Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  February 2016

 LAEF STORY

Jehovah Helpem Mi for Gohed Faithful

Jehovah Helpem Mi for Gohed Faithful

Mi talem datfala man long army mi stap finis long prison bikos mi no laek for faet. Mi askem hem olsem: “Bae iufala putim mi long prison moa?” Diswan hem mek-tu taem wea olketa talem mi for mas joinim United States Army.

MI BORN long 1926 long Crooksville, Ohio, United States. Dadi and mami no joinim eni religion, bat tufala talem mi and sevenfala brata and sista bilong mi for go long church. So mi go prea long Methodist Church. Taem mi 14 year, minister long church givim mi present bikos for wanfala full year mi no misstim eni Sunday for go prea.

Margaret Walker (mek-tu sista long left saed) helpem mi for lanem truth

Long datfala taem, wanfala neiba bilong mifala, Margaret Walker, wea hem wanfala Jehovah’s Witness, start for kam long haos for story witim mami abaotem Bible. Wanday, mi disaed for herehere taem tufala study. Mami tingse bae mi disturbim tufala, so hem talem mi for go aotsaed. Nomata olsem, long olketa narataem wea tufala study, mi trae for lisin long story bilong tufala. Wanday, Margaret askem mi, “Waswe, iu savve long nem bilong God?” Mi sei long hem, “Evriwan savve, nem bilong hem God.” Hem sei, “Iu go tekem Bible bilong iu and iu readim Psalm 83:18.” Taem mi readim mi faendemaot nem bilong God hem Jehovah. Mi ran go long olketa fren bilong mi and talem olketa: “Taem iufala go bak long haos, readim Psalm 83:18 and iufala bae savve  long nem bilong God.” Hem olsem mi start preach nao datfala taem.

Mi studyim Bible and mi baptaes long 1941. Bihaen, mi kasem assignment for conductim kongregeson buk study. Mi encouragem mami and olketa brata and sista bilong mi for kam long buk study, and evriwan kam. Bat dadi no interest.

DADI AGAINSTIM MIFALA

Mi kasem samfala responsibility moa long kongregeson, and mi start for keepim olketa pablikeson bilong iumi. Wanday, dadi pointim olketa buk and sei: “Iu lukim olketa samting hia? Aotem olketa from disfala haos and iu tu no stap long hia.” Mi muv aot and go stap long Zanesville, long Ohio, wea no farawe from dadi and mami. And evritaem mi savve go for encouragem olketa long famili.

Dadi trae for stopem mami for no go long olketa meeting. Samfala taem dadi savve pullim mami go bak insaed long haos taem hem redi for go long meeting. Bat mami bae ran go aot long nara door and go long meeting. Mi sei long mami: “Iu no wari. Bae gogo hem taed nomoa ia.” Gogo, dadi givap nao for trae stopem mami, and mami attendim evri meeting.

Long 1943, kongregeson start for duim Theocratic Ministry Skul, and mi start for duim olketa tok. Kaonsel wea mi kasem long datfala skul helpem mi for kamap gud long wei for teach.

NO JOINIM WAR

Long 1944, taem World War II gohed, gavman talem mi for joinim army. Mi mas go long Fort Hayes long Columbus, Ohio, duim medical chek, and fulimap samfala form. Mi talem olketa bigman long army mi bae no kamap wanfala soldia, so olketa talem mi for go. Bat tu-thri day bihaen, wanfala policeman kam long haos and sei: “Corwin Robison, mi kam for arrestim iu.”

Tufala week bihaen, mi go long kot and judge sei: “Sapos mi savve duim samting mi laekem, iu bae laeftaem long prison. Iu laek talem eni samting?” Mi sei: “Mi shud garem sem raet olsem wanfala minister long religion. Mi go long haos bilong pipol for preach long olketa, and mi preachim gud nius abaotem Kingdom long staka pipol.” Judge sei long komiti wea judgem case bilong mi: “Hem sei hem wanfala minister, bat hem no datwan nao iufala kam for disaedem. Iufala kam for disaedem sapos hem joinim army or nomoa.” Bihaen haf hour nomoa, datfala komiti sei mi guilty. Judge sei bae mi go long prison long Ashland, Kentucky, for faevfala year.

