“Lastfala Adam hem kamap wanfala spirit wea givim laef.”—1 COR. 15:45.

SONG: 111, 12

1-3. (a) Wanem nao wanfala long olketa main teaching wea iumi bilivim? (b) Why nao resurrection hem important tumas? (Lukim piksa long start bilong study.)

SAPOS samwan askem iu wanem nao olketa main teaching bilong iufala, wanem nao bae iu sei? For sure bae iu sei iu bilivim Jehovah nao Creator wea givim iumi laef. Maet iu talem tu iu bilivim Jesus Christ dae for givim ransom for iumi. And bae iu hapi for story abaotem hao pipol bilong God bae laef olowe long Paradaes long earth. Bat waswe, bae iu talem hem hao resurrection hem wanfala long olketa favorite teaching wea iu bilivim?

2 Nomata sapos iumi hope for no dae long datfala bigfala trabol and laef olowe long earth, iumi garem gud reason for bilivim hao resurrection hem wanfala main teaching bilong iumi. Aposol Paul showimaot why resurrection barava important. Hem sei: “Sapos olketa wea dae finis no savve laef bak, Christ hem no laef bak tu.” Sapos Jesus no resurrect, hard for hem rul olsem King long heven distaem, and preaching waka wea iumi duim hem iusles nomoa. (Readim 1 Corinth 15:12-19.) Bat iumi savve Jesus hem resurrect. From iumi bilivim resurrection bilong hem, iumi no  olsem olketa Sadducee wea nating bilivim man wea dae savve laef bak moa. Iumi gohed for garem faith long resurrection nomata olketa narawan mekfani long iumi.—Mark 12:18; Acts 4:2, 3; 17:32; 23:6-8.

3 Paul sei teaching abaotem “wei wea olketa wea dae finis bae laef bak” hem part long “olketa main teaching abaotem Christ.” (Heb. 6:1, 2) Hem barava talemaot klia hem bilivim resurrection. (Acts 24:10, 15, 24, 25) Nomata resurrection hem wanfala long olketa main teaching wea hem ‘first samting wea iumi lanem from message bilong God,’ hem important for iumi minim gud disfala teaching. (Heb. 5:12) Why nao olsem?

4. Olketa wanem kwestin nao maet iumi askem abaotem resurrection?

4 Taem pipol start for studyim Bible, olketa savve readim olketa story abaotem resurrection wea happen bifor, olsem resurrection bilong Lazarus. Olketa lane tu abaotem Abraham, Job, and Daniel wea barava trustim hao olketa wea dae bae laef bak long future. Bat wanem nao bae iu talem sapos samwan askem iu for pruvim why iumi trustim olketa resurrection promis wea Bible talem staka handred year bifor? And waswe, Bible really talem taem wea resurrection bae kamap long future? Ansa for olketa kwestin hia bae strongim faith bilong iumi.

RESURRECTION WEA BIBLE TALEM STAKA HANDRED YEAR FINIS

5. Wanem nao samfala kwestin wea bae iumi storyim?

5 Maet hem isi for iumi bilivim samwan hem savve laef bak no longtaem bihaen hem dae. (John 11:11; Acts 20:9, 10) Bat waswe iumi savve trustim promis abaotem resurrection wea bae kamap staka handred year long future? Maet hem abaotem samwan wea just dae or samwan wea dae longtaem finis. Waswe, iumi savve trustim kaen promis wea olketa talem longfala taem bifor? Ia, bikos iumi bilivim finis wanfala resurrection olsem wea happen staka handred year bihaen Bible promisim. Wanem resurrection nao datwan? And hao nao diswan join witim hope bilong iu for future?

