Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  August 2017

Aotem Olketa Old Wei and Stap Klia Long Datwan

Aotem Olketa Old Wei and Stap Klia Long Datwan

“Iufala mas [aotem] old wei bilong iufala.”—COL. 3:9.

SONG: 83, 129

1, 2. Wanem nao pipol luksavve long hem abaotem Olketa Jehovah’s Witness?

STAKA pipol luksavve Olketa Jehovah’s Witness barava difren, from olketa garem gudfala wei. Olsem example, wanfala man for raet, Anton Gill, sei olsem abaotem olketa Witness long Nazi Germany: “Olketa Nazi heitim Olketa Jehovah’s Witness. . . . Go kasem 1939, six thousand Witness nao stap long [olketa raf prison].” Hem sei tu, nomata olketa Witness barava safa, pipol savve olketa narawan fit for trustim olketa, olketa stedy nomata long taem wea hem no isi, faithful long God bilong olketa, and garem wan mind.

2 And no longtaem go nomoa, pipol long South Africa tu luksavve long wanfala spesol samting abaotem Olketa Jehovah’s Witness. Wanfala taem bifor, olketa Witness long there wea garem difren kala skin no free for associate tugeta. Bat long Sunday, December 18, 2011, winim 78,000 Witness wea garem olketa difren kala skin long South Africa, and olketa nara kantri wea klosap, hipap long wanfala big stadium long Johannesburg for wanfala spesol program. Wanfala bigman long datfala stadium sei: “Iufala showimaot gudfala wei, no enitaem bifor mi lukim kaen samting olsem long disfala stadium. Evriwan werem olketa gudfala  kaleko. And iufala klinim gud disfala stadium. Bat samting wea barava spesol, hem wei wea iufala hipap tugeta nomata iufala garem difren kala skin.”

3. Wanem nao mekem olketa brata and sista bilong iumi evriwea long world barava spesol?

3 Olketa pipol wea no Witness tu luksavve olketa brata and sista bilong iumi evriwea long world barava spesol. (1 Pet. 5:9) Why nao iumi difren from olketa nara organization? Bikos Bible and holy spirit bilong God helpem iumi for no duim olketa samting wea Jehovah no hapi long hem. Iumi traem best for ‘aotem olketa oldfala wei’ bilong iumi and ‘garem olketa niufala wei.’—Col. 3:9, 10.

4. Wanem nao bae iumi storyim long disfala study, and why nao hem important?

4 Bihaen iumi aotem olketa oldfala wei, iumi mas no duim moa olketa samting wea iumi lusim finis. Long disfala study, iumi bae lanem wanem iumi savve duim for aotem oldfala wei, and why hem important for iumi duim datwan. Iumi bae lanem tu hao man savve changem wei bilong hem nomata hem duim barava nogud samting. Then, bae iumi storyim wanem olketa wea insaed truth for longfala taem finis savve duim for stap klia long olketa nogud samting wea olketa lusim finis. Why nao hem important for iumi storyim diswan? Samfala wea bin worshipim Jehovah no careful and start for duim moa olketa nogud samting wea olketa lusim finis. Iumi evriwan need for tingim disfala warning: “Man wea tingse hem standap strong mas keakea nogud hem foldaon.”—1 Cor. 10:12.

‘KILLIM DAE FEELING FOR LAEK DURONG’

5. (a) Storyim example wea showimaot why hem important for kwiktaem lusim olketa oldfala wei bilong iumi. (Lukim piksa long start bilong study.) (b) Wanem nao samfala oldfala wei wea iumi mas lusim wea Colossae 3:5-9 storyim?

5 Wanem nao bae iu duim sapos kaleko wea iu werem hem dirty and hem smel nogud? Iu bae kwiktaem aotem datwan. Long sem wei, sapos iumi duim olketa samting wea Jehovah heitim, iumi mas kwiktaem duim samting for changem datwan. Taem Paul story abaotem diswan, hem sei: “Iufala mas lusim” olketa samting hia. Bae iumi storyim tufala samting: Wei for durong and duim olketa samting wea no klin.—Readim Colossae 3:5-9.

6, 7. (a) Olsem Paul talem, why nao iumi mas waka hard for lusim olketa oldfala wei? (b) Wanem nogud samting nao Sakura duim, and wanem nao helpem hem for change?

6 Wei for durong. Taem Bible story abaotem “wei for durong,” hem savve minim wei for duim sex witim nara man or sex witim samwan wea iu no maritim. Paul sei olketa Christian mas “killim dae” feeling bilong olketa for laek durong. Datwan minim, iumi mas waka hard for aotem feeling for laek duim rong samting. Hem bae no isi for duim datwan, bat iumi savve win!

