Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  April 2018

Olketa Young Wan, Waswe, Iu Markem Olketa Spiritual Goal?

Olketa Young Wan, Waswe, Iu Markem Olketa Spiritual Goal?

‘Trastem [Jehovah] long evri waka blong yu, and bae hemi gohed gudfala.’—PROVEBS 16:3.

SONG: 135, 144

1-3. (a) Wanem nao evri young wan feisim, and wanem nao wanfala example abaotem datwan? (Lukim piksa long start bilong study.) (b) Wanem nao bae helpem olketa young wan for deal witim samting wea olketa feisim?

TINGIM sapos samwan plan for go long wanfala important hipap wea bae kamap long nara taon wea stap farawe lelebet. For go long there, hem need for go long bas. Hem go long ples for faendem bas bat hem barava konfius bikos staka passenger nao long there and staka bas tu. Bat hem savve wea nao hem laek for go and hem go long bas wea go long datfala ples. Tingim sapos hem tekem bas wea go long difren ples, datwan bae mekem hem go long rong ples.

2 Olketa young wan distaem olsem olketa passenger long ples for faendem bas. Olketa young wan mas disaedem staka samting long laef wea maet mekem olketa konfius. Bat sapos iufala young wan savve wanem nao iu laek duim long laef bilong iu datwan bae helpem iu for mekem olketa disison long laef. Wanem nao iu shud duim long laef bilong iu?

3 Disfala study bae ansarem datfala kwestin and encouragem olketa young wan for iusim laef bilong olketa for duim samting wea Jehovah laekem. Diswan minim for followim advaes bilong Jehovah taem iu mekem olketa disison long laef, olsem saed long education, waka, wei for marit and garem pikinini. And hem minim tu  for garem olketa spiritual goal. Taem olketa young wan iusim laef bilong olketa for duim samting wea Jehovah laekem, datwan bae mekem olketa kasem staka blessing long laef.—Readim Provebs 16:3.

WHY NAO HEM IMPORTANT FOR MARKEM OLKETA SPIRITUAL GOAL?

4. Wanem nao bae iumi storyim long disfala study?

4 Hem gud for markem olketa spiritual goal taem iu young. Why nao hem important? Bae iumi storyim thrifala reason. First and mek-tu reason showimaot hao wei for markem olketa spiritual goal savve strongim wei wea iu fren witim Jehovah. And mek-thri reason showimaot why hem gud for markem olketa goal hia taem iu young.

5. Wanem nao main reason why iumi shud markem olketa spiritual goal?

5 First reason why iumi shud markem olketa spiritual goal, hem bikos datwan showimaot iumi tinghae long wanem Jehovah duim for iumi and love bilong hem. Man wea raetem Psalm hem sei: “Hemi gud tumas fo mi talem tengkiu long yu . . . Lod [Jehovah], mi hapi tumas from olketa bikfala waka blong yu. Ya, mi singsing fo preisim yu fo olketa samting wea yu bin duim fo mi.” (Sams 92:1, 4) Olketa young wan, tingim evri samting wea Jehovah givim long iu. Hem helpem iu for savve long hem, and hem givim iu laef, Bible, kongregeson, and nambawan hope for future. Taem iu markem olketa spiritual goal, iu showimaot long Jehovah iu tinghae long evri samting hia and datwan mekem iu fren gud witim hem.

6. (a) Hao nao olketa spiritual goal helpem iu for fren gud witim Jehovah? (b) Wanem nao samfala goal wea iu savve markem taem iu young?

6 Mek-tu reason hem bikos taem iu waka hard for kasem olketa spiritual goal datwan bae mekem Jehovah hapi and datwan bae helpem iu for fren gud witim hem. Aposol Paul hem sei olsem: “God hem raeteous so hard for hem forgetim waka wea iufala duim and love wea iufala showimaot for nem bilong hem.” (Heb. 6:10) Nomata iu barava young iu savve markem olketa goal. Olsem example, Christine hem 10 year taem hem disaed for evritaem readim olketa laef story bilong olketa faithful Witness. Toby hem 12 year taem hem markem goal for readim full Bible bifor hem baptaes. Maxim hem 11 year, and Noemi sista bilong hem, hem 10 year taem tufala baptaes. Bihaen datwan, tufala evriwan markem goal for waka long Bethel. So for helpem tufala gohed tingim goal hia, tufala pasim wanfala Bethel application long walling long haos bilong olketa. Bae hem gud for tingim olketa goal wea iu laek for markem and waka hard for kasem datwan.—Readim Philippi 1:10, 11.

