Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  December 2017

Waswe, Jacob kamap laen dadi bilong Messiah from hem peim raet bilong Esau olsem firstborn?

Kwestin From Reader

Kwestin From Reader

Waswe, laen bilong Messiah mas kam from olketa wea garem raet olsem firstborn long Israel nomoa?

Bifor iumi bin ting olsem. From luk olsem datwan fitim samting wea Hebrew 12:16 hem talem, wea sei Esau “no tinghae long olketa holy samting” and “hem lusim raet bilong hem olsem firstborn bikos hem exchangem datwan for wanfala pleit kaikai nomoa.” Diswan maet luk olsem taem Jacob kasem ‘raet olsem firstborn,’ hem kamap laen dadi bilong Messiah tu.—Matt. 1:2, 16; Luke 3:23, 34.

Bat, taem iumi lukluk gud long wanem Bible talem hem showimaot man no need for firstborn son for kamap laen dadi bilong Messiah. Bae iumi storyim samfala pruv wea showimaot diswan.

Firstborn son bilong Jacob (Israel), wea hem born from Leah, hem Reuben. Firstborn son bilong Jacob from favorite waef bilong hem, Rachel, hem Joseph. Taem Reuben duim wanfala nogud samting, raet olsem firstborn hem go long Joseph. (Gen. 29:31-35; 30:22-25; 35:22-26; 49:22-26; 1 Chron. 5:1, 2) Nomata olsem, laen bilong Messiah no kam from Reuben or Joseph. Bat hem kam from laen bilong Judah, wea hem mek-foa son bilong Jacob wea born from Leah.—Gen. 49:10.

Luke 3:32 storyim faevfala man insaed  famili laen bilong Messiah. Luk olsem olketa firstborn long famili bilong olketa. Olsem wei wea Jesse hem son bilong Obed, and Obed hem son bilong Boaz.—Ruth 4:17, 20-22; 1 Chron. 2:10-12.

Bat David, wea hem son bilong Jesse, hem no firstborn. Hem nao lastborn long eitfala boy. Nomata olsem, Messiah kam from laen bilong David. (1 Sam. 16:10, 11; 17:12; Matt. 1:5, 6) Then Solomon nao next wan insaed datfala laen nomata hem no firstborn bilong David.—2 Sam. 3:2-5.

Diswan no minim wei for firstborn hem no important. Firstborn son garem important position insaed famili and staka taem hem nao next wan for hed bilong famili. Hem tu son wea bae kasem dabol share long evriting wea dadi ownim.—Gen. 43:33; Deut. 21:17; Josh. 17:1.

Bat olketa savve givim datfala raet olsem firstborn long narawan. Olsem wei wea Abraham sendem go aot Ishmael, and givim raet olsem firstborn long Isaac. (Gen. 21:14-21; 22:2) And olsem iumi storyim finis, Jacob aotem raet olsem firstborn from Reuben and givim long Joseph.

Distaem iumi bae storyim moa Hebrew 12:16, wea sei: “Lukaot gud, nogud eniwan long iufala hem durong or hem no tinghae long olketa holy samting olsem Esau. Hem lusim raet bilong hem olsem firstborn bikos hem exchangem datwan for wanfala pleit kaikai nomoa.” Wanem nao diswan minim?

Long datfala taem, aposol Paul no storyim famili laen bilong Messiah. Hem bin encouragem olketa Christian for “gohed wakabaot followim stretfala road.” From nogud olketa durong and then “no kasem blessing bilong God.” (Heb. 12:12-16) Sapos olketa duim datwan, olketa olsem Esau. Hem “no tinghae long olketa holy samting,” and hem duim nomoa samting wea hemseleva laekem.

Long taem bilong Esau bifor, maet samfala taem hem garem privilege for offerim sakrifaes. (Gen. 8:20, 21; 12:7, 8; Job 1:4, 5) Bat from Esau tingim nomoa samting wea body laekem, hem lusim olketa privilege olsem for kasem wanfala pleit kaikai nomoa. Maet hem no laek kasem olketa nogud samting wea datfala profesi talem abaotem olketa wea kam from laen bilong Abraham. (Gen. 15:13) And from Esau maritim tufala woman wea no worshipim Jehovah, diswan showimaot hem duim samting wea hemseleva laekem nomoa and no tinghae long olketa holy samting. Diswan mekem parents bilong hem sorre tumas. (Gen. 26:34, 35) Jacob barava difren, bikos hem mek sure hem maritim woman wea worshipim tru God!—Gen. 28:6, 7; 29:10-12, 18.

So, wanem nao iumi lanem abaotem famili laen bilong Jesus, datfala Messiah? Samfala taem datfala laen hem kam from firstborn son, bat datwan no happen evritaem. Olketa Jew tu luksavve long diswan, bikos olketa acceptim Christ mas kam from laen bilong David, lastborn son bilong Jesse.—Matt. 22:42.