Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa—Study Magasin  |  April 2016

God Hem Hapi Long Man wea Faithful

God Hem Hapi Long Man wea Faithful

“Followim example bilong olketa wea kasem samting wea God promisim bikos olketa garem faith and olketa patient.”—HEB. 6:12.

SONG: 86, 54

1, 2. Wanem hard samting nao kasem Jephthah and dota bilong hem?

WANFALA young gele ran go long dadi bilong hem. Hem barava hapi for lukim dadi bilong hem kam bak from wanfala faet. From dadi bilong hem winim datfala faet, gele hia hapi tumas and hem singsing and dance. Bat then samting wea dadi bilong hem duim and talem mekem hem seke tumas. Dadi brekem kaleko bilong hem and sei: “Sorre tumas, gele bilong mi! Iu brekem heart bilong mi.” Then hem storyim promis wea hem talem long Jehovah wea bae barava changem laef bilong gele bilong hem. Dota bilong hem bae no marit and no garem eni pikinini. Nomata olsem, gele bilong hem stretawe talem dadi bilong hem for keepim promis bilong hem. Samting wea dota bilong Jephthah talem showimaot hem barava trustim Jehovah and hem luksavve hem bae evritaem kasem gud samting sapos hem duim wanem Jehovah laekem. (Judg. 11:34-37) Jephthah praod tumas long dota bilong hem. Hem savve Jehovah bae barava hapi long wei wea dota bilong hem willing for sapotim disison wea hem mekem.

 2 Jephthah and dota bilong hem barava trustim Jehovah, nomata long taem wea hem no isi for duim wanem Jehovah laekem. Tufala laekem Jehovah for hapi long tufala, and tufala willing for duim eni samting wea Jehovah laekem.

3. Hao nao example bilong Jephthah and dota bilong hem savve helpem iumi distaem?

3 Samfala taem hem no isi for gohed faithful long Jehovah. Iumi mas waka hard for gohed faithful. (Jude 3) Example bilong Jephthah and dota bilong hem savve helpem iumi. Wanem nao helpem tufala for gohed faithful long Jehovah nomata tufala kasem samfala hard samting?

GOHED FAITHFUL NOMATA STAKA PIPOL DUIM NOGUD SAMTING

4, 5. (a) Wanem nao Jehovah talem olketa Israelite for duim taem olketa kasem Promis Land? (b) Olsem Psalm 106 storyim, wanem nao happen long olketa Israelite from olketa no obey?

4 Samting olsem 300 year bifor taem bilong Jephthah and dota bilong hem, Jehovah talem olketa Israelite for killim dae evri pipol wea worshipim olketa false god wea stap long Promis Land. Bat olketa Israelite no obeyim Jehovah. (Deut. 7:1-4) Masbi evriday Jephthah and dota bilong hem lukim olketa nogud samting wea kamaot from wei wea olketa Israelite no obey. Staka Israelite start for followim nogud wei bilong pipol long Canaan, wea worshipim olketa false god and olketa durong.—Readim Psalm 106:34-39.

5 From olketa Israelite no obey, Jehovah no protectim olketa from olketa enemy. (Judg. 2:1-3, 11-15; Ps. 106:40-43) Masbi hem no isi for olketa famili wea lovem Jehovah for gohed faithful long datfala taem. Nomata olsem, Bible story abaotem samfala wea gohed faithful long datfala taem, olsem Jephthah and dota bilong hem, Elkanah, Hannah, and Samuel. Olketa hia barava laek for mekem Jehovah hapi.—1 Sam. 1:20-28; 2:26.

6. Wanem nao samfala nogud samting wea pipol long world duim, and wanem nao iumi mas duim?

6 Tingting and wei bilong pipol distaem tu hem olsem pipol long Canaan bifor. Staka pipol durong, raf, and laekem tumas selen. Bat Jehovah warnim iumi for no duim olketa samting olsem. Hem laek protectim iumi from olketa nogud samting, olsem hem laek protectim olketa Israelite tu. Iumi no laek for duim olketa nogud samting wea olketa Israelite duim. (1 Cor. 10:6-11) Iumi mas no followim wei bilong pipol long world. (Rome 12:2) Waswe, iu traem best for duim olsem?

JEPHTHAH GOHED FAITHFUL NOMATA HEM KASEM HARD TAEM

7. (a) Wanem nao olketa brata bilong Jephthah and olketa bigman long Israel duim long Jephthah? (b) Wanem nao Jephthah duim?

