Skip to content

Skip to secondary menu

Skip to table of contents

Olketa Jehovah’s Witness

Solomon Islands Pidgin

Wastaoa  |  No. 6 2017

 KAVA SUBJECT | PRESENT WEA WINIM ENI NARA PRESENT!

“Hem Best Present wea Mi Kasem”

“Hem Best Present wea Mi Kasem”

Diswan hem toktok wea wanfala gele wea 13 year hem talem taem olketa givim hem wanfala smol puppy. Wanfala bisnis woman sei best present wea hem kasem hem wanfala computer wea dadi bilong hem givim taem hem long hae skul yet. Wanfala hasband sei best present wea hem kasem hem wanfala card wea waef bilong hem wakem and givim hem long first wedding anniversary bilong tufala.

Evri year, long olketa spesol taem, pipol raonem world savve iusim staka taem and waka hard for faendem naesfala present for givim long olketa fren or relative bilong olketa. And olketa hapi tumas sapos man wea olketa givim present long hem tinghae long datwan olsem thrifala wea iumi storyim finis. Waswe long iu? Waswe, iu laek for givim naesfala present long narawan wea hem bae tinghae long hem? And waswe, iu hapi taem narawan givim naesfala present long iu?

Yes, taem man kasem present, datwan savve mekem hem barava hapi, and man wea givim present tu savve hapi. Diswan fitim disfala toktok long Bible: “Man wea givim samting hem barava hapi winim man wea kasem samting.” (Acts 20:35) And sapos man wea kasem present tinghae long datwan, man wea givim datfala present bae hapi go moa.

Wanem nao savve helpem iu for givim gudfala present wea bae mekem man wea kasem hem hapi tu? And sapos iu no fit for givim present wea bae kasem mind bilong hem, wanem nao iu savve duim mekem hem tinghae long datfala present?