Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  December 2016

From God Hem Kaen Tumas Iufala Kamap Free Nao

From God Hem Kaen Tumas Iufala Kamap Free Nao

“No letem sin for bossim iufala, from . . . God hem kaen tumas long iufala.”—ROME 6:14.

SONG: 2, 61

1, 2. Hao nao Rome 5:12 savve helpem iumi olketa pipol bilong Jehovah?

LONG Rome 5:12 hem sei: “Sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae bikos evriwan sin.” Iumi evriwan savve gud long disfala scripture, and staka taem iumi savve storyim long pipol wea iumi preach long olketa.

2 Disfala scripture hem kamap staka taem insaed long datfala buk Wanem Nao Really Samting wea Bible Teachim? Taem iumi studyim chapter 3, 5, and 6 long datfala buk, maet iumi savve readim Rome 5:12 for helpem olketa pikinini and Bible study bilong iumi for minim why earth hem no paradaes distaem, why iumi needim ransom, and why iumi dae. Bat disfala scripture savve helpem iumi evriwan for tinghae long wei wea iumi fren witim Jehovah. Hem savve helpem iumi tu for gohed duim wanem Jehovah laekem and for luk forward long olketa samting wea hem promisim for iumi long future.

3. Wanem nao iumi mas luksavve long hem from iumi born sin?

3 Iumi evriwan born sin so evriday nao iumi savve duim samting wea no stret. Nomata olsem, Jehovah savve iumi no  perfect and hem willing for forgivim iumi from hem garem mercy. (Ps. 103:13, 14) Jesus sei iumi mas prea long God for hem forgivim olketa sin bilong iumi. (Luke 11:2-4) Taem Jehovah forgivim finis olketa rong wea iumi duim bifor, iumi shud no tingim moa olketa samting hia. Distaem bae iumi storyim samting wea mekem Jehovah fit for forgivim iumi.

SAMTING WEA MEKEM JEHOVAH FIT FOR FORGIVIM IUMI

4, 5. (a) Wanem nao savve helpem iumi for minim samting wea Rome 5:12 hem storyim? (b) Wanem nao datfala wei for “kaen tumas” wea Rome 3:24 story abaotem hem minim?

4 For helpem iumi minim samting wea mekem Jehovah fit for forgivim olketa sin bilong iumi wea Rome 5:12 hem storyim, iumi savve lukim samfala nara chapter long Bible buk Rome, especially chapter 6. Long Rome chapter 3 hem storyim iumi “evriwan sin.” Paul sei: “Evriwan sin and no savve showimaot olketa nambawan wei bilong God. Long tingting bilong God olketa raeteous bikos long price wea Christ Jesus peim for sevem olketa. Diswan hem wanfala present wea God givim from hem kaen tumas.” (Rome 3:23, 24) Disfala Greek toktok wea olketa transleitim “kaen tumas” hem minim for duim barava gud samting for samwan and no expectim hem for changem bak datwan.

5 Wanfala savveman sei staka taem datfala Greek toktok hem abaotem samting wea God and Christ duim for sevem olketa man from sin and dae. Dastawe Niu World Bible transleitim datfala Greek toktok olsem “kaen tumas.” Bae iumi lukim samting wea God duim for iumi and wei wea hem kaen tumas hem helpem iumi distaem and givim iumi hope for future.

6. Wanem gud samting nao olketa man savve kasem from God hem kaen tumas?

6 Paul sei from Adam hem sin dastawe “sin hem kasem evriwan long world bikos long wanfala man nomoa.” Dastawe Bible sei “sin bilong wanfala man hem mekem dae rul olsem king.” Bat Paul sei tu, from God hem barava kaen tumas, hem openem wei for pipol bae laef “bikos long datfala man, Jesus Christ.” (Rome 5:12, 15, 17) “From wanfala man hem obeyim God, diswan bae mekem staka pipol raeteous.” And olketa savve luk forward for “kasem laef olowe bikos long Lord bilong iumi Jesus Christ.”—Rome 5:19, 21.

7. Hao nao ransom wea God provaedem showimaot hem barava kaen tumas?

7 Tingim diswan: Iumi no duim eni samting for mekem Jehovah givim kam Son bilong hem olsem ransom sakrifaes for iumi. Bat from hem kaen tumas dastawe hem duim samting for sevem iumi from sin and dae. Iumi barava tinghae long samting wea tufala duim mekem God savve forgivim olketa sin bilong iumi and iumi savve kasem laef olowe! Iumi laek for showimaot long laef bilong iumi evriday hao iumi tinghae long wanem God hem duim for iumi.

TINGHAE LONG WEI WEA GOD HEM KAEN TUMAS

8. Wanem tingting wea no stret nao iumi mas stap klia long hem?

8 Iumi savve God hem willing for forgivim olketa sin bilong iumi, nomata olketa big sin wea iumi duim tu. Bat iumi shud no tingse hem olraet nomoa for iumi duim sin bikos iumi sei Jehovah bae forgivim iumi. Long first century, nomata taem olketa aposol laef yet samfala Christian stap wea garem kaen tingting olsem. (Readim Jude 4.) Distaem samfala garem kaen  tingting olsem, so iumi mas careful nogud iumi start for garem sem tingting olsem olketa.

