Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  February 2016

Gohed Hapi for Worshipim Jehovah

Gohed Hapi for Worshipim Jehovah

WANEM nao happen long laef bilong iu wea mekem iu barava hapi? Waswe, hem day wea iu marit or hem taem wea first pikinini bilong iu hem born? Or waswe, hem day wea iu baptaes? Maet long tingting bilong iu, day wea iu baptaes nao hem barava important winim eni nara day and iu barava hapi long datfala day. Long datfala day, olketa brata and sista hapi tu for lukim iu showimaot long pablik iu lovem God long full heart, soul, mind, and strong bilong iu!—Mark 12:30.

Masbi iu barava hapi for worshipim Jehovah start long taem wea iu baptaes kam kasem distaem. Nomata olsem, samfala pablisa no hapi distaem olsem long taem wea olketa baptaes. Why nao olketa no hapi? Wanem nao savve helpem iumi for gohed hapi for worshipim Jehovah?

WHY NAO SAMFALA NO HAPI DISTAEM?

Olketa promis bilong Jehovah long Bible mekem iumi barava hapi. Why nao olsem? Bikos Bible sei klosap nao God bae finisim disfala nogud world, and niu world bae kam. Zephaniah 1:14 sei: “Bigfala day bilong Jehovah hem klosap! Hem klosap nao, and hem hariap tumas!” Nomata olsem, maet samfala no hapi from end hem no kam long taem wea olketa expectim, and from datwan, olketa no strong for worshipim God.—Prov. 13:12.

Taem iumi associate witim olketa brata and sista, datwan encouragem iumi and helpem iumi for gohed hapi for worshipim Jehovah. Maet gudfala wei bilong olketa wea worshipim Jehovah mekem iumi interest long tru worship, and datwan helpem iumi for start for worshipim God. (1 Pet. 2:12) Bat waswe sapos wanfala brata or sista no followim olketa standard bilong God? Maet datwan mekem samfala long kongregeson for wikdaon and olketa no gohed hapi for worshipim Jehovah.

And tu, wei for aftarem olketa material samting savve mekem iumi for no hapi. Why nao olsem? World bilong Satan mekem iumi tingse iumi shud baem olketa samting wea iumi no really needim. So hem gud for iumi tingim wanem Jesus talem. Hem sei: “No eniwan savve waka for tufala boss, bikos bae hem heitim narawan and lovem narawan, or bae hem faithful long narawan and ting daonem narawan. Iufala no savve worshipim God and long semtaem busy for kasem staka selen.” (Matt. 6:24) Iumi bae no hapi sapos iumi trae for worshipim Jehovah  and long semtaem aftarem staka samting long disfala world.

HAPI FOR WORSHIPIM JEHOVAH

Sapos iumi lovem Jehovah, hem no hard tumas for iumi obeyim olketa law bilong hem. (1 John 5:3) Tingim disfala toktok bilong Jesus: “Kam long mi, iufala wea waka hard and wea karem hevi samting, mekem mi savve strongim iufala. Iufala waka witim mi and lane from mi, bikos mi no savve raf and mi hambol. Wei for duim olsem bae strongim iufala. Bae hem no hard for iufala waka witim mi, and iufala savve karem samting wea mi askem iufala for karem.” (Matt. 11:28-30) Taem iumi followim example bilong Jesus, datwan strongim iumi and mekem iumi hapi. Distaem bae iumi storyim thrifala samting wea savve helpem iumi for gohed hapi for worshipim Jehovah.—Hab. 3:18.

Iumi worshipim datfala hapi God wea mekem iumi laef. (Acts 17:28; 1 Tim. 1:11) Iumi luksavve God nao mekem iumi for laef. So iumi shud gohed hapi for worshipim hem nomata iumi baptaes for longfala taem finis.