7 Tingim example bilong Sakura, * from Japan. Staka taem hem savve feel sorre and lonely. So taem hem 15 year, hem start for duim sex witim staka difren man for mekem hem no lonely and gogo thrifala taem hem killim dae baby insaed bele. Hem sei: “Firstaem, mi feel olsem olketa man hia lovem and needim mi. Bat taem mi gohed for duim datwan, mi nating hapi nomoa.” Sakura gohed for duim olsem go kasem taem hem 23 year. Then hem start for studyim Bible witim Olketa Jehovah’s Witness, and hem tinghae long samting wea hem lanem. Jehovah helpem hem for lusim datfala nogud wei, and for deal witim wei for feel guilty and for shame. Distaem, Sakura hem regular pioneer and hem no lonely nao. Hem sei: “Mi hapi bikos mi savve evriday Jehovah lovem mi.”

 STAP KLIA LONG OLKETA SAMTING WEA NO KLIN

8. Wanem nao samfala samting wea savve mekem iumi no klin long eye bilong God?

8 Olketa samting wea no klin. Taem Bible story abaotem olketa “samting wea no klin,” hem no minim nomoa wei for durong. Hem savve minim tu olketa samting olsem, for smoke or talem olketa rabis toktok for mekfani. (2 Cor. 7:1; Eph. 5:3, 4) And tu, hem savve minim olketa nogud samting wea pipol duim haed, olsem wei for readim olketa buk wea mekem olketa laek for duim sex, or lukluk long olketa rabis piksa. Datwan savve mekem man for duim samting wea no klin, olsem for nanali.—Col. 3:5. *

9. Wanem nao savve happen sapos man hem “ova tumas for laekem sex”?

9 Pipol wea lukluk long olketa rabis piksa evritaem savve “ova tumas for laekem sex” and gogo olketa savve addict long hem. Olketa wea duim research talem hao olketa wea lukluk olowe long olketa rabis piksa, olketa olsem tu olketa wea addict long alcohol or drug. So wei for lukluk olowe long olketa rabis piksa savve mekem man for kasem nogud samting tu. Hem savve mekem man for feel shame, no duim gud waka, famili bae no hapi, hasband and waef divorce, and man savve suisaed. Bihaen wanfala man hem stop for lukluk long olketa rabis piksa for wanfala year, hem sei: “Distaem mi no feel guilty nao.”

10. Wanem nao helpem Ribeiro for lusim wei for lukluk long olketa rabis piksa?

10 Staka pipol stragol for lusim wei for lukluk long olketa rabis piksa. Bat man savve winim datwan. Tingim example bilong Ribeiro, wea hem from Brazil. Taem hem teenager hem lusim hom and go waka long wanfala factory for wakem pepa from olketa buk and pepa wea olketa iusim finis. Long there nao hem lukim olketa magasin wea garem olketa rabis piksa. Ribeiro sei: “Isisi mi start for laek lukim olowe olketa rabis piksa. From mi laekem tumas datwan, mi weit nomoa for woman wea mitufala stap for lusim haos mekem mi savve lukluk long olketa video wea showim pipol durong.” Wanday, taem Ribeiro waka, hem lukim disfala buk, Secret for Kasem Hapi Famili, midolwan samfala buk long there. Hem tekem and hem readim. Wanem hem readim mekem hem laek for studyim Bible witim Olketa Jehovah’s Witness. Bat hem tek longtaem for Ribeiro lusim wei for lukluk long olketa rabis piksa. Wanem nao helpem hem? Hem sei: “Wei for prea, studyim Bible, and for ting raonem wanem mi lanem, helpem mi for tinghae long olketa nambawan wei bilong Jehovah. Datwan strongim love bilong mi for Jehovah winim feeling for laek lukluk long olketa rabis piksa.” Bible and holy spirit bilong God helpem Ribeiro for changem wei bilong hem. Hem baptaes, and distaem hem wanfala elder long kongregeson.

11. Wanem nao savve helpem man for stap klia long wei for lukluk long olketa rabis piksa?

11 Nomata Ribeiro studyim Bible, hem mas duim samfala nara samting tu for lusim wei for lukluk long olketa rabis piksa. Hem mas ting raonem samting wea hem lanem long Bible mekem datwan kasem heart bilong hem. Hem barava askem Jehovah for helpem hem. Olketa samting hia mekem love bilong Ribeiro for God kamap strong, and datwan helpem hem for lusim wei for lukluk long olketa rabis piksa. So for iumi stap klia long wei for lukluk long olketa rabis piksa, iumi tu mas barava  lovem Jehovah and heitim nogud samting.—Readim Psalm 97:10.

LUSIM WEI FOR KROS, TOK NOGUD, AND LAEA

12. Wanem nao helpem Stephen for lusim wei for kros and tok nogud?

12 Samfala pipol savve kwiktaem for kros and talem olketa toktok wea savve spoelem narawan. Kaen samting olsem savve affectim evriwan long famili. Stephen, wea hem wanfala dadi from Australia, hem man for tok swear and hem savve barava kros nomata long olketa smol samting. Hem sei: “Thrifala taem nao mi and waef separate and mitufala klosap for divorce.” Then, tufala start for studyim Bible witim Olketa Jehovah’s Witness, and Stephen traem best for followim wanem hem lanem. Hem sei taem hem no savve long Jehovah yet, hem savve kros tumas taem samting mekem hem feel nogud, and hem laek for kwiktaem duim samting, olsem wanfala bomb wea redi for bosta. Bat bihaen Stephen followim olketa advaes long Bible, evri samting start for change. Hem sei: “Famili bilong mifala stap gud. Jehovah helpem mi and distaem mi garem peace.” Distaem, hem wanfala ministerial servant, and waef bilong hem regular pioneer for samfala year finis. Olketa elder long kongregeson bilong hem sei: “Stephen hem wanfala kwaet man, hem waka hard, and hem hambol.” Olketa sei tu no eni taem olketa lukim hem kros. Stephen luksavve Jehovah nao helpem hem. Hem sei: “Mi kasem olketa nambawan blessing hia bikos Jehovah nao helpem mi for changem wei bilong mi.”