7, 8. (a) Hao nao wei for markem goal hem mekem hem isi for mekem olketa disison? (b) Why nao wanfala young wan disaed for no go long university?

7 Wanem nao mek-thri reason for markem olketa goal taem iu young? Hem bikos iu garem staka disison for mekem saed long education, waka, and olketa nara samting long laef. Wei for mekem disison hem olsem iu kasem tufala road wea hem meet tugeta and iu mas chusim which road for followim. Sapos iu savve wea nao iu laek go, hem bae isi for chusim stretfala road. Long sem wei tu, sapos iu garem olketa goal finis, datwan bae helpem iu for mekem olketa wise disison. Provebs 4:26 hem sei: “Planem gud wanem yu wande duim, evrisamting bae stret nomoa.” Sapos iu garem olketa gudfala goal taem iu young, iu bae kasem gud samting. Olsem example, from Damaris markem olketa gudfala goal taem hem young, datwan helpem hem for mekem important disison taem hem teenager.

8 Damaris kasem olketa hae mark taem hem duim exam for finisim hae skul. Datwan mekem hem fit for kasem scholarship for studyim  law long wanfala university, bat hem disaed for duim waka wea hem bae no kasem big pei. Why nao olsem? Hem sei: “Taem mi young yet mi disaed for pioneer. Datwan minim bae mi waka part-taem. Sapos mi kamap wanfala lawyer, bae mi kasem staka selen, bat bae hem hard for mi faendem part-taem waka.” Damaris hem pioneer for 20 year finis. Waswe, hem hapi long disison wea hem mekem taem hem teenager and goal wea hem markem? Hem sei: “Long bank wea mi waka, mi meetim staka lawyer. Olketa duim waka wea mi shud duim sapos mi go studyim law. Bat staka long olketa hia no hapi witim waka bilong olketa. Disison bilong mi for pioneer helpem mi for no olsem olketa lawyer hia and mi barava hapi for duim waka bilong Jehovah.”

9. Why nao olketa young wan fit for kasem praise?

9 Staka thousand young wan long olketa kongregeson evriwea long world fit for kasem praise. Important samting long laef bilong olketa hem wei wea olketa fren witim Jehovah and olketa spiritual goal bilong olketa. Olketa young wan hia barava enjoyim laef bilong olketa. And tu, olketa lane for followim direction bilong Jehovah long evri samting wea olketa duim long laef, olsem saed long education, waka, and famili. Solomon sei: “Trastem [Jehovah] long ful haat blong yu. . . . Tingim [Jehovah] long evrisamting, an bae hemi stretem rod blong yu.” (Provebs 3:5, 6) Olketa young wan barava spesol long eye bilong Jehovah. Hem lovem, protectim, leadim, and blessim olketa.

PREPARE GUD FOR PREACH

10. (a) Why nao ministry hem shud wanfala long olketa main samting long laef bilong iumi? (b) Hao nao iumi savve kamap gud long wei for explainim biliv bilong iumi?

10 Young wan wea laek iusim laef bilong hem for mekem Jehovah hapi bae laek for duim gud ministry. Jesus Christ sei “datfala waka for preachim gud nius mas gohed long evri kantri firstaem.” (Mark 13:10) From disfala preaching waka hem barava important, hem shud wanfala long olketa main samting long laef bilong iumi. Waswe, iu savve markem goal for duim moa samting long ministry? Waswe, iu savve pioneer? Bat waswe sapos iu no enjoyim preaching waka? And hao nao iu savve kamap gud long wei for explainim biliv bilong iu? Tufala samting hia bae helpem iu: Prepare gud, and no givap for talem olketa narawan samting wea iu savve abaotem Jehovah. Taem iu duim olsem bae iu barava hapi for duim preaching waka.

