Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  December 2016

 LAEF STORY

Mi ‘Change for Fitim Evri Difren Kaen Man’

Mi ‘Change for Fitim Evri Difren Kaen Man’

“Sapos iu baptaes, bae mi lusim iu!” Disfala toktok nao dadi bilong mi talem long mami bilong mi long 1941. Nomata olsem, mami disaed for baptaes. So dadi lusim mifala nao. Long datfala taem mi eit year nomoa.

BIFOR diswan happen, mi interest finis long truth. Mami tekem samfala Bible pablikeson and mi laekem tumas olketa piksa insaed olketa buk hia. Dadi no laekem mami for storyim olketa samting wea hem lanem long mi. Bat from mi interest and askem olketa kwestin, mami study witim mi taem dadi no stap long haos. From datwan, mi tu disaed for dedicate long Jehovah. Long 1943, mi baptaes long Blackpool, long England, taem mi ten year.

MI START FOR WORSHIPIM JEHOVAH

Start long datfala taem, mitufala mami go aot tugeta long ministry evritaem. Long datfala taem, mifala iusim olketa phonograph taem mifala duim preaching waka. Olketa phonograph hia big and hevi. Hevi bilong wanfala phonograph hem samting olsem foa and haf kilo. Tingim, nomata mi smol nomoa mi karem raon wanfala hevi samting olsem!

Taem mi kasem 14 year mi laek for pioneer nao. Mami sei mi mas story firstaem witim servant for brethren (circuit overseer). Brata hia sei bae hem gud sapos mi lanem eni waka wea savve sapotim pioneer waka bilong mi. So hem nao wanem mi duim. Bihaen mi waka for tufala year, mi story witim nara  circuit overseer and talem hem mi laek for pioneer. Hem sei long mi: “Iu pioneer nao!”

So long April 1949, mitufala mami salem samfala furniture wea mifala garem and givim samfala long olketa narawan, and mifala muv go long Middleton, klosap long Manchester. Long there nao mitufala start for pioneer. Bihaen fofala month, mi and narafala brata plan for pioneer tugeta. Branch office encouragem mitufala for muv go long wanfala niu kongregeson long Irlam. Mami bilong mi pioneer witim nara sista long narafala kongregeson.

Nomata mi 17 year nomoa, mi and pioneer partner bilong mi nao lukaftarem olketa meeting bikos no staka brata wea fit for duim datwan stap long datfala niu kongregeson. Bihaen, mi muv go long Buxton Kongregeson wea garem tu-thri pablisa nomoa and olketa needim help. Olketa samting hia redyim mi for olketa assignment wea mi bae kasem.

Mi witim olketa narawan advertisem wanfala pablik tok long Rochester, New York, 1953

Long 1951, mi apply for attendim Watchtower Bible Skul Bilong Gilead. Bat long December 1952, gavman sei mi mas joinim army. Mi talem long olketa mi no laek for joinim army bikos mi wanfala full-taem minister bat kot no acceptim datwan, and mi mas go long prison for sixfala month. Taem mi long prison, mi kasem invitation for go long mek-22 class bilong Gilead. So long July 1953, no longtaem bihaen mi kamaot from prison, mi  go long New York insaed long datfala ship wea olketa kolem Georgic.

Taem mi kasem New York, mi attendim datfala 1953 New World Society Assembly. Bihaen datwan, mi tekem train for go long South Lansing, long New York, wea Gilead Skul hem stap. From mi just kamaot from prison, mi garem lelebet selen nomoa. Taem mi go daon long train, mi tekem bas for go long South Lansing, and mi kaonem 25 cents from nara passenger for peim busfare.

KASEM ASSIGNMENT FOR GO LONG NARA KANTRI

Nambawan training wea mifala kasem long Gilead Skul hem helpem mifala for “change for fitim evri didifren kaen man.” (1 Cor. 9:22) Mi and Paul Bruun, witim Raymond Leach, mifala kasem assignment for go long Philippines. Bat mifala mas weit for tu-thri month bifor mifala kasem visa bilong mifala. Then mifala go long ship for kasem Rotterdam, long Netherlands. Then mifala go followim Mediterranean Sea and go insaed long Suez Canal. Mifala kamaot long Indian Ocean, go kasem Malaysia, and then long Hong Kong. Gogo, bihaen mifala travel for 47 day long sea, mifala kasem Manila long November 19, 1954.

Mitufala Raymond Leach go long ship for 47 day for kasem Philippines

Long there mifala mas getius long niu culture, niu kantri, and lanem niu languis. Bat long firstaem, mifala evriwan kasem assignment for joinim wanfala kongregeson long Quezon City, wea staka pipol savve story long English. So bihaen sixfala month, mifala savve tu-thri word nomoa long Tagalog languis. Next assignment wea mifala kasem hem helpem mifala for lanem datfala languis.

Wanday long May 1955, bihaen mifala kam bak from preaching, mitufala Brata Leach kasem leta wea sei mitufala kasem assignment for duim circuit waka. Long datfala taem mi 22 year nomoa, bat mi lanem staka niu samting long disfala assignment. Datwan helpem mi for ‘change for fitim evri difren kaen man.’