6. Hao nao profesi abaotem Jesus long Psalm 118 hem kamap tru?

6 Iumi bae storyim wanfala resurrection wea Bible talem staka handred year bifor hem happen. Luk olsem David nao raetem Psalm 118, wea hem sei: “Jehovah, plis sevem mifala!” and hem sei tu: “Jehovah hem blessim disfala man wea kam long nem bilong hem.” Diswan hem wanfala profesi abaotem Messiah and olketa pipol talem disfala toktok taem Jesus raedem donkey go long Jerusalem long Nisan 9, tu-thri day bifor hem dae. (Ps. 118:25, 26; Matt. 21:7-9) Bat hao nao Psalm 118 join witim resurrection? Lukim nara samting wea psalm hia talem, hem sei: “Ston wea olketa man wea wakem haos les long hem nao hem kamap main ston long kona.”—Ps. 118:22.

“Olketa man wea wakem haos” rejectim Messiah (Paragraf 7 storyim diswan)

7. Wanem nao olketa Jew duim wea showimaot olketa rejectim Jesus?

7 Disfala toktok “olketa man wea wakem haos” hem minim olketa bigman bilong Jew wea rejectim Messiah. Olketa showimaot olketa heitim Jesus and no acceptim wei wea hem nao Christ. And tu, olketa rejectim hem taem olketa forcem Pilate for killim hem dae. (Luke 23:18-23) Tru, olketa nao kosim dae bilong Jesus.

Taem Jesus resurrect hem kamap “main ston long kona” (Paragraf 8, 9 storyim diswan)

8. Hao nao Jesus savve kamap “main ston long kona”?

8 Sapos olketa rejectim Jesus and killim hem dae, hao nao bae hem kamap “main ston long kona”? Datwan savve happen nomoa sapos hem resurrect. Jesus explainim datwan taem hem story abaotem  landowner wea sendem olketa wakaman bilong hem go long olketa farmer bilong hem. Olketa farmer hia treatim nogud olketa wakaman. Gogo, datfala landowner sendem go son bilong hem bikos hem tingse olketa farmer bae obeyim hem. Bat olketa killim dae datfala son. Bihaen Jesus talem datfala tokpiksa, hem talem datfala toktok from Psalm 118:22. (Luke 20:9-17) Aposol Peter storyim sem verse taem hem story witim ‘olketa bigman and olketa man wea teachim law wea hipap long Jerusalem.’ Hem sei, “Jesus nao iufala nilam hem long post bat God mekem hem for laef bak.” Then hem sei: “Hem nao ‘ston wea iufala olketa man wea wakem haos les long hem, wea hem kamap main ston long kona.’”—Acts 3:15; 4:5-11; 1 Pet. 2:5-7.

9. Wanem profesi nao Psalm 118:22 hem storyim?

9 Datfala profesi long Psalm 118:22 storyim resurrection wea kamap staka handred year bihaen olketa raetem. Hem sei olketa bae rejectim Messiah and killim hem dae. Bat bihaen, hem bae laef bak and bae kamap datfala main ston long kona. From Jesus laef bak, hem nao kamap only “man wea savve sevem iumi.”—Acts 4:12; Eph. 1:20.

10. (a) Wanem nao Psalm 16:10 profesi abaotem? (b) Hao nao iumi savve Psalm 16:10 no story abaotem David?

10 Distaem iumi storyim nara scripture abaotem resurrection. Hem kamap tru winim wan thousand year bihaen olketa raetem. Diswan mekem iumi barava trustim hao olketa resurrection savve happen longfala taem bihaen olketa profesi abaotem or promisim. Long Psalm 16 David sei: “Iu bae no leavim mi long grev. Iu bae no letem body bilong wakaman bilong iu wea faithful for rotten.” (Ps. 16:10) David no minim hem nao bae no dae and no stap long grev. Bikos Bible sei David kamap olo and dae and “olketa berem hem witim olketa grani bilong hem long Taon Bilong David.” (1 Ki. 2:1, 10) So hu nao disfala verse story abaotem?

11. Wanem taem nao Peter explainim Psalm 16:10?

11 Winim wan thousand year bihaen David talem datfala toktok, Peter explainim hu nao Psalm 16:10 story abaotem tu-thri week bihaen Jesus dae and resurrect. Long datfala taem Peter story long staka thousand Jew and olketa wea followim religion bilong Jew. (Readim Acts 2:29-32.) Hem storyim hao David hem dae and olketa berem hem. Olketa wea lisin long Peter agree long datwan. And luk olsem no eniwan tok againstim Peter taem hem sei, “David hem savve finis Christ bae hem laef bak [and] hem storyim datwan.”