13. Wanem nao savve happen taem man hem kros, and wanem nao Bible talem abaotem datwan?

13 Bible talem iumi for lusim wei for kros, tok nogud, and singaot. (Eph. 4:31) Olketa samting hia savve mekem man for raf and laek for faet. Distaem staka pipol tingse hem olraet nomoa for kros and raf. Bat olketa wea duim olsem no respectim Jehovah. Staka brata and sista bilong iumi lusim finis olketa wei hia and garem olketa niufala wei.—Readim Psalm 37:8-11.

14. Waswe, man wea hem raf savve change and kamap hambol?

14 Hans hem elder long wanfala kongregeson long Australia. Chairman bilong olketa elder long kongregeson bilong hem sei: “Hans hem wanfala hambol brata wea iu bae laek for story witim.” Bat long bifor, Hans no hambol. Taem hem teenager hem savve drinkim tumas alcohol and hem savve raf. Wanfala taem hem barava drunk, hem kros tumas and hem killim dae gelfren bilong hem. Olketa judgem Hans for stap long prison for 20-fala year, bat datwan nating changem wei bilong hem. Then mami bilong hem askem wanfala elder for go lukim hem and hem start for studyim Bible. Hans sei: “Hem no isi for mi lusim olketa oldfala wei bilong mi. Olketa scripture wea encouragem mi hem Isaiah 55:7 wea sei: ‘Nogud man mas lusim nogud wei bilong hem,’ and 1 Corinth 6:11, wea story abaotem olketa wea lusim nogud wei bilong olketa wea hem sei: ‘Hem nao wei bilong samfala long iufala bifor.’ For staka year, Jehovah patient witim mi and hem iusim holy spirit bilong hem for helpem mi for garem olketa niufala wei.” Hans baptaes taem hem long prison and hem aot from prison bihaen 17 and haf year. Hem sei: “Mi thankiu long Jehovah for showimaot bigfala mercy and forgivim mi.”

15. Wanem nao nara oldfala wei wea Bible storyim, and wanem nao Bible talem abaotem datwan?

15 Wei for laea hem part long datfala oldfala wei. Olsem example, staka pipol savve laea mekem olketa no peim tax or for no  kasem blame for mistek wea olketa duim. Bat Jehovah hem “God wea evritaem talem tru samting.” (Ps. 31:5) So hem laekem evriwan wea worshipim hem for “mas talem tru samting” and “no laea.” (Eph. 4:25; Col. 3:9) Tru nao, iumi mas evritaem talem tru samting nomata hem no isi or maet bae iumi feel shame.—Prov. 6:16-19.

SAMTING WEA HELPEM OLKETA FOR WIN

16. Wanem nao savve helpem iumi for aotem olketa oldfala wei bilong iumi?

16 Hem hard for iumi lusim olketa oldfala wei bilong iumi sapos iumi depend long strong bilong iumiseleva. Sakura, Ribeiro, Stephen, and Hans barava waka hard for lusim nogud wei bilong olketa. Bible and holy spirit nao helpem olketa. (Luke 11:13; Heb. 4:12) Bible and holy spirit savve helpem iumi taem iumi readim Bible evriday, ting raonem, and prea evritaem for God givim iumi wisdom and for followim wanem iumi lanem. (Josh. 1:8; Ps. 119:97; 1 Thess. 5:17) And tu, Bible and holy spirit savve helpem iumi taem iumi prepare firstaem for olketa meeting and attendim olketa meeting. (Heb. 10:24, 25) And iumi laek for iusim olketa samting wea organization bilong Jehovah provaedem, olsem olketa magasin, JW Broadcasting, JW Library, and jw.org.—Luke 12:42.

Wanem nao savve helpem iumi for aotem olketa oldfala wei bilong iumi? (Paragraf 16 storyim diswan)

17. Wanem nao bae iumi storyim long nextfala study?

17 Iumi bin storyim samfala nogud wei wea olketa Christian mas lusim and stap klia long hem mekem Jehovah hapi. Bat iumi mas duim samfala nara samting tu. Iumi mas garem olketa niufala wei and keepim datwan for olowe. Bae iumi storyim datwan long nextfala study.

^ par. 7 Mifala changem samfala nem.

^ par. 8 Lukim Appendix long buk Gohed Kasem Gud Samting From Love Bilong God,” page 218-219, wea garem title Lusim Wei for Nanali.