7 Long taem bilong Jephthah, olketa Philistine and olketa Ammonite spoelem olketa Israelite. (Judg. 10:7, 8) Hem no olketa enemy nomoa wea mekem Jephthah kasem hard taem. Hem kasem hard taem from olketa brata bilong hem and olketa bigman long Israel tu. From olketa hia jealous long Jephthah and heitim hem, olketa forcem hem for no stap long land bilong hem. (Judg. 11:1-3) Nomata olsem, Jephthah no letem datwan for spoelem gudfala wei bilong hem. Hao nao iumi savve long datwan? Taem olketa bigman long Israel askem hem for helpem olketa, hem stretawe duim datwan. (Judg. 11:4-11) Why nao Jephthah showimaot gudfala wei olsem?

8, 9. (a) Wanem nao samfala principle long Law bilong Moses wea maet helpem Jephthah? (b) Wanem nao important long Jephthah?

8 Jephthah hem strongfala man for faet,  and hem savve gud long history bilong olketa Israelite and Law bilong Moses. Wei wea Jehovah deal witim pipol bilong Hem helpem Jephthah for savve long wanem God laekem and no laekem. (Judg. 11:12-27) Jephthah tingim wanem God laekem taem hem disaedem eni samting. Hem savve Jehovah no laekem wei for kros and wei for pei bak, and God laekem pipol bilong Hem for lovem each other. And tu, Law bilong Moses sei man mas helpem olketa narawan, nomata olketa wea heitim hem tu.—Readim Exodus 23:5; Leviticus 19:17, 18.

9 Maet example bilong Joseph helpem Jephthah. Joseph showim mercy long olketa brata bilong hem nomata olketa heitim hem. (Gen. 37:4; 45:4, 5) Taem Jephthah ting raonem example bilong Joseph, datwan helpem hem for duim samting wea Jehovah laekem. Samting wea olketa brata bilong Jephthah duim barava spoelem hem. Bat hem no laek for raoa witim olketa. Samting wea important long Jephthah nao hem for mekhae long Jehovah and protectim pipol bilong hem. (Judg. 11:9) Hem laek for gohed faithful long Jehovah. From hem faithful, Jehovah blessim hem, and olketa Israelite tu kasem blessing.—Heb. 11:32, 33.

10. Wanem nao iumi shud duim sapos wanfala brata or sista no kaen long iumi?

10 Waswe, bae iumi followim example bilong Jephthah? Wanem nao bae iumi duim sapos wanfala brata or sista no kaen long iumi or mekem iumi sorre? Iumi shud no letem datwan for stopem iumi for gohed worshipim Jehovah. Iumi shud no stop for go long olketa meeting and iumi shud no stop for associate witim olketa brata and sista. Iumi laek followim example bilong Jephthah and obeyim Jehovah. Datwan bae helpem iumi for winim eni hard taem mekem iumi tu showimaot gudfala example.—Rome 12:20, 21; Col. 3:13.

WILLING FOR MEKEM OLKETA SAKRIFAES

11, 12. Wanem nao Jephthah promisim long Jehovah, and wanem nao hem minim taem hem talem datfala promis?

11 Jephthah luksavve God nomoa savve helpem hem for winim olketa Ammonite. Hem promisim Jehovah sapos hem winim datfala faet, hem bae givim long Jehovah first wan wea kamaot from haos bilong hem taem hem kam bak from datfala faet. Hem sei datfala man bae olsem “wanfala sakrifaes wea olketa bonem.” (Judg. 11:30, 31) Wanem nao Jephthah minim?

12 Jehovah heitim wei for sakrifaesim man, so iumi savve Jephthah no ting for sakrifaesim samwan. (Deut. 18:9, 10) Long Law bilong Moses, sakrifaes wea olketa bonem hem kaen sakrifaes wea olketa givim full animal long Jehovah. So Jephthah minim man wea hem givim long Jehovah bae waka long tabernacle for full laef bilong hem. Jehovah duim wanem Jephthah askem, and helpem hem for winim olketa enemy. (Judg. 11:32, 33) Bat hu nao Jephthah givim long Jehovah?

13, 14. Hao nao Judges 11:35 showimaot Jephthah garem strongfala faith?

13 Tingim moa samting wea iumi storyim long start bilong disfala study. Taem Jephthah kam bak from datfala faet, first wan wea kamaot from haos for meetim hem, hem dota bilong hem wea hem barava lovem, and hem nomoa pikinini bilong hem! Waswe, Jephthah keepim promis bilong hem? Waswe, hem givim dota bilong hem long Jehovah for waka long tabernacle for full laef bilong hem?