12. Hao nao Psalm 16:10 hem kamap tru, and hao nao datwan helpem iumi for trustim olketa promis abaotem resurrection?

12 Peter iusim nara scripture wea David raetem long Psalm 110:1 for sapotim disfala point. (Readim Acts 2:33-36.) Wei wea Peter iusim olketa scripture hia helpem staka pipol for bilivim Jesus nao hem “Lord and Christ.” Pipol luksavve profesi long Psalm 16:10 hem kamap tru taem Jesus laef bak. Bihaen, aposol Paul iusim olketa sem scripture taem hem story long olketa Jew long taon bilong Antioch long Pisidia. Olketa pruv hia muvim olketa for laek lanem moa samting. (Readim Acts 13:32-37, 42.) Datwan shud helpem iumi tu for luksavve iumi fit for trustim olketa Bible profesi hia abaotem resurrection nomata datwan kamap tru bihaen staka handred year.

WANEM TAEM NAO RESURRECTION BAE HAPPEN?

13. Olketa wanem kwestin nao iumi maet askem abaotem resurrection?

13 Iumi hapi for savve hao resurrection savve happen staka handred year bihaen olketa profesi abaotem. Nomata olsem, samfala  maet ask olsem: ‘Waswe, datwan minim bae mi mas weit longtaem bifor mi savve lukim samwan wea mi lovem wea dae? Wanem taem nao resurrection bae happen?’ Jesus talem olketa aposol hao olketa no savve long samfala samting and olketa no fit for savve long datwan tu. Hem sei, ‘Dadi long heven nomoa garem paoa for markem taem for olketa samting happen.’ (Acts 1:6, 7; John 16:12) Bat, samfala information stap abaotem taem wea resurrection bae happen.

14. Hao nao resurrection bilong Jesus hem difren from olketa resurrection bifor?

14 Barava important resurrection wea Bible storyim nao hem resurrection bilong Jesus. Sapos hem no laef bak, no eniwan long iumi bae garem hope for lukim olketa wea iumi lovem wea dae finis. Olketa resurrection wea happen bifor Jesus hem resurrect, olsem olketa wea Elijah and Elisha resurrectim, olketa no gohed for laef olowe. Olketa dae bak and kamap dust moa insaed long grev. Bat Jesus “hem laef bak and bae hem no dae moa. Dae no garem eni paoa ovarem hem.” Long heven, hem gohed “laef for olowe.”—Rome 6:9; Rev. 1:5, 18; Col. 1:18; 1 Pet. 3:18.

15. Why nao Bible sei Jesus hem “first wan” for resurrect?

15 Resurrection bilong Jesus hem barava important bikos hem nao first wan for resurrect for kamap wanfala spirit and go long heven. (Acts 26:23) Bat, no Jesus seleva nomoa bae resurrect for go long heven. Jesus promis hao olketa faithful aposol bae rul witim hem long heven. (Luke 22:28-30) Bat bihaen olketa dae nao bae olketa just kasem disfala reward. Taem olketa resurrect olketa bae garem spirit body olsem Jesus. Paul sei, “Christ hem laef bak finis. Hem first wan for laef bak.” Paul sei olketa narawan tu bae resurrect and go long heven. Hem sei, “Diswan hem followim order: First wan wea laef bak hem Christ, then long taem wea Christ hem stap, olketa bilong hem bae laef bak tu.”—1 Cor. 15:20, 23.

16. Hao nao iumi luksavve wanem taem resurrection bilong olketa wea go long heven bae happen?

16 Toktok bilong Paul helpem iumi for luksavve wanem taem resurrection bilong olketa wea go long heven bae happen. Hem bae happen long “taem wea Christ hem stap.” For staka year finis, Olketa Jehovah’s Witness pruvim from Bible “taem wea Christ hem stap” hem start long 1914 and hem gohed yet distaem. And klosap nao disfala nogud world bae finis.