9, 10. Hao nao Paul and olketa nara Christian kamap free from sin and dae?

9 Paul talem olketa Christian hem rong for olketa tingse olketa savve gohed for duim sin and God bae forgivim olketa. Paul sei olketa shud no garem kaen tingting olsem bikos hem olsem olketa “dae finis and kamap free from sin nao.” (Readim Rome 6:1, 11.) Why nao Paul tok olsem?

10 God savve forgivim sin bilong Paul and olketa nara Christian long first century bikos long ransom sakrifaes bilong Jesus. Jehovah anointim olketa witim holy spirit mekem olketa kamap olketa son bilong hem. Sapos olketa gohed faithful, olketa bae rul witim Christ long heven. Bat from olketa stap yet long earth, hao nao olketa “dae finis and kamap free from sin”? Paul hem iusim datfala toktok for showimaot laef bilong olketa hem barava change. Hem sei bihaen Jesus hem dae and laef bak, hem kamap wanfala spirit wea no savve dae. Dastawe “dae no garem eni paoa ovarem hem nao.” Long sem wei, hem olsem olketa Christian tu dae finis. Laef bilong olketa hem barava change bikos olketa no letem samting wea body wea sin laekem for kontrolem olketa. Olketa waka hard for duim samting wea God hapi long hem. Olketa “dae finis and kamap free from sin” mekem olketa savve “duim samting wea God laekem bikos . . . olketa disaepol bilong Christ Jesus.”—Rome 6:9, 11.

11. Hao nao iumi olketa Christian distaem “dae finis and kamap free from sin”?

11 Waswe, iumi tu “dae finis and kamap free from sin”? Bifor iumi kamap Christian, maet iumi sin staka taem bikos iumi no luksavve long tingting bilong God abaotem olketa samting hia. Hem olsem iumi kamap ‘slave bilong samting wea no klin and iumi duim samting wea no stret,’ wea minim iumi “slave bilong sin.” (Rome 6:19, 20) Bat taem iumi lanem insaed Bible wanem God laekem iumi for duim, iumi changem olketa nogud wei bilong iumi, dedicate long hem and iumi baptaes. Iumi barava laek for obeyim Jehovah and duim samting wea bae mekem hem hapi. Iumi “free nao from wei for slave long sin” and kamap “slave bilong God and duim stret samting.”—Rome 6:17, 18.

12. Wanem nao iumi evriwan savve disaed for duim and for no duim?

12 Nomata olsem, iumi savve disaedem wanem for duim and wanem for no duim. Paul sei: “No letem sin gohed for rul olsem king long body bilong iufala mekem iufala no duim nomoa olketa samting wea body laekem.” (Rome 6:12) Iumi savve duim nogud samting wea body laekem or iumi savve kontrolem iumiseleva. Hem gud for ting raonem olketa kwestin hia: ‘Waswe, mi letem feeling for laekem nogud samting grow insaed heart bilong mi gogo mi duim rong samting? Or mi kwiktaem aotem datfala tingting?’ Sapos iumi barava tinghae long wei wea God hem kaen tumas long iumi, iumi bae duim best bilong iumi for mekem hem hapi.

IUMI FIT FOR WINIM FEELING FOR LAEK DUIM SIN

13. Hao nao iumi savve iumi fit for change and duim samting wea stret?

13 Long first century, samfala long Corinth wea olketa man for steal, man for sleep witim nara man, duim adultery, worshipim  idol, and olketa man for drunk, olketa change bikos olketa lane abaotem Jehovah and lovem hem. Olketa shame nao long olketa nogud samting wea olketa duim bifor. (Rome 6:21; 1 Corinth 6:9-11) Olketa Christian long Rome tu mas duim sem samting. Paul sei long olketa: “No letem sin bossim body bilong iufala. No iusim olketa part long body olsem weapon for duim samting wea no stret. Bat givim iufala seleva long God from iufala nao pipol wea laef bak, and iusim olketa part long body bilong iufala olsem weapon for duim gudfala samting.” (Rome 6:13) Paul hem savve olketa bae duim samting wea stret and gohed for kasem gud samting from wei wea God hem kaen tumas.

14, 15. Wanem nao samfala kwestin wea hem gud for iumi ting raonem?

14 Distaem hem semsem tu. Samfala brata and sista bilong iumi maet olsem olketa long Corinth bifor. Bat olketa change tu. Olketa lusim olketa nogud samting wea olketa duim bifor and kamap “klin.” Sapos iu tu duim datwan, waswe, iu gohed for stap klin front long Jehovah? From God hem kaen tumas and forgivim olketa sin bilong iu, waswe, iu waka hard for againstim olketa nogud samting wea body laekem, and gohed faithful for worshipim Jehovah?

