Hem no isi for savve best present for givim long samwan. Diswan hem bikos iumi no savve sapos man wea iumi givim present long hem bae tinghae long hem or nomoa. And maet sem present wea samwan hapi long hem narawan no laekem.

Olsem example, wanfala teenager maet hapi tumas sapos iu peim samting olsem mobile or tablet for hem. Bat maet wanfala man or woman barava tinghae long wanfala present wea hem kasem wea maet hem from famili laen bilong hem. Long samfala kantri present wea young pipol and olketa olo laekem tumas hem selen, bikos olketa savve iusim for peim wanem olketa laekem.

Nomata hem no isi, staka no givap for faendem best present for samwan wea olketa lovem. For helpem man long diswan hem gud for ting raonem samfala samting. Distaem bae iumi storyim fofala samting wea savve helpem iumi for faendem present wea samwan bae hapi long hem.

Savve wanem man laekem. Wanfala man wea stap long Belfast, long Northern Ireland, sei best present wea hem kasem hem wanfala bicycle taem hem samting olsem 10 or 11 year. Why nao olsem? Hem sei: “Bikos hem nao samting wea barava kasem mind bilong mi.” Diswan showimaot man savve tinghae long present wea kasem mind bilong hem. So trae for luksavve wanem man tinghae long hem bikos datwan bae helpem iu for savve wanem kaen present nao bae hem hapi long hem. Olsem example, olketa wea olo savve hapi tumas for stap witim famili bilong olketa. Olketa savve laekem tumas for evritaem lukim olketa pikinini and grani bilong olketa. Maet for go holiday witim olketa bae hem winim eni present wea olketa kasem.

Wanfala main samting wea savve helpem iumi for savve long wanem man laekem hem nao for lisin gud. Bible sei for iumi “mas willing for lisin, no kwiktaem for toktok.” (James 1:19) Sapos iu lisin gud long olketa fren and relative taem iufala savve story tugeta, bae hem isi for iu savve wanem olketa laekem and wanem olketa no laekem. Then bae hem isi for savve wanem kaen present nao hem laekem.

 Savve wanem man needim. Man wea kasem present bae barava tinghae long datwan nomata hem smol samting nomoa, wea hem samting wea hem needim. Bat hao nao bae iu savve long wanem hem needim?

Maet isi wei hem for askem stret long man wanem hem needim, or wanem hem laekem. Bat staka no laek duim datwan bikos olketa laek for givim present wea man no expectim. And sapos hem samting wea man hia barava needim tufala evriwan bae hapi tumas. Nara samting tu, nomata pipol savve feel free for storyim olketa samting wea olketa laekem and no laekem, staka taem olketa savve hol bak for talem samting wea olketa needim.

So trae for luksavve long living bilong man wea iu laek givim present long hem. Waswe, hem young, olo, singol, marit, divorce, widow, waka for selen, or hem retire finis? Ting raonem wanem kaen present nao maet fitim need bilong hem.

Maet iu savve askem olketa narawan wea garem semkaen living olsem hem. Olketa nao savve storyim long iu samting wea maet man hia barava needim. Datwan bae helpem iu for givim present wea man hia barava needim wea maet olketa narawan no tingim.

Barava taem. Bible sei: “Toktok wea man talem long barava taem hem gud tumas!” (Proverbs 15:23) Disfala scripture showimaot toktok wea iumi talem savve affectim narawan. Wanem iumi duim tu savve affectim narawan. Long sem wei, toktok wea iumi talem long barava taem savve mekem man hapi, olsem present wea iumi givim long taem wea man barava needim bae mekem hem hapi tumas tu.

Pipol savve givim present long samfala spesol taem. Staka taem olketa savve givim present taem wanfala fren hem marit, taem wanfala young wan hem graduate from skul, or taem mami redi for garem baby. Samfala pipol savve raetem list long olketa spesol taem olsem long year. Datwan bae helpem olketa for plan gud firstaem for givim present wea barava fitim olketa spesol taem olsem. *

Hem gud for no weit nomoa kasem olketa spesol taem then iu givim present, bat iu savve givim present long enitaem. Hem gud for tingim diswan tu. Sapos seknomoa wanfala young boy givim present long wanfala young gele, bae datfala young gele maet tingse boy hia laekem hem. Sapos datfala boy no garem tingting olsem, datwan bae mekem gele hia garem difren tingting or maet datwan kosim problem. Diswan mekem iumi tingim disfala important samting: Reason for man givim present.

Reason for man givim present. Olsem datfala example showimaot, bifor iu givim present long samwan hem gud for tingting gud firstaem nogud man wea kasem present garem difren tingting abaotem datwan. Hem gud tu for man wea laek givim present for ting raonem why nao hem laek givim present long samwan. Staka pipol sei olketa garem gudfala reason for givim present, bat long samfala taem olsem long Christmas olketa mas givim present long narawan bikos hem samting wea narawan expectim. Bat olketa narawan givim present bikos olketa expectim for kasem bak samting tu.

Wanem nao stretfala reason wea iu shud garem taem iu laek givim present long narawan? Bible sei: “Long evri samting wea iufala duim, iufala mas showimaot love.” (1 Corinth 16:14) Sapos iu givim present long samwan bikos iu tingim and lovem hem, hem bae hapi for kasem datfala present and iu tu bae barava hapi. Sapos iu duim olsem, Dadi bilong iumi long heven tu bae hem hapi. Taem olketa Christian long Corinth bifor hapi for sapotim relief waka for helpem olketa Christian long Judea, aposol Paul praisem olketa olsem: “God hem lovem man wea hapi for givim samting.”—2 Corinth 9:7.

Taem iumi ting raonem olketa samting wea  disfala article storyim, datwan savve helpem iumi for givim olketa present wea olketa narawan bae hapi long hem. God ting raonem olketa samting hia, and olketa nara samting tu, taem hem givim long iumi olketa man wanfala nambawan present wea winim eni nara present. Plis readim next article wea story abaotem datfala nambawan present.

^ par. 13 Staka pipol savve givim present long taem bilong birthday and Christmas. Bat staka taem olketa celebration hia join witim olketa kastom wea againstim wanem Bible talem. Lukim article “Samfala Ask Olsem—Hem Stret for Christian Celebratem Christmas?” long disfala magasin.