JEHOVAH PROTECTIM MI LONG PRISON

Bihaen long datfala kot case, mi go long prison long Columbus, Ohio, for tufala week. Firstfala day bilong mi long there, mi stap nomoa long cell bilong mi. Mi prea long Jehovah: “Mi hard for stap long cell for faevfala year. Mi no savve wanem for duim.”

Long mek-tu day, olketa gard letem mi for go aot from cell bilong mi. Mi go standap saed long wanfala prisoner wea tol and hem strong, and mitufala luk go aot long window. Hem askem mi, “Wat nao iu duim rong, short botol?” Mi sei: “Mi wanfala Jehovah’s Witness.” Hem sei, “Iu tru? So why nao iu stap long prison?”  Mi sei, “Mifala Jehovah’s Witness no joinim war and no killim dae pipol.” Hem sei, “Olketa putim iu long prison bikos iu no laek killim dae eniwan. Olketa putim olketa narawan long prison bikos olketa killim dae man. Waswe, datwan mek sense long iu?” Mi sei, “Barava nomoa nao.”

Then hem sei, “Mi stap long nara prison for 15 year, and mi readim samfala pablikeson bilong iufala.” Taem hem talem datwan, mi prea olsem, “Jehovah, mekem disfala man for helpem mi taem mi long hia.” Bihaen mi prea finis, Paul, wea hem nao nem bilong hem, hem sei: “Sapos eniwan long olketa hia mek trabol long iu, iu singaotem mi. Bae mi deal witim olketa.” Taem mi stap long datfala prison, no eniwan long 50-fala prisoner long there duim eni nogud samting long mi.

Mi and olketa nara Witness wea no joinim war stap long prison long Ashland, Kentucky

Taem olketa sendem mi go long prison long Ashland, mi lukim staka mature brata long there. Olketa helpem mi and olketa narawan for gohed strong long spiritual wei. Olketa markem Bible reading for mifala duim evri week, and mifala redyim olketa kwestin and olketa ansa for olketa meeting wea mifala kolem olketa Bible Bee. Mifala stap long wanfala big rum wea olketa bed laen followim wall. Mifala garem wanfala brata tu for lukaftarem territory. Brata wea lukaftarem territory markem samfala bed for mi lukaftarem. Hem sei: “Robison, iu bae lukaftarem evriwan wea stap long olketa bed hia. Diswan hem territory bilong iu. Mek sure iu preach long olketa bifor olketa lusim prison.” Hem nao hao mifala duim preaching waka mekem hem organize gud.

BIHAEN MI KAMAOT FROM PRISON

World War II hem finis long 1945, bat mi stap lelebet longtaem moa long prison. Mi warim olketa long famili bilong mi bikos mi tingim samting wea dadi talem long mi. Hem sei: “Sapos mi savve aotem iu from haos, bae hem no hard for mi kontrolem olketa narawan.” Bihaen mi kamaot long prison, mi barava hapi for lukim sevenfala long famili attendim olketa meeting and wanfala sista bilong mi hem baptaes, nomata dadi againstim olketa.

Mi redi for go preaching witim Demetrius Papageorge, wanfala anointed brata wea start for worshipim Jehovah long 1913

Taem war long Korea start long 1950, gavman talem mi moa for joinim army. Olketa talem mi for go long Fort Hayes moa. Bihaen olketa testim mifala for savve sapos mifala fit for joinim army, wanfala bigman long army sei long mi, “Iu nao garem hae mark long grup bilong iufala.” Mi sei, “Hem gud, bat bae mi no  joinim army.” Mi talem toktok long 2 Timothy 2:3 then mi sei, “Mi wanfala soldia bilong Christ.” Hem stap kwaet for longtaem lelebet, then hem sei, “Iu go nao.”

No longtaem bihaen, mi attendim Bethel meeting long wanfala convention long Cincinnati, Ohio. Brata Milton Henschel sei Bethel needim olketa brata wea laek waka hard for Kingdom. Mi apply for waka long Bethel, and olketa acceptim mi. Mi start waka long Brooklyn Bethel long August 1954, and mi stap long Bethel kam kasem distaem.