From Héctor evritaem tingim gud samting wea hem bae kasem long future and hem gohed busy long preaching waka, datwan helpem hem for gohed hapi

Tingim example bilong Héctor, wea duim traveling waka for 40 year. Nomata hem olo, hem gohed hapi for worshipim Jehovah. (Ps. 92:12-14) From waef bilong hem sik, Héctor no savve duim staka samting long waka bilong God olsem bifor. Nomata olsem, hem gohed hapi for worshipim God. Hem sei: “Nomata mi sorre tumas for lukim waef bilong mi barava sik big and hem no isi for mi lukaftarem hem, mi no letem datwan spoelem wei wea mi hapi for worshipim trufala God. Mi savve Jehovah nao mekem mi for laef and hem garem plan for olketa man, and datwan nao mekem mi for barava lovem hem and laek for worshipim hem. Mi traem best for busy long preaching waka, and mi evritaem tingim olketa gud samting wea Kingdom bae duim long future.”

From Jehovah givim ransom sakrifaes bilong Jesus, iumi savve hapi. Bible sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) Tru nao, God savve forgivim olketa sin bilong iumi and iumi savve kasem laef olowe sapos iumi showimaot faith long ransom sakrifaes bilong Jesus. Datwan hem samting wea iumi shud barava tinghae long hem! And taem iumi tinghae long ransom, datwan bae helpem iumi for gohed hapi for worshipim Jehovah.

Jesús mekem laef bilong hem simpol and hem hapi for worshipim Jehovah for staka year

Wanfala brata long Mexico, wea nem bilong hem Jesús, hem sei: “Mi waka waka nomoa for kasem selen. Samfala taem mi waka ovataem for staka  hour, nomata boss no talem mi for duim olsem. Mi duim datwan for kasem extra selen. Then mi lane abaotem Jehovah and wei wea hem sendem kam Son wea hem lovem for dae for olketa man. Datwan mekem mi barava laek for worshipim Jehovah. So mi dedicate long Jehovah and mi baptaes. Mi lusim waka wea mi duim for 28 year and mi start for duim full-taem service.” Datwan helpem Jesús for hapi for worshipim Jehovah.

Iumi hapi bikos iumi followim olketa standard bilong God. Hao nao laef bilong iu bifor iu lane abaotem Jehovah? Aposol Paul sei olketa Christian long Rome “slave bilong sin bifor” bat olketa kamap “slave bilong God and duim stret samting.” From olketa followim olketa standard bilong God, olketa garem hope for laef olowe. (Rome 6:17-22) Iumi tu followim olketa standard bilong God, so iumi no kasem olketa nogud samting wea pipol wea raf and durong olketa kasem. Dastawe iumi savve barava hapi!

“Taem mi worshipim Jehovah nao mi barava hapi.”—Jaime

Tingim example bilong Jaime wea no biliv long God bat hem bilivim teaching bilong evolution, and hem wanfala boxer. Taem Jaime start for attendim olketa meeting long Kingdom Hall, hem barava tinghae long wei wea olketa brata and sista showimaot love. Jaime askem Jehovah for helpem hem for bilivim Hem stap. Datwan nao helpem Jaime for lusim olketa nogud wei bilong hem. Jaime sei: “Isisi mi luksavve God hem stap and hem olsem wanfala Dadi wea lovem iumi and garem bigfala mercy. From mi followim olketa standard bilong Jehovah, datwan hem protectim mi. Sapos mi no changem wei bilong mi, maet mi no laef distaem olsem samfala fren bilong mi bifor wea olketa boxer. Taem mi worshipim Jehovah nao mi barava hapi.”

NO GIVAP!

Taem iumi weitim disfala nogud world for finis, no forget, olketa wea duim wanem God laekem “bae kasem laef olowe.” Dastawe “iumi mas gohed for duim gudfala samting, bikos long taem wea God markem, bae iumi kasem gud samting sapos iumi no givap.” (Gal. 6:8, 9) So gohed depend long Jehovah, waka hard for garem olketa wei wea bae mekem iumi sev long taem bilong “datfala big trabol,” no givap, and gohed hapi for worshipim Jehovah.—Rev. 7:9, 13, 14; Jas. 1:2-4.

Iumi savve Jehovah bae givim reward long iumi bikos hem savve long waka wea iumi duim and love wea iumi showimaot for hem and nem bilong hem. Sapos iumi gohed hapi for worshipim Jehovah, iumi followim example bilong David, wea sei: “Mi tingim Jehovah evritaem. From hem stap long raet saed bilong mi, mi bae no fraet. Dastawe heart bilong mi hapi, mi barava hapi. And mi stap long sef ples.”—Ps. 16:8, 9.