Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  August 2017

 HISTORY BILONG IUMI

“Wanem Taem Moa Bae Iumi Garem Assembly?”

“Wanem Taem Moa Bae Iumi Garem Assembly?”

WANFALA week bifor end bilong November 1932, olketa start for iusim firstfala traffic laet long Mexico City, wea winim wan million pipol stap long there. Bat, gogo pipol no interest nao for story abaotem datfala laet. Olketa wea reportim nius go long train station witim camera bilong olketa for weitim wanfala spesol guest wea bae arrive. Hem nao Joseph Rutherford, president bilong Watch Tower Society long datfala taem. Olketa Witness long Mexico tu redi for welkamim Brata Rutherford, wea kam for attendim thrifala day national convention long Mexico.

The Golden Age sei: “Long future pipol bae luksavve disfala convention hem barava important bikos hem helpem pipol for lane abaotem truth long Mexico.” Bat why nao datfala convention hem spesol nomata 150 pipol nomoa attendim?

Bifor datfala convention, no staka pipol kam insaed long truth long Mexico. Start long 1919, olketa savve garem olketa smol assembly, bat long olketa year bihaen, namba bilong olketa kongregeson hem gogo daon. Long 1929, taem branch office stap long Mexico City, luk olsem waka for preachim gud nius bae gohed gud long there. Bat samfala problem kamap. Organization givim instruction long olketa colporteur (pioneer) for no mixim bisnis witim preaching. Wanfala colporteur no laek for followim datfala instruction, so hem lusim organization and startim Bible study grup bilong hemseleva. Long datfala taem olketa mas changem tu branch overseer bikos hem duim samting wea no fitim wanfala Christian. Olketa brata and sista long Mexico wea faithful barava needim encouragement.

Taem Brata Rutherford visitim Mexico, hem givim tufala tok long convention and faevfala tok long radio. Datwan barava encouragem olketa brata and sista. Hem firstaem for iusim radio for talemaot gud nius long Mexico. Bihaen convention, datfala niu branch overseer organizem preaching waka, and olketa brata and sista gohed strong moa for preach and Jehovah blessim waka bilong olketa.

1941 convention, long Mexico City

Long 1933, tufala convention nao kamap long Mexico. Wanfala long taon bilong Veracruz wea garem harbor, and narawan long Mexico City. From olketa brata and sista waka hard for preach, gudfala samting kamaot from datwan. Olsem example, long 1931, olketa garem 82 pablisa. Tenfala year bihaen, olketa garem winim 800 pablisa! Long 1941, samting olsem 1,000 pipol nao attendim Theocratic Assembly long Mexico City.

“CAMPAIGN GOHED EVRIWEA LONG STREET”

Long 1943, olketa Witness long Mexico werem tufala saen for advertisem “Free Nation’s” Theocratic Assembly wea kamap long 12-fala difren taon long Mexico. * Olketa putim wanfala saen long front and narawan long baksaed bilong olketa. Hem nao  samting wea olketa Witness iusim for advertisem olketa convention start kam long 1936.

Wanfala magasin long 1944 hem showim olketa brata werem saen taem olketa duim campaign long Mexico City

Datfala magasin La Nación storyim gud samting wea kamap taem olketa iusim olketa saen hia long datfala campaign wea gohed long Mexico City. Hem sei: “Long firstfala day bilong datfala [assembly], olketa encouragem [olketa Witness] for invaetem staka pipol. Long mek-tu day, staka pipol nao kam, gogo datfala ples no garem inaf spes nao.” Datfala campaign hem mekem olketa long Catholic Church for kros, so olketa againstim olketa Witness. Nomata olsem, olketa brata and sista no fraet for gohed duim datfala campaign long olketa street. Datfala magasin sei tu: “Evriwan long datfala full taon lukim . . . olketa man and woman werem olketa saen hia.” Datfala magasin garem wanfala piksa bilong olketa brata and sista long olketa street long Mexico City, wea garem disfala toktok: “Campaign gohed evriwea long street.”

OLKETA BED HEM “SOFT AND WARM WINIM CEMENT FLOOR”

Long olketa year hia, staka Witness mas sakrifaesim staka samting mekem olketa savve attendim olketa convention wea kamap long Mexico. Staka kam from olketa vilij wea stap farawe, wea train and road no kasem olketa. Wanfala kongregeson sei: “Only samting wea stap klosap long mifala hem wanfala telegraph laen.” So samfala mas raedem olketa donkey or wakabaot for staka day for go long ples for weitim train mekem olketa go long taon for convention.

Staka Witness olketa poor, olketa no garem inaf selen for go long convention. Taem olketa arrive long ples for convention, olketa Witness long there kaen long olketa and invaetem olketa for stap long haos bilong olketa. Staka sleep long olketa Kingdom Hall. Wanfala taem, samting olsem 90-fala Witness stap long branch, and olketa sleep antap olketa box buk. Olketa divaedem olketa box buk hia for kamap olsem bed. Each wan sleep antap long 20-fala box. Yearbook storyim olketa brata sei olketa box hia “soft and warm winim cement floor.”

Olketa Witness hia tinghae long wei for enjoyim assembly winim olketa sakrifaes wea olketa duim. Distaem tu, winim 850,000 brata and sista long Mexico garem datfala wei for tinghae. * Wanfala report long 1949 Yearbook storyim nomata olketa brata and sista mas sakrifaesim staka samting, datwan no affectim wei wea olketa gohed strong for worshipim Jehovah. Bihaen olketa attendim eni assembly, datwan nomoa “main samting olketa laek for storyim olowe.” Wanfala kwestin wea olketa brata and sista savve askem olowe nao hem, “Wanem taem moa bae iumi garem assembly?”—From branch office long Central America.

^ par. 9 Yearbook bilong 1944 storyim datfala assembly mekem staka pipol long Mexico for savve long Olketa Jehovah’s Witness.

^ par. 14 Long Mexico, 2,262,646 pipol nao attendim Memorial long 2016.