem long pipol hao Bible hem no teachim olketa teaching olsem Trinity and soul wea no savve dae. Hem luksavve bae olketa man no savve lukim taem wea Christ hem kam bak, and tu, “taem wea olketa kantri rul” bae hem finis long 1914. (Luke 21:24) Brata Russel iusim taem, strong, and selen bilong hem for helpem pipol for savve long olketa tru teaching hia. Tru nao, Jehovah and Jesus iusim Brata Russell for leadim pipol bilong God long datfala important taem long history.

9 Brata Russell no laekem pipol for praisem or mekhae long hem. Long 1896, hem raetem long wanfala Wastaoa hao hem and olketa brata wea lead no laekem pipol for mekhae long olketa. Olketa no laekem pipol for kolem olketa long eni spesol title, and for eni grup iusim nem bilong olketa. Bihaen brata Russell sei: “Diswan hem no waka bilong eni man.”

10. (a) Wanem taem nao Jesus appointim “datfala wakaman wea faithful and wise”? (b) Storyim wei wea olketa brata luksavve Governing Body hem difren from Watch Tower Society.

10 Long 1919, thrifala year bihaen Brata Russell hem dae, Jesus appointim “datfala wakaman wea faithful and wise.” Hem appointim olketa for duim wanem samting? For givim “kaikai” long olketa follower bilong hem “long barava taem.” (Matt. 24:45) Long olketa year hia, wanfala smol grup bilong olketa anointed brata wea stap long  hedquarter long Brooklyn, long New York, givim spiritual kaikai long olketa follower bilong Jesus. Bihaen long 1940 olketa start for iusim datfala toktok “governing body” long olketa pablikeson bilong iumi. Long datfala taem, olketa director bilong Watch Tower Bible and Tract Society hem part long governing body. Bat long 1971, olketa luksavve Governing Body hem difren from datfala Watch Tower Society bikos datwan hem for lukaftarem olketa legal samting bilong organization. Start long datfala taem, olketa anointed brata savve kamap member bilong Governing Body nomata olketa no wanfala director bilong Watch Tower Society. No longtaem go nomoa, olketa start for iusim samfala brata wea olketa bilong “nara sheepsheep” for director bilong Watch Tower Society and for duim samfala nara important waka long organization. From datwan, main samting wea Governing Body duim hem for redyim spiritual kaikai for pipol bilong Jehovah, and givim direction long olketa. (John 10:16; Acts 6:4) Wastaoa bilong July 15, 2013, hem sei: “Datfala wakaman wea faithful and wise” hem “wanfala smol grup bilong olketa anointed brata wea olketa nao datfala Governing Body.”

Governing body long 1950

11. Hao nao Governing Body disaedem olketa important samting?

11 Governing Body garem meeting evri week for disaedem olketa important samting olsem wanfala grup. Datfala meeting helpem olketa for story gud tugeta and for olketa garem wan mind. (Prov. 20:18) No eniwan long olketa hem important winim narawan dastawe evri year difren member nao bae hem chairman long olketa meeting bilong olketa. (1 Pet. 5:1) Long sixfala komiti bilong Governing Body, olketa duim sem samting tu. No eni member bilong Governing Body hem tingse hem nao leader bilong olketa narawan. Each member bilong Governing Body tu hem wanfala “wakaman” wea kasem spiritual kaikai and followim direction bilong datfala wakaman wea faithful and wise.

Start long 1919 taem Jesus appointim datfala faithful wakaman, hem redyim spiritual kaikai for pipol bilong God (Paragraf 10, 11 storyim diswan)

“HU NAO DATFALA WAKAMAN WEA FAITHFUL AND WISE?”

12. Olketa wanem kwestin nao bae iumi storyim?

12 Olketa member bilong Governing Body no perfect and olketa no sei God story kam stret long olketa. Olketa savve mekem mistek tu taem olketa explainim Bible or taem olketa leadim organization bilong God. Olsem example, Watch Tower Publications Index garem disfala subject “Beliefs Clarified,” wea garem list bilong olketa change long wei wea iumi minim samfala scripture, start kam long 1870. Jesus no sei datfala faithful wakaman bilong hem bae givim spiritual kaikai wea perfect. So wanem nao ansa bilong disfala kwestin wea Jesus askem: “Hu nao datfala wakaman wea faithful and wise?” (Matt. 24:45) Wanem nao pruvim Governing Body nao hem datfala wakaman wea faithful? Distaem bae iumi storyim thrifala samting wea iumi storyim finis wea helpem governing body long first century.

13. Long wanem wei nao holy spirit helpem Governing Body?

13 Holy spirit helpem Governing Body. Holy spirit nao helpem Governing Body for minim olketa truth insaed long Bible wea firstaem olketa no minim. Olsem example, tingim datfala list bilong olketa change long wei wea iumi minim samfala scripture, wea iumi storyim finis. No eni man savve minim and explainim seleva “wisdom bilong God wea big tumas”! (Readim 1 Corinth 2:10.) Governing Body garem sem tingting olsem aposol Paul wea sei: “Taem iumi storyim olketa samting hia, iumi no iusim toktok wea kam from wisdom bilong olketa man, bat iumi toktok followim wanem holy spirit teachim iumi.” (1 Cor. 2:13) Bihaen staka handred  year wea pipol bilivim olketa laea teaching and no eniwan leadim olketa, why nao start long 1919, wei for minim toktok bilong God hem kamap big? Hem bikos God iusim holy spirit bilong hem for duim olketa samting hia!