Wanem nao iu duim for prepare gud for preach long narawan? (Paragraf 11, 12 storyim diswan)

11, 12. (a) Wanem nao olketa young wan savve duim mekem olketa redi for witness long olketa narawan? (b) Hao nao wanfala young wan garem chance for preach long skul?

11 Wanfala wei for iu prepare hem for redyim ansa for olketa kwestin wea olketa skulfren savve askem. Long jw.org website and long olketa pablikeson bilong iumi hem garem staka article wea savve helpem young pipol for savve hao for ansarem olketa kwestin wea kamap, olsem “Why nao iu biliv long God?” Datfala article “Waswe, Mi Shud Biliv Long Evolution?” long datfala brochure 10-Fala Kwestin wea Young Pipol Savve Garem, savve helpem iu for redyim ansa bilong iu for datfala kwestin. Hem garem olketa scripture insaed, olsem Hebrew 3:4 wea savve helpem iu for explainim wanem iu bilivim.—Readim 1 Peter 3:15.

12 Taem iu garem chance, encouragem olketa skulfren for lukim jw.org. Diswan nao samting wea Luca duim. Long class bilong hem olketa story abaotem olketa difren religion, and Luca lukim hao olketa textbuk wea olketa iusim garem olketa rong idea abaotem Olketa Jehovah’s Witness. Nomata hem fraet hem ask for explainim why olketa idea hia hem rong, and teacher agree. Luca explainim biliv bilong hem and hem showim website bilong iumi long evriwan long class. So teacher givim evriwan long class wanfala homwok wea  hem nao for lukim datfala video Beat a Bully Without Using Your Fists. Luca barava hapi from hem story abaotem Jehovah long skul.

13. Why nao iumi shud no givap taem olketa hard taem kamap?

13 Waka hard for kasem olketa goal bilong iu nomata hard taem kamap. (2 Tim. 4:2) Datwan nao samting wea Katharina duim. Hem 17 year taem hem markem goal for witness long olketa wakfren bilong hem. Wanfala man long waka ples tok spoelem hem tu-thri taem finis, bat hem no letem datwan for stopem hem for witness long olketa narawan. Hans, nara wakfren bilong Katharina, tinghae long gudfala wei bilong hem nomata hem kasem hard taem. From datwan, Hans readim olketa pablikeson bilong iumi, studyim Bible, and gogo hem baptaes. Katharina no savve evri samting wea happen bikos hem muv go long nara ples. Thirtin-fala year bihaen datwan hem sidaon long Kingdom Hall witim famili bilong hem and hem barava sapraes and hapi taem hem lukim olketa introducem Hans for givim wanfala tok. Katharina barava hapi from hem no givap for kasem goal bilong hem for witness long olketa wakfren bilong hem.

NO FORGETIM OLKETA GOAL BILONG IU

14, 15. (a) Wanem nao olketa young wan shud tingim taem olketa kasem hard taem? (b) Taem nara young wan laek mekem iu followim samting wea hem laekem, hao nao bae iu deal witim datwan?

14 Olsem iumi bin lanem insaed disfala study hem gud for iu disaed for iusim laef bilong iu for duim samting wea Jehovah laekem. Diswan minim iu need for garem olketa spiritual goal. Olketa nara young wan wea sem age olsem iu maet laekem nomoa for enjoyim laef, and laek invaetem iu for joinim olketa. Gogo bae iu need for showimaot long olketa hao iu disaed strong for followim samting wea iu disaedem finis. No letem olketa narawan for mekem iu forgetim olketa goal bilong iu. Sapos iu long ples for faendem bas wea iumi storyim long start, iu bae no go nomoa long bas wea go long difren ples from iu lukim olketa passenger long datfala bas olketa enjoyim datfala trip, iaman?