14 Long datfala taem tu, masbi Jephthah  ting raonem olketa principle long Law bilong God and datwan helpem hem for disaedem stret samting. Maet hem ting raonem wanem Exodus 23:19 talem, wea sei pipol bilong God mas willing for givim best samting long Jehovah. And tu, Law bilong Moses sei taem man mekem promis long Jehovah, “hem mas keepim promis bilong hem. Hem shud duim evri samting wea hem promis for duim.” (Num. 30:2) Olsem Hannah, wea maet laef long semtaem olsem Jephthah, Jephthah mas keepim promis bilong hem nomata hem no isi for hem and dota bilong hem. From dota bilong hem bae waka long tabernacle, hem bae no marit and no garem pikinini. So Jephthah bae no garem eniwan for kasem nem and land bilong hem bihaen hem dae. (Judg. 11:34) Nomata olsem, Jephthah sei: “Mi mekem promis long Jehovah, and mi mas duim nao.” (Judg. 11:35) Jephthah no tingim hemseleva and Jehovah blessim hem. Sapos iu nao Jephthah, waswe, bae iu duim sem samting?

15. Wanem promis nao staka long iumi mekem, and hao nao iumi savve showimaot iumi faithful?

15 Taem iumi dedicate long Jehovah, iumi promis for evritaem duim wanem hem laekem. Iumi savve samfala taem bae hem no isi for iumi keepim datfala promis. So wanem nao iumi duim taem samwan askem iumi for duim samting wea iumi no laek for duim? Sapos iumi willing for obeyim God, iumi showimaot iumi faithful for keepim promis bilong iumi. Olketa blessing wea iumi kasem from Jehovah hem winim eni hard taem wea iumi kasem. (Mal. 3:10) Bat wanem nao dota bilong Jephthah duim taem hem herem promis bilong dadi bilong hem?

Wanem nao iumi savve duim for showimaot iumi garem faith olsem Jephthah and dota bilong hem? (Paragraf 16, 17 storyim diswan)

16. Wanem nao dota bilong Jephthah duim taem hem herem promis bilong dadi bilong hem? (Lukim piksa long start bilong study.)

16 Promis bilong Jephthah hem difren from promis bilong Hannah. Hannah promis for givim son bilong hem Samuel for waka long tabernacle olsem wanfala Nazirite. (1 Sam. 1:11) Olketa Nazirite savve  marit and garem pikinini. Bat Jephthah promis for givim dota bilong hem olsem “sakrifaes wea olketa bonem,” so dota bilong hem no savve marit and garem pikinini. (Judg. 11:37-40) Tingim, from dadi bilong hem bigman long Israel, maet hem savve maritim wanfala barava naesfala man long Israel. Bat dadi bilong hem laekem hem for kamap wanfala wakaman long tabernacle. Wanem nao dota bilong Jephthah duim? Hem showimaot wei for worshipim Jehovah hem first samting long laef bilong hem taem hem sei hem willing for duim wanem dadi bilong hem promisim. (Judg. 11:36) Hem willing for no marit and no garem pikinini mekem hem savve duim waka bilong Jehovah. Wanem nao iumi savve duim for followim example bilong hem?

17. (a) Wanem nao iumi savve duim for followim example bilong Jephthah and dota bilong hem? (b) Hao nao Hebrew 6:10-12 encouragem iu for duim moa samting long waka bilong Jehovah?

17 Plande thousand young Christian willing for no marit or olketa marit bat chus for no garem pikinini distaem. Why nao olsem? Olketa laek for duim moa samting long waka bilong Jehovah. And tu, staka wea olo no spendem staka taem witim olketa pikinini or grani bilong olketa bikos olketa laek for iusim taem and strong bilong olketa long waka bilong Jehovah. Samfala hia duim construction waka, or attendim Skul for Olketa Kingdom Pablisa and muv long ples wea needim samfala pablisa moa. Samfala brata and sista duim moa samting long preaching waka long taem bilong Memorial. Jehovah bae no forgetim sakrifaes bilong olketa faithful brata and sista hia. (Readim Hebrew 6:10-12.) Waswe, iu savve duim moa samting long waka bilong Jehovah?

WANEM IUMI LANEM

18, 19. Wanem nao iumi lanem abaotem Jephthah and dota bilong hem, and hao nao iumi savve followim example bilong tufala?

18 Nomata Jephthah kasem staka hard taem long laef, hem evritaem duim wanem Jehovah laekem. Hem no followim wei bilong pipol wea stap raonem hem. And Jephthah gohed faithful nomata olketa narawan no kaen long hem. Jephthah and dota bilong hem willing for duim wanem Jehovah laekem nomata hem no isi, and Jehovah blessim tufala and iusim tufala for mekhae long tru worship. Nomata olketa narawan no obeyim Jehovah, Jephthah and dota bilong hem gohed faithful long God.

19 Bible sei: “Followim example bilong olketa wea kasem samting wea God promisim bikos olketa garem faith and olketa patient.” (Heb. 6:12) Iumi laek for followim example bilong Jephthah and dota bilong hem. Iumi savve God hem hapi long man wea faithful.