14. Olsem Revelation 14:6, 7 storyim, hao nao olketa angel helpem Governing Body and pipol bilong God?

14 Olketa angel helpem Governing Body. Governing Body garem bigfala responsibility for leadim winim eit million Witness long preaching waka evriwea long world. Why nao datfala waka hem barava kamap big? Wanfala reason hem bikos olketa angel nao sapotim datfala waka. (Readim Revelation 14:6, 7.) Iumi savve herem olketa experience wea showimaot samwan hem prea for askem God for helpem hem, and kwiktaem nomoa wanfala pablisa meetim hem and storyim Bible long hem! * Waka for preach and teachim pipol hem gohed nomata long olketa ples wea pipol barava againstim iumi. Diswan hem olsem bikos olketa angel nao helpem pipol bilong God.

15. Wanem nao showimaot Governing Body hem difren from olketa bigman bilong religion? Storyim example.

15 Governing Body followim toktok bilong God. (Readim John 17:17.) Tingim samting wea happen long 1973. The Watchtower bilong June 1 hem ask olsem: “Waswe, man wea no stop for smoke bae hem fit for baptaes?” Hem storyim olketa Bible principle  wea showimaot man wea duim olsem hem no fit for baptaes. And tu, hem talem samfala scripture and explainim why nao man wea no stop for smoke hem shud disfellowship. (1 Cor. 5:7; 2 Cor. 7:1) Hem sei disfala strongfala kaonsel hem no kam from eni man bat hem kam “from God, wea talem tingting bilong hem insaed long Bible.” No eni nara religion hem barava followim samting wea Bible talem nomata maet datwan hem no isi for samfala member bilong hem. Wanfala buk long United States wea storyim religion sei: “Olketa bigman bilong religion evritaem reviewim and changem lelebet teaching bilong olketa followim tingting bilong olketa member bilong olketa. Olketa duim olsem mekem olketa member hia no lusim religion bilong olketa and nara pipol sapotim olketa.” Governing Body no duim samting followim tingting bilong pipol, bat hem followim wanem Bible talem. Diswan showimaot Jehovah nao leadim pipol bilong hem distaem.

“TINGIM OLKETA WEA LEADIM IUFALA”

16. Wanem nao wanfala wei wea iumi savve tingim Governing Body?

16 Readim Hebrew 13:7. Bible sei for “tingim olketa wea leadim iufala.” Wanfala wei for duim diswan hem for prea for Governing Body. (Eph. 6:18) Olketa garem staka responsibility, olsem for provaedem spiritual kaikai, leadim preaching waka evriwea long world, and for mek sure organization iusim gud evri donation wea iumi kasem. So olketa barava needim iumi for prea for olketa!

17, 18. (a) Wanem nao olketa difren wei wea iumi savve followim wanem Governing Body talem? (b) Hao nao preaching waka wea iumi duim sapotim Governing Body and Jesus?

17 Narafala wei for tingim Governing Body hem for followim wanem olketa talem. Iumi kasem instruction from Governing Body insaed long olketa pablikeson bilong iumi, olketa meeting, assembly, and olketa convention. Governing Body nao appointim olketa circuit overseer, and olketa circuit overseer nao appointim olketa elder. Taem olketa circuit overseer and olketa elder followim instruction from Governing Body, datwan showimaot olketa tingim olketa. And iumi evriwan showimaot iumi respectim Leader bilong iumi Jesus, taem iumi obeyim and stap anda long olketa man wea hem iusim for leadim iumi distaem.—Heb. 13:17.

18 Narafala wei for tingim Governing Body, hem for duim best bilong iumi long preaching waka. Hebrew 13:7 encouragem olketa Christian for garem sem faith olsem olketa wea leadim iumi. Governing Body showimaot olketa garem strongfala faith from olketa gohed strong for preachim gud nius abaotem Kingdom. Waswe, iumi sapotim olketa brata hia long disfala important waka? Sapos iumi duim olsem bae iumi hapi tumas long taem wea Jesus bae sei olsem: “From iufala duim olketa samting hia long wanfala brata bilong mi, hem olsem iufala duim long mi nao.”—Matt. 25:34-40.

19. Why nao iu laek for gohed followim Leader bilong iumi, Jesus?

19 Taem Jesus go bak long heven, hem no forgetim olketa follower bilong hem. (Matt. 28:20) Jesus savve holy spirit, olketa angel, and olketa Holy Raeting nao helpem hem for leadim pipol bilong God long earth. And Jesus givim olketa samting hia for helpem datfala faithful wakaman distaem tu. Governing Body gohed for “followim datfala Pikinini Sheepsheep,” Jesus, “long eni ples wea hem go.” (Rev. 14:4) So taem iumi followim instruction from Governing Body, iumi followim Leader bilong iumi, Jesus. Klosap nao bae hem leadim iumi for kasem laef olowe. (Rev. 7:14-17) No eni leader long disfala earth savve givim iumi datwan!

^ par. 3 Luk olsem hem plan bilong Jehovah for 12-fala aposol kamap “twelvfala ston” for faondeson bilong Niu Jerusalem. (Rev. 21:14) Dastawe bihaen eniwan long olketa faithful aposol hia dae, olketa no changem hem.

^ par. 8 Start long 1955, nem hia hem change for kamap Watch Tower Bible and Tract Society of Pennsylvania.

^ par. 14 Lukim buk Barava Storyim Gud Kingdom Bilong God,” page 58-59.