Givim tok long Bicol languis long wanfala circuit assembly

Olsem example, long firstfala kongregeson wea mi visitim, mi givim pablik tok front long wanfala stoa. Long datfala taem long Philippines, olketa brata savve givim pablik tok long olketa pablik ples! Taem mi visitim olketa difren kongregeson, mi savve givim tok insaed olketa gazebo (smol haos wea no garem walling), long market, front long olketa community hall, long basketball kot, long olketa park, and staka taem long saed road nomoa. Wantaem long San Pablo City, mi shud givim tok long wanfala market ples bat bikos hem big rain mi no givim datfala tok. So mi talem olketa elder for mi givim tok hia long Kingdom Hall. Bihaen, olketa brata askem mi sapos hem fitim for putim datfala tok long report olsem wanfala pablik meeting or nomoa!

Taem mi go visitim olketa kongregeson, evritaem mi savve stap long haos bilong olketa brata. Nomata olketa garem olketa simpol haos, bat evritaem haos bilong olketa hem klin. Staka taem mi savve sleep long wanfala mat long floor. Ples for swim hem aotsaed long haos, so mi mas werem kaleko taem mi swim. For go long olketa nara ples, mi savve go long bas, and samfala taem mi go long boat for go kasem olketa nara island. Long olketa year wea mi stap long full taem service, no enitaem mi garem wanfala car.

Nomata mi no tekem eni languis course, mi lanem Tagalog languis taem mi go aot long ministry witim olketa brata and sista, long olketa meeting, and taem mi visitim olketa kongregeson. Olketa brata willing for helpem mi for lane, and mi tinghae long wei wea olketa patient and stretem mi taem mi talem rong long eni word.

Gogo mi mekem samfala change moa bikos mi kasem olketa niu assignment. Long 1956,  Brata Nathan Knorr kam long Philippines taem mifala garem wanfala national convention. Mi kasem assignment for story witim olketa wea reportim nius. Mi no duim diswan bifor bat olketa narawan helpem mi. Insaed long datfala sem year tu, mifala holem nara national convention moa, and mi nao convention overseer. Brata Frederick Franz from hedquarter hem visit kam tu and mi lanem staka samting from hem. Taem hem givim pablik tok, hem werem barong Tagalog, wea hem kastom kaleko bilong olketa long Philippines. Datwan mekem olketa brata long there barava hapi, and mi luksavve hem important for change mekem pipol no fraetem iumi.

Taem mi kamap distrik overseer, mi mas changem samfala samting moa. Long datfala taem, mifala showim long pipol datfala movie The Happiness of the New World Society. Klosap evritaem mifala showim datfala movie long aotsaed, so samfala taem olketa insect savve staka tumas. Olketa insect hia kam followim laet bilong projector and olketa pas insaed. Big waka nao for klinim datfala projector bihaen! Hem no isi for organizem olketa hipap olsem, bat mifala hapi for lukim pipol kam and lane abaotem organization bilong Jehovah wea stap evriwea long world.

Olketa Catholic priest long samfala area bihaenem olketa police for no letem mifala for holem olketa assembly. Nara samting tu,  sapos church bilong olketa hem klosap long ples wea mifala holem olketa assembly, olketa bae ringim belo long church for disturbim mifala. Nomata olsem, staka pipol wea stap long olketa ples hia lanem truth and worshipim Jehovah distaem.

WILLING FOR GOHED CHANGE FOR DUIM OLKETA NIU ASSIGNMENT

Long 1959, mi kasem assignment for waka long branch office. Mi lanem staka samting moa taem mi waka long there. Gogo, mi kasem assignment for visitim olketa nara kantri olsem zone overseer. Taem mi go duim zone visit long Thailand, mi meetim wanfala missionary sista wea nem bilong hem Janet Dumond. Mitufala raet leta long each other, and gogo mitufala marit. Mitufala marit finis for 51 year and hapi for duim full-taem service tugeta.

Mitufala Janet long wanfala island long Philippines

Mi hapi for visitim pipol bilong Jehovah long 33 kantri. Olketa firstfala assignment bilong mi helpem mi for savve hao for deal witim pipol wea garem difren culture and living! Taem mi visitim olketa kantri hia, datwan helpem mi for luksavve Jehovah lovem pipol from evri ples.—Acts 10:34, 35.

Mitufala evritaem go aot long ministry

GOHED YET FOR CHANGE

Mitufala Janet hapi tumas for waka witim olketa brata and sista long Philippines, and mitufala gohed for waka long branch office long Quezon City. Insaed 60 year wea mi stap long hia, namba bilong olketa pablisa hem kamap staka winim taem wea mi just arrive long hia. Nomata kam kasem distaem, mi mas gohed yet for change for fitim wanem Jehovah laekem. Olsem example, bikos long olketa change wea kamap long organization bilong Jehovah distaem, mifala mas willing for gohed change.

Mitufala hapi tumas for lukim namba bilong olketa Witness hem kamap staka

Mitufala duim best bilong mifala for followim direction wea kam from Jehovah, and datwan mekem mitufala barava hapi and satisfae. And tu, mitufala traem best for mekem samfala change mekem mitufala fit for helpem olketa brata and sista. Tru nao, mitufala willing for duim eni samting wea Jehovah laekem mekem mifala savve helpem ‘evri difren kaen man.’

Mitufala gohed for waka long branch office long Quezon City