Staka waka stap for mi duim long Bethel. For tu-thri year, mi lukaftarem samfala machine long Bethel, and mi repairim olketa lok. Mi duim samfala waka tu long olketa Assembly Hall long New York City.

Mi lukaftarem olketa machine long office building long Brooklyn Bethel

Mi laekem tumas olketa samting long Bethel olsem morning worship, famili Wastaoa Study, and tu, for preach witim kongregeson. Hem olketa samting wea evri Witness famili shud duim evritaem. Taem famili storyim text evriday, duim Famili Worship evri week, go long olketa meeting and duim preaching waka evritaem, evriwan long famili bae gohed fren gud witim Jehovah.

Mi garem staka fren long Bethel and long kongregeson. Samfala olketa anointed Christian wea kasem finis reward for go long heven. Olketa narawan no anointed Christian. Bat evriwan wea worshipim Jehovah, and olketa Bethelite tu, no perfect. Sapos problem kamap midolwan wanfala brata and mi, mi evritaem trae for stretem datfala problem. Mi tingim wanem Matthew 5:23, 24 talem, and wanem Jehovah laekem iumi for duim taem problem olsem kamap. Hem no isi for sei sorre, bat wei for duim olsem savve evritaem stretem problem.

OLKETA BLESSING

From mi olo distaem, hem no isi for mi go preach from haos tu haos, bat mi no givap. Mi lanem lelebet toktok long Mandarin Chinese languis, and mi hapi for story witim Chinese pipol taem mi duim street waka. Samfala morning mi givimaot 30 or 40 magasin long pipol.

Mi preach long Chinese pipol long Brooklyn, New York

 Mi duim tu wanfala return visit long samwan wea stap long China! Wanday, wanfala young gele smile long mi taem hem givimaot samfala pepa wea advertisem wanfala ples for salem frut. Mi smile and showim hem Wastaoa and Awake! magasin long Chinese languis. Hem tekem olketa magasin and hem sei nem bilong hem Katie. Bihaen datwan, evritaem Katie lukim mi, hem kam and story long mi. Mi teachim hem nem bilong samfala frut and vegetable long English languis, and hem trae for talem nem bilong olketa frut hia. Mi storyim tu samfala scripture long hem, and mi givim hem wanfala Wanem Bible Teachim buk. Bat bihaen samfala week, mi no lukim hem nao.

Samfala month bihaen, nara gele wea givimaot samfala pepa acceptim samfala magasin. Nara week bihaen, taem mi lukim datfala gele, hem givim mobile bilong hem long mi and hem sei, “Iu story go long China.” Mi sei: “Mi no savve long eniwan long China.” Bat hem forcem mi, so mi tekem phone and mi sei, “Hello, mi Robison.” Samwan sei long mi, “Robby, mi Katie ia. Mi long China distaem.” Mi sei, “Long China?” Katie sei: “Ia. Robby, iu savve long gele wea givim iu phone? Hem sista bilong mi. Iu teachim mi staka gud samting. Plis teachim hem tu olsem iu teachim mi.” Mi sei: “Katie, bae mi traem best for duim datwan. Thankiu for talem kam wea nao iu stap.” No longtaem bihaen, mi story moa witim sista bilong Katie, and datwan nao hem last taem wea mi lukim hem. Nomata long wea nao tufala gele hia stap, mi hope tufala bae lane abaotem Jehovah.

Mi worshipim Jehovah for 73 year finis. Mi hapi Jehovah helpem mi for no teksaed long war and for gohed faithful taem mi long prison. And tu, olketa brata and sista bilong mi sei wei wea mi no givap taem dadi againstim mi helpem olketa for no fraet for followim truth. Gogo, mami and sixfala brata and sista bilong mi olketa baptaes. Dadi tu hem stop for againstim mifala, and hem attendim samfala meeting bifor hem dae.

Sapos God hem laekem, hem bae mekem olketa famili member and olketa fren bilong mi wea dae finis for laef bak long niu world. Iumi bae barava hapi tumas for worshipim Jehovah for olowe witim olketa wea iumi lovem! *

^ par. 32 Brata Corwin Robison hem dae bifor olketa printim disfala article. Hem faithful long Jehovah go kasem taem hem dae.