15 Sapos olketa narawan laek mekem iu followim samting wea olketa laekem, hao nao iu savve deal witim datwan? Traem best for stap klia long olketa samting wea bae mekem hem isi for iu followim wanem olketa narawan  laekem. (Provebs 22:3) And tingim nogud samting wea iu bae kasem sapos iu followim olketa wea duim olketa nogud samting. (Gal. 6:7) Hem gud for luksavve iu needim advaes. Wei for hambol bae helpem iu for acceptim advaes bilong parents bilong iu and olketa nara mature brata and sista insaed long kongregeson.—Readim 1 Peter 5:5, 6.

16. Storyim experience wea showimaot why hem gud for hambol.

16 Wei wea Christoph hambol helpem hem for acceptim gudfala advaes. No longtaem bihaen hem baptaes, hem start for go long wanfala ples for exercise and train. Samfala nara young wan long there barava laekem hem for joinim sports team bilong olketa. Hem storyim datwan witim wanfala elder, and datfala elder talem hem for tingting gud firstaem abaotem olketa nogud samting wea maet kamap, olsem maet hem start for barava laek winim olketa narawan. Nomata olsem, Christoph joinim datfala team. No longtaem bihaen hem luksavve datfala sports hem barava ruf tumas and danger. Bihaen datwan hem story moa witim samfala elder, and olketa givim hem advaes from Bible. Cristoph sei: “Jehovah iusim olketa elder for givim mi gud advaes and mi followim wanem Jehovah laekem, nomata datwan no isi.” Waswe, iu hambol for followim olketa gud advaes?

17, 18. (a) Wanem nao Jehovah laekem olketa young wan distaem for duim? (b) Wanem nao samfala samting wea mekem samfala sorre bihaen, and hao nao for stap klia long datwan? Storyim example.

17 Bible sei: “Olketa yanga, yufala mas hapi taem yufala yang yet. Taem yufala yang, yufala mas duim olketa gudfala samting wea hemi save mekem yufala hapi.” (Eklesiastes 11:9) Tru nao, Jehovah laekem iu for hapi taem iu young. Disfala study storyim finis wanfala samting wea savve mekem iu for hapi, hem nao for garem olketa spiritual goal and followim advaes bilong Jehovah taem iu mekem olketa plan bilong iu. Sapos iu duim diswan taem iu young, iu bae luksavve Jehovah blessim, lukaftarem, and protectim iu. Tingim olketa gudfala kaonsel wea stap insaed Bible and followim disfala advaes: “Taem yu yang yet, yu mas tingim God hu hemi mekem yu.”—Eklesiastes 12:1.

18 No eniwan savve young for olowe. Olketa young wan savve growap kwiktaem tumas. Bat sorre samting nao, staka pipol sorre bihaen bikos taem olketa young olketa trae for kasem olketa goal wea no spiritual or maet olketa no garem eni goal. Bat olketa wea markem olketa spiritual goal taem olketa young bae hapi and satisfae from olketa mekem olketa wise disison. Hem nao samting wea happen long Mirjana, wea taem hem young hem savve tumas for plei sports. Olketa invaetem hem for plei long Winter Olympic Games. Bat hem disaed for duim full-taem ministry. For winim 30 year Mirjana hem gohed duim full-taem service, and hasband bilong hem tu duim full-taem service. Hem sei wei for garem bignem, hae position, for kamap rich and for pipol tinghae long man, hem no savve mekem man for barava hapi. Olketa goal wea barava gud hem nao for duim wanem God laekem and for helpem pipol for savve long hem.

19. Storyim olketa gudfala samting wea kamaot from wei for markem olketa spiritual goal taem iu young.

19 Olketa young wan long kongregeson fit for kasem praise bikos olketa disaed for iusim laef bilong olketa for worshipim Jehovah nomata olketa kasem olketa hard taem. Olketa duim diswan long wei for markem olketa spiritual goal and for mekem preaching waka barava important long laef bilong olketa. And tu, olketa disaed strong for no letem eni samting long disfala world for mekem olketa forgetim olketa goal bilong olketa. Olketa young wan savve sure olketa no waka hard nating nomoa. Olketa garem olketa brata and sista wea lovem and sapotim olketa, and taem olketa depend long Jehovah long evri samting wea olketa duim, olketa plan bilong olketa bae gohed gud.