15 Hem tru, iumi mas stap klia long olketa bigfala sin wea samfala long Corinth bifor olketa duim. Iumi no tingse iumi savve gohed duim olketa bigfala sin olsem, and God bae showimaot mercy long iumi and forgivim iumi. Bat waswe, iumi barava laek for obeyim Jehovah long evri samting, nomata long olketa sin wea samfala tingse hem smolfala sin nomoa?—Rome 6:14, 17.

16. Waswe, olketa sin wea 1 Corinth 6:9-11 storyim nomoa iumi mas stap klia long olketa?

16 Tingim example bilong aposol Paul. Iumi savve hem no duim olketa bigfala sin wea 1 Corinth 6:9-11 storyim. Nomata olsem, hem still garem sin. Hem sei: “Mi man nomoa ia wea mi slave bilong sin. Samting wea mi duim bat mi no minim tu. Samting wea mi laek for duim, mi no duim nomoa. Bat samting wea mi barava les long hem, hem nao wanem mi duim.” (Rome 7:14, 15) Diswan showimaot olketa nara samting stap wea hem ting long olketa olsem sin, and hem mas faet againstim olketa sin hia. (Readim Rome 7:21-23.) Iumi laek for followim example bilong Paul and traem best for obeyim Jehovah long evri samting.

17. Why nao iumi laek for honest?

17 Olsem example, tingim wei for honest. For Jehovah hapi long iumi, iumi mas honest. (Readim Proverbs 14:5; Ephesus 4:25.) Iumi no laek for olsem Satan, wea hem “dadi bilong wei for laea.” And iumi tingim tu, Ananias and waef bilong hem tufala dae from tufala laea. So iumi no laea. (John 8:44; Acts 5:1-11) Bat wei for honest hem no minim for no laea nomoa. Sapos iumi tinghae long wei wea God hem kaen tumas, iumi mas honest long olketa nara samting tu.

18, 19. Wanem nao samfala nara samting wea insaed long wei for no honest?

18 Man wea laea hem talem samting wea no tru. Bat Jehovah showimaot samfala nara samting tu hem insaed long wei for no honest. Olsem example, Jehovah sei long olketa Israelite: “Iufala mas no steal, iufala mas no trikim narawan, and iufala mas no konim narawan.” Why nao Jehovah talem diswan long olketa? Hem sei:  “Iufala mas holy, bikos mi God bilong iufala Jehovah, mi nao mi holy.” (Lev. 19:2, 11) Nomata maet iumi no laea long narawan, bat sapos iumi no talem full story and hem bilivim samting wea no tru, datwan minim iumi no honest nao.

Waswe, iumi traem best for no laea and no trikim narawan? (Paragraf 19 storyim diswan)

19 Olsem example, wanfala wakaman askem boss for taem off, mekem hem savve go lukim doctor long clinic. Bat datwan hem no full story. Hem tru hem bae go long clinic, bat hem plan tu for duim samfala nara samting. Hem laek for go long market or visitim olketa wantok. Waswe, hem honest or hem trikim boss bilong hem? Datfala man no talem full story bat hem mekem boss bilong hem bilivim samting wea no tru. Samfala taem pipol trikim narawan bikos olketa laek for kasem samting or bikos olketa no laek for kasem nogud samting. Bat iumi obeyim Jehovah wea sei: “Iumi mas no trikim narawan.” Iumi laek for duim samting wea stret and samting wea holy.—Rome 6:19.

20, 21. Sapos iumi tinghae long wei wea God kaen tumas long iumi, wanem nao iumi mas faet againstim?

20 Iumi no duim adultery, no drunk, and olketa nara bigfala sin. Nomata olsem, iumi no laek for duim eni samting wea Jehovah no hapi long hem. Olsem example, iumi no durong, bat waswe, iumi enjoyim olketa hapitaem wea no klin? Or iumi no drunk, bat waswe, iumi drinkim alcohol gogo iumi klosap drunk? Maet hem no barava isi for winim olketa test hia, bat iumi fit for win.

21 Goal bilong iumi hem for followim wanem Paul talem. Hem sei: “No letem sin gohed for rul olsem king long body bilong iufala mekem iufala no duim nomoa olketa samting wea body laekem.” (Rome 6:12; 7:18-20) Hem tru, from iumi no perfect iumi still savve duim sin. Bat taem iumi waka hard for faet againstim feeling for duim sin, datwan showimaot iumi tinghae long wei wea Jehovah and Jesus kaen tumas long iumi.

22. Olketa wea showimaot olketa tinghae long wei wea Jehovah hem kaen tumas, olketa bae kasem wanem gud samting?

22 Jehovah hem forgivim olketa sin bilong iumi and hem bae gohed for duim datwan. Iumi barava tinghae long wei wea hem kaen tumas! So iumi mas waka hard for no duim olketa samting wea Jehovah sei hem rong, nomata maet pipol tingse olketa samting hia smolfala sin nomoa. Wanem gud samting nao bae iumi kasem long future sapos iumi duim olsem? Paul sei: “From iufala slave bilong God distaem and no slave bilong sin, iufala holy and bae iufala kasem laef olowe.”—Rome 6:22.