17, 18. Long taem wea Jesus stap, wanem nao bae happen long samfala anointed Christian?

17 Bible storyim samfala samting moa abaotem datfala resurrection for go long heven. Hem sei: “Mifala laekem iufala for  savve abaotem olketa wea dae finis . . . Sapos iumi bilivim Jesus hem dae and hem laef bak, bae iumi bilivim tu God bae mekem olketa disaepol bilong Jesus wea dae for laef bak . . . Iumi wea laef yet taem Lord hem stap bae go ap long heven. Bat olketa wea dae finis bae go ap firstaem, then iumi bae go ap bihaen. Lord bilong iumi bae kam daon from heven. . . . Then olketa disaepol bilong Christ wea dae finis bae olketa nao first wan for laef bak. Bihaen, iumi wea laef yet bae go ap witim olketa long olketa cloud for meetim Lord long skae, and iumi bae stap witim Lord for olowe.”—1 Thess. 4:13-17.

18 Datfala first resurrection bae kamap bihaen Christ kamap king long 1914. Bat, olketa anointed Christian wea laef long taem bilong datfala big trabol bae ‘go ap long olketa cloud.’ Wanem nao datwan minim? Hem minim olketa anointed wan hia bae dae bat no “gohed for stap olsem,” bikos taem olketa dae bae olketa change “kwiktaem nomoa, olsem taem eye hem sat and open moa. Diswan bae happen long taem wea datfala last trumpet hem krae.”—1 Cor. 15:51, 52; Matt. 24:31.

19. Hao nao resurrection long future hem difren from resurrection bifor?

19 Distaem, staka faithful Christian no kasem anointing and Jehovah no chusim olketa for rul witim Christ long heven. Bat, olketa luk forward long “day bilong Jehovah,” taem hem bae finisim disfala nogud world. No eniwan savve really taem wea end bae kam, bat olketa pruv showimaot hao hem barava klosap. (1 Thess. 5:1-3) Long niu world, wanfala difren resurrection bae kamap. Pipol bae laef bak long earth and garem hope for kamap perfect and no dae moa. Long datfala taem olketa bae “laef bak long wei wea difren.” Disfala resurrection hem difren bikos olketa wea resurrect bifor olketa dae moa, bat olketa wea bae laef bak long future bae no dae moa.—Heb. 11:35.

20. Why nao iumi sure resurrection bae barava organize gud?

20 Bible sei olketa wea bae resurrect for go long heven bae “followim order.” (1 Cor. 15:23) So iumi trustim hao resurrection wea bae kamap long earth hem bae followim order or barava organize gud. Datwan maet mekem iumi ask olsem: Waswe, olketa wea dae no longtaem go nomoa bae resurrect stretawe bihaen Wan Thousand Year Rul Bilong Christ hem start, and waswe, olketa wea lovem olketa bae stap for welkamim olketa? Waswe, bae olketa faithful man long bifor wea duim waka for lead, laef bak firstaem for help for organizem pipol bilong God long niu world? Waswe long olketa wea nating savve long Jehovah? Wanem taem and long wea nao olketa bae laef bak? Iumi garem staka kwestin wea iumi tingim, bat iumi no need for wari abaotem olketa samting hia distaem. Hem gud for iumi weit and lukluk nomoa. Iumi savve trustim hao bae hem barava interesting for lukim wanem Jehovah bae duim.

21. Wanem nao hope bilong iu?

21 Go kasem datfala taem, iumi shud gohed strongim faith bilong iumi long Jehovah. Thru long Jesus, Jehovah promis hao olketa wea dae bae stap long memory bilong hem and bae laef bak moa. (John 5:28, 29; 11:23) Nara samting wea pruvim Jehovah bae resurrectim olketa wea dae, hem wei wea Jesus sei Jehovah ting long Abraham, Isaac, and Jacob, olsem olketa laef nomoa. (Luke 20:37, 38) Iumi garem staka gud reason for talem sem toktok olsem aposol Paul wea sei: ‘Biliv bilong mi hem for God bae mekem pipol laef bak.’—Acts 24:15.